ການສຶກສາຄົ້ນຄວ້າໃໝ່ສະແດງໃຫ້ເຫັນວ່າ ການຕັດປະລິມານການບໍລິໂພກເກືອລົງມື້ ລະພຽງແຕ່ 3 ກຣາມເທົ່ານັ້ນກໍອາດສາມາດ ຊ່ວຍຊີວິດຂອງຄົນອາເມຣິກັນໄວ້ໄດ້ຫລາຍ ໝື່ນຄົນ ໃນແຕ່ລະປີ.
ຖ້າພວກເຮົາຫລຸດຜ່ອນປະລິມານເກືອທີ່ເອົາ ໃສ່ໃນອາຫານລົງໄດ້ແມ່ນແຕ່ໜ້ອຍດຽວກໍ ສາມາດຊ່ວຍພວກເຮົາບໍ່ໃຫ້ເປັນໂຣກຫົວໃຈ ໄດ້. ສິ່ງທີ່ກ່າວມານີ້ໄດ້ຖືກຄົ້ນພົບຢູ່ໃນການ ສຶກສາຄົ້ນຄວ້າໃໝ່ທີ່ໃຊ້ເຄື່ອງຄອມພິວເຕີ້ ຄິດໄລ່ ເພື່ອຈະຄາດຄະເນເບິ່ງວ່າການຕັດ ເກືອໃຫ້ໜ້ອຍລົງພຽງ 3 ກຣາມ ຕໍ່ມື້ເທົ່ານັ້ນ ຈະມີຜົນກະທົບ ຕໍ່ໂຣກຫົວໃຈຢ່າງໃດໃນ ສະຫະລັດ.
ຜົນການຄົ້ນຄວ້າກໍຄື: ມີຄົນເປັນຫົວໃຈວາຍໜ້ອຍລົງກວ່າເກົ່າ 13%. ເປັນລົມສາລະບາດ ຫລື stroke ໜ້ອຍລົງ 8%. ມີການເສຍຊີວິດ ໜ້ອຍລົງ 4%. ກໍລະນີຄົນເປັນໂຣກຫົວ ໃຈໃໝ່ຫລຸດ ລົງ 11% ແລະ ຊ່ວຍປະຢັດຄ່າໃຊ້ຈ່າຍໃນການປິ່ນປົວຮັກສາພະຍາບານ ໄດ້ເຖິງ 240 ຕື້ຫລື 240 ພັນລ້ານໂດລ້າ. ເວົ້າລວມແລ້ວ ພວກນັກຄົ້ນຄວ້າໄດ້ພົບວ່າ ການກິນເກືອໃຫ້ໜ້ອຍລົງມື້ລະ 3 ກຣາມນັ້ນ ສາມາດປ້ອງກັນຄົນໄດ້ ຫລາຍເຖິງນຶ່ງແສນຄົນບໍ່ໃຫ້ເປັນໂຣກຫົວໃຈວາຍ ແລະ 92 ພັນຄົນບໍ່ໃຫ້ເສຍຊີວິດໄດ້ ໃນແຕ່ລະປີ.
ຜົນຂອງການສຶກສາຄົ້ນຄວ້ານີ້ ໄດ້ລົງພິມເຜີຍແຜ່ຢູ່ໃນວາລະສານ ການແພດ New England Journal of Medicine. ທ່ານນາງ Kirsten Bibbins-Domingo ແຫ່ງມະຫາວິທະຍາໄລ California ສາຂານະຄອນ San Francisco ຊຶ່ງເປັນຫົວ ໜ້າຄະນະນັກຂຽນລາຍງານນີ້ເວົ້າວ່າ ພວກເຮົາອາດບໍ່ຮູ້ສຶກ ຫລື ສັງເກດເຫັນຄວາມ ແຕກຕ່າງໃນຣົດຊາດຂອງອາຫານໄດ້ຊ້ຳ ພວກເຮົາຫາກຕັດການກິນເກືອລົງ 3 ກຣາມ, ຫລືເຄິ່ງບ່ວງ ຕໍ່ມື້. ທີມນັກຄົ້ນຄວ້າ ດັ່ງກ່າວນີ້ ມີລວມທັງພວກນັກຄົ້ນຄວ້າ ຈາກມະຫາວິທະຍາໄລ Stanford ລັດແຄລິຟໍເນຍ ແລະ ມະຫາວິທະຍາໄລ Columbia ທີ່ລັດນິວຢອກ.
