ອັຟການິສຖານ(ໃນພາກສະຫລູບຂ່າວ): ຂ່າວຫລ້າສຸດຈາກອັຟການິສຖານແຈ້ງວ່າ ຄະນະກຳມາທິການເລືອກຕັ້ງທີ່ເປັນເອກກະ ລາດຂອງອັຟການິສຖານ ໄດ້ປະກາດຍົກເລີກການເລືອກຕັ້ງຮອບສອງ ທີ່ກຳໜົດໃສ່ວັນເສົາສັບປະດານີ້ແລ້ວ ແລະໄດ້ປະກາດໃຫ້ປະທານາທິບໍດີ HAMID KARZAI ເປັນຜູ້ຊະນະໃນການເລືອກຕັ້ງ ທີ່ກາຍມາເປັນບັນຫາໂຕ້ແຍ້ງຖົກຖຽງກັນຂອງປະເທດນັ້ນ. ພວກເຈົ້າໜ້າທີ່ໃນຄະນະກຳມາທິການດັ່ງກ່າວຖະແຫລງໃຫ້ຮູ້ໃນວັນຈັນມື້ນີ້ວ່າ ເຂົາເຈົ້າຕັດສິນໃຈຍົກເລີກການເລືອກຕັ້ງຮອບສອງ ຫລັງຈາກຄູ່ແຂ່ງຂອງທ່ານ KARZAI ຄືທ່ານ ABDULLAH ABDULLAH ນັ້ນ ໄດ້ປະກາດຖອນໂຕ ໃນວັນອາທິດວານນີ້ ຍ້ອນວິຕົກວ່າ ຈະມີການສໍ້ໂກງການເລືອກຕັ້ງ ຄືກັນກັບໃນຄັ້ງກ່ອນ.
ຂ່າວໃຫຍ່
ປາກິສຖານ: ຕຳຫລວດປາກິສຖານກ່າວວ່າ ຄົນວາງລະເບີດສະລະຊີບຄົນນື່ງໄດ້ທຳການໂຈມຕີ ຢູ່ໃກ້ໆ ກັບກອງບັນຊາການຂອງກອງທັບໃນເມືອງ RAWALPINDI ເຮັດໃຫ້ຢ່າງນ້ອຍ 34 ຄົນເສຍຊີວິດແລະອີກ 30 ກ່ວາຄົນໄດ້ຮັບບາດເຈັບ ໃນວັນຈັນມື້ນີ້. ຂະນະດຽວກັນ ທາງລັດຖະບານປາກິສຖານກໍໄດ້ສະເນີໃຫ້ເງິນລາງວັນ ສຳຫລັບການຈັບໂຕ ບໍ່ວ່າເປັນຫລືຕາຍ ພວກຜູ້ນຳກຸ່ມຕາລີບານຢູ່ໃນປະເທດ. ປະກາດ ສະບັບນື່ງຂອງລັດຖະບານຢູ່ໃນໜ້າໂຄສະນາຂອງໜັງສືພິມ ສະເນີໃຫ້ເງິນລາງ ຮອດຫ້າລ້ານດອລລ່າ ສຳຫລັບການຈັບໂຕ ຫລືຂໍ້ມູນທີ່ນຳໄປສູ່ການຈັບໂຕ ນາຍ HAKIMULLAH MEHSUD ຫົວໜ້າກຸ່ມຕາລີບານໃນປາກິສຖານ ແລະຜູ້ນຳຕາລີບານຄົນອ່ືນໆອີກ ສິບກ່ວາຄົນ. ກອງທັບປາກິສຖານກຳລັງຕໍ່ສູ້ຢ່າງເອົາຈິງເອົາຈັງກັບພວກຫົວຮຸນແຮງເຫລົ່ານີ້ ໃນການປະຕິບັດການບຸກໂຈມຕີຄັ້ງໃຫຍ່ໃນເຂດ WARIZISTAN ໃຕ້ຂອງພວກຊົນເຜົ່າ ທາງກ້ຳຕາເວັນຕົກສ່ຽງເໜືອຂອງປະເທດ. ພວກຫົວຮຸນແຮງໄດ້ທຳການໂຈມຕີໂຕ້ຕອບຄືນຫລາຍບັ້ນ ໃນເດືອນແລ້ວນີ້ ສົ່ງຜົນໃຫ້ຫລາຍຮ້ອຍຄົນເສຍຊີວິດ. ຄວາມຮຸນແຮງຄັ້ງຫລ້າສຸດນີ້ ໄດ້ກະຕຸ້ນໃຫ້ອົງການສະຫະປະຊາຊາດ ປະກາດຖອນພະນັກງານ ຊາວຕ່າງປະເທດຂອງຕົນ ທີ່ປະຕິບັດງານຊ່ວຍເຫລືອ ຢູ່ໃນເຂດຕາເວັນຕົກສ່ຽງເໜືອຂອງປາກິສຖານນັ້ນ ອອກໄປ ຍ້ອນຄວາມເປັນຫ່ວງດ້ານຄວາມປອດໄພ.
