ວັນອັງຄານ ວັນທີ 1 ທັນວາຜ່ານມານີ້ ແມ່ນວັນໂຣກ AIDS ຂອງໂລກ. ການລະບາດຂອງໂຣກ ນີ້ ຍັງສືບຕໍ່ເອົາຊີວິດຜູ້ຄົນໄປຢ່າງຫລວງຫລາຍ ຢູ່ຕໍ່ມາເຖິງແມ່ນພວກນັກ ວິທຍາສາດໄດ້ພັດທະນາຢຸກຢາປົວ ພະຍາດດັ່ງກ່າວອອກມາຢ່າງຫລວງຫລາຍ ສົ່ງຜົນໃຫ້ສາມາດ ປ່ຽນການວິນິດໃສໂຣກ AIDS ຈາກອາການ “ບໍ່ມີທາງລອດ” ມາເປັນອາການທີ່ຄວບຄຸມໄດ້ ຢ່າງໜ້ອຍກໍສຳລັບພວກທີ່ສາມາດໄດ້ຮັບປ່ິນປົວທີ່ຖືກຕ້ອງ.
ທ່ານນາງ Susan Denzler ບັນນາທິການວາລະສານວ່າດ້ວຍນະໂຍບາຍດ້ານສຸກຂະພາບ Health Affairs ກ່າວວ່າເຊື້ອ HIV/ AIDS ຍັງຄົງເປັນຄວາມເປັນຫ່ວງອັນໃຫຍ່ຫລວງຂອງໂລກ ຢູ່ຕໍ່ມາ ຊຶ່ງທ່ານນາງກ່າວກ່ຽວກັບຄວາມຮ້າຍແຮງຂອງບັນຫານີ້ວ່າ
ກໍຄືດັ່ງທີ່ພວກເຮົາຮູ້ນຳກັນຫັ້ນແຫລະ ເວລານີ້ແມ່ນມີຫລາຍກວ່າ 4 ລ້ານຄົນໃນທົ່ວໂລກ ທີ່ຕິດເຊື້ອໄວຣັສນີ້ ທີ່ຍັງມີຊີວິດຢູ່ ແລະ ມີສຸກຂະພາບຂ້ອນຂ້າງດີ. ທັງນີ້ກໍຍ້ອນວ່າ ເຂົາເຈົ້າໄດ້ຮັບການປິ່ນປົວດ້ວຍຢາຕໍ່ຕ້ານການກັບຄືນມາຂອງເຊື້ອໄວຣັສ. ມີອີກປະມານ 7 ລ້ານຄົນໃນທົ່ວໂລກທີ່ຄວນຈະໄດ້ຮັບການປິ່ນປົວແບບດຽວກັນນີ້. ແລະ ດັ່ງທີ່ພວກເຮົາຮູ້ນຳກັນອີກຫັ້ນແຫລະ ແນ່ນອນມີ 2 ລ້ານ 7ແສນຄົນອີກທີ່ຈະຕິດເຊື້ອໄວຣັສນີ້ໃນແຕ່ລະປີ.
ວາລະສານກິດຈະການສຸກຂະພາບ ຫລື Health Affairs ສຶກສາເບິ່ງການຕໍ່ສູ້ຕ້ານ ໂຣກ AIDS ໃນສະບັບປັດຈຸບັນຂອງຕົນ.
ໃນ ບົດຂຽນທີ່ລົງພິມໃນວາລະສານດັ່ງກ່າວ ກ່ຽວກັບແຫລ່ງທຶນສຳລັບ ການຕໍ່ສູ້ຕ້ານໂຣກ AIDS ນັ້ນ ທ່ານ Robert Hecht ກ່າວວ່າ ກົນໄກສນອງເງິນທຶນໃຫ້ແກ່ການດຳເນີນຄວາມພະຍາຍາມດັ່ງກ່າວໃນ ປັດຈຸບັນນີ້ ແມ່ນບໍ່ໄດ້ຜົນດີປານໃດ. ທ່ານ Hecht ເປັນຜູ້ອຳນວຍ ການຝ່າຍບໍລິຫານຂອງສະຖາບັນ ຜົນການສຶກສາຄົ້ນຄວ້າສຳລັບການ ພັດທະນາ ຊຶ່ງເປັນອົງການບໍ່ຫາຜົນກຳໄລ ທ່ີສຶກສາເບິ່ງການເສດຖະ ກິດແລະນະໂຍບາຍດ້ານສຸກຂະພາບ ພ້ອມກັບເຣື່ອງອື່ນໆນຳ.
