ກຸ່ມບໍລິສັດເອກກະຊົນຈາກໜູ່ເກາະ Bristish Virgin ຈະລົງທຶນກໍ່ສ້າງທາງລົດໄຟໃນແຂວງ ສະຫວັນນະເຂດເພື່ອເຊື່ອມຕໍ່ໄປຍັງທ່າເຮືອໃນພາກກາງຂອງຫວຽດນາມ ໂດຍຈະໃຊ້ເງິນ ລົງທຶນເປັນມູນຄ່າລວມເຖິງ 3.000 ລ້ານ ໂດລາສະຫະຣັດ.
ທ່ານ Noor Mohamed Ahmad ຜູ້ອຳນວຍການຝ່າຍຕ່າງປະເທດຂອງກຸ່ມບໍລິສັດ Giant ຈຳກັດຈາກໝູ່ເກາະ British Virgin ໄດ້ຖະແຫຼງຢືນຢັນວ່າກຸ່ມບໍລິສັດ Giant ຈະປະກາດແຜນການລົງທຶນເພື່ອດຳເນີນການກໍ່ສ້າງທາງລົດໄຟໃນແຂວງສະຫວັນນະເຂດຂອງລາວໃນໝໍ່ໆນີ້. ໂດຍໃນປັດຈຸບັນຍັງຄົງດຳເນີນການເຈລະຈາຮ່ວມກັບທາງການລັດຖະບານລາວເພື່ອກຳນົດລາຍລະ ອຽດຕ່າງໆ ຮ່ວມກັນໃຫ້ແລ້ວສົມບູນກ່ອນທີ່ຈະລົງນາມໃນສັນຍາການລົງທຶນຢ່າງເປັນທາງ ການເຊິ່ງຄາດວ່າຈະມີຂຶ້ນພາຍໃນເດືອນທັນວາປີນີ້.
ຜູ້ອຳນວຍການຝ່າຍຕ່າງປະເທດຂອງກຸ່ມບໍລິສັດ Giant ຈຳກັດ ໄດ້ໃຫ້ລາຍລະອຽດວ່າ ການ ກໍ່ສ້າງທາງລົດໄຟໃນແຂວງສະຫວັນນະເຂດໂດຍມີເປົ້າໝາຍ ເພື່ອເຊື່ອມຕໍ່ ໄປຍັງ ທ່າເຮືອໃນເຂດພາກກາງຂອງຫວຽດນາມນັ້ນ ຄາດໝາຍວ່າຈະຕ້ອງໃຊ້ເງິນທຶນລວມປະ ມານ 3.000 ລ້ານ ໂດລາສະຫະຣັດ. ໂດຍຈະເປັນທາງລົດໄຟທີ່ສ້າງຄູ່ຂະໜານໄປກັບ ຖະໜົນເລກ 9 ທີ່ເຊື່ອມຕໍ່ຈາກຂົວຂ້າມແມ່ນ້ຳຂອງລະຫວ່າງລາວ-ໄທໄປຍັງດ່ານຊາຍ ແດນ ທີ່ບ້ານແດນສະຫວັນ ແລະ ດ່ານລາວບາວຂອງ ຫວຽດນາມ.
ຊຶ່ງເມື່ອປະກອບກັບການທີ່ກຸ່ມບໍລິສັດ Giant ເອງກໍ່ໄດ້ຮັບອະນຸມັດຈາກລັດຖະບານຫວຽດ ນາມ ໃນການລົງທຶນສ້າງທາງລົດໄຟຈາກດ່ານລາວບາວໄປຍັງທ່າເຮືອໃນເຂດພາກກາງຂອງຫວຽດນາມໄປແລ້ວກ່ອນໜ້ານີ້ ກໍ່ເຮັດໃຫ້ ກຸ່ມບໍລິສັດ Giant ມີຄວາມໝັ້ນໃຈວ່າຈະສາມາດເຊື່ອມຕໍ່ທາງລົດໄຟຈາກສະຫວັນນະເຂດໄປ ຍັງເຂດພາກກາງຂອງ ຫວຽດນາມໄດ້ຢ່າງ ເປັນຮູບປະທຳພາຍໃນ 5 ປີຕໍ່ໜ້ານີ້ ກັບທັງ ຍັງຖືວ່າສອດຄ່ອງກັບແຜນການແລະ ເປົ້າໝາຍ ຂອງລັດຖະບານລາວທີ່ຈະພັດທະນາລາວໃຫ້ເປັນເຂດສູນກາງເຊື່ອມຕໍ່ການຄົມ ມະນາຄົມ-ຂົນສົ່ງໃນເຂດລຸ່ມແມ່ນ້ຳຂອງກັບອາຊຽນໃນອານາຄົດອີກດ້ວຍ.