ອັຟການິສຖານ: ທ່ານ BAN KI MOON ເລຂາທິການໃຫຍ່ອົງການສະຫະປະຊາຊາດເດີນ ທາງໄປຮອດນະຄອນຫລວງກາບູລ ໃນວັນຈັນມື້ນີ້ ເພື່ອສົນທະນາຫາລືກັບປະທານາທິບໍດີ HAMID KARZAI ແລະທ່ານ ABDULLAH ABDULLAH ອະດີດຄູ່ແຂ່ງຂອງທ່ານ KARZAI ໃນການເລືອກຕັ້ງປະທາ ນາທິບໍດີອັຟການິສຖານ. ການເດີນທາງໄປຢ້ຽມຢາມຂອງທ່ານພັນກີມູນໃນຄັ້ງນີ້ ມີຂື້ນໃນເວລາທີ່ມີຄວາມຫລໍ່ແຫລມທາງ ການເມືອງຂອງອັຟການິສຖານ ຫລັງຈາກທີ່ທ່ານອັບດູລລາ ໄດ້ປະກາດຖອນໂຕອອກຈາກການເລືອກຕັ້ງຮອບສອງ ຫລືຮອບຕັດສິນຊີ້ຂາດ ຍ້ອນຄວາມເປັນຫ່ວງກ່ຽວກັບການສໍ້ໂກງການເລືອກຕັ້ງ ຊື່ງການຖອນໂຕຂອງທ່ານເທົ່າກັບເປັນການມອບໄຊຊະນະໃນການເລືອກຕັ້ງ ໃຫ້ທ່ານ KARZAI ເຖິງແມ່ນພວກເຈົ້າໜ້າທີ່ອັຟການິສຖານຈະໄດ້ປະກາດໄປແລ້ວວ່າ ການເລືອກຕັ້ງຮອບທີສອງ ໃນວັນທີ 7 ເດືອນພະຈິກນີ້ ຈະດຳເນີນໄປຕາມແຜນກໍຕາມ.
