ປະທານາທິບໍດີໂອບາມາ ຮັບລາງວັນໂນແບນຂະແໜງສັນຕິພາບ:
ປະທານາທິບໍດີບາຣັກໂອບາມາແຫ່ງສະຫະຣັດ ກ່າວວ່າ ທ່ານຈະໃຊ້ລາງວັນໂນແບນຂະແໜງສັນຕິພາບ ຂອງທ່ານນີ້ເພື່ອຊ່ອຍນຳພາສະຫະຣັດແລະໂລກໄປສູ່ການມີສັນຕິພາບທ່ີຍືນຍົງແລະຄວາມປອດໄພ.
ເວລານີ້ທ່ານໂອບາມາກຳລັງຢູ່ໃນກຸງ Oslo ປະທດ Norway ບ່ອນທ່ີ
ທ່ານຈະໄປຮັບເອົາລາງວັນທີ່ມີກຽດອັນສູງສົ່ງອັນນີ້ໃນວັນພະຫັດມື້ນີ້.
ໃນກອງປະຊຸມ ຕໍ່ນັກຂ່າວຮ່ວມກັບນາຍົກຣັຖມຸນຕີ Jens Stolten- berg ແຫ່ງ Norway ທ່ານໂອບາມາຍອມຮັບຮູ້ວ່າ ມີຄົນອື່ນໆອີກຫລາຍຄົນຄວນຈະໄດ້ຮັບລາງວັນໂນແບນສັນຕິພາບທ່ີວ່ານີ້. ທ່ານກ່າວຕື່ມວ່າ ຖ້າທ່ານປະສົບກັບຄວາມສຳເຣັດໃນການເຮັດໃຫ້ສະຫະຣັດເປັນກຳລັງທ່ີດີໃນໂລກແລ້ວ ການຕຳໜິຕິຕຽນທ່ານທ່ີວ່າທ່ານໄດ້ຮັບ ລາງວັນດັ່ງກ່າວໄວໂພດນັ້ນກໍຈະໝົດໄປ.
ນາຍົກຣັຖມຸນຕີ Stoltenberg ກ່າວວ່າ ຄວາມພະຍາຍາມຕ່າງໆຂອງທ່ານໂອບາມາ ເພື່ອແກ້ໄຂບັນຫາຕ່າງໆເຊັ່ນ ເຣື່ອງການປ່ຽນແປງຂອງດິນຟ້າອາກາດ ແລະເຣື່ອງ ການຫ້າມແຜ່ຜາຍອາວຸດນີວເຄລັຍໂດຍຜ່ານທາງການທູດ ສະແດງໃຫ້ເຫັນວ່າ ເປັນການສອດຄ່ອງກັບຈິດໃຈທ່ີດີທ່ີສຸດຂອງມື້ລາງທ່ານ Alfred Nobel ຜູ້ລິເລີ້ມ ລາງວັນນີ້ຂຶ້ນມານັ້ນ. ປະທານາທິບໍດີໂອບາມາ ຈະ ຮັບເອົາລາງວັນໂນແບນຂະແໜງສັນຕິພາບນີ້ ເປັນເວລາຫລາຍມື້ຫລັງຈາກທ່ານສັ່ງໃຫ້ເພີ່ມກຳລັງທະຫານຕື່ມອີກ30 ພັນຄົນໄປຍັງອັຟການີສຖານ ແລະທ່ານກ່າວຕື່ມວ່າ ທ່ານຍັງມີຄວາມໝັ້ນໝາຍຕໍ່ການປະຕິບັດຕາມຕາລາງເວລາ ທ່ີຈະມອບໂອນການຮັບຜິດຊອບໃຫ້ແກ່ກຳລັງຮັກສາຄວາມປອດໄພຂອງອັຟການີສຖານໃນເດືອນກໍລະກົດ ປີ2011 ນັ້ນ.
