ເອເປັກ: ບັນດາຜູ້ນຳຂົງເຂດເອເຊຍ-ປາຊີຟິກ ໄດ້ສີ້ນສຸດກອງປະຊຸມສຸດຍອດຂອງພວກຕົນ ທີ່ສິງກະໂປ ໃນວັນອາທິດມື້ນີ້ ດ້ວຍການອອກຖະແຫລງການສະບັບສຸດທ້າຍ ທີ່ໃຫ້ຄຳໝັ້ນສັນຍາວ່າ ຈະເຮັດໃຫ້ການເຈລະຈາເລື່ອງການຄ້າໂລກ ຮອບໂດຫາ ອັດລົງ ຢ່າງສຳເລັດຜົນ ໃຫ້ໄດ້ໃນປີ 2010 ແຕ່ໄດ້ຖອນເປົ້າ ໝາຍ ທີ່ໄດ້ກຳນົດໄວ້ ສຳລັບການຕັດລະດັບການປ່ອຍມົນລະພິດ ອາຍແກສ CARBON DIOXIDE ລົງນັ້ນ. ກອງປະຊຸມສຸດຍອດຂອງສະພາຮ່ວມມືດ້ານເສດຖະກິດລະວ່າງບັນດາປະເທດ ໃນຂົງເຂດເອເຊຍແລະມະຫາສະມຸດປາຊີຟິກ ຫລື APEC ທີ່ປະກອບດ້ວຍສະມາ ຊິກ 21 ປະເທດ ໄດ້ປະຖີ້ມເປົ້າໝາຍ ທີ່ຈະຕັດການປ່ອຍອາຍແກສເຮືອນແກ້ວລົງ ໃຫ້ໄດ້ເຄິ່ງນື່ງ ພາຍໃນປີ 2050 ນັ້ນ ທັງໆທີ່ໄດ້ປະກາດວ່າ ການປ່ຽນແປງຂອງດິນຟ້າອາກາດ ແມ່ນເປັນນື່ງໃນການທ້າທາຍທີ່ໃຫຍ່ຫລວງທີ່ສຸດຂອງໂລກ. ພວກຜູ້ນຳເອເປັກໄດ້ຕົກລົງເຫັນພ້ອມນຳກັນວ່າ ຈຳເປັນຕ້ອງມີແຜນຍຸທະສາດໃໝ່ ສຳລັບການເຕີບໃຫຍ່ຂະຫຍາຍໂຕ ເພື່ອຮັບມືກັບຄວາມຕ້ອງການຕ່າງໆ ຂອງເສດຖະກິດໂລກ. ນາຍົກລັດຖະມົນຕີສິງກະໂປ ທ່ານ LEE HSIEN LOONG ເປັນຜູ້ອ່ານບົດສັງເຂບຂອງຖະແຫລງການຂອງຜູ້ນຳເອເປັກ.
ພ້ອມດຽວກັນນີ້ ພວກຜູ້ນຳເອເປັກໄດ້ປະຕິເສດຕໍ່ທຸກຮູບແບບຂອງລັດທິປ້ອງກັນ ສິນຄ້າພາຍໃນປະເທດ ແລະກ່າວວ່າພວກເຂົາເຈົ້າຈະມຸ່ງໝັ້ນ ຕໍ່ການເຮັດໃຫ້ການເຈລະຈາການຄ້າໂລກ ອັດລົງໃຫ້ໄດ້ໃນປີໜ້າ. ການເຈລະຈາທີ່ວ່ານີ້ໄດ້ຢຸດສະງັກລົງ ຍ້ອນການຂັດແຍ້ງກັນລະວ່າງພວກປະເທດຮັ່ງມີແລະທຸກຍາກ ກ່ຽວກັບການຕັດການເກື້ອກຸນແກ່ພາກສ່ວນກະເສດ ແລະພາສີອາກອນລົງ. ຖະແຫລງການຂອງກອງປະຊຸມຍັງເວົ້າອີກວ່າ ທັງ 21 ປະເທດສະມາຊິກ ຈະຮັກສານະໂຍບາຍກະຕຸກຊຸກຍູ້ເສດຖະກິດໄວ້ ຈົນກ່ວາວ່າເສດ ຖະກິດຂອງໂລກ ຈະມີການຟື້ນໂຕຄືນ ທີ່ໝັ້ນຄົງແລະຖາວອນ ຢ່າງແລເຫັນໄດ້. ປະທານາທິບໍດີສະຫະ ລັດ ທ່ານ BARAK OBAMA ທີ່ໄປຮ່ວມປະຊຸມນຳ ໄດ້ປະກາດວ່າ ສະຫະລັດຈະເປັນເຈົ້າພາບ ຈັດ ກອງປະຊຸມເອເປັກ ປະຈຳປີ 2011 ຂື້ນ ທີ່ລັດຮາວາຍ ບ່ອນທີ່ທ່ານເຄີຍຢູ່ອາໃສຕອນຍັງນ້ອຍ.
ໂອບາມາ-ຣັດເຊຍ: ປະທານາທິບໍດີໂອບາມາ ກັບປະທານາ ທິບໍດີຣັດເຊຍ ທ່ານ DMITRI MEDVEDEV ກ່າວວ່າ ພວກທ່ານທັງສອງຍັງວາງແຜນ ທີ່ຈະເຮັດສົນທິສັນຍາສະບັບໃໝ່ ເພື່ອແທນທີ່ສົນທິສັນ ຍາຫລຸດຜ່ອນອາວຸດຍຸທະສາດ ຫລື START ນັ້ນ ໃຫ້ແລ້ວສຳເລັດພາຍໃນທ້າຍປີນີ້. ທ່ານໂອບາມາ ກັບທ່ານ MEDVEDEV ໄດ້ພົບປະກັນ ຢູ່ສິງກະໂປໃນວັນອາທິດມື້ນີ້ ຫລັງຈາກທີ່ກອງປະຊຸມເອເປັກໄດ້ອັດລົງ. ສອງອຳນາດນິວເຄລຍຊັ້ນນຳຂອງໂລກ ສະຫະລັດກັບຣັດເຊຍ ໄດ້ສະແດງຄວາມມຸ່ງໝັ້ນ ທີ່ຈະເຮັດສັນຍາສະບັບໃໝ່ຂື້ນມາແທນທີ່ ສົນທິສັນຍາ START ONE ທີ່ຈະໝົດອາຍຸລົງ ໃນວັນທີ 5 ທັນວານີ້. ນອກນັ້ນ ຜູ້ນຳທັງສອງຍັງກ່າວວ່າ ເວລາກຳລັງຈະໝົດໄປແລ້ວ ສຳລັບອິຣ່ານ ທີ່ຈະຮັບເອົາຂໍ້ຕົກລົງທີ່ນາໆຊາດໄດ້ສະເນີຂື້ນ ເພື່ອໃຫ້ອິຣ່ານສົ່ງທາດຢູເຣນຽມ ທີ່ໃຊ້ແລ້ວຂອງຕົນໄປຕ່າງປະເທດ ເພື່ອກັ່ນກອງຕື່ມອີກນັ້ນ. ທ່ານ MEDVEDEV ກ່າວວ່າທ່ານຍັງຫວັງວ່າ ຈະສາມາດເກ້ຍກ່ອມໃຫ້ອິຣ່ານ ສົ່ງທາດຢູເຣ ນຽມຂອງຕົນ ໄປໃຫ້ຣັດເຊຍກັ່ນໃຫ້ຕື່ມອີກ ເພື່ອທີ່ຈະສາມາດນຳໄປໃຊ້ເປັນເຊື້ອໄຟແລ່ນເຕົາແຍກທີ່ເກົ່າ ແກ່ແຫ່ງນື່ງຂອງຣ່ານ ເພື່ອຜະລິດໄຟຟ້ານັ້ນ.
