ໂອບາມາ - ຈີນ:
ປະທານາທິບໍດີສະຫະຣັດ ທ່ານ BARACK OBAMA ແລະປະທານ ປະ ເທດຈີນ ທ່ານ HU JINTAO
ໄດ້ສິ້ນສຸດການ ເຈຣະຈາຫາຣື ເປັນເວລາ ຫລາຍໆຊົ່ວໂມງ ທີ່ ນະຄອນຫລວງປັກກິ່ງໃນວັນອັງຄານມື້ນີ້ ດ້ວຍ ການໃຫ້ຄຳໝັ້ນສັນຍາ ຄືນໃໝ່ອີກວ່າ ຈະຮ່ວມ ມືກັນໃນທຸກໆດ້ານ ນັບແຕ່ເຣື່ອງ ເສຖກິດຂອງ ໂລກ ການຫ້າມແຜ່ຜາຍອາວຸດນິວເຄລັຽຕລອດ ທັງການປ່ຽນແປງຂອງດິນຟ້າອາກາດ. ໃນການ ຖແລງ ຕໍ່ກອງປະຊຸມນັກຂ່າວ
ລຸນຫຼັງການພົບ ປະກັນ ຂອງພວກທ່ານນັ້ນ ທ່ານ OBAMA ໄດ້ກ່າວເນັ້ນວ່າ
ທຸກໆບັນຫາທ້າທາຍທີ່ສຳຄັນໆ ຂອງສັຕວັດທີ 21 ແມ່ນເປັນບັນຫາທີ່ແຕະຕ້ອງ
ທັງສອງປະເທດ. ທ່ານກ່າວວ່າ ບັນຫາທ້າທາຍເຫລົ່ານີ້ ຈະບໍ່ສາມາດແກ້ໄຂໄດ້ຕາມລຳພັງ. ພວກຜູ້ນຳທັງສອງ ບໍ່ໄດ້ຕອບຄຳຖາມ ຂອງພວກນັກຂ່າວ. ການເຈຣະຈາ
ບໍ່ໄດ້ສ້າງ ຄວາມກ້າວໜ້າ ທີ່ສຳຄັນໆໃດໆ ແຕ່ທ່ານ HU ເວົ້າວ່າ ພວກທ່ານ
ໄດ້ສ້າງຄວາມກ້າວໜ້າ ໃນລະຫວ່າງ ການສົນທະນາຫາຣືກັນ ຂອງພວກທ່ານ. ນອກນັ້ນ
ທ່ານຍັງກ່າວເນັ້ນ ເຖິງຄວາມຈຳເປັນ ໃນການເອົາມາຕການ ທີ່ເປັນຮູປທັມ
ເພື່ອຮັບມື ກັບອັນທີ່ ທ່ານເອີ້ນວ່າ ບັນຫາທ້າທາຍ ຮ່ວມກັນ.
ອີຣ່ານ - ນິວເຄລັຽ: ປະທານາທິບໍດີ ສະຫະ ຣັດທ່ານ BARACK OBAMA ກ່າວວ່າອີຣ່ານ ຈະປະເຊີນ ກັບຜົນທີ່ຕິດຕາມມາ
ຢ່າງຮ້າຍແຮງ ຖ້າອີຣ່ານຫາກບໍ່ສະແດງ ໃຫ້ເຫັນວ່າ ໂຄງການ ນິວເຄລັຽຂອງຕົນ
ເປັນໂຄງການ ທີ່ມີຈຸດປະສົງ ໃນທາງສັນຕິ ແລະໂປ່ງໃສ. ປະທານາທິບໍດີ OBAMA
ກ່າວຕໍ່ກອງປະຊຸມ ຖແລງຂ່າວ ທີ່ ນະຄອນຫຼວງ ປັກກິ່ງ ໃນວັນອັງຄານ ມື້ນີ້ວ່າ
ສະຫະຣັດ ແລະຈີນ ໄດ້ເຫັນພ້ອມ ນຳກັນວ່າ ອີຣ່ານຕ້ອງໄດ້ໃຫ້ ການຄ້ຳປະກັນ ກ່ຽວກັບຈຸດ ປະສົງ ໃນທາງສັນຕິ ຂອງຕົນນັ້ນ ຕໍ່ປະຊາ ຄົມນາໆຊາດ. ຈີນແລະສະຫະຣັດ
ແມ່ນຮວມຢູ່ໃນ ກຸ່ມ 6 ປະເທດ ທີ່ເອີ້ນກັນວ່າ 5 ມະຫາອຳນາດ ບວກນຶ່ງ ທີ່ກຳລັງ
ຊອກຫາຊ່ອງທາງ ເປີດການເຈຣະຈາ ເພື່ອຍຸຕິ ໂຄງການນິວເຄລັຽ ຂອງອີຣ່ານ.
ອົງການນິວເຄລັຽ ຂອງສະຫະປະຊາຊາດ ກ່າວວ່າ ຕົນມີຄວາມວິຕົກກັງວົນ ຢ້ານວ່າ
ອີຣ່ານ ຍັງປົກປິດ ກ່ຽວກັບເຣື່ອງ ສະຖານທີ່ ແລະລາຍລະອຽດ ທີ່ພົວພັນກັບ
ໂຄງການນິວເຄລັຽ ຂອງຕົນນັ້ນຢູ່. ໃນລາຍງານ ຂອງອົງການ ພະລັງງານ ປະຣະມະນູສາກົນ
ທີ່ພິມເຜີຍແຜ່ ໃນວັນຈັນວານນີ້ ທາງອົງການນີ້ເວົ້າວ່າ ອີຣ່ານໄດ້ແກ່ຍາວ
ການເປີດເຜີຍ ກ່ຽວກັບ ໂຮງກັ່ນທາດ ຢູເຣນຽມ ໃກ້ໆເມືອງ QOM ຊຶ່ງພາໃຫ້ມີຄຳຖາມ
ກ່ຽວກັບ ຄວາມເປັນໄປໄດ້ ໃນກິຈການອື່ນໆ ທີ່ບໍ່ມີການ ເປີດເຜີຍ
ຂອງອີຣ່ານນັ້ນ.
ອັຟການິສຖານ: ອັງກິດໄດ້ສເນີທີ່ຈະເປັນເຈົ້າ ພາບ ຈັດກອງປະຊຸມນາໆຊາດ
ກ່ຽວກັບອັຟກາ ນິສຖານ ໃນຕົ້ນປີໜ້າ ຊຶ່ງຈະຕັ້ງ ກຳນົດເວລາ ໃນການມອບໂອນ
ຄວາມຮັບຜິດຊອບ ໃນດ້ານ ຄວາມໝັ້ນຄົງ ໃຫ້ແກ່ ກຳລັງທະຫານ ອັຟກາ ນິສຖານ
ເລີ້ມຕົ້ນ ໃນປີ 2010. ໃນຄຳປາສັຍ ທີ່ກຸງລອນດອນ ໃນມື້ວັນຈັນວານນີ້
ນາຍົກຣັຖ ມຸນຕຣີ GORDON BROWN ກ່າວວ່າ ທ່ານ ຕ້ອງການ ຢາກໃຫ້ກອງປະຊຸມ
ທີ່ວ່ານີ້ ກຳນົດ ໂຄງຮ່າງ ທີ່ກວ້າງຂວາງ ທາງດ້ານການເມືອງ ທີ່ຈະອຳນວຍໃຫ້
ຍຸທສາດ ທາງດ້ານທະຫານ ສາມາດບັນລຸ ຄວາມສຳເຣັດໄດ້. ທ່ານ BROWN ເວົ້າວ່າ
ພັຍຂົ່ມຂູ່ ທີ່ໃຫຍ່ທີ່ສຸດ ຕໍ່ຄວາມໝັ້ນຄົງ ແຫ່ງຊາດ ຂອງອັງກິດ
ແມ່ນພວກກໍ່ການຮ້າຍຂ້າມຊາດ. ແຕ່ທ່ານ ກໍໃຫ້ຂໍ້ສັງເກດວ່າ ໄດ້ມີຄວາມກ້າວໜ້າ
ທີ່ແທ້ຈິງ ໃນການຕໍ່ຕ້ານ ກຸ່ມກໍ່ການຮ້າຍ AL-QAIDA ຢູ່ໃນອັຟການິສຖານ
ແລະປາກິສຖານ ໂດຍເວົ້າວ່າ ຫົວໜ້າ 7 ຄົນ ຂອງຈຳນວນທັງໝົດ 12 ຄົນ
ຂອງກຸ່ມກໍ່ການຮ້າຍ AL-QAIDA ໄດ້ຖືກຂ້າຕາຍ ນັບແຕ່ ເດືອນມັງກອນ ປີ 2008
ເປັນຕົ້ນມາ. ນອກນັ້ນ ໃນມື້ວານນີ້ ຣັຖບານ ອັຟການິສຖານ ຍັງໄດ້ປະກາດ ກ່ຽວກັບ
ການສ້າງຕັ້ງ ຜແນກການຕໍ່ຕ້ານ ການສໍ້ຣາດບັງຫລວງຂຶ້ນ ເພື່ອສືບສວນ
ກ່ຽວກັບການສໍ້ໂກງ ຂອງເຈົ້າໜ້າທີ່ ອະວຸໂສ.
