ລິ້ງ ສຳຫລັບເຂົ້າຫາ

ກຳປັ່ນຂ້າມຟາກອິນໂດເນເຊຍຫລົ້ມ: ຢ່າງນ້ອຍ 9 ຄົນເສຍຊີວິດ, ປະມານ 230 ລອດມາໄດ້


ອິນ​ໂດ​ເນ​ເຊຍ: ເຈົ້າໜ້າ​ທີ່​ຝ່າຍ​ຂົນ​ສົ່ງ​ຂອງ​ອິນໂດ​ເນ​ເຊຍ​ກ່າວ​ວ່າ ມີ​ຢ່າງ​ນ້ອຍ 9 ​ຄົນ​ເສຍ​ຊີວິ​ດ ​ແລະ 230 ກ່ວາຄົນ​ຖືກ​ຊ່ວຍ​ຊີວິດ​ໄວ້​ໄດ້ ​ໃນ​ວັນ​ອາທິດ​ມື້​ນີ້ ຫລັງ​ຈາກ​ທີ່​ເກີດ​ເຫດການ​ເຮືອ​ຂ້າມ​ຟາກ​ລຳ​ນື່ງ ຫລົ້ມຈົມ​ນ້ຳ ​ໃນ​ທະ​ເລ​ທີ່​ປ່ັນ​ປ່ວນ ​ໄກ້ໆ​ກັບ​ເກາະ Sumatra. ອົງການ​ຂ່າວ​ຝະລັ່ງ ລາຍ​ງານ​ຂ່າວ​ອ້າງ ​ຄຳ​ເວົ້າຂອງ​ເຈົ້າໜ້າ​ທີ່​ທ້ອງ​ຖິ່ນ​ຄົນ​ນື່ງ ທີ່​ກ່າວ​ວ່າ​ມີຢ່າງ​ນ້ອຍ 21 ຄົນ​ຈົມ​ນ້ຳຕາຍ. ບາງ​ລາຍ​ງານຂ່າວ​ເວົ້າວ່າ ກຳ​ປັ່ນ​ລຳ​ນັ້ນອາດ​ໄດ້​ບັນທຸກ​ຜູ້​ໂດຍສານ​ເກີດ​ອັດຕາ 273 ຄົນ. ເອກ​ອະທິບໍດີ​ກົມ​ຂົນສົ່ງ​ທາງ​ເຮືອ ​ເວົ້າວ່າ​ມີຊື່ ​213 ຄົນຢູ່​ໃນ​ລາຍ​ຊື່​ຜູ້​ໂດຍສານ. ທ່ານ​ກ່າວວ່າ ຄວາມແຕກ​ໂຕນ​ກັນ​ຢ່າງ​ໃຫຍ່​ໃນ​ຈຳນວນ​ໂຕ​ຈິງ ກັບ​ຈຳນວນ​ໃນ​ລາຍ​ຊື່ ​ແມ່ນເປັນ​ກໍລະນີການລະ​ເມີ​ດກົດ​ລະບຽບຢ່າງ​ເປີດ​ແປນ ທີ່​ກະທຳ​ກັນ​ຢູ່ເລື້ອຍໆ. ເຈົ້າໜ້າ​ທີ່​ເວົ້າວ່າ ​ເຮື​ອຂ້າມ​ຟາກ Dumai Express 10 ກຳລັງ​ແລ່ນ​ຈາກເກາະ Batam ​ໄປ​ຍັງ​ແຂວງ Riau ​ໃນ​ເຊົ້າວັນ​ອາທິດ​ມື້​ນີ້ ​ເວລາ​ເກີດ​ອຸບັດ​ຕິ​ເຫດ​ຫລົ້ມລົງ.