ໂອບາມາ-ອາຊ່ຽນ: ນອກນັ້ນແລ້ວ ໃນວັນອາທິດມື້ນີ້ ປະທານາທິບໍດີໂອບາມາ ຍັງໄດ້ພົບປະກັບພວກຜູ້ ນຳຂອງກຸ່ມປະເທດເອເຊຍຕາເວັນອອກສ່ຽງໃຕ້ ຫລືອາຊ່ຽນ ໂຮມທັງມຽນມານຳ ທີ່ສິງກະໂປນັ້ນ. ແຕ່ເຖິງແມ່ນທ່ານໂອບາມາກັບນາຍພົນ THEIN SEIN ນາຍົກລັດ ຖະມົນຕີມຽນມາ ໄດ້ຢູ່ໃນຫ້ອງດຽວກັນກໍຕາມ ແຕ່ທັງສອງທ່ານກໍບໍ່ໄດ້ເຂົ້າໄປໃກ້ກັນ ຫລືຈັບມືກັນ. ຢ່າງໃດກໍຕາມ ທ່ານ ROBERT GIBBS ເລຂາທິການຝ່າຍຂ່າວຂອງທຳ ນຽບຂາວ ບອກພວກນັກຂ່າວວ່າ ໃນການພົບປະກັບພວກຜູ້ນຳອາຊ່ຽນທີ່ບໍ່ເປີດໃຫ້ ນັກຂ່າວເຂົ້າໄປນັ້ນ ທ່ານໂອບາມາໄດ້ຮຽກຮ້ອງໃຫ້ປ່ອຍໂຕທ່ານນາງ ອອງ ຊານຊູຈີ ຜູ້ນຳຝ່າຍຄ້ານທີ່ຖືກກັກໂຕໃນມຽນມາ ພ້ອມກັບນັກໂທດການເມືອງຄົນອື່ນໆອີກ ໝົດທຸກຄົນຢູ່ໃນມຽນມານັ້ນ ແລະໃຫ້ຢຸດເຊົາການກົດຂີ່ປາບ ປາມພວກຊົນກຸ່ມນ້ອຍ. ທ່ານນາງອອງ ຊານຊູຈີ ທີ່ເຄີຍໄດ້ຮັບລາງວັນໂນແບລ ຂະແໜງສັນຕິພາບ ໄດ້ຖືກກັກຂັງໃນຮູບໃດຮູບນື່ງ ມາເປັນເວລາ 14 ປີຂອງໄລຍະ 20 ຜ່ານມາ. ປະທນາທິບໍດີໂອບາມາ ໄດ້ສົນທະນາຫາລືກັບ ປະທານາທິບໍດີອິນໂດເນເຊຍ ທ່ານ SUSILO BAMBANG YUDHOYONO ໃນການພົບປະຄັ້ງສຸດທ້າຍຂອງທ່ານທີ່ສິງກະໂປ ກ່ອນອອກເດີນທາງໄປຢ້ຽມຢາມຊຽງໄຮ້ ປະເທດຈີນ.
ກວັນຕານາໂມ: ເຈົ້າໜ້າທີ່ລັດຖະບານໂອບາມາກ່າວວ່າ ຄຸກທີ່ເກືອບວ່າເປົ່າວ່າງແຫ່ງນຶ່ງ ໃນລັດອິລລິນອຍສ໌ ອາດສາມາດໃຊ້ເປັນບ່ອນກັກຂັງພວກນັກໂທດ ຈາກສູນກັກຂັງທີ່ ອ່າວກວັນຕານາໂມ ຮ່ວມກັບນັກໂທດລັດ ຖະບານກາງໄດ້. ເຈົ້າໜ້າທີ່ກ່າວໃນຕອນ ແລງວັນເສົາວານນີ້ວ່າ ຄຸກ Thomson Correctional Facility ທີ່ມີການ ຮັກສາຄວາມປອດໄພ ຢ່າງໜາແໜ້ນແລະເຄ່ງຄັດ ຕັ້ງຢູ່ຫ່າງຈາກນະຄອນຊິຄາໂກ ໄປທາງກ້ຳ ຕາ ເວັນຕົກ 220 ຫລັກກິໂລເເມັດ ໄດ້ກາຍເປັນທາງເລືອກ ອັນດັບໜ້າ ສຳລັບລັດຖະບານກາງທີ່ຈະຊື້ເອົາ ແລ້ວຫລັງຈາກນັ້ນ ລັດຖະບານກໍຈະສາມາດຍ້າຍ ພວກຕ້ອງສົງໃສ ກໍ່ການຮ້າຍ ໄປ ຢູ່ຄຸກແຫ່ງນີ້ ທີ່ມີຫ້ອງຂັງ 1600 ຫ້ອງນັ້ນໄດ້. ເຈົ້າໜ້າທີ່ລັດຖະບານບໍ່ໄດ້ເປີດເຜີຍວ່າ ຈະຍົກຍ້າຍນັກໂທດກັກຂັງ ຈາກອ່າວກວັນຕານາໂມ ຈຳນວນຈັກຄົນ ໄປຢູ່ຄຸກທີ່ລັດອິລລີນອຍສ໌ນັ້ນ. ຜູ້ວ່າການລັດ ອິລລິນອຍສ໌ ຈະຖະແຫລງຕໍ່ສື່ມວນຊົນ ໃນ ວັນອາທິດມື້ນີ້. ພວກເຈົ້າໜ້າທີ່ທ້ອງຖິ່ນ ໃຫ້ຂໍ້ສັງເກດວ່າ ການທີ່ລັດຖະບານກາງສະຫະລັດ ຈະໃຊ້ຄຸກແຫ່ງນີ້ ຖືວ່າຈະເປັນການສ້າງໜ້າວຽກ ຫລາຍພໍສົມຄວນ.
