ການເອົາຢາຕ້ານເຊື້ອໂຣກເອດສ໌ທີ່ວ່ານີ້ ໃຫ້ທາຣົກນ້ອຍເກີດໃໝ່ທີ່ລ້ຽງດ້ວຍ ນ້ຳນົມແມ່ກິນເປັນເວລາດົນເຖິງ 6 ອາທິດນັ້ນ ສາມາດຫລຸດອັດຕາຄວາມສ່ຽງໃນການຕິດເຊື້ອໂຣກ ດັ່ງກ່າວລົງໄດ້ເຖິງເຄິ່ງນຶ່ງເມື່ອທຽບໃສ່ເດັກທີ່ໄດ້ຮັບຢານີ້ ພຽງເທື່ອດຽວ ຄືຫລັງຈາກທີ່ຄອດອອກມາແລ້ວ.
ອາທິດເລ້ວນີ້ ພວກເຮົາໄດ້ເວົ້າເຖິງ ຄຸນປະໂຫຍດຂອງການລ້ຽງລູກ ດ້ວຍນົມແມ່ໃນການ ຈະເລີນເຕີບໂຕຂອງເດັກນ້ອຍ. ແຕ່ວ່າການໃຫ້ລູກດູດນົມແມ່ນັ້ນ ມັນເປັນການຍາກສຳລັບແມ່ໂດຍສະເພາະແມ່ນໃນຕອນທຳອິດທີ່ແມ່ເອົານົມໃຫ້ລູກກິນ. ສະນັ້ນ ເຮົາມີຄຳແນະນໍາດັ່ງຕໍ່ໄປນີ້:
ຄວນໃຫ້ລູກກິນນົມແມ່ ໃນທັນທີຫລັງຈາກທີ່ເດັກຄອດອອກມາ. ອາດມີນັກຊ່ຽວຊານຢູ່ໂຮງ ໝໍ ຫລື ສູນປິ່ນປົວສຸຂະພາບແບບອື່ນ ທີ່ສາມາດສອນວິທີອູ້ມລູກນ້ອຍໃນຫລາຍໆທ່າທີ່ຖືກຕ້ອງໃຫ້ບັນດາແມ່ລູກອ່ອນ ທີ່ມີລູກຫົວສາວນັ້ນ.
ການເອົານົມໃຫ້ລູກກິນສາມາດເຮັດໃຫ້ຮູ້ສຶກເຈັບປວດຫລັງຫລືປວດກ້ານຄໍໄດ້ ຖ້າຜູ້ເປັນແມ່ຫາກກົ້ມລົງເອົານົມໃຫ້ລູກກິນດົນໆ. ສະນັ້ນ ໃຫ້ອູ້ມເອົາລູກມາແປະຢູ່ເອິກແມ່ ໃນເວລາໃຫ້ລູກກິນນົມຈະດີກວ່າ. ປາກຂອງເດັກຈະຕ້ອງເປີດໃຫ້ກວ້າງເທົ່າທີ່ຈະກ້ວາງໄດ້ ເພື່ອໃຫ້ຫົວນົມ ແລະບໍລິເວນອ້ອມແອ້ມຫົວນົມ ເຂົ້າໄປໃນປາກລູກນ້ອຍຢ່າງພໍດີ.
ທາຣົກນ້ອຍຄວນໄດ້ກິນນົມຢູ່ເລື້ອຍໆ ໃນເວລາເກີດມາໃໝ່ໆ ເຊິ່ງຕາມປົກກະຕິ ຄວນໃຫ້ລູກກິນນົມ ທຸກໆ 2 ຊົ່ວໂມງ. ຄລີນິກ Mayo ຢູ່ໃນສະຫະຣັດແນະນຳວ່າ ຈະເປັນການດີທີ່ສຸດ ຖ້າຫາກວ່າແມ່ເອົານົມໃຫ້ລູກກິນ ຕອນທີ່ລູກຍັງບໍ່ທັນຫີວຈົນເກີນໄປ. ແລະ ພວກນັກຊ່ຽວຊານທັງຫລາຍຍັງເວົ້າວ່າ ຖ້າແມ່ໃຫ້ລູກກິນນົມຕົນເອງເລື້ອຍໆ ມັນກໍຈະຊ່ວຍໃຫ້ ຮ່າງກາຍຂອງແມ່ ຜະຫລິດນ້ຳນົມໄດ້ຫລາຍຂຶ້ນ.