​ໃນ​ອີກ​ກໍລະນີ​ນື່ງ ​ກຳ​ປັ່ນ​ຂ້າມ​ຟາກ Dumai Express 15 ທີ່ບັນທຸກ​ຜູ້​ໂດຍສານ 278 ຄົນ ​ໄດ້​ຖືກ​ຄື້ນ ຟອງ​ຂະໜາດ​ໃຫຍ່ ​ຊັດໄປ​ເກີຍ​ຕື້ນ​ໃນ​ວັນ​ອາທິດ​ມື້​ນີ້ ຄື​ກັນ ​ຂະນະ​ທີ່​ກຳລັງ​ແລ່ນ​ຈາກ​ເກາະ Batam ​ໄປ​ຍັງ​ເກາະ Moro. ເຈົ້າໜ້າ​ທີ່​ເວົ້າວ່າ ຜູ້​ໂດຍສານ​ແລະ​ລູກ​ເຮືອ​ທັງ​ໝົດ ປອດ​ໄພ. ຊາວ​ອິນ​ໂດເນເຊຍ ​ແມ່ນ​ກາງ​ຕໍ່​ນຳ​ເຮືອ​ຂ້າມ​ຟາກ​ຢ່າງ​ຫລວງຫລາຍ ສຳລັບ​ເດີນທາງ​ໄປ​ມາ​ ລະ​ວ່າງ​ເກາະດອນ​ຕ່າງໆ ທີ່​ມີ​ຢູ່​ຫລາຍ​ພັນ​ເກາະນັ້ນ ​ແລະ​ອຸບັດ​ຕິເຫດ​ເຮືອ​ຫລົ້ມ ​ແມ່ນ​ເກີດ​ຂື້ນ​ເປັນ​ປະຈຳ ຍ້ອນ​ອາກາດ​ບໍ່​ດີ​ແດ່ ໂຄງ​ລ່າງ​ພື້ນ ຖານ​ບໍ່​ດີ ​ແລະ​ມັກ​ບັນທຸກ​ຄົນ​ເກີນ​ອັດຕາ.

ການ​ເມືອງ​ໃນ​ອິຣ່ານ: ທາງການສານອິຣ່ານໄດ້ຕັດສິນ​ໂທດຈຳຄຸກເປັນເວລາຫົກປີ ຕໍ່ອະດີດຮອງປະທານາ ທິບໍດີ Mohammad Ali Abtahi ທີ່​ໄດ້ປະທ້ວງຜົນການ ເລືອກຕັ້ງປະທານາທິບໍດີ ທີ່​ເປັນຫົວຂໍ້ຄັດ​ແຍ້​ງ ກັນນັ້ນ. ພວກທີ່ ໄກ້ຊິດກັບທ່ານ Abtani ຫົວປະຕິຮູບ ກ່າວໃນວັນອາທິດມື້ນີ້ວ່າ ທ່ານໄດ້ຖືກແຈ້ງໃຫ້ຊາບ ກ່ຽວກັບການຕັດສິນ​ໂທດທ່ານ ເມື່ອ ວັນເສົາວານນີ້. ທາງການສານຂອງອິຣ່ານ ພົບວ່າທ່ານມີ ຄວາມ ຜິດໃນ ຖານທີ່ເປັນຕົວການ ຍຸຍົງໃຫ້ປະຊາຊົນກໍ່​ການ​ຈະລາຈົນ ຕໍ່ຕ້ານລັດຖະບານ. ທ່ານ Abtahi ໄດ້ຖືກຈຳຄຸກ​ເປັນ​ເວລາ ສາມສີ່ວັນ ຫລັງຈາກການປ່ອນບັດເລືອກຕັ້ງເມື່ອວັນທີ່ 12 ເດືອນມິຖຸນາຜ່ານມາ. ຕໍ່ມາ ມີລາຍງານວ່າ ທ່ານໄດ້ສະແດງ ຄວາມເສຍໃຈ ທີ່ທ່ານໄດ້ເຂົ້າປະກອບສ່ວນໃນການປະທ້ວງນັ້ນ ແຕ່ສະມາຊິກ ໃນຄອບຄົວຂອງທ່ານ​ເວົ້າວ່າ ຄຳກ່າວຂອງທ່ານນັ້ນ ມາຈາກການບັງຄັບຫລາຍກວ່າ. ການເລືອກຕັ້ງ​ເອົາ​ທ່ານ Ahmadinejad ​ເປັນປະທານາທິບໍດີ ສະ​ໄໝທີ່ສອງໃນ ເດືອນ ມິຖຸນານັ້ນ ໄດ້ກໍ່ໃຫ້ເກີດມີການປະ ທ້ວງຢ່າງໃຫຍ່ຫລວງ ໂດຍພວກປະຊາຊົນອິຣ່ານທີ່ຮູ້ສຶກວ່າ ມີການໂກງການເລືອກຕັ້ງ. ລາຍງານ​ຂ່າວ​ເວົ້າວ່າ ປະຊາຊົນຫລາຍ ຄົນຖືກຂ້າຕາຍ ​ໃນການກວດລ້າງຂອງລັດຖະບານ ແລະພວກນັກເຄຶ່ອນໄຫວ ທາງການເມືອງ ພວກນັກຂ່າວ ແລະຄົນອື່ນໆອີກ ຫລາຍກວ່າ 1000 ຄົນ ຖືກກັກຂັງ.

