ນາງສາແມນທາ ໂອໂຣບາຕໍ, ແມ່ຍິງຊາວ ອັງກິດ ທີ່ຖືກສານຂອງລາວຕັດສິນຈຳຄຸກ ຕະຫຼອດຊີວິດໃນກໍລະນີຄວາມຜິດກ່ຽວກັບ ຢາເສບຕິດນັ້ນ ໄດ້ຍື່ນອຸທອນຕໍ່ສານໃນ ປະເທດອັງກິດ ເພື່ອຂໍໃຫ້ນາງເປັນອິດສະລະ ໂດຍໃຫ້ເຫດຜົນວ່າ ນາງໄດ້ທຳຄວາມຜິດ ຍ້ອນຖືກຂົ່ມຂູ່ວ່າຈະເອົາຊີວິດຢູ່ໃoລາວ ແລະ ໃນລະຫວ່າງທີ່ຖືກດຳເນີນຄະດີຢູ່ໃນ ລາວນັ້ນ ກໍໄດ້ຖືກກົດດັນຕ່າງໆນາໆ.
ຊື່ມວນຊົນ ໃນກຸງລອນດອນ ປະເທດອັງກິດ ໄດ້ລາຍງານວ່າ ທ່ານ Edward Fitzgerald ທະ ນາຍຄວາມຂອງນາງ ສາ ແມນທາ ໂອໂຣບາຕໍ ຜູ້ຕ້ອງຫາກະທຳ ຄວາມຜິດ ໃນຄະດີກ່ຽວກັບການລັກລອບ ຂົນຢາເສບຕິດ ທີ່ຖືກສານປະຊາຊົນລາວຢູ່ນະຄອນຫລວງວຽງຈັນ ຕັດສິນຈຳຄຸກຕະ ຫລອດຊີວິດ ແລະ ໄດ້ສົ່ງຕົວໃຫ້ແກ່ທາງການອັງກິດ ໃນຖານະຜູ້ຮ້າຍຂ້າມແດນ ນັບຕັ້ງ ແຕ່ເດືອນສິງຫາເປັນຕົ້ນມາແລ້ວນັ້ນ ໄດ້ຍື່ນອຸທອນຕໍ່ສານໃນປະເທດອັງກິດ ເພື່ອຂໍໃຫ້ປ່ອຍຕົວນາງ ສາແມນທາໃຫ້ເປັນອິສະລະ ເມື່ອວັນທີ 8 ທັນວາ ທີ່ຜ່ານມານີ້. ທະນາຍ ຄວາມຜູ້ດັ່ງກ່າວນີ້ ໄດ້ໃຫ້ເຫດຜົນຕໍ່ສານອຸທອນໃນປະເທດອັງກິດວ່າ ສາເຫດ ທີ່ເຮັດໃຫ້ນາງ ສາແມນທາ ຕ້ອງກະທຳຄວາມຜິດດັ່ງກ່າວຢູ່ໃນປະເທດລາວ ແລະ ກໍໄດ້ ຖືກຕັດສິນໂທດໄປແລ້ວນັ້ນ ກໍຍ້ອນວ່າ ນາງໄດ້ຖືກການຂົ່ມຂູ່ວ່າຈະເອົາຊີວິດໂດຍຜູ້ຊາຍຊາວ ໄນຈີເຣຍ ສອງຄົນຢູ່ໃນປະເທດລາວ ຊຶ່ງນອກ ຈາກພວກເຂົາຈະໄດ້ພາກັນຂົ່ມຂືນນາງແລ້ວ ກໍຍັງໄດ້ພາກັນບີບບັງຄັບໃຫ້ນາງ ຕ້ອງລັກລອບຂົນຢາເສບຕິດ ປະເພດຢາ ເຮໂຣອິນ ອອກຈາກນະຄອນຫລວງວຽງຈັນ ຜ່ານບາງກອກ ເພື່ອມຸ້ງໄປສູ່ປະເທດ Australia ອີກດ້ວຍ. ດ້ວຍເຫດນີ້ ຈຶ່ງເຮັດໃຫ້ນາງ ສາແມນທາ ບໍ່ມີທາງເລືອກອື່ນທີ່ຈະຮັກສາຊີວິດຂອງຕົນເອງໄດ້ ຊຶ່ງກໍຄືຈະຕ້ອງປະຕິບັດຕາມການຖືກບີບບັງຄັບ ໃຫ້ລັກລອບຂົນຢາເສບຕິດດັ່ງກ່າວນັ້ນເອງ.
ທະນາຄວາມຜູ້ດັ່ງກ່າວນີ້ ຍັງໄດ້ໃຫ້ການອະທິບາຍຕໍ່ໄປວ່າ ໃນຂະນະທີ່ ນາງ ສາແມນທາ ໄດ້ຖືກຈັບກຸມຢູ່ສະໜາມບິນວັດໄຕໃນວຽງຈັນນັ້ນ ນາງກໍຍັງໄດ້ຖືກຊຸກຈົນລົ້ມ ແລະ ກໍໄດ້ເປັນເຫດ ເຮັດໃຫ້ນາງຕ້ອງແທັງລູກ ທີ່ເກີດຈາກການທີ່ຖືກຂົ່ມຂືນ ໂດຍຊາວໄນຈີເຣຍທັງສອງຄົນນັ້ນອີກດ້ວຍ.
ແຕ່ຢ່າງໃດກໍຕາມ ນາງ ສາແມນທາ ກໍຍອມຮັບວ່າ ນາງໄດ້ທຳການປະສົມທຽມຈົນຕັ້ງຄັ້ນໄດ້ເປັນເທື່ອທີ່ສອງ ເພື່ອໃຫ້ພົ້ນຈາກໂທດປະຫານຊີວິດຕາມກົດໝາຍອາຍາຂອງລາວ ຫາກແຕ່ວ່ານາງ ກໍບໍ່ມີໂອກາດໄດ້ຕໍ່ສູ້ຄະດີຄວາມຢ່າງອິດສະລະຢູ່ໃນປະເທດລາວເລີຍ. ນອກຈາກການຖືກກົດດັນໃຫ້ຍອມຮັບສາລະພາບໃນຄວາມຜິດທີ່ໄດ້ກະທຳລົງໄປ ເພື່ອທີ່ວາທາງການລາວ ຈະໄດ້ດຳເນີນການສົ່ງຕົວນາງຕໍ່ໃຫ້ກັບທາງການອັງກິດຕາມທີ່ໄດ້ມີການຕົກລົງກັນໃນສົນທີສັນຍາວ່າດ້ວຍການສົ່ງຜູ້ລ້າຍຂ້າມແດນັ້ນເອງ.
ແຕ່ເຖິງຢ່າງໃດກໍຕາມ ທາງການລາວ ກໍຍັງຄົງບໍ່ໄດ້ສະແດງທ່າທີຕໍ່ກໍລະນີດັ່ງກ່າວນີ້ແຕ່ຢ່າງໃດ ຫາກແຕ່່ວ່າກ່ອນໜ້ານີ້ ທາງການລາວກໍໄດ້ໃຫ້ການຢືນຢັນມາໂດຍຕະຫລອດວ່າ ໄດ້ດຳເນີນຄະດີຄວາມຕໍ່ນາງ ສາແມນທາ ຢ່າງຍຸດຕິທຳຕາມກົດໝາຍຂອງລາວທຸກປະການ, ກັບທັງຍັງໄດ້ປະຕິດ ບັດຕໍ່ ນາງ ສາແມນທາ ຕາມລັກການມະນຸດສະທຳອີກດ້ວຍ.
