ກຳແພງເບີລິນ:
ປະຊາຊົນແລະທາງການເຢຍລະມັນ ພາກັນສະເຫລີມລະຫລອງຄົບຮອບ
20 ຂອງການພັງລົງຂອງກຳແພງເບີລິນ ໃນວັນທີ 9 ພະຈິກມື້ນີ້ ດ້ວຍການຈັດພິທີທາງສາດສະນາ
ທຳການສວດມົນພາວະນາ ແລະໃຫ້ຄຳໝັ້ນສັນຍາທີ່ຈະຈື່ຈຳຄວາມສຸກ ສະນຸກສະບາຍແລະຄວາມມ່ວນຊື່ນ
ຈາກການໄດ້ຊົມໄຊ້ອິດສະລະເສລີພາບນັ້ນ. ນາຍົກ ລັດຖະມົນຕີເຢຍລະມັນ ທ່ານນາງ ANGELA
MERKEL ໄດ້ເລິ່ມຕົ້ນ ການສະຫລອງໃນມື້ນີ້ ພ້ອມກັບປະທານາທິບໍດີ HORST KOEHLER ແລະຜູ້ນຳຄົນ ອື່ນໆ
ດ້ວຍການໄປຮ່ວມໃນການສວດມົນພາວະນາ ຢູ່ໂບດ GETHSEMANE ໃນເມືອງເບີລິນ. ລັດຖະມົນຕີການຕ່າງປະເທດສະຫະລັດ
ທ່ານນາງ HILLARY CLINTON ກໍຮ່ວມຢູ່ໃນກຸ່ມພວກເຈົ້າໜ້າທີ່ຂັ້ນສູງທີ່ປະກອບສ່ວນໃນພິທີດັ່ງກ່າວນຳ.
ປະຊາຊົນຫລາຍກ່ວານື່ງແສນຄົນໄດ້ໄປມີໜ້າ
ຢູ່ນະຄອນເບີລິນ ເພື່ອຮ່ວມໃນການສະເຫລີມສະຫລອງໃນມື້ນີ້ ທີ່ເຈົ້າໜ້າທີ່ເຢຍລະມັນເອີ້ນວ່າ
ເປັນບຸນສະຫລອງອິດສະລະເສ ລີພາບ ຊື່ງມີໂຮມທັງການສະແດງຄອນເສີດດົນຕີຣ໊ອກ ຈູດ ບັ້ງໄຟດອກ ແລະມີການຈັດວາງໂດມີໂນ ທີ່ເຮັດດ້ວຍໂຟມ
ເປັນແຖວຍາວຢຽດ ຊື່ງຈະມີການຍູ້ໃຫ້ພັງລົງຕໍ່ໆກັນໄປ ຕາມເສ້ນທາງທີ່ເນ່ງໄປໃສ່ບ່ອນທີ່ເຄີຍເປັນທີ່ຕັ້ງຂອງກຳແພງເບີລິນ
ທີ່ແບ່ງແຍກເບີລິນຕາເວັນອອກ ກັບເບີລິນຕາເວັນຕົກນັ້ນ. ການພັງລົງຂອງກຳແພງເບີລິນ
ໃນປີ 1989 ໄດ້ແຜ້ວທາງໄປ ສູ່ການທ້ອນໂຮມ ເຢຍລະມັນຕາເວັນອອກກັບເຢຍລະມັນຕາເວັນຕົກເຂົ້າກັນ
ຊື່ງມີຂື້ນຢ່າງເປັນທາງການ ໃນວັນທີ
3 ເດືອນຕຸລາ ປີ 1990.
