ຂ່າວກອງປະຊຸມສະພາວະໂລກຮ້ອນ: ເວລາໃກ້ຈະໝົດລົງແລ້ວ ສຳລັບພວກເຈົ້າໜ້າທ່ີກຳລັງຂຸ້ນຂ້ຽວຫາທາງ ໃຫ້ມີການບັນລຸຂໍ້ຕົກລົງກັນ ເຣື່ອງແຜນການຕໍ່ສູ້ກັບສະພາວະໂລກ ຮ້ອນ ຊຶ່ງພວກຜູ້ນຳຈາກບາງປະເທດເຕືອນວ່າ ກອງປະຊຸມຄັ້ງນີ້ອາດ ສາມາດປະສົບກັບຄວາມລົ້ມແຫລວໄດ້. ກອງປະຊຸມວ່າດ້ວຍສະພາວະໂລກຮ້ອນ ທ່ີອົງການສະຫະປະຊາຊາດຈັດຂຶ້ນທ່ີນະຄອນ Copenha-gen ໄດ້ຍ່າງເຂົ້າເປັນອາທິດສຸດທ້າຍໃນວັນຈັນມື້ນີ້ ໃນຂະນະທ່ີບັນດາ ຜູ້ນຳຈາກທົ່ວໂລກກຳລັງກະກຽມ ທ່ີຈະເດີນທາງໄປຍັງນະຄອນຫລວງຂອງເດນມາກ ເພື່ອປະກອບສ່ວນໃນນັດສຸດທ້າຍຂອງກອງປະຊຸມວ່າດ້ວຍສະພາວະໂລກຮ້ອນນີ້.
ເຣື່ອງຕ່າງໆທ່ີຍັງຕົກລົງກັນບໍ່ທັນໄດ້ ແມ່ນເຣື່ອງກ່ຽວກັບວ່າ ແຕ່ລະປະເທດຈະຕ້ອງຕັດການສົ່ງແກສເຮືອນແກ້ວຂຶ້ນສູ່ອາກາດໜ້ອຍຫລາຍສ່ຳໃດ ຊື່ງການປ່ອຍແກສດັ່ງກ່າວອອກຈາກທໍ່ອາຍເສຍຂອງລົດແລະ ຈາກໂຮງຈັກໂຮງງານຕ່າງໆນັ້ນ ເປັນສາເຫດທ່ີພາໃຫ້ໂລກຮ້ອນ ແລະກ່ຽວກັບວ່າຜູ້ໃດຈະເປັນຜູ້ຈ່າຍສຳລັບການຕັດການສົ່ງແກສເຮືອນແກ້ວລົງນີ້.ທ່ານ Kevin Rudd ນາຍົກຣັຖມຸນຕີ Australia ກ່າວຕໍ່ອົງການ ຂ່າວ Sky News ໃນວັນຈັນມື້ນີ້ວ່າ ມີໂອກາດທ່ີວ່າກອງປະຊຸມນີຈະຍຸດຕິ ລົງດ້ວຍຄວາມລົ້ມແຫລວ ໃນຂະນະທ່ີທ່ານ Ed Miliband ຣັຖມຸນຕີ ວ່າດ້ວຍການປ່ຽນແປງຂອງດິນຟ້າອາກາດຂອງອັງກິດ ຮຽກຮ້ອງໃຫ້ມີ ມີການເຄື່ອນໄຫວດ່ວນຂຶ້ນອີກ ໂດຍກ່າວວ່າ ກອງປະຊຸມບໍ່ໄດ້ດຳເນີນໄປຕາມທິດທາງທ່ີຈະພາໃຫ້ມີການບັນລຸຂໍ້ຕົກລົງ ທ່ີຕ້ອງການ.
