ສປປ ລາວ ຊຶ່ງເປັນປະເທດນ້ອຍໆໃນຂົງເຂດເອເຊັຍຕາເວັນອອກສຽງໃຕ້ ໄດ້ເປັນເຈົ້າພາບຈັດການແຂ່ງຂັນກິລາແຫ່ງພາກພື້ນເອເຊັຍຕາເວັນອອກສ່ຽງໃຕ້ ຫລື SEA Games ຂຶ້ນເປັນຄັ້ງທຳອິດໃນເດືອນແລ້ວນີ້ ເຮັດໃຫ້ລາວມີຊື່ສຽງເປັນທີ່ຮູ້ຈັກຫລາຍຂຶ້ນໃນທົ່ວໂລກ ແລະໄດ້ຮັບການສົ່ງເສີມທາງດ້ານເສດຖະກິດ. ຜູ້ສື່ຂ່າວວີໂອເອ ປະຈຳບາງກອກ ທີ່ໄດ້ເດີນທາງໄປຢ້ຽມຢາມນະຄອນຫລວງວຽງຈັນ ລາຍ ງານມາວ່າ ການເຕີບໂຕຂອງປະເທດລາວ ທ່ີບໍ່ມີທາງອອກສູ່ທະເລນັ້ນແມ່ນກາງຕໍ່ນຳການສົ່ງອອກຊັບພະຍາກອນທັມມະຊາດ ແຕ່ປັດຈຸບັນນີ້ລາວກຳລັງສົນໃຈເຮັດໃຫ້ການທ່ອງທ່ຽວມີບົດບາດສຳຄັນຫລາຍຂຶ້ນໃນ ການຂຍາຍເສດຖະກິດຂອງຕົນ.
//ສຽງເປີດການແຂ່ງຂັນກີລາຊີເກມ//
ການແຂ່ງຂັນກີລາຊີເກມຄັ້ງທີ 25 ໄດ້ໄຂຂຶ້ນ ທ່ີສປປລາວ ດ້ວຍການຟ້ອນລຳທຳເພງສະແດງວັທະນະທຳຢ່າງຟົດຟື້ນມ່ວນຊື່ນ ໃນຂະນະທ່ີນັກກີລາຈາກ 11 ປະເທດ ຍ່າງຜ່ານສະໜາມກີລາແຫ່ງຊາດອັນໃໝ່. ລາວໄດ້ຮັບຄຳຍ້ອງຍໍສັນລະເສີນ ແລະການຮັບຮູ້ຢ່າງກ້ວາງຂວາງຈາກ ການເປັນເຈົ້າພາບຈັດງານແຂ່ງຂັນດັ່ງກ່າວ ເຖິງແມ່ນວ່າລາວຕ້ອງໄດ້ ອາໄສການຊ່ອຍເຫລືອຈາກຈີນ ໃນການກໍ່ສ້າງສະໜາມກີລາແຫ່ງຊາດແຫ່ງໃໝ່ນີ້ ອາໄສວຽດນາມໃນການປຸກສ້າງບ້ານພັກສຳລັບນັກກີລາ
ແລະອາໄສການຊ່ອຍເຫລືອດ້ານການເງິນຈາກເກົາຫລີໃຕ້ ຍີ່ປຸ່ນແລະປະເທດອື່ນໆອີກ.
/// ສຽງທ່ີຮ້າຍຂາຍເຄື່ອງທ່ີລະລຶກ///
ທ້າວໂຖ ພ້ອມຜົນ ເຈົ້າຂອງຮ້ານຂາຍເຄື່ອງທ່ີລະລຶກ ແລະຂອງກິນ ຫລີ້ນ ຢູ່ທາງໜ້າສະໜາມກີລາແຫ່ງຊາດໃໝ່ ກ່າວວ່າ ປະເທດລາວຄວນຈະມີຄວາມພາກພູມໃຈ ທີ່ໄດ້ເປັນເຈົ້າພາບຈັດການແຂ່ງຂັນຄັ້ງນີ້:
ສຽງທ້າວໂຖເປັນພາສາລາວ:…..