ອິນ​ເດຍ: ຕຳຫລວດ​ທີ່​ປະ​ເທດ​ອິນ​ເດຍກ່າວ​ວ່າ ມີ​ການວາງ​ລະ​ເບີດ​ໂຈມ​ຕີ​ສອງ​ບັ້ນ​ໃນ​ວັນ​ອາທິດ​ມື້​ນີ້ ​ສົ່ງ​ຜົນ​ໃຫ້ 6 ຄົນ​ເສ​ຍຊີວິດ ​ແລະ​ຢ່າງ​ນ້ອຍ 50 ກ່ວາ​ຄົນ ​ໄດ້​ຮັບ​ບາດ​ເຈັບ ​ໃນ​ແຄວ້ນ ASSAM ທາງ​ພາກ​ຕາ​ເວັນ​ອອກ​ສ່ຽງ​ເໜືອຂອງ​ອິນ​ເດຍ. ຕຳຫລວດ​ເວົ້າວ່າ ລະ​ເບີດ​ທີ່​ເຊື່ອງ​ໄວ້​ໃນ​ລົດຖີບ​ສອງ​ຄັນ ​ໄດ້​ແຕກ​ຂື້ນ ຫ່າງ​ກັນບໍ່​ເທົ່າ​ໃດ​ນາທີ ຢູ່​ທາງ​ນອກ​ສະຖານີ​ຕຳ​ຫລວດແຫ່ງ​ນື່ງ ກັບ​ສູນ​ການ​ຄ້າ​ແຫ່ງ​ນື່ງ ​ໃນ​ເມືອງ NALBARI. ກຳລັງ​ຮັກສາ​ຄວາມ​ປອດ​ໄພ​ໄດ້​ຈັດ​ໃຫ້​ແຄວ້ນ ASSAM ຢູ່​ໃນ​ທ່າ​ມີ​ສະຕິ​ລະວັງ​ໂຕ​ສູງ. ຕຳ ຫລວດ​ສົງ​ໃສ​ວ່າ​ກຸ່ມ​ແບ່ງ​ແຍກ​ດິນ​ແດນ ​ແນວ​ໂຮມ​ສາມັກຄີ​ປົດ​ປ່ອຍ​ອາສົມ ​ຫລື ULFA ເປັນ​ຜູ້​ຢູ່​ເບື້ອງ​ຫລັງ​ການ​ໂຈມ​ຕີຄັ້ງນີ້ ​ແຕ່​ພວກຜູ້ນຳ​ກຸ່ມ​ກະບົດ​ດັ່ງກ່າວ ​ປະຕິ​ເສດ​ວ່າ​ກຸ່ມ​ຂອງພວກ​ຕົນ​ບໍ່ມີ​ສ່ວນ​ກ່ຽວຂ້ອງໃດໆ. ອາທິດ​ແລ້ວ​ນີ້ ຕຳຫລວດ​ອິນ​ເດຍ​ກໍໄດ້​ຖີ້ມ​ໂທດ​ໃສ່​ພວກ​ກົວ​ຮຸນ​ແຮງ​ຂອງ​ກຸ່ມ ULFA ວ່າ​ເປັນ​ຜູ້​ວາງ ລະ​ເບີດ​ຮ້າຍແຮງ ທີ່​ເຮັດ​ໃຫ້ລົດ​ໄຟ​ບັນທຸກ​ຂະ​ບວນນື່ງ ຕົກ​ລາງ ສົ່ງ​ຜົນ​ໃຫ້​ຕູ້​ລົດ​ໄຟ​ບັນທຸກ​ນ້ຳມັນ 12 ຕູ້​ລຸກ​ໄໝ້​ເປັນ​ໄຟ ​ແຕ່​ພວກ​ຄົນ​ຍາມ​ແລະ​ຄົນ​ຂັບ​ລົດ​ໄຟ ​ເອົາ​ໂຕ​ຫລົບໜີ​ອອກ​ມາ​ໄດ້​ຢ່າງ​ປອດໄພ.