ກ່ຽວກັບໜີ້ສິນປະເທດ ດູໃບ: ປະເທດ Dubai ທ່ີເປັນໜີ້ສິນຫລາຍໃນເຂດອ່າວເປີເຊັຍ ໄດ້ຮັບເງິນ ຊ່ອຍເຫລືອເພື່ອໃຊ້ໜີ້ ໃນນາທີສຸດທ້າຍ ຊຶ່ງອາດສາມາດລົດຜ່ອນຄວາມເປັນຫ່ວງຂອງພວກລົງທຶນຈາກທົ່ວໂລກໄດ້. ບັນດາເຈົ້າໜ້າທ່ີກ່າວໃນວັນຈັນມື້ນີ້ວ່າ ປະເທດ Abu Dhabi ຊື່ງເປັນເພື່ອນບ້ານຂອງ Dubai ກຳລັງຢື່ນມືເຂົ້າຊ່ວຍເຫລືອດ້ວຍເງິນ ຈຳນວນ 10 ພັນລ້ານດອນລ້າ. ທັງສອງປະເທດແມ່ນສ່ວນນຶ່ງຂອງກຸ່ມປະເທດທີ່ເອີ້ນວ່າ ສະຫະຣັຖອາຣັບ Emirates ທີ່ຕັ້ງຢູ່ໃນແຖບອ່າວເປີເຊັຍ.ຄຳປະກາດຊ່ອຍເຫລືອນີ້ມີຂຶ້ນ ໃນມື້ດຽວກັນກັບທ່ີກຸ່ມບໍລິສັດຣັດວິສາຫະກິດ Dubai World ຖືກບັງຄັບໃຫ້ໃຊ້ໜີ້ຄືນ 3500 ລ້ານດອນລາ. ບໍລິສັດຣັດວິສາຫະກິດ Dubai World ເຮັດໃຫ້ລາຄ້າຮຸ້ນໃນທົ່ວໂລກດິ່ງລົງໃນເດືອນແລ້ວນີ້ ຫລັງຈາກທາງບໍລິສັດ ອອກມາເວົ້າວ່າ ຕົນບໍ່ສາມາດທີ່ຈະຈ່າຍເງິນໜີ້ສິນຈຳນວນເກືອບ 60 ພັນລ້ານດອນລາໄດ້ ທັນຕາມກຳນົດ. ບັນດານັກວິເຄາະພາກັນຢ້ານກົວວ່າ ການທ່ີກຸ່ມບໍລິ ສັດດັ່ງກ່າວບໍ່ສາມາດຈ່າຍໜີ້ຕາມກຳນົດໃນວັນຈັນມື້ນີ້ ອາດສາມາດສົ່ງຜົນກະທົບຕໍ່ເສດຖະກິດໂລກໄດ້ ອີກເທື່ອນຶ່ງ.
ຂ່າວຄືບໜ້າກ່ຽວກັບການຈັບອ່າວຸດເກົາຫລີເໜືອທີ່ໄທ: ສານແຫ່ງນຶ່ງຂອງໄທໄດ້ສັ່ງໃຫ້ຄຸມຂັງພວກຜູ້ຊາຍ 5 ຄົນໄວ້12 ມື້ ໃນຂະນະທ່ີພວກເຂົາເຈົ້າກຳລັງຖືກສືບສວນ ຍ້ອນໄດ້ນຳເຮືອບິນລຳນຶ່ງທ່ີບັນທຸກອາວຸດເກົາຫລີເໜືອ ເຂົ້າປະເທດຢ່າງຜິດກົດໝາຍ.ພວກຜູ້ຊາຍ 5 ຄົນນີ້ຖືກຈັບກຸມໃນວັນສຸກຜ່ານມາ ໃນຂະນະພວກເຂົາ ເຈົ້າເອົາເຮືອບິນລົງຈອດເຕີມນ້ຳມັນ ທ່ີສະໜາມບິນດອນເມືອງທີ່ບາງ ກອກ. ບັນດາເຈົ້າໜ້າທ່ີໄທເວົ້າວ່າ ຕຳຫລວດໄດ້ທຳການເຄື່ອນໄຫວຫລັງຈາກໄດ້ຮັບແຈ້ງໃຫ້ຊາບຈາກສະຫະຣັດ ແຕ່ທາງຣັຖບານກຸງວໍຊິງຕັນບໍ່ໄດ້ຢືນຢັນຂ່າວນີ້. ຊາຍ4 ຄົນຈາກກາຊັກສະຖານ ແລະຈາກ Belarus ຄົນນຶ່ງ ປະຕິເສດວ່າພວກຕົນບໍ່ໄດ້ເຮັດຫຍັງຜິດ ໂດຍກ່າວວ່າ ພວກເຂົາເຈົ້າບໍ່ຮູ້ວ່າເຮືອບິນຂອງເຂົາເຈົ້າບັນທຸກອາວຸດ. ເຂົາເຈົ້າແຈ້ງລາຍການສິນຄ້າທ່ີ ບັນທຸກມາໃນເຮືອບິນນັ້ນ ວ່າແມ່ນເຄື່ອງອຸບປະກອນເຈາະບໍ່ນ້ຳມັນ.