ໃນປະຈຸບັນນີ້ຢູ່ໃນລາວມີເສັ້ນທາງລົດໄຟທີ່ເຊື່ອມຕໍ່ຈາກທ່ານາແລ້ງໃນເຂດບ້ານດົງໂພສີ ເມືອງຫາດຊາຍຟອງ ນະຄອນວຽງຈັນ ໄປຍັງຂົວມິດຕະພາບລາວ-ໄທ ແຫ່ງທຳອິດ ເຊິ່ງ ມີໄລຍະທາງຍາວ 3.5 Km ແລະເຊື່ອມກັບຈັງຫວັດໜອງຄາຍ ຕໍ່ໄປຍັງບາງກອກທີ່ໄດ້ມີການເຊື່ອມຕໍ່ເສັ້ນທາງເຂົ້າຫາກັນນັບຕັ້ງແຕ່ຕົ້ນປີ 2009 ມາແລ້ວ. ໂດຍເສັ້ນທາງລົດໄຟດັ່ງກ່າວນີ້ເປັນຄວາມຊ່ວຍເຫຼືອຈາກລັດຖະບານ ໄທ ແລະໃນຂະນະນີ້ລັດຖະບານໄທກໍ່ກຳລັງພິຈາລະນາທີ່ຈະໃຫ້ການຊ່ວຍເຫຼືອແກ່ ລັດຖະບານລາວເພີ່ມຕື່ມຂື້ນອີກ ດ້ວຍການສ້າງທາງລົດໄຟຕໍ່ຈາກທ່ານາແລ້ງເຂົ້າໄປໃນນະຄອນວຽງຈັນທີ່ມີໄລຍະ ທາງຍາວປະມານ 9 Km ຊຶ່ງໃນໄລຍະທີ່ຜ່ານມາເສັ້ນທາງລົດໄຟດັ່ງກ່າວນີ້ໄດ້ມີການສຶກສາ ແລະອອກແບບກໍ່ສ້າງດ້ວຍຄວາມຊ່ວຍເຫຼືອຈາກລັດຖະບານຝະຣັ່ງໄປແລ້ວ.
ເພາະສະນັ້ນຈຶ່ງຍັງລໍຖ້າພຽງແຕ່ການອະນຸມັດງົບປະມານສະໜັບສະໜູນຂັ້ນສຸດທ້າຍຈາກລັດຖະບານໄທຢ່າງເປັນທາງການເທົ່ານັ້ນ. ໂດຍຄາດໝາຍວ່າການກໍ່ສ້າງເສັ້ນທາງລົດໄຟທີ່ມີໄລຍະທາງຍາວ 9 Km ດັ່ງກ່າວຈະຕ້ອງໃຊ້ເງິນທຶນ 500 ກວ່າລ້ານບາດ.
ນອກຈາກນີ້ລັດຖະບານລາວຍັງມີແຜນການທີ່ຈະສະໜັບສະໜູນໃຫ້ຕ່າງຊາດລົງທຶນກໍ່ສ້າງທາງລົດໄຟທີ່ເຊື່ອມຕໍ່ຈາກນະຄອນຫຼວງວຽງຈັນຂຶ້ນໄປຍັງເມືອງຫຼວງພະບາງອີກດ້ວຍ. ຫາກແຕ່ວ່າຈົນເຖິງປະຈຸບັນນີ້ກໍ່ຍັງຄົງບໍ່ມີບໍລິສັດຕ່າງຊາດລາຍໃດທີ່ໃຫ້ຄວາມສົນໃຈທີ່ຈະລົງທຶນເນື່ອງຈາກວ່າເປັນເສັ້ນທາງທີ່ຈະຕ້ອງໃຊ້ງົບປະມານຢ່າງຫຼວງຫຼາຍນັ້ນເອງ.