ອັຟກາ​ນິສຖານ: ເຈົ້າໜ້າທີ່ຮັກສາຄວາມປອດ​ໄພອັຟການິສຖານຜູ້ນຶ່ງ ກ່າວວ່າ ລະເບີດແຄມທາງລູກນື່ງ ​ໄດ້​ເຮັດໃຫ້ທະຫານຍາມຊາຍແດນ ໃນແຂວງກັນດາຮາ ທາງ​ພາກໃຕ້ ຂອງປະ​ເທດ ເສຍຊີວິດ 5 ຄົນ. ນາຍພົນ Abdul Raziq ຜູ້ບັນ ຊາການກຳລັງຮັກສາ ຄວາມປອດ​ໄພຊາຍແດນກ່າວວ່າ ໜ່ວຍ ອອກລາດຕະເວນໃນຕອນຂ້ອນ​ແຈ້ງຂອງວັນອາທິດມື້ນີ້ ໄດ້​ໄປ​ຢຽບ​ເອົາລະເບີດ ໃນຂະນະທີ່ຂັບລົດໄປຕາມຖະນົນ ໃຫຍ່ສາຍ​ນື່ງ ໃນ ເຂດເມືອງ Spin Baldak ຢູ່ເຂດຊາຍແດນຕິດກັບ ປາກີສຖານນັ້ນ. ອົງການຂ່າວຂອງ ຝະລັ່ງກ່າວວ່າ ກຸ່ມຕາລິບານໄດ້ອ້າງເອົາຄວາມຮັບ ຜິດຊອບໃນການໂຈມຕີຄັ້ງນີ້. ພວກເຈົ້າໜ້າທີ່ອັຟການິສຖານ ກ່າວວ່າ ໃນເຫດການກໍ່ຄວາມວຸ້ນວາຍເມື່ອວັນເສົາວານນີ້ ລູກສອນໄຟລູກນຶ່ງຕົກຢູ່ໄກ້ໂຮງແຮມ ທັນສະໄໝແຫ່ງນຶ່ງ ໃນກາງເມືອງຫລວງກາບູລ ຍັງຜົນໃຫ້ມີປະຊາຊົນບາດເຈັບ 4 ຄົນ. ທ່ານ Zamary Bashary ໂຄສົກ ກະຊວງພາຍໃນ ບອກວີໂອເອວ່າ ລູກສອນໄຟລູກນັ້ນໄດ້ລະເບີດຂື້ນ ຢູ່ຖະນົນລະຫວ່າງ ໂຮງໝໍກັບໂຮງແຮມ Serena. ຢ່າງນ້ອຍ ມີທະຫານອັຟການິສຖານ ນຶ່ງຄົນ ຢູ່ໃນຈຳນວນຜູ້ບາດເຈັບ ສີ່ ຄົນນັ້ນ. ໂຮງແຮມດັ່ງກ່າວ ​ເປັນ​ບ່ອນ​ທີ່ພວກຊາວຕ່າງປະເທດນິຍົມ​ກັນ​ໄປ​ພັກ ແລະ ຕັ້ງຢູ່ໄກ້ໆກັບ ທຳນຽບປະທານາທິບໍດີ ກະຊວງຕ່າງໆຂອງລັດຖະບານ ແລະສະຖານທູດຕ່າງໆ.