ການເລືອກຕັ້ງທີ່ໂກໂຊໂວ: ບ່ອນປ່ອນບັດໄດ້ໄຂຂື້ນແລ້ວ ທີ່ໂກໂຊໂວ ເປັນເທື່ອທຳອິດ ນັບແຕ່ໂກໂຊໂວ ທີ່ພົນລະເມືອງສ່ວນໃຫຍ່ເປັນຊາວ ALBANIA ໄດ້ປະກາດເປັນເອກກະລາດ ຈາກເຊີເບຍ ໃນປີ 2008. ມີປະຊາຊົນຫລາຍກ່ວາ ນື່ງລ້ານຫ້າແສນຄົນ ມີສິດປ່ອນບັດໃນການເລືອກຕັ້ງທ້ອງຖິ່ນ ໃນມື້ນີ້ ຊື່ງເປັນການເລືອກຕັ້ງເອົາເຈົ້າເມືອງ ແລະສະມາຊິກສະພາປົກຄອງ ສຳລັບ 36 ເຂດເທດສະບານ ໂຮມທັງເມືອງຫລວງ PRISTINA. ມີ 74 ພັກການເມືອງກັບກຸ່ມຈັດຕັ້ງ ຕ່າງໆຂອງພົນລະເມືອງ ປະກອບສ່ວນໃນການເລືອກຕັ້ງ ໂຮມທັງຜູ້ສະມັກເລືອກຕັ້ງ ຈຳນວນນື່ງ ທີ່ເປັນຊາວເຊີເບຍ ແຕ່ພວກເຊື້ອສາຍເຊີເບຍ ທີ່ເປັນຊົນກຸ່ມນ້ອຍໃນໂກໂຊໂວນັ້ນ ໄດ້ຂູ່ທີ່ຈະຂວ້າມບາດການເລືອກຕັ້ງ. ວັນເສົາວານນີ້ ອົງການເນໂຕໄດ້ນຳເອົາກຳລັງຣັກສາຄວາມສະງົບ ໄປປົດຂະນວນລະເບີດມືທີ່ບໍ່ທັນແຕກລູກນື່ງ ທີ່ຖືກພົບເຫັນຢູ່ຫ້ອງການ ຂອງຝ່າຍຄ້ານພັກນື່ງ. ເຈົ້າໜ້າທີ່ ໄດ້ວາງແຜນວ່າ ຈະສົ່ງກຳລັງຮັກສາຄວາມສະງົບ ຫ້າພັນຄົນ ອອກປະຕິບັດງານ ຢູ່ຕາມບ່ອນປ່ອນບັດ ລຸນຫລັງໄດ້ເກີດເຫດຮ້າຍນ້ອຍໆຫລາຍຄັ້ງ ລະວ່າງການໂຄສະນາຫາສຽງເລືອກຕັ້ງ. ຄາດວ່າຈະຮູ້ຈັກຜົນການ ເລືອກຕັ້ງຂັ້ນຕົ້ນ ໃນບໍ່ເທົ່າໃດຊົ່ວໂມງ ຫລັງຈາກປ່ອນປ່ອນບັດອັດລົງ
ຄລິນຕັນ-ພາກຕາເວັນອອກກາງ: ອະດີດປະທານາທິບໍດີ ສະຫະລັດ ທ່ານ BILL CLINTON ກຳລັງຮຽກຮ້ອງໃຫ້ ອິສຣາແອລກັບປາແລສໄຕນ໌ ປະລະຄວາມຂັດແຍ້ງກັນຕ່າງໆ ແລ້ວເຄື່ອນໄຫວ ໄປສູ່ສັນຕິພາບ ໂດຍທ່ານກ່າວວ່າ ພວກເຂົາເຈົ້າບໍ່ສາມາດທີ່ຫລີກໜີ ຈາກອັນທີ່ທ່ານເອີ້ນວ່າ "ອະນາຄົດທີ່ມີຮ່ວມກັນ" ນັ້ນໄດ້. ທ່ານຄລິນຕັນໄດ້ກ່າວຄຳຮຽກຮ້ອງດັ່ງກ່າວ ໃນວັນເສົາວານນີ້ ຢູ່ສູນອະນຸສອນແຫ່ງນື່ງ ທີ່ອຸທິດໃຫ້ແກ່ທ່ານ YITZHAK RABIN ອະດີດນາຍົກລັດຖະມົນຕີ ອິສຣາແອລ ທີ່ນະຄອນ TEL AVIV ປະເທດອິສຣາແອລ. ທ່ານ RABIN ໄດ້ຖືກລອບສັງຫານ ເມື່ອເດືອນພະຈິກ ປີ 1995 ໂດຍຊາວຍິວຫົວຮຸນແຮງຄົນ ນື່ງ ທີ່ຄັດຄ້ານຕໍ່ຄວາມພະຍາຍາມຂອງທ່ານ ທີ່ຈະສ້າງສັນຕິພາບກັບຝ່າຍປາແລສໄຕນ໌ນັ້ນ. ທ່ານຄລິນຕັນເວົ້າວ່າ ຖ້າຫາກ ທ່ານຣາບິນ ບໍ່ຖືກລອບສັງຫານເມື່ອ 14 ປີກ່ອນ ກໍຄົງໄດ້ມີການບັນລຸຂໍ້ຕົກລົງຂັ້ນ ກວມລວມ ສຳລັບສັນຕິ ພາບໃນພາກຕາເວັນອອກກາງ ພາຍໃນເວລາ 3 ປີແລ້ວ. ທ່ານຄລິນຕັນ ຊື່ງເປັນປະທາ ນາທິບໍດີສະຫະລັດໃນເວລານັ້ນ ໄດ້ທຳງານຢ່າງໃກ້ຊິດກັບທ່ານຣາບິນ ແລະທ່ານ YASSER ARAFAT ມື້ລາງຜູ້ນຳປາແລສໄຕນ໌ ເພື່ອເຈລະຈາສັນຕິພາບກັນໃນລະວ່າງຊຸມປີ 1995 ນັ້ນ. ທັງທ່ານ ຣາບິນ ແລະທ່ານອາຣາຟັຕ ຕ່າງກໍໄດ້ຮັບລາງວັນໂນແບລ ຂະແໜງສັນຕິພາບ ສຳລັບຄວາມພະຍາຍາມຂອງພວກທ່ານ.
ຄວາມຮຸນແຮງໃນປະເທດຝຣັ່ງ: ແຜນການໂຄສະນາຂອງບໍລິສັດການຕະຫລາດຝຣັ່ງບໍລິສັດນື່ງ ເພື່ອຊັກຊວນໃຫ້ຜູ້ຄົນຊົມໃຊ້ອິນເຕີແນັຕ ໂດຍປະກາດວ່າຈະແຈກເງິນ ຈຳນວນຫລວງຫລາຍ ໃຫ້ປະຊາຊົນຢູ່ກາງເມືອງນັ້ນ ໄດ້ປ່ຽນໄປເປັນຄວາມຮຸນແຮງໃນວັນເສົາວານນີ້ ຫລັງຈາກທີ່ບໍລິສັດປ່ຽນແຜນ ບໍ່ແຈກເງິນຕາມທີ່ໄດ້ ປະກາດໄວ້ ຍ້ອນເຈົ້າໜ້າທີ່ຫ້າມ. ຕຳຫລວດກ່າວວ່າ ຫລັງຈາກມີປະຊາຊົນຫລາຍກ່ວາຫ້າພັນຄົນລຸລັ່ງໄປອັ່ງແອກັນ ຢູ່ບໍລິເວນໃຈກາງເມືອງ ໃກ້ໆກັບຫໍ EIFFEL ເຈົ້າໜ້າທີ່ເລີຍຮ້ອງຂໍໃຫ້ທາງ ບໍລິສັດເລີກລົ້ມແຜນການ ເພາະຢ້ານຈະມີການຍາດແຍ່ງກັນເອົາເງິນ. ພວກຄົນຈຳນວນຫລວງຫລາຍ ທີ່ລໍຖ້າເປັນ ເວລາຫລາຍໆຊົ່ວໂມງນັ້ນ ເກີດໂມໂຫໂທໂສ ຫລັງຈາກໄດ້ຊາບວ່າຈະບໍ່ມີການແຈກເງິນ ກໍເລີຍພາກັນອາລະວາດ ກໍ່ຄວາມຮຸນແຮງ ທຸບປ້ອງອ້ຽມຮ້ານຄ້າຮ້ານຂາຍ ແລະປີ້ນລົດຢ່າງນ້ອຍຄັນນື່ງ. ຕຳຫລວດໄດ້ຈັບ ຢ່າງນ້ອຍ 10 ຄົນ. ອົງການຂ່າວສານຝຣັ່ງລາຍງານຂ່າວໃນເວລາຕໍ່ມາວ່າ ປະທານຂອງບໍລິສັດການຕະຫລາດດັ່ງກ່າວ ໄດ້ປະກາດວ່າ ຕົນຈະເອົາເງິນທີ່ວາງແຜນວ່າຈະແຈກໃຫ້ປະຊາຊົນນັ້ນ ໄປມອບໃຫ້ອົງການກຸສົນແທນ.