ນັກບິນຄົນນຶ່ງ ນາຍ Viktor Abdullayev ກ່າວຕໍ່ໜັງສືພິມ New York Times ວ່າ ພວກຕົນໄດ້ເລີ້ມຖ້ຽວບິນໃນ Ukraine ແລ້ວໄປ ຮັບເອົາສິນຄ້າທ່ີເກົາຫລີເໜືອ ແລະກຳລັງຈະກັບຄືນໄປຍັງ Ukraine ໂດຍຜ່ານໄທ ສີລັງກາແລະສະຫະຣັຖອາຣັບ Emirates ແຕ່ລາວບໍ່ ໄດ້ບອກໃຫ້ຮູ້ວ່າ ຈະສົ່ງພວກສິນຄ້າເຫລົ່ານີ້ໄປໃສ? ທາງການໄທກ່າວວ່າ ພວກຫີບບັນທຸກສິນຄ້າໃນເຮືອບິນ ແມ່ນບັນຈຸ ລະເບີດທ່ີຂັບດັນດ້ວຍຈະຫລວດ ພ້ອມທັງລູກສອນໄຟແລະອາວຸດອື່ນໆ ໜັກ 35 ຕັນ ແລະເວົ້າວ່າ ພວກສິນຄ້າບັນທຸກໃນເຮືອບິນຈະໄດ້ຖືກກວດກາຢ່າງເຕັມສ່ວນ.
ກ່ຽວກັບທໍ່ລຳລຽງແກສຂອງຈີນ: ທ່ານຫູຈິນເຖົາປະທານປະເທດຈີນ ເປີດທໍ່ລຳລຽງແກສໃໝ່ຈາກພາກ ການເອເຊັຍໃນວັນຈັນມື້ນີ້. ພວກຜູ້ນຳຈາກປະເທດກາຊັກສະຖານ ເທີກເມນີສຖານ ແລະອຸສເບກີສຖານ ຊຶ່ງເປັນປະເທດສົ່ງອອກແກສ ລາຍໃຫຍ່ທ່ີສຸດໃນເອເຊັຍກາງ ກໍໄດ້ໄປຮ່ວມກັບທ່ານຫູຈິນເຖົາໃນພິທີ ເປີດຢ່າງເປັນທາງການໃນວັນຈັນມື້ນີ້ ທ່ີເຂດບໍ່ແກສ Sumandepe ໃນເຂດສອກຫລີກຫ່າງໄກໃນ ພາກຕາເວັນອອກຂອງ Turmenistan ບ່ອນທ່ີທໍ່ລຳລຽງແກສເລີ້ມຂຶ້ນນັ້ນ. ທໍ່ລຳລຽງແກສທ່ີວ່ານີ້ຊຶ່ງຍາວ 1800 ຫລັກກິໂລແມ້ດ ແມ່ນແລ່ນຜ່ານ Turmenistan, Uzbekistan cແລະ Kazakhstan ກ່ອນຈະໄປເຊື່ອມຕໍ່ໃສ່ກັບທ່ໍລຳລຽງແກສ ຍາວ 5000 ກິໂລແມັດໃນຂົງເຂດຊິນຈຽງ ພາກຕາເວັນຕົກສຸດຂອງຈີນ.ທໍ່ລຳລຽງແກສເສ້ນ ນີ້ ແມ່ນເປັນເສ້ນທຳອິດໃນເຂດເອເຊັຍກາງ ທ່ີຈະສົ່ງແກສໂດຍບໍ່ຜ່ານຣັດເຊັຍ ເຮັດໃຫ້ກຸງປັກກິງມີບົດບາດທ່ີສຳຄັນໃນຂົງເຂດນັ້ນ.