ອິຣ່ານ: ບັນດາເຈົ້າໜ້າທີ່ອິຣ່ານກ່າວວ່າ ເຂົາເຈົ້າຕ້ອງການໃຫ້ພວກຊ່ຽວຊານດ້ານວິຊາການທົບທວນຄືນເບິ່ງແຜນການຂອງຝ່າຍຕາເວັນຕົກ ທີ່ໄດ້ຮັບການໜຸນຫລັງຈາກສະຫະປະຊາດ ທີ່ຈະສົ່ງທາດຢູເຣນຽມຂອງອິຣ່ານໄປຫລອມໃໝ່ໃນຕ່າງປະເທດນັ້ນ. ລັດຖະມົນຕິການຕ່າງປະເທດຂອງອິຣ່ານກ່າວວ່າ ອິຣ່ານໄດ້ຮ້ອງຂໍໄປຍັງອົງການປາລະມານູສາກົນ ເມື່ອສອງມື້ກ່ອນ ໃຫ້ຈັດຕັ້ງຄະນະກຳມາທິການດ້ານເທັກນິກ ຂື້ນມາ ເພື່ອຕີລາຄາແຜນການທີ່ຈະສົ່ງທາດຢູເຣນຽມ ທີ່ມີຄຸນນະພາບຕ່ຳຂອງຕົນ ໄປຫລອມໃໝ່ໃນປະເທດຣັສເຊຍ ເພື່ອເສີມສະມັດຕະພາບນັ້ນ ຊື່ງຫລັງຈາກເສັດສີ້ນຂັ້ນຕອນດັ່ງກ່າວແລ້ວ ຣັສເຊຍກໍຈະສົ່ງທາດຢູເຣນຽມນັ້ນຄືນໃຫ້ອິຣ່ານ ເພື່ອນຳເອົາໄປໃຊ້ເປັນເຊື້ອໄຟ ແລ່ນເຕົາແຍກປາລະມະນູສຳຫລັບການ ຄົ້ນຄ້ວາແຫ່ງນື່ງຂອງອິຣ່ານ. ຄຳຖະແຫລງດັ່ງກ່າວຂອງທ່ານ MANOUCHEHR MOTTAKI ລັດຖະມົນຕີຕ່າງປະເທດອິຣ່ານ ຕໍ່ນັກຂ່າວຢູ່ປະເທດມາເລເຊຍ ໃນວັນຈັນມື້ນີ້ ແມ່ນຕິດຕາມມາຫລັງຈາກສະມາຊິກສະພາແຫ່ງຊາດອິຣ່ານ ຫລາຍຄົນ ໄດ້ສະແດງຄວາມເຫັນຄັດຄ້ານຕໍ່ການສົ່ງທາດຢູເຣນຽມ ໄປຫລອມໃໝ່ຢູ່ໃນຕ່າງປະເທດ.
(ໃນພາກສະຫລູບຂ່າວ): ອັງກິດແລະຣັສເຊຍ ກຳລັງຮຽກຮ້ອງໃຫ້ເຈົ້າໜ້າທີ່ອິຣ່ານສະໜອງຕອບໂດຍໄວ ຕໍ່ແຜນການທີ່ຝ່າຍຕາເວັນຕົກໄດ້ສະເນີຂື້ນມາ ທີ່ຈະສົ່ງທາດຢູເຣນຽມທີ່ມີເກຣດຕ່ຳຂອງອິຣ່ານ ໄປຫລອມໃໝ່ເພື່ອເສີມສະມັດຕະພາບ ຢູ່ຣັສເຊຍນັ້ນ. ລັດຖະມົນຕີຕ່າງປະເທດອັງກິດ ທ່ານ DAVID MILIBAND ກ່າວວ່າ ທ່ານ ແລະທ່ານ SERGEI LAVROV ຄູ່ຕຳແໜ່ງຂອງທ່ານຈາກຣັສເຊຍ ຕ່າງກໍຢາກເຫັນການສະໜອງຕອບໂດຍໄວຈາກອິຣ່ານ ກ່ຽວກັບແຜນການດັ່ງກ່າວທີ່ໄດ້ຮັບການໜູນຫລັງຈາກອົງການສະຫະປະຊາຊາດ.
