ອິຣ່ານ: Web sites ຂອງຝ່າຍຄ້າຍໃນອິຣ່ານກ່າວວ່າ ພວກໄວ້ອາໄລຈຳນວນ ຫລາຍໝື່ນຄົນພາກັນໄປຮ່ວມສົ່ງສະການນັກບວດ Grand Ayato-llah Hossein Ali Motazeri ອະດີດຜູ້ນຳສາດສະໜາທ່ີຄັດຄ້ານຣັຖ ບານອິຣ່ານນັ້ນ. ລາຍງານຂ່າວເວົ້າວ່າ ພວກໄວ້ອາໄລພາກັນເຕົ້າ ໂຮມກັນໃນວັນຈັນມື້ນີ້ ທ່ີເມືອງ Qom ເມືອງສາສະໜາໃນພາກເໜືອ ບ່ອນທ່ີທ່ານ Ali Montazeri ໄດ້ເຖິງແກ່ມໍຣະນະກັມໄປໃນວັນອາທິດວານນີ້ ຮວມອາຍຸໄດ້ 87 ປີ ແລະວ່າ ມີຝູງຊົນຈຳນວນຫລາຍ ໄປເຕົ້າໂຮມກັນຢູ່ຂ້າງນອກຂອງ ບ້ານພັກຂອງຜູ້ກ່ຽວ ຢູ່ໃນເມືອງ Qom ເພື່ອໄປສະແດງຄວາມເຄົາຣົບນັບຖືຂອງເຂົາເຈົ້າ ແລະພາກັນຮ້ອງໂຮ ຊື່ຂອງທ່ານ.
ບັນດາຜູ້ນຳຫົວປະຕິຮູບຂອງອິຣ່ານ ຄືທ່ານ Mir Hossein Mousavi ແລະທ່ານ Mehdi Karroubi ໄດ້ພາກັນປະກາດໃຫ້ວັນຈັນມື້ນີ້ ເປັນວັນໄວ້ອາໄລນຳນັກບວດທ່ານນີ້ ແລະຮຽກຮ້ອງໃຫ້ພວກສະໜັບສະໜຸນທ່ານ ໄປຮ່ວມໃນພິທີສົ່ງສະການ. ສ່ວນຣັຖບານອິຣ່ານໄດ້ຫ້າມພວກສື່ມວນຊົນຕ່າງປະເທດ ໄປຕິດຕາມ ເອົາຂ່າວເຫດການນີ້.
ພວກຫົວປະຕິຮູບອິຣ່ານ ໄດ້ສວາຍໃຊ້ຫລາຍໆໂອກາດໃນວັນລະລຶກເຖິງແຫ່ງຊາດ ຫວ່າງໄວໆຜ່ານມານີ້ ເປັນຈຸດຊຸມນຸມຊົນເພື່ອທຳການ ປະທ້ວງຕໍ່ຕ້ານຣັຖບານ. Ayatollah Montazeri ໄດ້ກ່າວຫາພວກ
ຄະນະນຳພາຂອງອິຣ່ານໃນປັດຈຸບັນຊ້ຳແລ້ວຊ້ຳອີກ ວ່າປັກຄອງປະເທດແບບຜະເດັດການໂດຍໃຊ້ສາສະໜາອີສລາມເປັນສາກບັງໜ້າ ແລະທ່ານໄດ້ຖືກກັກບໍລິເວນໃຫ້ຢູ່ ໃນບ້ານເຮືອນມາເປັນເວລາດົນນານ.
ກ່ຽວກັບເຢເມນ: ພວກະບົດເຢເມນນິການຊີໄອ ກ່າວຫາກຳລັງຂອງ Saudi Arabiaເຂັ່ນຂ້າປະຊາ ຊົນ 54 ຄົນດ້ວຍການໂຈມຕີທາງອາກາດໃສ່ເມືອງນຶ່ງໃນພາກເໜືອຂອງເຢເມນ. ພວກກະບົດນິກາຍ
Shi;ite Zaidi ກ່າວວ່າ ຝູງເຮືອບິນຣົບຂອງ Saudi Arabi ໄດ້ທຳການໂຈມຕີທາງອາກາດ ດັ່ງກ່າວໃນວັນອາທິດວານນີ້ ໂດຍໄດ້ທຳລາຍເຮືອນ 5 ຫລັງໃນເມືອງ Razch ໃນແຂວງSaada ແລະເວົ້າຕໍ່ໄປວ່າ ພວກ ທ່ີເສັຍຊີວິດໄປນັ້ນແມ່ນຮວມທັງພວກແມ່ຍິງແລະເດັກນ້ອຍ. ບໍ່ມີຖ້ອຍຖະແຫລງໃດໆອອກມາໃນ ເວລານີ້ຈາກ Saudi Arabiaກ່ຽວກັບຂໍ້ກ່າວຫາເຫລົ່ານີ້ ແລະກໍບໍ່ມີແຫລ່ງຂ່າວທ່ີເປນອິດສະຣະຢືນຢັນການໂຈມຕີທາງ ອາກາດທ່ີວ່ານີ້. ກຳລັງຂອງ Saudi Arabiaໄດ້ເລີ້ມທຳການໂຈມຕີພວກກະ ບົດເຫລົ່ານີ້ ທີ່ເອີ້ນກັນ ອີກຊື່ນຶ່ງວ່າ Houthis ໃນເດືອນແລ້ວນີ້ ຫລັງຈາກພວກກະບົດໄດ້ສັງຫານພວກທະຫານຍາມ Saudi Arabia 2 ຄົນໃນການຍິງຕໍ່ສູ້ກັນຂ້າມຊາຍແດນນັ້ນ.