ອິສຣາແອລ - ປາແລສໄຕນ໌: ສະຫະພາບ ຢູໂຣບ ໄດ້ປະຕິເສດ ຕໍ່ການຮ້ອງຂໍ ຂອງພວກ ຜູ້ນຳປາແລສໄຕນ໌ທີ່ຢາກໃຫ້ ສະຫະພາບຢູໂຣບ ສນັບສນຸນແຜນການຂອງຕົນ ເພື່ອໃຫ້ຮັບຮູ້ ປາ ແລສໄຕນ໌ໃນຖານະຣັດເອກກະຣາດ ຢູ່ທີ່ສະມັດ ຊາໃຫຍ່ ໂດຍປາສຈາກການຍິນຍອມເຫັນພ້ອມ ຂອງອິສຣາແອລ. ທ່ານ CARL BILDT ຣັຖມຸນ ຕຣີການຕ່າງປະເທດສະວີເດັນ ຊຶ່ງປະເທດ ຂອງທ່ານ ພວມກຳຕຳແໜ່ງ ປະທານວຽນ ຂອງສະຫະພາບຢູໂຣບນັ້ນ ກ່າວວ່າ ມັນຈະເປັນ ການໄວເກີນໄປ ທີ່ຈະຮັບຮູ້ ຣັດເອກກະຣາດ ປາແລສໄຕນ໌ ໃນເວລານີ້ ເນື່ອງຈາກວ່າ ສະພາບການ ຍັງບໍ່ພ້ອມເທື່ອ ສຳລັບການເຄື່ອນໄຫວແບບນັ້ນ. ທ່ານ BILDT ໄດ້ແສດງ ຄວາມເຫັນດັ່ງກ່າວ ຂອງທ່ານ ລ່ວງໜ້າກອງປະຊຸມ ຂອງບັນດາ ຣັຖມຸນຕີ ການຕ່າງປະເທດ ຂອງສຫະພາບຢູໂຣບ ຢູ່ນະຄອນຫລວງ BRUSSELS ຂອງປະເທດ BELGIUM. ທ່ານກ່າວວ່າ ຄນະຣັຖມຸນຕຣີ ຈະຫາຣືກັນ ຊອກຫາຊ່ອງທາງອື່ນໆ ເພື່ອສະແດງການສນັບສນູນ ຕໍ່ຊາວປາແລສໄຕນ໌.