ການແຂ່ງກີລາ SEA Games ທີ່ ສປປ ລາວ:
ການແຂ່ງຂັນກີລາແຫ່ງຂົງເຂດເອເຊັຍຕາເວັນອອກສຽງໃຕ້ໄດ້ໄຂຂຶ້ນ ແລ້ວທ່ີນະຄອນຫລວງວຽງຈັນຂອງລາວ ໂດຍມີຜູ້ຊະນະຫລຽນຄຳໄປແລ້ວ 8 ຫລຽນ ກ່ອນໜ້າພິທີໄຂງານແຂ່ງຂັນຢ່າງເປັນທາງການໃນມື້ວານນີ້.
ໄດ້ມີການຈູດບັ້ງໄຟດອກຂຶ້ນສູ່ທ້ອງຟ້າ ແລະ ມີການຍິງລູກສອນໄຟ ໄປຍັງໝໍ້ກະທະໃຫຍ່ເພື່ອຈູດທວນໄຟໃນວັນພຸດວານນີ້. ພິທີເປີດການ ແຂ່ງຂັນ ແມ່ນຈັດຂຶ້ນທ່ີສະໝາມກີລາແຫ່ງໃຫຍ່ ທ່ີມີບ່ອນນັ່ງ 20 ພັນ ບ່ອນ ອັນເປັນສ່ວນນຶ່ງຂອງສະໜາມກີລາໃໝ່ແຫ່ງຊາດ ມູນຄ່າ 100 ລ້ານດອນລາ ທີ່ໄດ້ຮັບການຊ່ອຍເຫລືອຈາກຈີນ ຍີ່ປຸ່ນ ບຣູໄນ ເກົາ ຫລີໃຕ້ ວຽດນາມແລະໄທ.
ຜົນການແຂ່ງຂັນກິລາບາງປະເພດທີ່ເສັດສິ້ນໄປແລ້ວ ປາກົດວ່າ ມຽນ ມ້າໄດ້ຮັບຫລຽນຄຳ ໃນການແຂ່ງຂັນກີລາເຕກວນໂດປະເພດຍິງດຽວແລະທີມເຕະກະຕໍ້ປະເທດຍິງ. ວຽດນາມໄດ້ 2 ຫລຽນຄຳ ຈາກກີລາເຕກວນໂດ ສຳລັບທີມຜູ້ຊາຍແລະທີມປະສົມຊາຍຍິງ. ໄທ ລາວ ຟີລິບປິນ ແລະສິງກະໂປ ຕ່າງກໍໄດ້ໄປປະເທດລະ 1 ຫລຽນຄຳແລ້ວ. ຄາດກັນວ່າ ໄທຈະຄອບງຳໃນການແຂ່ງກິລາປະຈຳຂົງເຂດເປັນເວລາ 10 ມື້ນີ້ ຊຶ່ງໄດ້ນຳນັກກີລາມາຈາກ 11 ປະເທດ ເພື່ອແຂ່ງຂັນໃນກິ ລາ 28 ປະເພດ ຊື່ງຫລຸດຈາກ 43 ປະເພດ ໃນການແຂ່ງຂັນກິລາ SEA Games ເທື່ອກ່ອນ ທ່ີປະເທດໄທ. ໂຄສົກຣັຖບານລາວເອີ້ນການແຂ່ງຂັນກີລານີ້ວ່າ ເປັນ ຄວາມພາກພູມໃຈອັນໃຫຍ່ຫລວງສຳລັບປະເທດຂອງທ່ານ.