ບັນດາຜູ້ຍິງທັງຫລາຍ ສາມາດຮຽນຮູ້ວິທີການລ້ຽງລູກດ້ວຍນົມຕົນເອງໄດ້ ໂດຍການອ່ານປຶ້ມ ຫລື ຊອກອ່ານໃນ Internet ຫລືຮັບຄຳແນະນຳຈາກພວກກຸ່ມສະນັບສະນູນຕ່າງໆ.
ແຕ່ແນວໃດກໍດີ ຍັງມີແມ່ບາງຄົນທີ່ບໍ່ສາມາດຕັດສິນໃຈໄດ້ວ່າ ຄວນຈະລ້ຽງລູກດ້ວຍນົມຕົນເອງ ຫລືບໍ່.
ໃນບັນດາປະເທດກຳລັງພັດທະນາ, ການລ້ຽງລູກດ້ວຍນົມແມ່ຍັງຄົງເປັນຊ່ອງທາງຕົ້ນຕໍທີ່ພາໃຫ້ເດັກຕິດເຊື້ອໂຣກ AIDS. ແຕ່ວ່າ ນົມສູດປະສົມກັບນໍ້າທີ່ບໍ່ສະອາດ ກໍ່ສາມາດເຮັດໃຫ້ເດັກເຈັບປ່ວຍໄດ້ຄືກັນ.
ຫວ່າງບໍ່ດົນມານີ້, ໃນກອງປະຊຸມບັ້ນນື່ງທີ່ ບອສເຕີນ ພວກນັກ ຊ່ຽວຊານດ້ານໂຣກເອັສ ໄດ້ລາຍງານຂ່າວດີສຳລັບພວກແມ່ທັງຫລາຍ. ເຂົາເຈົ້າບອກວ່າ ການສຶກສາເດັກເກີດໃໝ່ ປະມານ ສອງພັນຄົນ ໄດ້ສະແດງໃຫ້ເຫັນວ່າການເອົາຢາ Nevirapine ຕ້ານເຊື້ອໄວຣັສ HIV ໃຫ້ເດັກເກີດໃໝ່ກິນ ພ້ອມກັບໃຫ້ພວກເຂົາກິນນົມແມ່ໄປພ້ອມນັ້ນ ຈະສາມາດຫລຸດອັດຕາຄວາມສ່ຽງຕໍ່ການຕິດເຊື້ອໂຣກດັ່ງກ່າວລົງໄດ້.
ຢາຕ້ານເຊື້ອໂຣກເອັສ Nevirapine ຖືກນຳໃຊ້ຢ່າງກວ້າງຂວາງ ໃນບັນດາປະເທດກຳລັງພັດທະນາ ເພື່ອປ້ອງກັນບໍ່ໃຫ້ພວກແມ່ທີ່ຕິດເຊື້ອໂຣກນີ້ຢູ່ແລ້ວນັ້ນ ເອົາເຊື້ອໄວຣັສນີ້ໄປຕິດແປດລູກ ນ້ອຍຂອງເຂົາເຈົ້າໃນລະຫວ່າງການເກີດ.