ທ່ານ Hecht ກ່າວວ່າ ພວກເຮົາຕ້ອງຍ້າຍໜີ ອອກຈາກຮູບແບບໃຫ້ ການຊ່ວຍເຫລືອແບບສຸກເສີນ, ວິທີການໃຫ້ເງິນແບບພໍແຕ່ແກ້ສຸກເສີນແຕ່ລະປີໄປ ດັ່ງທ່ີໄດ້ເຮັດກັນມາໃນທົດສວັດຜ່ານມານັ້ນ ແລະພິຈາລະ ນາເບິ່ງວິທີການໃຫ້ເງິນທຶນສຳລັບໂຣກ AIDS ໃນໄລຍະຍາວ ແລະມອງເບິ່ງໂຣກລະບາດອັນນີ້ ໃນໄລຍະຍາວ ຖ້າຫາກພວກເຮົາຢາກຈະ ເຮັດໃຫ້ຖືກຕ້ອງ ດຽວນີ້ ໃນມື້ນີ້ ໃນມື້ອື່ນ ຫລືໃນສອງສາມປີຂ້າງໜ້າເພື່ອປ່ຽນແປງທິດທາງຂອງໂຣກ AIDSນີ້.
ທ່ານ Hecht ກ່າວຕື່ມວ່າ ຖ້າບໍ່ມີວິທີຮັບມື ທີ່ໃຊ້ຍຸດທະສາດຫລາຍກ່ວານີ້ແລ້ວ ກໍອາດຈະມີຄວາມກ້າວໜ້າແດ່ເລັກນ້ອຍໃນການຕໍ່ຕ້ານໂຣກ AIDS ແຕ່ຈະບໍ່ເປັນໄຊຊະນະທີ່ເດັດຂາດ.
Dr. Anthony Fauci ນັກຄົ້ນຄວ້າກ່ຽວກັບໂຣກ AIDS ກ່າວວ່າ ແຕ່ເຖິງແມ່ນບໍ່ໄດ້ຮັບໄຊຊະນະທ່ີເດັດຂາດ ບັນດານັກຄົ້ນຄວ້າກໍໄດ້ບັນລຸຄວາມກ້າວໜ້າທ່ີສຳຄັນຫລາຍບາງຢ່າງ ຊຶ່ງທ່ານກ່າວດັ່ງນີ້:
"ຄວາມກ້າວໜ້າໃນການສຶກສາຄົ້ນຄວ້າກ່ຽວກັບເຊື້ອ HIV ຂອງໂຣກ ເອດສ໌ ທີ່ໄດ້ຮັບມາຕັ້ງແຕ່ຕອນເລີ່ມຕົ້ນ ຄືຈາກປີ 1981 ມາຈົນເຖິງປີ 2009 ນີ້ ແມ່ນເປັນສິ່ງນື່ງທີ່ບໍ່ເຄີຍມີມາ ກ່ອນເລີຍກໍວ່າໄດ້ ຊື່ງກໍຄົງຈະເປັນເພາະວ່າ ມັນເປັນສະຖານະການໃໝ່ ທີ່ອຳນວຍໂອກາດ ໃຫ້ຢ່າງຫລວງຫລາຍ ແລະກໍໄດ້ມີການທຸ້ມເທຊັບພະຍາກອນເງິນຄຳ ໃນປະລິມານມະຫາ ສານເຂົ້າໃສ່ການສຶກສາຄົ້ນຄວ້າ ກ່ຽວກັບເລື້ອງນີ້". Dr. Fauci ຊຶ່ງເປັນຫົວໜ້າສະຖາບັນຄົ້ນຄວ້າກ່ຽວກັບເລື່ອງພູມແພ້ ແລະພະຍາດຕິດແປດແຫ່ງຊາດຂອງສະຫະຣັດ ກ່າວວ່າ ຄວາມກ້າວໜ້າເຫລົ່ານັ້ນ ໄດ້ປ່ຽນພາບພົດໃນອະນາຄົດ ສຳລັບພວກຊາວ ໜຸ່ມທ່ີເປັນໂຣກ AIDS ຫລາຍຄົນ.Dr. Fauci ກ່າວວ່າ ໃນລະຫວ່າງຊຸມປີ 1980 ຫາຕົ້ນຊຸມປີ 1990 ທີ່ທ່ານເອີ້ນວ່າເປັນຊ່ວງຫລາຍໆປີທ່ີມືດມົນທ່ີສຸດ ໃນອາຊີບນາຍໝໍ ຂອງທ່ານນັ້ນ ຄົນທ່ີເປັນໂຣກ AIDS ແລະເປັນປອດບວມພ້ອມ ໂດຍສະເລັ່ຍແລ້ວ ແມ່ນມີຊີວິດຢູ່ລອດໄດ້ພຽງແຕ່ 6 ເດືອນເທົ່ານັ້ນ ຫລັງ ຈາກການວິນິດໃສຂອງນາຍແພດ. ແຕ່ທຸກມື້ນີ້ ແມ່ນແຕກຕ່າງກັນຫລາຍ. ທ່ານອະທິບາຍວ່າ:
"ຖ້າຫາກວ່າມີບາງຄົນເຂົ້າມາໃນຄລີນິກຂອງເຮົາ ຢູ່ສະຖາບັນສຸຂະພາບ ແຫ່ງຊາດ ຫລື NIH ໃນເວລານີ້ແລະເປັນຄົນລຸ່ນອາຍຸ 20ປີ ທີ່ຫາກໍຕິດເຊື້ອເອັຊໄອວີ ມາໃໝ່ໆ ເຂົາເຈົ້າກໍໄດ້ຮັບການປິ່ນປົວ ທີ່ອາດຈະເຮັດໃຫ້ເຂົາເຈົ້າມີຊີວິດຍືນເກີນ 69 ປີ. ຂ້າພະເຈົ້າ ຄິດວ່າ ບໍ່ເຄີຍມີການ ແຊກແຊງດ້ານຢຸກຢາ ຄືກັນກັບທີ່ພວກເຮົາໄດ້ປະສົບມາ ຢ່າງໜ້ອຍກໍ ໃນຫລາຍໆສິບປີ ຜ່ານມານີ້ ທີ່ໄດ້ມີຜົນກະທົບຢ່າງເລິກເຊິ່ງສ່ຳນັ້ນ".ເຖິງ ແມ່ນມີການປ່ິນປົວທ່ີດີຂຶ້ນກໍຕາມ ແຕ່ເປົ້າໝາຍທ່ີແທ້ຈິງນັ້ນ ແມ່ນການຄົ້ນຄວ້າຫາຢາວັກຊິນ ທີ່ປ້ອງກັນການຕິດເຊື້ອໂຣກເອດສ໌ໄດ້ ແຕ່ຄວາມສຳເຣັດໃນດ້ານນີ້ ຍັງບໍ່ທັນມີຂື້ນເທື່ອ. ເຊື້ອ HIV ແມ່ນເປັນສັດຕູທ່ີທ້າທາຍໂດຍສະເພາະ ທ່ີສາມາດລີ້ຊ່ອນຢູ່ໃນຮ່າງກາຍຂອງເຮົາໄດ້ ແລະຫລີກລ່ຽງລະບົບປ້ອງກັນໂຕເອງຂອງຮ່າງກາຍຂອງເຮົາ. ເວລາພວກນັກວິທຍາສາດພັດທະນາຢາວັກຊິນສຳລັບປ້ອງກັນພະຍາດໃດ ນື່ງຂື້ນມາ ແມ່ນພວກເຂົາເຈົ້າພະຍາຍາມລຽນແບບ ໃນສິ່ງທີ່ລະບົບ ພູມຕ້ານທານໃນຮ່າງກາຍຂອງເຮົາສາມາດກະທຳໄດ້ນັ້ນ. Dr. Fauci ຊີ້ແຈງວ່າ:
ຊຶ່ງໝາຍຄວາມວ່າ ຮ່າງກາຍຂອງຄົນເຮົາໄດ້ພິສູດໃຫ້ເຫັນແລ້ວ ແນວຄິດທີ່ວ່າ ມັນ ກໍຄືຮ່າງກາຍຂອງເຮົາ ສາມາດກຳຈັດເຊື້ອໄວຣັສ ໃດນື່ງໄດ້ ແລະສາມາດສ້າງພູມຕ້ານທານຂື້ນ ທີ່ຈະປ້ອງກັນການຕິດ ເຊື້ອພະຍາດນັ້ນໄປໄດ້ຕລອດຊີວິດ ແຕ່ບໍ່ແມ່ນໃນກໍລະນີຂອງ ເຊື້ອເອັຊ ໄອວີ ດັ່ງນັ້ນ ພວກເຮົາຕ້ອງເຮັດໃຫ້ໄດ້ດີກວ່າ ພູມຕ້ານທານທີ່ການຕິດເຊື້ອ ໂດຍທຳມະຊາດສ້າງຂຶ້ນນັ້ນ.
ການສຶກສາສະແດງໃຫ້ເຫັນວ່າ ການທົດລອງຢາວັກຊິນທີ່ປະເທດໄທ ຫວ່າງບໍ່ດົນຜ່ານມານີ້ ໄດ້ຮັບຜົນດີແບບຈຳກັດ ສຳລັບຜູ້ຄົນ ບາງຄົນ ແຕ່ເຖິງແມ່ນການທົດລອງໄດ້ຮັບຜົນສຳເຣັດກໍຕາມ ມັນກໍຈະໃຊ້ເວລາຕື່ມອີກຫລາຍປີ ກ່ອນທີ່ຈະສາມາດນຳຢາວັກຊິນນີ້ ອອກມາ ຈຳໜ່າຍໃນຕລາດ.Dr. Fauci ໄດ້ກ່າວຫຍໍ້ໆເຖິງຍຸດທະສາດອື່ນໆອີກຫລາຍຢ່າງ ສຳລັບ ຕໍ່ຕ້ານເຊື້ອ HIV/AIDS ທີ່ກຳລັງດຳເນີນການທົດລອງຢູ່ ແຕ່ທ່ານ ກ່າວວ່າ ຍຸທະສາດເຫລົ່ານັ້ນທັງໝົດ ແມ່ນມີຂໍ້ເສັຍ. ໂຕຢ່າງ ຢາທາທາງນອກທີ່ປະກອບດ້ວຍສານຈຸລິນຊີ ຫລື topical microbicides ເປັນຢາທ່ີໃຊ້ທາອະໄວຍະວະເພດຂອງແມ່ຍິງ ໂດຍສະເພາະ ກ່ອນ ການ ຈະຮ່ວມເພດ. ແຕ່ວ່າ ມີອຸບປະສັກຢ່າງຫລວງຫລາຍທາງດ້ານປະເພນີວັດທະ ນະທຳຕໍ່ການໃຊ້ຢານີ້ ຢູ່ໃນຫລາຍໆເຂດ ແລະພວກແມ່ ຍິງທ່ີໃຊ້ຢານີ້ ກໍຕ້ອງໄດ້ລັກລີ້ ໃຊ້. ແຕ່ Dr. Fauci ກ່າວວ່າຢາເຫລົ່າ ນີ້ເປັນຊ່ອງທາງທີ່ສຳຄັນ ເພື່ອປ້ອງກັນການແຜ່ ລະບາດຂອງເຊື້ອ HIV.