ທີ່ຟີລິບປິນ: ກອງທັບຟີລິບປິນກ່າວວ່າ ພວກມືປືນຈຸນຶ່ງໄດ້ຈັບປະຊາຊົນຢ່າງນ້ອຍ 75 ຄົນ ສ່ວນຫລາຍເປັນພວກເດັກນ້ອຍນັກຮຽນ ຫລັງຈາກບຸກເຂົ້າໄປໃນໂຮງຮຽນປະຖົມແຫ່ງນຶ່ງ ທ່ີຢູ່ເຂດສອກຫລີກຫ່າງໄກໃນພາກໃຕ້ ຂອງຟີລິບປິນ. ບັນດານາຍທະຫານຟີລິປປິນກ່າວວ່າ ພວກມືປືນໄດ້ລັກພາໂຕພວກ ຊາວບ້ານເຫລົ່ານັ້ນ ໄປຈາກບ້ານນຶ່ງເທິງເກາະມິນດານາວໃນວັນພະຫັດມື້ນີ້. ຕຳຫລວດກ່າວວ່າ ເດັກນ້ອຍ 15 ຄົນໄດ້ຖືກປ່ອຍໂຕໃນເວລາຕໍ່ມາ. ພາກໃຕ້ຂອງຟີລິບປິນແມ່ນໄດ້ຖືກຄຸກຄາມໂດຍພວກໂຈນຜູ້ຮ້າຍ ພວກທະຫານບ້ານ ປະກອບອາວຸດຂອງຣັຖບານ ທີ່ບໍ່ມີການກຳກັບເບິ່ງນຳຢ່າງເຄ່ງຄັດ ຕລອດທັງພວກກະບົດມຸສລິມແລະຄອມ
ມີວນິດ.ບັນດາເຈົ້າໜ້າທ່ີກ່າວວ່າ ເວລານີ້ຕຳຫລວດກຳລັງຕິດຕາມລ່າໂຕ ພວກມືປືນີ້ຢູ່ ຊຶ່ງປາກົດວ່າ ພວກ ເຂົາກຳລັງໃຊ້ໂຕປະກັນເປັນມະນຸດ ກຳບັງ ເພື່ອເອົາໂຕຫລົບໜີໄປ. ໃນເດືອນແລ້ວນີ້ ປະຊາຊົນ57 ຄົນໃນຂະບວນລົດໄປຈົດຊື່ເລືອກຕັ້ງໄດ້ຖືກສັງຫານໝູ່ໃນແຂວງ Maguindanao ໃນພາກໃຕ້ຂອງປະເທດ
ແລະໄດ້ມີການປະກາດໃຊ້ກົດໄອຍະການເສິກໃນແຂວງດັ່ງກ່າວຕັ້ງແຕ່ເກີດເຫດການນັ້ນມາ.
ກ່ຽວກັບອັຟການີສຖານ: ທ່ານ Robert Gates ຣັຖມຸນຕີປ້ອງກັນປະເທດສະຫະຣັດ ກ່າວຕໍ່
ບັນດາຜູ້ບັນຊາການກອງທັບອັຟການີສຖານວ່າ ສະຫະຣັດຕັ້ງໃຈທ່ີຈະເປັນພາຄີກັບພວກເຂົາເຈົ້າ ເປັນເວລາດົນນານຕໍ່ໄປໃນອະນາຄົດ. ໃນລະຫວ່າງການພົບປະກັນທ່ີສະໜາມບິນກຸງຄາບູລ ໃນວັນພະຫັດ
ມື້ນີ້ ທ່ານ Gates ກ່າວວ່າ ສະຫະຣັດຈະປະຕິບັດຕາມຄຳໝັ້ນສັນຍາຂອງຕົນຕໍ່ອັຟການີສຖານ ແລະກ່າວຕື່ມວ່າ ຄວາມສັມພັນນັ້ນແມ່ນຝັງ ຢູ່ໃນເລືອດ. ກ່ອນໜ້ານັ້ນ ໃນການຢ້ຽມຢາມອັຟການີສຖານ ຄັ້ງນີ້ ທ່ານ Gates ກ່າວວ່າ ສະຫະຣັດຕຽມພ້ອມທ່ີຈະສົ່ງທະຫານ ໄປຊ່ອຍເຫລືອກຳລັງອັຟການີສຖານເປັນເວລາ ຫລາຍປີ ກາຍເດືອນກໍລະກົດ ປີ 2011 ທ່ີປະທານາທິບໍດີບາຣັກໂອບາມາໄດ້ກຳນົດໄວ້ ວ່າຈະເລີ້ມຖອນທະຫານອອກຈາກອັຟການີສຖານໄປນັ້ນ. ໃນຂ່າວທ່ີພົວພັນກັບເຣື່ອງນີ້ ພົນໂທ William Caldwel l ແຫ່ງກອງ ທັບບົກສະຫະຣັດກ່າວຕໍ່ບັນດານັກຂ່າວທ່ີກຸງຄາບູລໃນວັນພຸດວານນີ້ວ່າ ມີຊາວໜຸ່ມອັຟການີສຖານ ຫລາຍກວ່າ 2500 ຄົນ ສມັກເຂົ້າເປັນ ທະຫານໃນຮອບ 7 ມື້ທຳອິດຂອງເດືອນທັນວານີ້ ສົມທຽບກັບຈຳ ນວນ ທັງໝົດ 831 ຄົນ ໃນເດືອນກັນຍາຜ່ານມາ.
ທີ່ປາກີສຖານ: ບັນດາເຈົ້າໜ້າທ່ີປາກີສຖານກ່າວວ່າ ຜູ້ຊາຍອະເມຣິກັນ 5 ຄົນທ່ີຖືກຈັບກຸມຢູ່ປາກິສຖານໃນສັບປະດານີ້ ກຳລັງຖືກສອບປາກຄຳກ່ຽວກັບຂໍ້ກ່າວຫາທ່ີວ່າພວກເຂົາເຈົ້າໄດ້ມີສ່ວນພົວພັນກັບບັນດາກຸ່ມຫັວ ຮຸນແຮງຈັດນັ້ນ. ຕຳຫລວດປາກີສຖານກ່າວວ່າ ພວກຜູ້ຊາຍເຫລົ່ານີ້ຖືກຈັບກຸມໃນລະຫວ່າງການບຸກເຂົ້າກວດຄົ້ນເຮືອນຫລັງນຶ່ງຂອງຜູ້ນຳໃນທ້ອງຖິ່ນຄົນນຶ່ງຂອງກຸ່ມຫົວຮຸນແຮງ Jaish-e-Muhammad ທ່ີຜິດກົດໝາຍ
ໃນເມືອງ Sargodha ແຂວງປັນຈາບຂອງປາກີສຖານ.
ໃນຖະແຫລງການສະບັບນຶ່ງ ໂຄສົກຍິງປະຈຳອົງການ FBI ສະຫະ ຣັດກ່າວວ່າ ທາງອົງການກຳລັງພະຍາຍາມພິສູດຊື່ສຽງຂອງພວກບຸກ ຄົນເຫລົ່ານີ້ ແລະຊອກຮູ້ວ່າເຂົາເຈົ້າໄປປາກີສຖານເຮັດຫຍັງ ແລະ ພວກເຂົາເຈົ້າເປັນພວກນັກສຶກສາອະເມຣິກັນ 5 ຄົນທ່ີຫາຍສາບສູນໄປ
ຕັ້ງແຕ່ທ້າຍເດືອນພະຈິກແລ້ວນີ້ ຫລືບໍ?.
ຕຳຫລວດສືບສວນກາງຂອງສະຫະຣັດຫລື FBI ກ່າວວ່າ ຕົນກຳລັງທຳການຕິດຕໍ່ພົວພັນກັບພວກຄອບຄົວຂອງພວກນັກສຶກສາທ່ີຫາຍສາບສູນໄປ ຕລອດທັງເຈົ້າໜ້າທີ່ປາກີສຖານເຊັ່ນກັນ.
ວັນເສົາ, ໒໗ ກໍລະກົດ ໒໐໒໔