ປາກິສຖານ: ຕຳຫລວດປາກິສຖານກ່າວວ່າ ຄົນວາງລະເບີດສະລະຊີບຄົນນື່ງ ທີ່ນັ່ງມາໃນລົດລາກ ໄດ້ເຮັດໃຫ້ສາມຄົນເສຍຊີວິດ ໃນເມືອງ PESHAWAR ນື່ງມື້ຫລັງຈາກຄົນຮ້າຍວາງລະເບີດສະລະຊີບອີກຄົນນື່ງ ໄດ້ສັງຫານ 13 ຄົນ ຢູ່ຕະຫລາດທີ່ແອອັດດ້ວຍຜູ້ຄົນແຫ່ງນື່ງໃນເມືອງດຽວກັນ ທາງພາກຕາເວັນຕົກສ່ຽງເໜືອຂອງປາກິສຖານ. ຕຳຫລວດເວົ້າວ່າ ຄົນຮ້າຍໄດ້ບີບຂະນວນລະເບີດຢູ່ດ່ານກວດກາແຫ່ງນື່ງ ໃນວັນຈັນມື້ນີ້ ບົນເສ້ນທາງທີ່ມີຄົນທຽວຫລາຍສາຍນື່ງ ທີ່ເນ່ງອ້ອມເມືອງເປຊາວາ. ມີຜູ້ໄດ້ຮັບບາດເຈັບ 5 ຄົນໃນການໂຈມຕີມື້ນີ້. ການໂຈມຕີໃນມື້ວານນີ້ ໄດ້ສັງຫານເຈົ້າເມືອງທ້ອງຖິ່ນຄົນນື່ງ ຄືທ່ານ ABDUL MALIK. ເຈົ້າເມືອງຜູ້ເຄາະຮ້າຍຄົນນີ້ ເຄີຍສະນັບສະນູນພວກຕາລີບານມາກ່ອນ ແຕ່ໄດ້ຫັນປ່ຽນໄປເຂົ້າຂ້າງຝ່າຍລັດຖະບານ ແລະໄດ້ປຸກລະດົມຊາວບ້ານ ໃຫ້ພາກັນຕັ້ງກອງຫລອນຂື້ນມາ ເພື່ອຕໍ່ສູ້ກັບພວກຕາລີບານ ທີ່ໄດ້ອ້າງເອົາຄວາມຮັບຜິດຊອບໃນການໂຈມຕີ ທີ່ໄດ້ສັງຫານທ່ານ MALIK ນັ້ນ.
ອິຣັກ: ສະພາແຫ່ງຊາດອິຣັກໄດ້ຮັບຜ່ານກົດໝາຍເລືອກຕັ້ງ ທີ່ລໍຖ້າກັນມາເປັນເວລາດົນນານນັ້ນ ເພື່ອໃຫ້ ສາມາດຈັດການເລືອກຕັ້ງແຫ່ງຊາດ ຂື້ນໄດ້ໃນເດືອນມັງກອນ ປີໜ້າ. ຮ່າງກົດໝາຍດັ່ງກ່າວຖືກຮັບຜ່ານ ເອົາ ໃນວັນອາທິດວານນີ້ ດ້ວຍການເຫັນ ພ້ອມນຳຈາກຜູ້ແທນ 141 ຄົນໃນຈຳນວນ 195 ຄົນທີ່ເຂົ້າປະ ຊຸມ. ພວກຜູ້ແທນສາມາດຕົກລົງກັນໄດ້ ໃນບັນຫາສຳຄັນຂໍ້ນື່ງທີ່ເປັນຫົວຂໍ້ຖົກຖຽງກັນ ຄືບັນຫາກ່ຽວກັບວ່າ ຈະຈັດການເລືອກຕັ້ງຂື້ນແບບໃດ ຢູ່ໃນເມືອງ KIRKUK ທີ່ມີຫລາຍຊົນເຜົ່າອາໃສຢູ່ ແລະຮັ່ງມີດ້ວຍນ້ຳ ມັນ ທາງພາກເໜືອຂອງອິຣັກນັ້ນ. ໃນລະວ່າງກອງປະຊຸມລົງຄະແນນສຽງກ່ຽວກັບຮ່າງກົດໝາຍເລືອກຕັ້ງ ນັ້ນ ເອກອັກຄະລັດຖະທູດສະຫະລັດ ປະຈຳອິຣັກ ທ່ານ CHRISTOPHER HILL ແມ່ນໄດ້ແລ່ນໄປແລ່ນມາ ລະວ່າງພັກຝ່າຍຂອງພວກຜູ້ແທນທີ່ເປັນຄູ່ແຂ່ງກັນ ເພື່ອກົດດັນໃຫ້ເຂົາເຈົ້າ ຕົກລົງກັນແລະຮັບຜ່ານເອົາຮ່າງກົດໝາຍນັ້ນ. ຢູ່ທຳນຽບຂາວ ປະທານາທິບໍດີບາຣັກ ໂອບາມາ ໄດ້ສະແດງຄວາມຍິນດີນຳ ການຮັບຜ່ານກົດໝາຍດັ່ງກ່າວ ໂດຍກ່າວວ່າມັນເປັນຄວາມກ້າວໜ້າອັນສຳຄັນ ໄປສູ່ການຄ້ຳປະກັນໃຫ້ມີ ສັນຕິພາບທີ່ໝັ້ນຄົງຖາວອນຢູ່ໃນອິຣັກ. ທ່ານກ່າວອີີກວ່າ ນອກນັ້ນແລ້ວ ກໍຍັງຈະແຜ້ວທາງໃຫ້ມີການຖອນອອກໄປຈາກອິຣັກ ຢ່າງເປັນລະບຽບຮຽບຮ້ອຍ ຂອງກອງທະຫານສະຫະລັດ ພາຍໃນເດືອນກັນຍາປີໜ້າ.
ສະຫະລັດ - ອິສຣາແອລ: ທ່ານບາຣັກ ໂອບາມາ ມີກຳໜົດຈະພົບປະຫາລືກັບທ່ານ BENJAMIN NETANYAHU ນາຍົກລັດຖະມົນຕີອິສຣາແອລ ໃນວັນຈັນມື້ນີ້ ທີ່ນະຄອນຫລວງວໍຊິງຕັນ. ທ່ານເນຕັນຢາຮູກຳລັງຢ້ຽມຢາມວໍຊິງຕັນ ເພື່ອກ່າວຄຳປາໃສຕໍ່ກອງປະຊຸມປະຈຳປີຂອງສະມາພັນຊາວຍິວ ແຫ່ງພາກພື້ນອາເມລິກາເໜືອ. ເຈົ້າໜ້າທີ່ທຳນຽບຂາວກ່າວໃນວັນອາທິດວານນີ້ວ່າ ພວກຜູ້ນຳທັງສອງທ່ານ ຈະພົບປະຫາລືກັນໃນຕອນຄ່ຳວັນຈັນມື້ນີ້ ກໍຄືເຊົ້າວັນອັງຄານຢູ່ປະເທດລາວ ແຕ່ຈະບໍ່ປາກົດໂຕຮ່ວມກັນ ຕໍ່ໜ້າ ພວກນັກຂ່າວທີ່ປະຈຳຢູ່ທຳນຽບຂາວ. ລັດຖະບານທ່ານໂອບາມາໄດ້ພະຍາຍາມມາເປັນເວລາຫລາຍເດືອນແລ້ວ ເພື່ອກົດດັນໃຫ້ທ່ານເນຕັນຢາຮູ ກັບທ່ານ MAHMOUD ABBAS ປະທານາທິບໍດີປາແລສໄຕນ໌ ຟື້ນຟູການເຈລະຈາສັນຕິພາບລະວ່າງກັນ. ສາຍພົວພັນລະວ່າງສະຫະລັດ ກັບອິສຣາແອລ ໄດ້ເຄ່ງຕຶງຂື້ນ ນັບແຕ່ທ່ານເນຕັນຢາຮູໄດ້ປະຕິເສດຕໍ່ຄຳຮຽກຮ້ອງຂອງ ປະທນາທິບໍດີໂອບາມາ ທີ່ຢາກໃຫ້ອິສຣາແອລຢຸດເຊົາ ການກໍ່ສ້າງບ້ານເຮືອນຂອງຊາວຍິວ ໃນເຂດ WEST BANK ຂອງຊາວປາແລສໄຕນ໌ ທີ່ຢູ່ໃຕ້ການຄອບຄອງຂອງອິສຣາແອລນັ້ນ.