ຢາທາທາງນອກທີ່ວ່ານີ້ ແມ່ນເປັນສິ່ງຈຳເປັນທີ່ສຸດ
ທີ່ຕ້ອງໄດ້ໃຊ້ແທ້ໆຍ້ອນ ເຫດຜົນຫລາຍປະການ ດ້ວຍກັນ. ເຫດຜົນນື່ງທີ່ບໍ່ໄດ້ສຳ ຄັນໜ້ອຍ
ໄປກວ່າເຫດຜົນ ອື່ນໆ ໂດຍສະເພາະໃນພວກ ປະເທດທີ່ກຳລັງພັທະນາ ບ່ອນທີ່ພວກແມ່ຍິງທັງ ຫລາຍສາມາດທີ່ຈະເຮັດເອງ ໄດ້
ເພື່ອປ້ອງກັນ ພວກເຂົາເຈົ້າ ເອງໄວ້ ຈາກສິ່ງນື່ງທີ່ເທົ່າເຖິງ ປັດຈຸບັນນີ້ ແມ່ນເຂົາເຈົ້າ
ບໍ່ສາມາດເຮັດໄດ້ເລີຍ ຢູ່ໃນບາງວັດທະນະທຳ.
Dr Fauci ກ່າວວ່າ ເວລານີ້ ກຳລັງມີການທົດລອງວິທີປ້ອງກັນ ລ່ວງໜ້າ ກ່ອນທີ່ຈະຖືກເຜີຍແບໃສ່ເຊື້ອໂຣກເອດສ໌ນັ້ນ ເພື່ອຢາກຮູ້ວ່າ ວິທີນີ້ມີປະສິດທິຜົນຫລືບໍ? ຕາມທິດສະດີນັ້ນ ການໃຫ້ຢາຕໍ່ຕ້ານໂຣກ Aids ແກ່ຄົນທ່ີຍັງບໍ່ທັນຕິດເຊື້ອ HIV ນັ້ນ ຄວນຈະເປັນຍຸດທະສາດ ທ່ີໄດ້ຜົນ ແຕ່ Dr. Fauci ກ່າວວ່າ ມັນເປັນເຣື່ອງຫຍຸ້ງຍາກພໍແລ້ວ ຢູ່ໃນຫລາຍໆແຫ່ງ ສຳລັບພວກແພດໝໍ ທີ່ຈະເຂົ້າໄປເຖິງແລະຮັກສາ ພວກເປັນໂຣກເອດສ໌ໄດ້ ແລະການທີ່ຈະພະຍາຍາມຊຸກຍູ້ໃຫ້ ຜູ້ຄົນທ່ີ ມີສຸກຂະພາບແຂງແຮງດີ ກິນຢາຕໍ່ຕ້ານຫລືປ້ອງກັນໂຣກ AIDS ໃນຖານະເປັນການເອົາມາດຕະການປ້ອງກັນລ່ວງໜ້ານັ້ນ ກໍແຮ່ງຈະຫຍຸ້ງຍາກຫລາຍຂື້ນອີກ.
ວິທີການນຶ່ງຕື່ມອີກກໍຄື ການທົດລອງແລະປິ່ນປົວແບບສະໝັກໃຈ ຊຶ່ງພົວພັນກັບການທົດລອງແລະປ່ິນປົວຜູ້ຄົນເປັນຈຳນວນຫລວງຫລາຍພ້ອມກັນ ທ່ີກວດເຫັນວ່າມີເຊື້ອ HIV ທ່ີພາໃຫ້ເປັນໂຣກ Aids ໂດຍບໍ່ຄຳ ນຶງວ່າ ພວກຄົນເຫລົ່ານີ້ເຈັບປ່ວຍ ຫລືຜົນການກວດເລືອດປາກົດອອກມາວ່າ ພວກເຂົາເຈົ້າມີທ່າທາງວ່າຈະເຈັບປ່ວຍ ຫລືບໍ່ກໍຕາມ.
ທັງ Dr. Fauci ແລະທ່ານ Robert Hecht ໄດ້ເວົ້າກ່ຽວກັບການຕໍ່ ຕ້ານໂຣກ AIDS ນີ້ ທ່ີກອງປະຊຸມສຳມະນາ ທ່ີວາລະສານ Health Affairs ເປັນຜູ້ອຸບປະຖັມຈັດຂຶ້ນ ເພື່ອເປັນຂີດໝາຍວັນໂຣກເອດສ໌ ຂອງໂລກ ວັນທີ 1 ທັນວາ.
