ກອງປະຊຸມວ່າດ້ວຍການປ່ຽນແປງຂອງດິນຟ້າອາກາດຂອງໂລກ. ບັນດາປະເທດຕ່າງໆຂອງໂລກຈະໄປຮ່ວມປະຊຸມກັນຢູ່ທ່ີນະຄອນ ຫລວງ Copenhagen ຂອງເດັນມາກໃນວັນຈັນມື້ອື່ນນີ້ ເປັນເວລາ 12ມື້ເພື່ອຊອກຫາຊ່ອງທາງ ຕໍ່ສູ້ກັບສະພາວະໂລກຮ້ອນ. ບັນດາ 192 ປະເທດພາຄີໃນສົນທິສັນຍາໂຄງຮ່າງຂອງສຫະປະຊາຊາດ ວ່າດ້ວຍການປ່ຽນແປງຂອງດິນຟ້າອາກາດ ກຳລັງຕົກຢູ່ພາຍໃຕ້ຄວາມກົດ
ດັນຫລາຍຂື້ນເລື້ອຍໆໃຫ້ບັນລຸການຕົກລົງກັນເພື່ອວາງເປົ້າໝາຍໃນການຄວບຄຸມການປ່ອຍ ແກສເຮືອນແກ້ວ ອອກ ທ່ີກໍ່ໃຫ້ເກີດ ສະພາວະໂລກຮ້ອນນັ້ນ ແລະໃຫ້ມີການຕົກລົງກັນກ່ຽວກັບວ່າ ພວກປະເທດທ່ີຮັ່ງມີຄວນຈະຈ່າຍເງິນໃຫ້ຫລາຍເທົ່າໃດ ເພ່ືອແລກກັບການ ໃຫ້ພວກປະເທດທ່ີທຸກຍາກ ນຳໃຊ້ເທັກໂນໂລຈີພລັງງານທີ່ສະອາດ ນັ້ນ. ບັນດາປະເທດທ່ີໄປຮ່ວມປະຊຸມຈະພະຍາຍາມໃຫ້ບັນລຸຂໍ້ຕົກລົງລະຫວ່າງຊາດກັນສະບັບໃໝ່
ວ່າດ້ວຍການລົດຜ່ອນການປ່ອຍແກສເຮືອນແກ້ວເຂົ້າສູ່ອາກາດ ເພື່ອນຳມາໃຊ້ແທນສົນທິສັນຍາກຽວໂຕ ທີ່ໄດ້ເຊັນກັນໃນປີ1997 ຊຶ່ງຈະໝົດອາຍຸລົງ ໃນປີ2012 ນັ້ນ. ໃນວັນເສົາວານນີ້ ປະຊາຊົນຫລາຍໝື່ນຄົນພາກັນທຳການປະທ້ວງໃນ ທົ່ວຢູໂຣບ ເພື່ອຮຽກຮ້ອງໃຫ້ມີການເຄື່ອນໄຫວທ່ີເປັນຮູບຮ່າງຂຶ້ນມາໃນກອງປະຊຸມຄັ້ງນີ້.
ທີ່ອັຟການີສຖານ: ທ່ານ ໂຣເບີທ ເກທສ໌ ລັດຖະມົນຕຣີປ້ອງກັນປະເທດສະຫະລັດ ກ່າວ ວ່າ ສະຫະລັດບໍ່ຮູ້ວ່າບິນລາດິນ ຜູ້ນຳກຸ່ມອາລຄາອີດານັ້ນຢູ່ໃສແລະບໍ່ມີຂ່າວສືບລັບຢ່າງຄັກແນ່ ກ່ຽວກັບບ່ອນຢູ່ຂອງຜູ້ກ່ຽວ ມາໄດ້ຫລາຍປີ ແລ້ວ.ໃນການໃຫ້ສຳພາດ ໃນລາຍການ “ອາທິດນີ້” ຂອງ
ໂທລະພາບເອບີຊີ ທີ່ຈະອອກອາກາດໃນວັນອາທິດມື້ນີ້ ທ່ານເກທສ໌ ເວົ້າວ່າ ສະຫະລັດ ຈະ “ໄປຕາມລ່າຈັບຕົວ” ບິນລາດິນ ມາໃຫ້ໄດ້ ຖ້າຫາກຮູ້ຂໍ້ມູນທີ່ເຊື່ອ ຖືໄດ້ວ່າຜູ້ກ່ຽວ ຢູ່ບ່ອນໃດ.
ເຈົ້າໜ້າທີ່ທະຫານສະຫະລັດ ແລະຝ່າຍພັນທະມິດ ເຄີຍເວົ້າວ່າ ພວກ ເຂົາເຈົ້າເຊື່ອວ່າ ບິນລາດິນ ກຳລັງຫລົບລີ້ຢູ່ບ່ອນໃດບ່ອນນຶ່ງຕາມຊາຍ ແດນທີ່ເປັນພູເຂົາ ລະວ່າງປາກີສຖານ ແລະອັຟການີສຖານ.