ຊີມບາບເວ: ຜູ້ຊ່ວຍຂັ້ນສູງຄົນນື່ງຂອງນາຍົກລັດຖະມົນຕີ MORGAN TSVANGIRAI ຖືກນຳໂຕຂື້ນສານໃນວັນຈັນມື້ນີ້ ໃນຂໍ້ຫາກໍ່ການຮ້າຍແລະລັກລອບເອົາອາວຸດເຂົ້າປະເທດ. ພັກຂະບວນການເພື່ອການ ປ່ຽນແປງໄປສູ່ປະຊາທິປະໃຕ ຫລືພັກ MDC ຂອງທ່ານ TSVANGIRAI ກ່າວວ່າການດຳເນີນຄະດີຕໍ່ທ່ານ ROY BENNETT ນັ້ນ ແມ່ນມີເປົ້າໝາຍທາງການເມືອງ ແລະຕາມຄຳເວົ້າຂອງທ່ານ TSVAN-GIRAI ເອງນັ້ນ ແມ່ນເປັນການດຳເນີນຄະດີ ທີ່ເຕັມໄປດ້ວຍຄວາມມຸ່ງຮ້າຍ. ທ່ານ BENNETT ຊື່ງເປັນຄົນຜິວຂາວແລະອະດີດກະເສດຕະກອນປູກກາເຟ ເປັນນື່ງໃນບັນດາຜູ້ນຳພັກ MDC ທີ່ມີຊື່ສຽງ ທັງເປັນນາຍຄັງຂອງພັກ ແລະໄດ້ຖືກແຕ່ງຕັ້ງໃຫ້ເປັນຮອງລັດຖະມົນຕີວ່າການກະຊວງກະສິກຳ ໃນຄະນະລັດຖະ ບານແບ່ງປັນອຳນາດຂອງ ZIMBABWE. ທ່ານໄດ້ຖືກຈັບເມື່ອເດືອນກຸມພາ ຕົ້ນປີ ໃນຂໍ້ຫາທີ່ຍ້ອນຫລັງຄືນໄປຍັງປີ 2006 ເວລາພໍ່ຄ້າອາວຸດຄົນນື່ງຖືກຈັບແລະຖືກກ່າວຫາໃນເບື້ອງຕົ້ນວ່າ ວາງແຜນຈະລອບສັງຫານປະທານາທິບໍດີ ROBERT MUGABE. ພໍ່ຄ້າອາວຸດທີ່ຖືກຈັບໄດ້ເຊັນໜັງສື ທີ່ເອົາທ່ານ BENNETT ແລະຄົນອື່ນໆອີກຫລາຍຄົນໄປພົວພັນນຳແຜນການດັ່ງກ່າວ ແຕ່ຜູ້ກ່ຽວໄດ້ປ່ຽນຄຳເວົ້າໃນເວລາຕໍ່ມາ ແລະບອກພວກນັກຂ່າວວ່າ ເຂົາຖືກທໍລະມານແລະບັງຄັບໃຫ້ເຊັນໜັງສືກ່າວຫາທ່ານ BENNETT ນັ້ນ.