ກ່ຽວກັບຄວາມຮຸນແຮງໃນອັຟການີສຖານ: ບັນດາເຈົ້າໜ້າທ່ີອັຟການີສຖານກ່າວວ່າ ພວກມືປືນ ຈຸນຶ່ງໄດ້ສັງຫານເຈົ້າໜ້າທ່ີຕຳຫລວດອັຟການີສຖານ 16 ຄົນໃນການໂຈມຕີດ່ານກວດ ກາ 2 ແຫ່ງ ໃນພາກເໜືອແລະພາກໃຝຕ້ຂອງປະເທດ. ກະຊວງພາຍໃນອັຟການີສຖານ ກ່າວວ່າ ການໂຈມຕີທ່ີດ່ານກວດກາແຫ່ງນຶ່ງໃນແຂວງ Helmand ໃນພາກໃຕ້ໃນວັນຈັນມື້ນີ້ ໄດ້ເຮັດໃຫ້ ຕຳຫລວດເສັຍຊີວິດໄປ 8 ຄົນ ແລະວ່າ ພວກໂຈມຕີໄດ້ສັງຫານຕຳ ຫລວດ ອີກ 8 ຄົນໃນລະຫວ່າງການໂຈມຕີເທິງທາງຫລວງສາຍນຶ່ງ ໃນແຂວງ Baghlan ທາງພາກຕາເວັນອອກສຽງເໜືອຂອງປະເທດ. ບັນດາເຈົ້າໜ້າທ່ີກ່າວວ່າ ຕຳລຫວດໄດ້ສັງຫານພວກ ຫົວຮຸນແຮງຢ່າງນ້ອຍ 1 ຄົນໃນລະຫວ່າງການໂຈມຕີ ແລະໄດ້ຖິ້ມໂທດໃສ່ກຸ່ມມຸສລິມ Hezb-i-Islami ທີ່ເປັນພັນທະມິດກັບກຸມຕາລີບັນນັ້ນ ວ່າເປັນຜູ້ທຳການໂຈມຕີ. ພົນເຮືອເອກ Mike Mullen ຫົວໜ້າທຳນຽບ ຫ້າແຈ ເດີນທາງໄປຮອດກຸງຄາບູລ ໃນວັນຈັນມື້ນີ້ ໃນເວລາພຽງບໍ່ເທົ່າໃດມື້ ກ່ອນການເດີນທາງໄປຮອດຂອງກຳລັງກອງໜູນຈຸທຳອິດຂອງຈຳນວນທະຫານ 30 ພັນຄົນທ່ີປະທານາທິບໍດີບາຣັກໂອບາມາແຫ່ງສະຫະຣັດ ຕັດສິນໃຈ ສົ່ງໄປເສີມ ໃນອັຟການສຖານນັ້ນ.
ຜົນຂອງການແຂ່ງຂັນກີລາ SEA Games ທີ່ລາວ: ໄທໄດ້ກ້າວຂື້ນມາເປັນອັນດັບນຶ່ງໃນການ ແຂ່ງຂັນກີລາ SEA Games ທ່ີນະຄອນຫລວງວຽງຈັນຂອງລາວ ໂດຍໄດ້ຫລຽນຄຳຫລາຍກວ່າໝູ່ຫລັງຈາກທ່ີພວກນັກກິລາຍົກນ້ຳໜັກ ແລະນັກກີລາແລ່ນແລະລານ ຄ້ວາເອົາຫລຽນຄຳໄປ ໃນວັນອາທິດວານນີ້.
ສອງນັກກິລາຊາຍໄທ ຄ້ວາເອົາຫລຽນຄຳໄປໄດ້ໃນການຍົກນ້ຳໜັກ ທັງປະເພດເກີນ 94 ກິໂລຂື້ນໄປ ໂດຍຍົກໄດ້ຮວມທັງໝົດ 345 ກິໂລ ແລະປະເພດຕ່ຳກວ່າ 94 ກິໂລ ໂດຍຍົກໄດ້ຮວມທັງໝົດ 360 ກິໂລ ຊື່ງແມ່ນຫລາຍເປັນປວັດການ. ອີກຄົນນຶ່ງກໍໄດ້ຮັບຫລຽນຄຳ ປະເພດນ້ຳໜັກ85ກິໂລ ຊຶ່ງຜູ້ກ່ຽວຍົກໄດ້ທັງໝົດ 331ກິໂລ.
ຟີລິບປິນໄດ້ຫລຽນຄຳໃນມື້ວານນີ້ ຈາກນາຍ Arniel Ferrara ໃນກິລາໂຍນໄມ້ຄ້ອນ ແລະຈາກນາງ Rosie Villarito ໃນກີລາຊັດຫລາວ ແລະນາຍ Daniel Coakley ໃນກີລາລອຍນ້ຳປະເພດຊາຍ ທ່າເສຣີລະຍະ50 ແມັດ.
ໃນຂະນະການແຂ່ງຂັນກີລາ SEA Games ຊຶ່ງຈັດຂື້ນໃນທຸກໆ 2 ປີ ດຳເນີນມາໄດ້ເກືອບເຄິ່ງທາງແລ້ວນັ້ນ ໄທໄດ້ຫລຽນຄຳໄປ 29 ຫລຽນ ຮວມທັງໝົດເປັນ 108 ຫລຽນ. ວຽດນາມມາໃນອັນດັບ2 ໄດ້ຫລຽນທັງໝົດ 76ຫລຽນ ທ່ີຮວມທັງຫລຽນຄຳ25 ຫລຽນ ແລະໃນຂະນະທີ່ ສິງກະໂປຢູໃນອັນດັບ3 ໂດຍໄດ້ຫລຽນຄຳ 23ຫລຽນ ໃນຈຳນວນທັງໝົດ 60 ຫລຽນ.
ວັນອາທິດ, ໐໘ ທັນວາ ໒໐໒໔