ການ​ເມືອງ​ໃນ​ອິຣັກ: ພວກ​ສະມາຊິກ​ສະພາ​ແຫ່ງ​ຊາດ​ອິຣັກ ປະຊຸມ​ກັນ​ອີກ​ໃນ​ມື້​ນີ້ ​ເພື່ອ​ພະຍາຍາມຫາ​ທາງ​ ແກ້​ໄຂ​ສະພາບການບໍ່​ໄປ​ບໍ່​ມາ ກ່ຽວ​ກັບ​ຮ່າງກົດໝາຍ​ເລືອກ​ຕັ້ງ ທີ່​ສະພາ​ຕ້ອງ​ຮັບ​ຜ່ານ​ເອົາ ກ່ອນ​ຈະ​ຈັດ ການ​ເລືອກ​ຕັ້ງທົ່ວ​ໄປ​ຂື້ນ​ໄດ້ ໃນ​ເດືອນ​ມັງກອນ ປີໜ້າ. ພວກ​ຜູ້​ແທນ​ສືບ​ຕໍ່​ການ​ເຈລະຈາ​ຕໍ່​ລອງກັນ​ ທີ່​ໄດ້​ເລິ່ມຂື້ນ​ໃນ​ວັນເສົາວານ​ນີ້ ຫລັງ​ຈາກ​ທີ່​ຮອງ​ປະທານາທິບໍດີ​ຈາກ​ເຜົ່າ Sunni ທ່ານ Tareq al-Hashemi​ໄດ້​ໃຊ້​ສິດຍັບຍັ້ງ​ ຫລືວີ​ໂຕ ຮ່າງ​ກົດໝາຍ​ນັ້ນ ​ແລະ​ສົ່ງ​ຄືນ​ໄປ​ໃຫ້ ສະພາ​ໃນຕົ້ນອາທິດ​ຜ່ານ​ມາ. ທ່ານ al-Hashemi ຢາກ​ໃຫ້​ຮ່າງ​ກົດໝາຍ​ນີ້ ອະນຸມັດໃຫ້​ຊາວ​ອິຣັກທີ່​ດຳລົງຊີວິດ​ຢູ່​ຕ່າງປະ​ເທດ​ ຊື່​ງຈຳນວນ​ຫລາຍ​ເປັນ​ຊາວ​ອາ​ຫຣັບ​ເຜົ່າ​ຊຸນ​ນີນັ້ນ ມີ​ຜູ້​ຕາງໜ້າເຂົາ​ເຈົ້າ ຢູ່​ໃນ​ສະພາ​ຫລາຍ​ຂື້ນ. ຫລັງ​ຈາກ​ທີ່​ທ່ານ al-Hashemi ​ໄດ້​ໃຊ້​ວີ​ໂຕ ຄະນະ​ກຳມາ​ທິການ​ເລືອກ​ຕັ້ງຂອງ​ອິຣັກ ກໍ​ໄດ້​ໂຈະ​ການ​ກະກຽມ​ຫ້າງ​ຫາ​ສຳລັບ​ການ​ເລືອກ​ຕັ້ງນັ້ນ​ໄວ້. ສະມາຊິກ​ຄະ​ນະ​ກຳມາ​ທິການ​ເວົ້າວ່າ ສະພາບການ​ບໍ່​ໄປ​ບໍ່​ມາ​ ກ່ຽວ​ກັບ​ຮ່າງ​ກົດ ໝາຍ​ເລືອກ​ຕັ້ງ ມີ​ທາງ​ວ່າ​ຈະ​ເຮັດ​ໃຫ້ການ​ປ່ອນ​ບັດ​ໃນ​ເດືອນ​ມັງກອນ ຊັກ​ຊ້າ​ອອກໄປ. ສະພາ​ແຫ່ງ​ຊາດອິຣັກມີ​ທາງ​ເລືອກ​ສອງ​ທາງ ຄື​ແກ້​ໄຂ​ຮ່າງ​ກົດໝາຍຕາມ​ທີ່​ທ່ານ al-Hashemi ຕ້ອງການ ຫລື​ສົ່ງ​ກັບ​ຄືນ​ໄປ​ໃຫ້​ສະພາ​ປະທານາທິບໍດີ ຊື່​ງກໍ​ອາດ​ຈະ​ຖືກ​ວີ​ໂຕ້​ອີກ ຄື​ກັນ.