ຟີລິບປິນ: ລັດຖະບານຟີລິບປິນ ໄດ້ອອກມາກ່າວປະຕິຍານໃນວັນຈັນມື້ນີ້ ວ່າຈະຕາມລ່າໂຕໃຫ້ໄດ້ ພວກຫົວຕໍ່ສູ້ທີ່ມີສ່ວນກ່ຽວຂ້ອງກັບກຸ່ມກໍ່ການຮ້າຍ AL-QAIDA ທີ່ທາງການສົງໃສວ່າ ເປັນຜູ້ລັກຈັບໂຕຫົວໜ້າ ຫລືຄູໃຫຍ່ຂອງໂຮງຮຽນ ຄົນນື່ງໄປ ແລ້ວຕັດຫົວຜູ້ກ່ຽວ. ຕຳຫລວດທີ່ເກາະໂຮໂລ ທາງພາກໃຕ້ຂອງຟີລິບປິນເວົ້າວ່າ ຫົວຂອງທ່ານ GABRIEL CANIZARES ໄດ້ຖືກພົບເຫັນຢູ່ໃນຖົງຖົງນື່ງ ຢູ່ປັ້ມນ້ຳມັນແຫ່ງ ນື່ງ ໃນຕອນເຊົ້າມືດວັນຈັນມື້ນີ້ 22 ມື້ຫລັງຈາກທີ່ຜູ້ກ່ຽວຖືກລັກຈັບໂຕໄປ ແຕ່ບໍ່ເຫັນຕົນໂຕຂອງທ່ານ. ເຈົ້າໜ້າທີ່ໃຫ້ຮູ້ອີກວ່າ ກ່ອນໜ້ານີ້ ພວກກຸ່ມຫົວຮຸນແຮງ ABU SAYYAF ໄດ້ຮຽກເອົາຄ່າໄຖ່ ຈຳນວນ 42 ພັນດອລລ່າ ເພື່ອແລກກັບການປ່ອຍໂຕທ່ານ CANIZARES ແຕ່ວ່າທາງເຈົ້າໜ້າທີ່ແລະຍາດພີ່ນ້ອງຂອງທ່ານບໍ່ຍອມຈ່າຍ. ໂຄສົກຍິງຄົນນື່ງຂອງປະທານາທິບໍດີ GLORIA ARROYO ກ່າວໃນຄຳຖະ ແຫລງສະບັບນື່ງທີ່ແຈກຢາຍໃຫ້ສື່ມວນຊົນໃນວັນຈັນມື້ນີ້ວ່າ ທາງການຟີລິບປິນ ມີຄວາມມຸ່ງໝັ້ນຢ່າງເດັດ ດ່ຽວ ທີ່ຈະປາບແລະເຮັດໃຫ້ອັນທີ່ນາງເອີ້ນວ່າ ຄວາມໂຫດຮ້າຍປ່າເຖື່ອນ ທີ່ຊົ່ວຮ້າຍ ໜ້າຂະຫຍະຂະແຫຍງ ແລະໄຮ້ມະນຸດສະທຳ ຂອງກຸ່ມ ABU SAYYAF ນັ້ນຢຸດຕິລົງ. ພວກກຸ່ມຊາວມຸສລິມຫົວຮຸນແຮງທີ່ວ່ານີ້ ມີຊື່ສຽງເນົ່າເໝັນ ຍ້ອນການວາງລະເບີດໂຈມຕີ ການລັກຈັບໂຕຜູ້ຄົນໄປຮຽກຄ່່າໄຖ່ ແລະຂ້າຄົນໂດຍວິທີຕັດຫົວ.