ໃນເຂດຕາເວັນອອກຂອງອັຟການີສຖານ ກຳລັງທະຫານນານາຊາດ ກ່າວວ່າ ທະຫານສະຫະລັດຄົນນຶ່ງເສຍຊີວິດຍ້ອນຖືກລະເບີດລູກນຶ່ງ ໃນວັນເສົາວານນີ້ ແລະວ່າກຳລັງຮັກສາຄວາມປອດພັຍຂອງອັຟກາ ນີສຖານແລະຂອງນານາຊາດ ໄດ້ທຳການໂຈມຕີທາງອາກາດໃນຕອນ ເດິກຂອງວັນອາທິດມື້ນີ້ ໃນແຂວງ Laghman ແລະໄດ້ສັງຫານພວກຫົວຮຸນແຮງກຸ່ມນຶ່ງ. ນອກນັ້ນ ອົງການເນໂຕ້ກ່າວວ່າ ກຳລັງທະຫານອັຟການີສຖານແລະຂອງນານາຊາດໃນແຂວງກັນດາຮາທາງພາກໃຕ້ຂອງປະເທດ ໄດ້ຈັບ ຜູ້ບັງຄັບບັນຊາຂອງກຸ່ມຕາລິບານຄົນນຶ່ງ ແລະພວກຫົວຮຸນແຮງອີກຄົນນຶ່ງ ທີ່ຮັບຜິດຊອບໃນການໂຈມຕີດ້ວຍລະເບີດຫລາຍໆບັ້ນໃນຂົງເຂດດັ່ງກ່າວ.
ກ່ຽວກັບນີວເຄລັຍເກົາຫລີເໜືອ: ທູດພິເສດຂອງສະຫະຣັດກ່ຽວກັບກິດຈະການເກົາຫລີເໜືອ ເດີນທາງໄປຮອດເກົາຫລີໃຕ້ ໃນວັນອາທິດມື້ນີ້ ເພື່ອຈະເດີນທາງໄປພົບປະກັບ ເຈົ້າໜ້າທີ່ີລັດຖະບານພຽງຢ້າງ ເພື່ອຊັກຊວນໃຫ້ເກົາຫລີເໜືອຢຸດເຊົາທຳການຄັດຄ້ານບໍ່ເຂົ້າຮ່ວມກອງປະຊຸມ6ຝ່າຍວ່າດ້ວຍການປົດອາວຸດ ນີວເຄລັຍຂອງເກົາຫລີເໜືອນັ້ນ. ທ່ານ Stephen Bosworth ທູດພິເສດສະຫະຣັດຈະເດີນທາງຕໍ່ໄປ ຍັງກຸງພຽງຢ້າງໃນວັນອັງຄານສັບປະດານີ້ ໃນອັນທ່ີເອີ້ນວ່າການພົບ ປະເຈຣະຈາກັນໂດຍກົງເທື່ອທຳອິດລະຫວ່າງກຸງວໍຊິງຕັນແລະເກົາຫລີເໜືອ ນັບແຕ່ປະທານາທິບໍດີບາຣັກໂອບາມາແຫ່ງສະຫະຣັດຂຶ້ນດຳຣົງ ຕຳແໜ່ງໃນເດືອນມັງກອນແລ້ວນີ້ເປັນຕົ້ນມາ. ເກົາຫລີເໜືອໄດ້ຊຸກຍູ້ໃຫ້ມີການເຈລະຈາກັນໂດຍກົງກັບສະຫະຣັດ ນັບແຕ່ໄດ້ຖອນໂຕອອກຈາກການເຈຣະຈາ 6 ຝ່າຍ ເພື່ອປະທ້ວງຕໍ່ການ ຕຳໜິຕິຕຽນຂອງນາໆຊາດຕໍ່ການທົດລອງຍິງລູກສອນໄຟຂອງຕົນໃນ ເດືອນເມສາຜ່ານມານັ້ນ. ທາງກຸງວໍຊິງຕັນໄດ້ກ່າວວ່າ ຕົນຈະທຳການ ເຈຣະຈາກັບຝ່າຍເກົາຫລີເໜືອ ກໍຕໍ່ເມື່ອມັນຈະນຳໄປສູ່ການຮື້ຟື້ນການ ເຈຣະຈາ 6 ຝ່າຍຄືນ ແລະມີເກົາຫລີໃຕ້ ຈີນ ຍີ່ປຸ່ນແລະຣັດເຊັຍເຂົ້າ ປະກອບສ່ວນນຳເທົ່ານັ້ນ.
ທີ່ຟີລິບປິນ: ບັນດານາຍທະຫານໃນພາກໃຕ້ຟີລິປິນກ່າວວ່າ ເຂົາເຈົ້າໄດ້ພົບເຫັນ ອາວຸດແລະລູກກະສູນເປັນຈຳນວນຫລາຍ ໃນວັນອາທິດມື້ນີ້ ທ່ີຝັງໄວ້ ໃນດິນຂອງຕະກຸນນື່ງທ່ີມີອຳນາດ ທ່ີຖືກກ່າວຫາວ່າທຳການສັງຫານໝູ່ 57 ຄົນ ຍ້ອນເຫດຜົນທາງດ້ານການເມືອງໃນເດືອນແລ້ວນີ້.