ອອ໊ສເຕຣເລຍ: ເຈົ້າໜ້າທີ່ຝ່າຍການທະເລຂອງອອ໊ສເຕຣເລຍກ່າວວ່າ ເຮືອລຳນື່ງທີ່ບັນທຸກຄົນປະມານ 40 ຄົນໄດ້ຈົມລົງກາງທະເລ ທາງທິດຕາເວັນຕົກສ່ຽງໃຕ້ ຂອງໝູ່ເກາະ COCOS ທີ່ເປັນດິນແດນຂອງອອ໊ສເຕຣເລຍນັ້ນ ໄກອອກໄປປະມານ 650 ຫລັກ. ໂຄສົກຂອງທ່ານ BRENDAN O'CONNOR ລັດຖະ ມົນຕີກະຊວງພາຍໃນຂອງອອ໊ສເຕຣເລຍ ໃຫ້ຮູ້ໃນວັນຈັນມື້ນີ້ວ່າ ຢ່າງນ້ອຍ 15 ຄົນໄດ້ຖືກຊ່ວຍຊີວິດໄວ້ ໂດຍພວກກຳປັ່ນທີ່ແລ່ນຢູ່ໃນເຂດນັ້ນ. ບໍ່ເປັນທີ່ແຈ້ງຂາວວ່າ ພວກຢູ່ໃນເຮືອລຳທີ່ຫລົ້ມ ເປັນພວກຊອກຂໍລີ້ໄພ ຫລືແນວໃດ. ໃນຮອບປີຜ່ານມານີ້ ອອ໊ສເຕຣເລຍແມ່ນໄດ້ເຫັນ ຈຳນວນພວກຊອກຂໍລີ້ໄພ ທີ່ມຸ່ງໜ້າໄປຍັງຝັ່ງທະເລຂອງຕົນນັ້ນ ເພິ່ມຂື້ນ ອັນເປັນສາເຫດກໍ່ໃຫ້ເກີດການຕໍ່ສູ້ກັນທາງການເມືອງ ກ່ຽວກັບວ່າລັດຖະບານຄວນຈະປະຕິບັດແນວໃດ ກັບຄົນພວກນີ້.
ປະເທດໄທ: ຕຳຫລວດໄດ້ຈັບບຸກຄົນສອງຄົນ ທີ່ທາງການສົງໃສວ່າ ເປັນໂຕການເຮັດໃຫ້ລາຄາຫຸ້ນຕົກ ຢ່າງໃຫຍ່ ໂດຍການປ່ອຍຂ່າວກ່ຽວກັບສຸຂະພາບຂອງກະສັດໄທ ຜູ້ຊະລາພາບ ທີ່ກຳລັງຊົງປະຊວນຢູ່ນັ້ນ. ຜູ້ຕ້ອງສົງໃສຄົນນື່ງແມ່ນອະດີດແມ່ຄ້າຫຸ້ນຄົນໄທ. ຕຳຫລວດໄດ້ເຂົ້າຈັບກຸມຜູ້ກ່ຽວໃນວັນອາທິດວານນີ້ ທີ່ສະໜາມບິນສຸວັນນະພູມ ໃນນະຄອນຫລວງບາງກອກ ຫລັງຈາກນາງເດີນທາງໄປຮອດນຳຖ້ຽວບິນ ຈາກຢູໂຣບ. ພ້ອມດຽວກັນນີ້ ຕຳຫລວດໄດ້ເຂົ້າຈັບກຸມພະນັກງານຄົນນື່ງຂອງບໍລິສັດນາຍໜ້າຄ້າຫຸ້ນໄທ KT Zmico SECURITIES ໃນຍ່ານທຸລະກິດຂອງບາງກອກ. ທາງການໄທໄດ້ກ່າວຫາພວກຕ້ອງສົງໃສທັງສອງຄົນວ່າ ລະເມີດກົດໝາຍ ສະບັບປີ 2007 ທີ່ຫ້າມການນຳໃຊ້ເຄື່ອງຄຳພິວເຕີເພື່ອເຜີຍແຜ່ຂໍ້ມູນທີ່ບໍ່ ມີມູນຄວາມຈິງ ທີ່ບ່ອນທຳລາຍຄວາມໝັ້ນຄົງແຫ່ງຊາດຂອງໄທ.