ກຳປູເຈຍ- ໄທ: ນາຍົກລັດຖະມົນຕີ HUN SEN ກ່າວວ່າ ທ່ານທັກສິນ ຊິນນະວັດ ອະດີດຜູ້ນຳໄທທີ່ລີ້ໄພຢູ່ຕ່າງປະເທດ ຈະໄປຢ້ຽມຢາມກຳປູເຈຍ ເພື່ອກ່າວຄຳປາໃສຕໍ່ນັກເສດຖະສາດກຸ່ມນື່ງ ຊື່ງເປັນການເຄື່ອນໄຫວທີ່ຄາດວ່າ ຈະເຮັດໃຫ້ການຜິດຖຽງກັນທາງການທູດ ລະວ່າງເຂມນກັບໄທ ຮ້າຍແຮງໜັກຂື້ນຕື່ມ. ທ່ານ ຮຸນເຊນ ບອກກອງປະຊຸມໃຫ້ສຳພາດຂ່າວ ໃນວັນອາທິດວານນີ້ວ່າ ທ່ານ ທັກສິນຈະກ່າວຄຳປາໃສຕໍ່ພວກນັກເສດຖະສາດເຂມນ ຈຳນວນ 300 ກ່ວາຄົນ ໃນວັນທີ 12 ເດືອນນີ້. ຄຳປະກາດໃຫ້ຮູ້ດັ່ງກ່າວນີ້ ແມ່ນຕິດຕາມມາຫລັງຈາກທີ່ມີການແຕ່ງຕັ້ງໃນອາທິດຜ່ານມາ ໃຫ້ທ່ານທັກສິນເປັນທີ່ປຶກສາດ້ານເສດຖະກິດຂອງລັດຖະບານກຳປູເຈຍ. ທາງການໄທໄດ້ຕອບໂຕ້ ໂດຍການຮຽກໂຕເອກອັກຄະລັດ ຖະທູດຂອງຕົນ ກັບຄືນປະເທດ ຊື່ງກຳປູເຈຍກໍໄດ້ສະໜອງຕອບໃນທຳນອງດຽວກັນ.
ຈີນ-ສະຫະລັດ(ໃນພາກສະຫລູບຂ່າວ): ນາຍົກລັດຖະມົນຕີຈີນ ທ່ານ WEN JIABAO ກ່າວວ່າ ທ່ານມີຄວາມຍິນດີນຳຮ່ອງຮອຍຕ່າງໆ ທີ່ສະແດງວ່າມີການດີຂື້ນໃນເສດຖະກິດຂອງສະຫະລັດນັ້ນ ແຕ່ພ້ອມດຽວກັນ ທ່ານກໍຫວັງວ່າວໍຊິງ ຕັນຈະຮັກສາການຂາດດຸນງົບປະມານຂອງຕົນໄວ້ "ໃນຂະໜາດທີ່ເໝາະສົມ." ທ່ານ WEN JIABAO ໄດ້ຖະແຫລງເຊ່ນນັ້ນ ໃນວັນອາທິດວານນີ້ ທີ່ເມືອງ ຕາກອາກາດ SHARM EL-SHEIK ປະເທດອີຈິບ ບ່ອນທີ່ທ່ານໄປຮ່ວມກອງປະຊຸມສອງວັນ ກ່ຽວກັບການຮ່່ວມມືລະວ່າງຈີນກັບອັຟຟຣິກາ. ທ່ານນາຍົກລັດ ຖະມົນຕີຈີນຖະແຫລງຕໍ່ກອງປະຊຸມໃຫ້ສຳພາດຂ່າວວ່າ ທ່ານຢາກໃຫ້ ສະຫະລັດຮັກສາການຂາດດຸນງົບປະມານຂອງຕົນໄວ້ ໃນລະດັບທີ່ຄວບຄຸມໄດ້ ເພາະວ່າມັນຈະຊ່ວຍຕໍ່ການຟື້ນໂຕຄືນຂອງເສດຖະກິດໂລກ ແລະຄ້ຳປະກັນໃຫ້ມີສະຖຽນລະພາບໃນອັດຕາແລກປ່ຽນຂອງເງິນຕາ. ຈີນເປັນເຈົ້າໜ້າລາຍໃຫຍ່ທີ່ສຸດຂອງລັດຖະບານ ສະຫະລັດ ແລະໄດ້ລົງທຶນ ປະມານ 70% ຂອງເງິນຕາສຳລອງຕ່າງປະເທດຂອງຕົນ ຫລືປະມານ 14 ພັນຕື້$ ໃສ່ການເຊື້ອເອົາຊັບສິນຕ່າງໆໃນສຫະລັດໄວ້ ໂດຍສະເພາະກໍແມ່ນ ພັນທະບັດຂອງລັດຖະບານສະຫະລັດນັ້ນ.