ລາວເປັນປະເທດຄອມມີວນິດທ່ີທຸກຈົນ ປົກຄອງດ້ວຍພັກການເມືອງພັກດຽວ ແລະການຢູ່ຢ່າງໂດດດ່ຽວຈາກປະຊາຄົມນາໆຊາດ ໄດ້ເຮັດໃຫ້ລາວລອດພົ້ນຈາກວິກິດການການເງິນໂລກ. ເສດຖະກິດຂອງລາວມີການ ເຕີບໃຫຍ່ຂະຫຍາຍໂຕ ໃນອັດຕາປະມານ 7 ເປີເຊັນຕໍ່ປີ ຊື່ງສ່ວນໃຫຍ່ແມ່ນໄດ້ມາຈາກການສົ່ງອອກ ຊັບພະຍາ ກອນບໍ່ແຮ່ແລະກະແສໄຟຟ້າ. ເຖິງຢ່າງໃດກໍດີ ລາວຍັງຄົງເປັນປະເທດທ່ີປະຊາຊົນສ່ວນໃຫຍ່ ອາໄສການກະເສດເປັນພື້ນຖານໃນການດຳຣົງຊີວິດ ເຊ່ນແມ່ຍິງຄົນນີ້ ນາງຂັນ ທີ່ປູກຜັກປູກໝີ່ຂາຍລ້ຽງຊີບ
///ສຽງນາງຂັນຖອກນ້ຳຫົດສວນຜັກຂອງລາວ///
ນາງຂັນພວມຖອກນ້ຳລົງໃສ່ຄຸ ເພື່ອເອົາໄປຫົດສວນຜັກຂອງລາວ. ນາງໄດ້ເຮັດສວນປູກຜັກຂາຍ ມາເປັນເວລາ 20 ປີແລ້ວ. ນາງກ່າວວ່າ ນາງຫາເງິນໄດ້ພຽງແຕ່ພໍລ້ຽງກຸ້ມຄອບຄົວ 8 ຄົນຂອງນາງໄປໃນແຕ່ລະມື້:
ສຽງນາງຂັນເປັນພາສາລາວ
ປະເທດລາວດຳລົງຄົງໂຕຢູ່ໄດ້ ດ້ວຍອາໄສກາງຕໍ່ນຳການຊ່ອຍເຫລືອແລະເງິນກູ້ຢືມຈາກຕ່າງປະເທດ ມາເປັນເວລາດົນນານແລ້ວ. ບັນດານັກເສດຖະສາດກ່າວວ່າ ການເຕີບໂຕຢ່າງໄວຂອງເສດຖະກິດ ໄດ້ຊ່ອຍລົດຜ່ອນໜີ້ສິນຕ່າງປະເທດຂອງລາວລົງ ແຕ່ການກາງຕໍ່ທາງດ້ານເສດຖະກິດນຳຊັບພະຍາກອນທັມມະຊາດນັ້ນ ບໍ່ໄດ້ສ້າງທຸລະກິດ ຂະໜາດນ້ອຍ ຫລືສ້າງໜ້າວຽກຂຶ້ນຢ່າງພຽງພໍ ຢູ່ໃນປະເທດ. ທ່ານ Gil-Hong Kim ຜູ້ອຳນວຍ ການທະນາຄານພັດທະນາເອເຊັຍປະຈຳລາວກ່າວວ່າ ປະເທດລາວບໍ່ຄວນຈະກາງຕໍ່ນຳແຕ່ການສົ່ງອອກ ສິນຄ້າປະເພດວັດຖຸດິບ ເພື່ອການເຕີບໂຕຂອງເສດຖະກິດຂອງຕົນນັ້ນຊຶ່ງທ່ານ ຄິມ ກ່າວດັ່ງນີ້:
"ເພື່ອແບ່ງປັນຜົນປະໂຫຍດຈາກພາກສ່ວນຊັບພະຍາກອນທັມມະຊາດກັບພວກຄົນທັງໝົດ ແລະກັບພລາຍຄົນທ່ີເພ່ີມຂຶ້ນ ລວມທັງກັບພວກຄົນລາວຫລາຍເພ່ີມຂຶ້ນນັ້ນ ມັນເປັນເຣື່ອງສຳຄັນ ທ່ີສຸດທ່ີຈະຕ້ອງມີໂຄງສ້າງເສດຖະກິດທ່ີສົມດຸນແລະກ້ຳເກິ່ງກັນ ສຳລັບການເຕີບໂຕທ່ີແທ້ຈິງ ຂອງເສດຖະກິດນັ້ນ."
ເວລານີ້ ຣັຖບານລາວກຳລັງສົ່ງເສີມການທ່ອງທ່ຽວເພື່ອປັບປຸງພື້ນຖານຂອງເສດຖະກິດຂອງຕົນ ໃຫ້ມີຫລາຍພາກສ່ວນ ແລະສົ່ງເສີມທຸລະກິດໃນເຂດທ້ອງຖິ່ນ. ທ່ານຄິມກ່າວວ່າ ການເປັນເຈົ້າພາບຈັດ ການແຂ່ງຂັນກີລາຊີເກມ ແມ່ນໄດ້ຊ່ວຍກະຕຸ້ນເສດຖະກິດຂອງລາວແຕ່ ພຽງໃນໄລຍະສັ້ນເທົ່ານັ້ນ. ທ່ານຄິມກ່າວຕໍ່ໄປວ່າ ແຕ່ວ່າບາງທີສິ່ງສຳ ຄັນໄປກວ່ານັ້ນ ກໍການແຂ່ງຂັນກີລານີ້ ຈະຊ່ອຍປັບປຸງພາບພົດຂອງລາວ ໃຫ້ດີຂຶ້ນ ໃນສາຍຕາຂອງໂລກພາຍນອກ.