ປະທານາທິບໍດີ Gloria Arroyo ໄດ້ປະກາດໃຊ້ກົດໄອຍະການເສິກແລະງົດສິດທິພົນລະເມືອງ ໃນແຂວງ Maguinfanao ໃນຕອນແລງ ວັນສຸກຜ່ານມານີ້ ຊື່ງອະນຸຍາດໃຫ້ພວກທະຫານທຳການຈັບກຸມບຸກຄົນ ໃດກໍໄດ້ ໂດຍບໍ່ຕ້ອງມີໝາຍຈັບຈາກສານ.ໄດ້ມີການປະກາດກົດໄອຍະ ການເສິກດັ່ງກ່າວນີ້ໃຫ້ຮູ້ໃນວັນເສົາວານນີ້.
ໃນວັນເສົາວານນີ້ເຊັ່ນກັນ ທາງການກ່າວວ່າ ພວກທະຫານໄດ້ຈັບກຸມ ນາຍ Andal Ampatuan ຜູ້ພໍ່ ພ້ອມດ້ວຍລູກຊາຍຄົນນຶ່ງຢູ່ທ່ີບ້ານ ເຮືອນຂອງເຂົາເຈົ້າໃນແຂວງ Maguindanao ນັ້ນ. ລູກຊາຍຂອງ ນາຍ Ampatuan ອີກຄົນນຶ່ງໄດ້ຢູ່ໃນຄຸກແລ້ວ ໃນຂໍ້ຫາມີສ່ວນພົວພັນ ກັບການຂ້າລ້າງຜານຜູ້ຄົນເປັນໝູ່ນັ້ນ. ຫລາຍກວ່າ 40 ຄົນ ໄດ້ຖືກ ຈັບ ກຸມນັບແຕ່ໄດ້ມີການສັງຫານໝູ່ດັ່ງກ່າວ.
ຂ່າວຄືບໜ້າກ່ຽວກັບໄຟໄໝ້ທີ່ບາບັນເທີງໃນຣັດເຊັຍ: ພວກໄວ້ອາໄລໃນເມືອງ Perm ໃນເຂດພູເຂົາ
Urals ຂອງຣັດເຊັຍໄດ້ໄປຮ່ວມພິທີສົ່ງສະການຊຸດທຳອິດໃນວັນອາທິດມື້ນີ້ ສຳລັບພວກທ່ີໄດ້ຮັບເຄາະຮ້າຍຈາກໄຟໄໝ້ບາບັນເທີງແຫ່ງນຶ່ງ ທ່ີໄດ້ເອົາຊີວິດຜູ້ຄົນ ໄປຢ່າງນ້ອຍ 112 ຄົນ.
ບັນດາເຈົ້າໜ້າທ່ີກ່າວວ່າ ຈຳນວນຜູ້ເສັຍຊີວິດຈາກໄຟໄໝ້ໃນຕອນເຊົ້າມືດວັນເສົາວານນີ້ ສາມາດເພ່ີມຂຶ້ນອີກໄດ້ ເພາະວ່າພວກທ່ີໄດ້ຮັບບາດເຈັບທ່ີກຳລັງຮັບການປ່ິນປົວຢູ່ໂຮງໝໍນັ້ນ ຫລາຍຄົນມີອາການສາຫັດ.
ປະທານາທິບໍດີ Demitri Medvedev ແຫ່ງຣັດເຊັຍໄດ້ປະກາດເອົາມື້ ວັນຈັນມື້ອື່ນເປັນວັນໄວ້ອາໄລແຫ່ງຊາດສຳລັບພວກເຄາະຮ້າຍ. ທ່ານ Medvedev ໄດ້ຮຽກຮ້ອງໃຫ້ມີການລົງໂທດຢ່າງໜັກຕໍ່ພວກເຈົ້າຂອງ ບາບັນເທີງແຫ່ງນັ້ນ ຊຶ່ງທ່ານກ່າວວ່າ ພວກເຂົາເຈົ້າບໍ່ເອົາຫົວຊານຳຄຳເຕືອນຂອງເຈົ້າໜ້າທ່ີກວດກາຄວາມປອດໄພຂອງໄຟ ຊ້ຳແລ້ວຊ້ຳອີກ.
ບັນດາເຈົ້າໜ້າທ່ີຣັດເຊັຍໄດ້ຈັບກຸມ 5 ຄົນແລ້ວ ທ່ີຮວມທັງເຈົ້າຂອງ ແລະບັນດາຜູ່ກໍ່ຕັ້ງບາທ່ີມີຊື່ວ່າ Lame Horse ນັ້ນ ໃນຂໍ້ສົງໄສວ່າບໍ່ປະຕິບັດຕາມກົດລະບຽບວ່າດ້ວຍຄວາມປອດໄພນັ້ນ.
ວັນສຸກ, ໒໐ ກັນຍາ ໒໐໒໔