ໄຕ້ຫວັນແລະຈີນ: ເຈົ້າໜ້າທີ່ເຈຣະຈາຂັ້ນສູງຂອງຈີນກ່ຽວກັບໄຕ້ຫວັນເດີນທາງໄປຮອດເກາະໄຕ້ຫວັນໃນວັນຈັນມື້ນີ້ ເພື່ອທຳການໂອ້ລົມສົນທະນາກັນເຣື່ອງ ສາຍພົວພັນດ້ານການຄ້າກັບຄູ່ຕຳແໜ່ງຂອງທ່ານ.
ທ່ານ Chen Yunlin ເດີນທາງໄປຮອດສະໜາມບິນເມືອງໄຕຈຸງ ໃນພາກກາງຂອງເກາະໄຕ້ຫວັນ ພາຍໃຕ້ການຮັກສາຄວາມປອດໄພຢ່າງເຄັ່ງຄັດ. ໃນລະຫວ່າງການຢ້ຽມຢາມເປັນເວລາ 5 ມື້ ທ່ານມີໝາຍກຳນົດທ່ີຈະໂອ້ລົມກັນກັບທ່ານຈຽງປິນກຸງ ຫົວໜ້າເຈຣະຈາຝ່າຍໄຕ້ ຫວັນ ກ່ຽວກັບເຣື່ອງການເຮັດຂໍ້ຕົກລົງການຄ້າເສຣີກັນຢ່າງກວ້າງ ຂວາງ. ນອກນັ້ນ ທ່ານ Chen ຍັງຈະລົງນາມໃນສັນຍາການຄ້າໃໝ່ສີ່ສະບັບ ກັບເຈົ້າໜ້າທ່ີໄຕ້ຫວັນ. ການຢ້ຽມຢາມຂອງທ່ານ Vhen Yunlin ມີຂຶ້ນໃນເວລານຶ່ງມື້ຫລັງຈາກປະຊາຊົນຫລາຍພັນຄົນພາກັນເດີນຂະບວນ ຜ່ານເມືອງໄຕຈຸງ ເພື່ອປະທ້ວງການພົບປະເຈຣະຈາກັນນີ້ ຊຶ່ງພວກ ເຂົາເຈົ້າຢ້ານວ່າ ຈະພາໃຫ້ມີການທ້ອນໂຮມເຂົ້າກັນກັບແຜ່ນດິນໃຫຍ່ ໃນບັ້ນສຸດທ້າຍນັ້ນ. ພວກເດີນຂະບວນພາກັນຮ້ອງ ໂຮຄຳຂວັນຕ່າງໆທ່ີນິຍົມເອກກະຣາດ ແລະໂບກປ້າຍຄຳຂວັນຕໍ່ຕ້ານຈີນ ເພື່ອປະທ້ວງຕໍ່ການຢ້ຽມຢາມຂອງ ທ່ານ Chen Yunlin ຄັ້ງນີ້. ຕຳຫລວກກະປະມານວ່າພວກເດີນຂະບວນ ມີຈຳນວນໃນລະຫວ່າງ 20 ຫາ 30ພັນຄົນ.