​ໄທ-ອົບ​ພະຍົບມົ້ງ: ກຸ່ມສິ້ງຊອມດ້ານສິດທິມະນຸດ Human Rights Watch ໄດ້ຮຽກຮ້ອງໃຫ້ລັດຖະບານໄທ ປ່ອຍພວກ ອົພຍົບຊາວລາວເຜົ່າມົ້ງ ຈຳນວນ 158 ຄົນທີ່ຖືກຄຸມຂັງ ມາໄດ້ ສາມປີແລ້ວ ຢູ່​ໜອງຄາຍ ນັ້ນ ແລະອະນຸຍາດໃຫ້ພວກ ເຂົາເຈົ້າ ຕັ້ງຖິ່ນຖານ ຢູ່ໃນປະເທດໄທ ຫລື​ໄປ​ຢູ່ປະເທດອື່ນ. ກຸ່ມປົກ​ປ້ອງສິດ ທິມະນຸດດັ່ງກ່າວ ທີ່ມີສຳນັກງານ​ໃຫຍ່ຕັ້ງຢູ່ນະຄອນ ນີວຢ໊ອກ ກ່າວວ່າ ເຈົ້າໜ້າທີ່ໄທແມ່ນກຳລັງກັກຂັງພວກ ອົພຍົບຊາວລາວ ເຜົ່າມົ້ງດັ່ງກ່າວ ​ໄວ້ໃນສະພາບທີ່ຂີ້ຮ້າຍ​ແລະທາລຸນຫລາຍ ຊຶ່ງຖືວ່າ ເປັນການກະທຳທີ່ ຝ່າຝືນກົດໝາຍອົພຍົບສາກົນ. ກຸ່ມດັ່ງກ່າວ​ເວົ້າຕໍ່ໄປວ່າ ລັດຖະບານໄທໄດ້ໃຊ້ການນາບຂູ່ ແລະປະຕິເສດ ບໍ່ຍອມສະໜອງ​ສິ່ງ​ທີ່​ຈຳ​ເປັນ​ຕ່າງໆ ​ໃຫ້ແກ່ພວກ ຊາວລາວເຜົ່າມົ້ງເຫລົ່ານັ້ນ ​ເພື່ອ​ບີບ​ບັງຄັບ​ໃຫ້​ເຂົາ​ເຈົ້າກັບ ຄືນໄປລາວ. ໃນຈົດໝາຍສະບັບນຶ່ງທີ່​ສົ່ງເຖິງ ນາຍົກລັດຖະມົນຕຣີໄທ ທ່ານອະພິສິດ ເວຊຊາຊິວະ ​ໃນ​ວັນ​ສຸກ​ຜ່ານ​ມານັ້ນ ກຸ່ມ Human Rights Watch ໄດ້ຮຽກຮ້ອງໃຫ້ລັດຖະບານໄທ ຈົ່ງຍຸຕິ​ໂດຍທັນທີ​ໃນອັນ ທີ່ຕົນເອີ້ນວ່າ "ນະໂຍບາຍທີ່ຂາດສິນລະທຳ ແລະ ຜິດກົດໝາຍນັ້ນ." ກຸ່ມສິ້ງຊອມສິດທິມະນຸດກຸ່ມນີ້ ກ່າວວ່າ ຫລາຍໆປະເທດ ອັນມີໂຮມ ທັງສະຫະລັດ ​ແຄນາດາ ເນເທີແລນ ແລະອອສເຕຣເລຍ ແມ່ນໄດ້ຕົກລົງທີ່ຈະຮັບ ເອົາຊາວອົພຍົບເຫລົ່ານີ້​ແລ້ວ ແລະບໍ່ມີ ເຫດຜົນໃດໆ ທີ່ທາງລັດຖະບານໄທ ຈະກັກຕົວພວກເຂົາເຈົ້າ ໄວ້ອີກ ຕໍ່ໄປ. ທາງອົງການສະຫະປະຊາ ຊາດກໍໄດ້ຮຽກຮ້ອງ​ໃນ​ທຳນອງ​ດຽວ​ກັນ​ນີ້ ຕໍ່ລັດຖະບານໄທ ເມື່ອວັນອັງຄານ ຜ່ານມານັ້ນ.