ໃນປະຈຸບັນ ເດັກ ເກີດໃໝ່ຈາກແມ່ທີ່ມີເຊື້ອໂຣກເອດສ໌ ແມ່ນຈະໄດ້ຮັບຢາ Nevirapine ພຽງແຕ່ຄັ້ງດຽວ, ໃນຕອນຄອດອອກມາໃໝ່ໆ ເທົ່ານັ້ນ. ແຕ່ການສຶກສາຄົ້ນຄ້ວາໃໝ່ ພົບວ່າ ເດັກເກີດໃໝ່ທີ່ໄດ້ຮັບຢາ Nevirapine ເປັນປະຈຳໃນແຕ່ລະວັນ ເປັນເວລາຫົກອາທິດ ແມ່ນມີອັດຕາຄວາມສ່ຽງຕໍ່ການຕິດເຊື້ອໄວຣັສ
HIV ຕ່ຳກວ່າເດັກທີ່ໄດ້ຮັບຢາດັ່ງກ່າວ ພຽງຄັ້ງດຽວໃນຕອນເກີດນັ້ນ ປະມານເຄີ່ງນື່ງ ແລະເມື່ອຮອດອາຍຸຫົກເດືອນ, ພວກເຂົາກໍມີອັດຕາຄວາມສ່ຽງຕໍ່ການຕິດເຊື້ອ HIV ຫຼື ເສຍຊີວິດໜ້ອຍລົງເກືອບ ຮອດ 1/3.
ພວກນັກວິທະຍາສາດແຈ້ງວ່າ ການໃຫ້ຢາ Nevirapine ຫົກອາທິດ ກໍມີຄວາມປອດໄພ ເທົ່າໆກັບການໃຫ້ພຽງຄັ້ງດຽວ ຕາມຫລັກຊີ້ນຳການໃຊ້ຢາທີ່ໃຊ້ໃນປະຈຸບັນ.
ທີມນັກຄົ້ນ ຄວ້າຈາກມະຫາວິທະຍາໄລ Johns Hopkins ໃນລັດ Maryland ໄດ້ນຳພາການສຶກສານີ້ ໂດຍມີບັນດາຜູ້ສຶກສາວິໄຈຈາກເອທີໂອເປຍ, ອິນເດຍ ແລະ ຢູການດາ.
ໃນປີ 2006 ອົງການສະຫະປະຊາຊາດໄດ້ປ່ຽນແປງນະໂຍ ບາຍຂອງຕົນ ກ່ຽວກັບເລື່ອງການລ້ຽງລູກດ້ວຍນ້ຳນົມແມ່ ຂອງ ພວກແມ່ທີ່ຕິດເຊື້ອ HIV. ຄຳແນະນຳໃໝ່ຂອງອົງການ ສະຫະປະ ຊາຊາດສະໜັບສະໜູນການລ້ຽງລູກດ້ວຍນົມແມ່ ເປັນເວລາຫົກເດືອນ ຖ້າຫາກວ່າແມ່ບໍ່ມີເງິນສຳລັບຊື້ອາຫານພື້ນຖານ ຫຼືນົມສູດປະສົມ ມາລ້ຽງລູກ. ຈຸດປະສົງຕົ້ນຕໍຂອງຄຳແນະນຳນີ້ ກໍຄືວ່າ ຢາກໃຫ້ຄົນເຂົ້າໃຈວ່າ ການໃຫ້ລູກກິນນົມແມ່ນັ້ນ ມີຜົນປະໂຫຍດ ຫລາຍກວ່າ ຄວາມສ່ຽງຕໍ່ການຕິດເຊື້ອໂຣກ ຈາກແມ່ທີ່ມີເຊື້ອໂຣກເອດສ໌ນັ້ນ.
ນອກນັ້ນ, ພວກນັກຊ່ຽວຊານຍັງເນັ້ນອີກວ່າເດັກເກີດໃໝ່ທີ່ບໍ່ໄດ້ກິນນົມແມ່ ມີຄວາມສ່ຽງຕໍ່ການເສຍຊີວິດຍ້ອນພະຍາດປອດບວມ ຫຼື ຖອກທ້ອງ ໃນອັດຕາສູງກວ່າເດັກເກີດໃໝ່ທີ່ລ້ຽງດ້ວຍນົມແມ່ ຫລາຍເຖິງ 5 ຫາ 7 ເທົ່າ.