ເກືອແຕ່ລະກຣາມບັນຈຸທາດໂຊດຽມຫລືທາດເກືອຢູ່ 400 ມີລີກຣາມ ຊຶ່ງຜູ້ຜະຫລິດອາ ຫານຢູ່ໃນສະຫະລັດ ຈະລະບຸສ່ວນປະກອບຂອງເກືອໃນອາຫານຂອງເຂົາເຈົ້າໃສ່ໄວ້ໃນ ປ້າຍທີ່ຕິດຢູ່ນຳອາຫານ ເພື່ອໃຫ້ຜູ້ບໍລິໂພກຮູ້ຈັກວ່າມີເກືອແລະສ່ວນປະກອບອື່ນໆ ໜ້ອຍຫລາຍສ່ຳໃດຢູ່ໃນອາຫານນັ້ນ.
ລັດຖບານເວົ້າວ່າ ຄົນອາເມຣິກັນໃນເກນທຳມະດາ ແມ່ນຈະກິນເກືອໃນປະລິມານ 10 ກຣາມຕໍ່ມື້. ສະມາຄົມໂຣກຫົວໃຈ ຫລື American Heart Association ແນະນຳ ວ່າ ສຳລັບຄົນທີ່ມີສຸຂພາບດີ ແມ່ນບໍ່ໃຫ້ກິນເກືອເກີນ 3 ກຣາມ ຕໍ່ມື້. ສະມາຄົມດັ່ງ ກ່າວເວົ້າວ່າ ປະລິມານເກືອໃນອາຫານອາເມລິກັນ ໄດ້ເພີ້ມຂຶ້ນ 50% ນັບຕັ້ງແຕ່ ຊຸມປີ 1970 ເປັນ ຕົ້ນມາ, ໃນຂະນະທີ່ຄວາມດັນເລືອດກໍໄດ້ເພີ້ມສູງຂຶ້ນຄືກັນ. ສະນັ້ນ ການ ກິນເກືອໜ້ອຍລົງກວ່າເກົ່າ ກໍໝາຍຄວາມວ່າເຮົາ ລົດຄວາມດັນເລືອດລົງ.
ເຈົ້າຄອງກຳແພງນະຄອນນິວຢ໋ອກ ທ່ານ Michael Bloomberg ກຳລັງນຳພາກະແສຄວາມພະຍາ ຍາມທີ່ເອີ້ນວ່າ “ການລິເລີ້ມຫລຸດຜ່ອນການກິນເກືອແຫ່ງຊາດ ຫລື National Salt Reduction Initiative ຊຶ່ງແນວຄິດອັນນີ້ ແມ່ນເພື່ອສ້າງຄວາມກົດດັນໃສ່ບໍລິສັດຜະຫລິດອາຫານ ແລະ ຮ້ານອາຫານທັງ ຫລາຍ ໃຫ້ໃຊ້ເກືອໜ້ອຍລົງ ແຕ່ພວກນັກວິຈານເວົ້າວ່າ ການເຮັດແນວນີ້ ແມ່ນເປັນການແຊກແຊງຂອງລັດຖ ບານ ເຂົ້າໃນກິດຈະການຂອງເອກະຊົນ.
ເຈົ້າຄອງກຳແພງນະຄອນ Michael Bloomberg ໄດ້ຮັບຜົນສຳເລັດໃນດ້ານອື່ນໆ ມາ ແລ້ວຫລາຍດ້ານ, ຕົວຢ່າງເຊັ່ນ ການອອກລະບຽບບັງຄັບໃຫ້ພວກຮ້ານຂາຍອາຫານໄວທັນໃຈ ຫລື fast food ໃນນະຄອນນິວຢອກ ໃຫ້ຂຽນບອກຈຳນວນ calorie ທີ່ພາໃຫ້ມີ cholesterol ຫລື ໄຂມັນໃນເລືອດນັ້ນໃສ່ໃນປ້າຍສ່ວນປະກອບຂອງອາຫານ ຂອງພວກເຂົາເຈົ້າ. ມາບັດນີ້ ການສຶກສາຄົ້ນຄວ້າ ໂດຍສະຖາບັນຄົ້ນຄວ້າກ່ຽວກັບເດັກ ນ້ອຍ ໃນນະຄອນຊີແອັຕເຕິລ ຫລື Seattle Children's Research Institute ສະ ແດງໃຫ້ເຫັນວ່າ ແນວຄວາມຄິດດັ່ງກ່າວ ສາມາດມີອິດທິພົນຕໍ່ການສັ່ງຊື້ອາຫານຂອງຜູ້ເປັນພໍ່ແມ່ ເຮັດໃຫ້ເຂົາເຈົ້າມີຄວາມລະມັດລະວັງຫລາຍຂຶ້ນໃນການສັ່ງຊື້ອາຫານໃຫ້ລູກຂອງເຂົາເຈົ້າກິນ.