ສະຫະລັດ - ​ເກົາຫລີ​ເໜືອ: ຊ່ຽວຊານ​ຄະນະນື່ງຂອງ​ສະຫະລັດ ກ່ຽວ​ກັບ​ກິດຈະການ​ເກົາຫລີ ​ເລີ່ມຕົ້ນ ການຢ້ຽມຢາມ​ເກົາຫລີ​ເໜືອ​ ເປັນ​ເວລາ 4 ວັນ​ໃນ​ວັນ​ເສົາ​ວານ​ນີ້ ​ເພື່ອ​ທຳ​ການ​ເຈລະຈາ​ກ່ຽວ​ກັບ​ໂຄງການ​ຜະຫລິດ​ອາວຸດ​ນິວ​ເຄລຍຂອງ​ເກົາຫລີ​ເໜືອ. ອົງການ​ຂ່າວ YONHAP ຂອງ​ເກົາຫລີ​ໃຕ້ ລາຍ​ງານຂ່າວ​ອ້າງ​ແຫ​ລ່ງຂ່າວ​ທາງ​ການທູດ​ວ່າ ຄາດ​ວ່າການ​ຢ້ຽມຢາມ​ເທື່ອ​ນີ້ ຈະ​ເປັນ​ການແຜ້ວ​ທາງ​ໃຫ້​ແກ່​ທູດ​ພິ​ເສດ​ຂອງ ສະຫະລັດ ສຳລັບ​ເກົາຫລີ​ເໜືອ ທ່ານ Stephen Bosworth ຊື່​ງມີ​ກຳໜົດ​ຈະເດີນທາງ​ໄປ​ ນະຄອນຫລວງ​ພຽງ​ຢາງ ຂອງ​ເກົາຫລີ​ເໜືອ ​ໃນ​ວັນ​ທີ 8 ​ທັນວາ ​ເດືອນ​ໜ້າ​ນີ້ ​ໂດຍ​ມີ​ເປົ້າໝາຍ​ຈະ​ຮື້​ຟື້ນ​ການ​ເຈລະຈາ​ຫົກ​ຝ່າຍ ທີ່​ແນໃສ່​ເພື່ອ​ໃຫ້​ເກົາຫລີ​ເໜືອ​ປະລະ​ໂຄງການ​ອາວຸດ​ນິວ​ເຄລຍນັ້ນ. ປະທານາທິບໍດີ​ສະຫະລັດ ທ່ານ Barak Obama ​ໄດ້​ປະກາດ​ໃຫ້​ຊາບ​ກ່ຽວ ກັບແຜນການ​ເດີນທາງ​ໄປ​ເກົາຫລີ​ເໜືອ​ຂອງ​ທ່ານ Bosworth ​ໃນ​ລະ​ວ່າງ​ກອງ​ປະຊຸມ​ສຸດ​ຍອດ​ຂອງ​ທ່ານ ກັບທ່ານ Lee Myung-bak ປະທານາທິບໍ ດີ​ເກົາຫລີ​ໃຕ້ ທີ່​ນະຄອນຫລວງ​ໂຊ​ລ ​ເມື່ອ​ວັນ​ພະຫັດ​ອາທິດ​ແລ້ວ​ນີ້.

XS
SM
MD
LG