ສະຫະຣັດປະນາມກຳປູເຈັຍ: ສະຫະຣັດປະນາມການຕັດສິນໃຈຂອງກຳປູເຈັຍໃນການເນຣະເທດ ຊາວມຸສລິມເຜົ່າ ວີເກີ້(Uighur) 20 ຄົນທ່ີໄດ້ພາກັນຫລົບໜີຈາກພາກຕາເວັນຕົກສຽງເໜືອຂອງຈີນ ເຂົ້າໄປຢູ່ໃນກຳປູເຈັຍ ຫລັງຈາກເກີດຄວາມວຸ້ນວາຍຂຶ້ນລະຫວ່າງຊົນຊາດຊົນເຜ່ົາໃນຕົ້ນປີນີ້. ຖະແຫລງການສະບັບນຶ່ງ ຈາກກະຊວງການຕ່າງປະເທດສະຫະຣັດ ກ່າວວ່າ ຣັຖບານຂອງທ່ານໂອບາມາມີຄວາມກັງວົນໃຈຢ່າງເລິກເຊິ່ງ ນຳການຕັດສິນໃຈຂອງຣັຖບານກຳປູເຈັຍ ທ່ີໄດ້ເນຣະເທດພວກອົບພະ ຍົບເຫລົ່ານີ້ແບບບັງຄັບນັ້ນ. ຖະແຫລງການຍັງກ່າວຕໍ່ໄປວ່າ ເຫດການທ່ີວ່ານີ້ຈະສົ່ງຜົນກະທົບໃຫ້ແກ່ສາຍພົວພັນຂອງກຳປູເຈັຍກັບສະຫະຣັດ ແລະສະຖານະພາບຂອງກຳປູເຈັຍໃນເວທີສາກົນ. ນອກນີ້ ຖະແຫລງການຍັງກ່າວຕື່ມວ່າ ສະຫະ ຣັດມີຄວາມເປັນຫ່ວງ ຢ່າງເລິກເຊິ່ງເຊັ່ນກັນ ກ່ຽວກັບສວັດດີການຂອງພວກຊາວວີເກີ້ ທ່ີພະຍາຍາມຊອກຫາທາງປ້ອງກັນໂຕ ພາຍໃຕ້ກົດໝາຍສາກົນນັ້ນ. ພວກມຸສລິມເຜົ່າວີເກີ້ ກຸ່ມນີ້ໄດ້ຫລົບໜີຈາກຈີນໄປ ຫລັງຈາກເກີດ ຄວາມວຸ້ຍວາຍຂຶ້ນໃນຂົງເຂດຊິນຈຽງໃນຕົ້ນປີນີ້. ເປັນດັ່ງທ່ີຄາດກັນໄວ້ ພວກວີເກີ້ຖືກເນຣະເທດ ກ່ອນຮອງປະທານປະເທດຈີນ ທ່ານ Xi Jinping ເດີນທາງໄປຮອດໃນວັນອາທິດວານນີ້ ເພື່ອທຳການຢ້ຽມຢາມກຳປູເຈັຍຢ່າງເປັນທາງການ.
ທີ່ອັຟການີສຖານ: ບັນດາເຈົ້າໜ້າທ່ີອັຟການີສຖານກ່າວວ່າ ພວກຫົວຮຸນແຮງກຸ່ມຕາລີບັນ ໄດ້ເຂົ້າຍຶດເອົາອາຄານຫລັງນຶ່ງ ໃນເມືອງຫລວງຂອງແຂວງທາງພາກ ຕາເວັນອອກແຫ່ງນຶ່ງ ຊຶ່ງໄດ້ກະຕຸ້ນໃຫ້ມີການຕໍ່ສູ້ກັນກັບຕຳຫລວດ ຍັງ ຜົນໃຫ້ພວກທຳການໂຈມຕີ ເສັຍຊີວິດໄປ 3 ຄົນ.
ບັນດາເຈົ້າໜ້າທ່ີກ່າວວ່າ ພວກຫົວຮຸນແຮງທີ່ຖືອາວຸດໜັກ ແລະນຸ່ງເສື້ອກັ໊ກບັນຈຸລະເບີດສະລະຊີບ ໄດ້ພາກັນບຸກເຂົ້າໄປໃນອາຄານຫລັງນຶ່ງໃນວັນຈັນມື້ນີ້ ຢູ່ໃກ້ໆກັບສະຖານີຕຳຫລວດແຫ່ງນຶ່ງໃນເມືອງ Gardez ເມືອງຫລວງຂອງແຂວງ Paktia ແລະວ່າພວກຫົວຮຸນແຮງ ຢ່າງນ້ອຍຄົນນຶ່ງ ເສັຍຊີວິດ ເວລາເສື້ອບັນຈຸລະເບີດສະລະຊີບ ລະເບີດຂຶ້ນໃນລະວ່າງການຍິງຕໍ່ສູ້ກັນ. ບັນດາເຈົ້າໜ້າທ່ີກ່າວວ່າ ພວກຫົວຮຸນແຮງ ຄົນນຶ່ງຫລື 2 ຄົນຍັງສືບຕໍ່ທຳການຕ້ານຢັນຢູູຕໍ່ມາ. ຝ່າຍກຸ່ມຕາລີບັນກ່າວວ່າ ມີພວກຫົວຮຸນແຮງ 5 ຄົນທຳການບຸກ ໂຈມຕີຄັ້ງນີ້. ຮ້ານຄ້າຮ້ານຂາຍໄດ້ປິດລົງໃນໃຈກາງເມືອງ Gardez ຂະນະທ່ີພວກຊາວເມືອງ ລໍຖ້າໃຫ້ການຕໍ່ສູ້ກັນ ຍຸຕິລົງ.
ວັນເສົາ, ໒໗ ກໍລະກົດ ໒໐໒໔