ຄາຣ໌ເຕີ້ - ເອເຊັຽ: ອະດີດ ປະທານາທິບໍດີ ສະຫະຣັດທ່ານ JIMMY CARTER ໄດ້ເດີນ ທາງ ໄປເຖິງ ປະເທດໄທ ໃນມື້ວັນຈັນ ວານນີ້ ເພື່ອຊ່ອຍສ້າງເຮືອນ ໃຫ້ພວກຄົນທຸກ 82 ຫຼັງ ຊຶ່ງຈຳນວນດັ່ງກ່າວ ແມ່ນເພື່ອເປັນກຽດໃນການ ມີພຣະຊົນມາຍຸ ຄົບຮອບ 82 ພັນສາ ຂອງກະ ສັດ ພູມີພົນ ອະດຸນຍະເດດ ຂອງໄທ ໃນວັນທີ 5 ທັນວາ ຈະມານີ້. ທ່ານ CARTER ແລະພັລຍາ ທ່ານນາງ ROSALYNN ໃຊ້ເວລາ ນຶ່ງອາທິດ ໃນແຕ່ລະປີ ເພື່ອເຮັດວຽກ ໃຫ້ແກ່ອົງການ ການກຸສົນ HABITAT FOR HUMANITY ໃນໂຄງການ ທີ່ຮູ້ກັນ ໃນນາມໂຄງການ ວຽກງານຂອງທ່ານ CARTER ໃນປະເທດຕ່າງໆ ເຊັ່ນອິນເດັຽ ເກົາຫລີ ແລະຟີລິບປິນ. ການເດີນທາງໃນປີນີ້ ແມ່ນຮວມທັງ ໂຄງການຕ່າງໆ ໃນ 5 ປະເທດ ເຂດແມ່ນ້ຳຂອງ. ມີພວກອາສາສະມັກ ຫຼາຍພັນຄົນ ກຳລັງພາກັນເຮັດວຽກ ກ່ຽວກັບໂຄງການທ່ານ CARTER ຊຶ່ງຈະສ້າງ ແລະສ້ອມແປງເຮືອນ 166 ຫຼັງ ຢູ່ທີ່ກຳປູເຈັຽ ຈີນ ລາວ ໄທ ແລະວຽດນາມ. ອົງການ HABITAT FOR HUMANITY ກ່າວວ່າ ເກືອບ 1 ສ່ວນ 5 ຂອງປະຊາຊົນ ໃນເຂດອ່າງແມ່ນ້ຳຂອງ ດຳຣົງຊີວິດ ຢູ່ດ້ວຍຄວາມທຸກຍາກ ຊຶ່ງຫລາຍໆຄົນ ຂອງຈຳນວນນີ້ ແມ່ນມີລາຍໄດ້ ບໍ່ຮອດ 1 ໂດລາ ຕໍ່ຄົນຕໍ່ມື້.
ມຽນມາ - ເຮືອຂ້າມຟາກ: ເຈົ້າໜ້າທີ່ມຽນ ມາ ກ່າວວ່າ ເຊື່ອວ່າມີຢ່າງນ້ອຍ 50 ຄົນໄດ້ ຈົມນ້ຳຕາຍ ເວລາເຮືອຂ້າມຟາກລຳນຶ່ງ ທີ່ມີຜູ້ ໂດຍສານ ເກືອບ 180 ຄົນ ໄດ້ຕຳກັນ ກັບ ເຮືອພ້ວງແລະບັນທຸກລຳນຶ່ງ. ເຈົ້າໜ້າທີ່ກ່າວ ໃນວັນອັງຄານ ມື້ນີ້ວ່າ ໄດ້ມີການພົບເຫັນສົບ ຄົນຕາຍ 31 ສົບແລ້ວ ຫລັງຈາກ ໄດ້ເກີດ ອຸບັດຕິເຫດ ໃນມື້ວັນອາທິດຜ່ານມາ ແລະ 21 ຄົນຍັງຫາຍສາບສູນ. ເຈົ້າໜ້າທີ່ເວົ້າວ່າ ພວກ ຜູ້ໂດຍສານທີ່ເຫລືອ ໄດ້ຖືກຊ່ອຍຊີວິດໄວ້ໄດ້ ແລະໄດ້ພາກັນ ເດີນທາງກັບຄືນ ໄປບ້ານ ຂອງພວກເຂົາເຈົ້າແລ້ວ. ອຸບັດຕິເຫດ ດັ່ງກ່າວນີ້ ເກີດຂຶ້ນທີ່ ແມ່ນ້ຳ NGAWUM ຊຶ່ງຢູ່ໃນບໍຣິເວນ 3 ຫລ່ຽມປາກແມ່ນ້ຳ ອີຣະວະດີ ໃນພາກໃຕ້ ຂອງປະເທດມຽນມາ.
ເຊີນຟັງຂ່າວລາຍລະອຽດ ໂດຍຄລິກບ່ອນສຽງ.