ບັງຄລາເດຊ: ແຫລ່ງຂ່າວນື່ງໃນປະເທດ BANGLADESH ລາຍງານວ່າ ຕຳຫລວດໄດ້ຕັນປະຕູທາງ ເຂົ້າຕຶກວາງສະແດງແຫ່ງນື່ງໄວ້ ໃນຄວາມພະຍາຍາມເພື່ອຂັດຂວາງການເປີດງານວາງສະແດງຮູບພາບ ທີ່ຈັດຂື້ນໂດຍພວກລີ້ໄພຊາວທິເບດ. ເວບໄຊ້ທ໌ BDNews24.com ລົງຂ່າວໃນວັນຈັນມື້ນີ້ວ່າ ຢ່າງໃດກໍຕາມ ຮູບພາບຂອງອົງດາໄລ ລາມະ ຜູ້ນຳທາງດ້ານຈິດໃຈຂອງຊາວທິເບດທີ່ລີ້ໄພຢູ່ຕ່າງປະເທດ ໄດ້ຖືກນຳອອກມາວາງສະແດງ ຢູ່ທາງນອກຕຶກ ເພື່ອຫລີກເວ້ນການຂັດຂວາງຂອງຕຳຫລວດ. ຕຶກວາງສະແດງເຄື່ອງສິນລະປະ DRIK ໃນນະຄອນຫລວງ DHAKA ໄດ້ວາງແຜນໄວ້ວ່າ ຈະວາງສະແດງຮູບພາບກ່ຽວ ກັບຊະຕາກຳທີ່ຊາວທິເບດໄດ້ປະສົບພົບພໍ້ ຫລັງຈາກທີ່ກອງທັບຈີນໄດ້ເຂົ້າຍຶດເອົາດິນແດນ ຂອງເຂົາເຈົ້າ ເມື່ອຫລາຍກ່ວາ 50 ປີຜ່ານມາແລ້ວນັ້ນ.
ສະຫະລັດ-ເມັກຊິໂກ: ກະຊວງຍຸຕິທຳຂອງສະຫະລັດກ່າວວ່າ ເມັກຊິໂກໄດ້ຈັດສົ່ງພວກຫລົບໜີກົດໝາຍ ຄືນໃຫ້ສະຫະລັດ ໃນຈຳນວນຫລາຍເປັນປະວັດການໃນປີນີ້ ຄືຕັ້ງແຕ່ຕົ້ນປີ ມາຮອດປັດຈຸບັນ ແມ່ນໄດ້ສົ່ງຜູ້ຕ້ອງສົງໃສໃຫ້ ທັງໝົດ 100 ຄົນແລ້ວ ລື່ນຈຳນວນ 95 ຄົນທີ່ສົ່ງໃຫ້ໃນປີກາຍນີ້. ກະຊວງຍຸຕິທຳຂອງສະຫະລັດ ກ່າວໃນເອກກະສານຖະແຫລງຂ່າວທີ່ນຳອອກເຜີຍແຜ່ໃນວັນອາທິດວານນີ້ວ່າ ເມັກຊິໂກໄດ້ ມອບໂອນໃຫ້ ຕື່ມອີກ 11 ຄົນ ໃນໄລຍະບໍ່ເທົ່າໃດມື້ຜ່ານມານີ້ ຊື່ງພວກຕ້ອງສົງໃສເຫລົ່ານັ້ນ ຖືກກ່າວຫາໃນຂໍ້ຫາກໍ່ອາຊະຍາກຳຕ່າງໆ ອັນໂຮມທັງການ ຄາດຕະກຳ ການກໍ່ຄວາມຜິດທາງເພດ ຄ້າຢາເສບຕິດ ແລະຟອກເງິນ ຢູ່ ໃນຫົກລັດດ້ວຍກັນ.
ວັນປອດບວມໂລກ: ອົງການສະຫະປະຊາຊາດ ແລະບັນດາອົງການຈັດຕັ້ງດ້ານສາທາລະນະສຸກ ຢູ່ໃນທົ່ວໂລກ ພາກັນສະຫລອງວັນປອດບວມຂອງໂລກ ຫລື WORLD PNEUMONIA DAY ເປັນເທື່ອທຳອິດ ໃນວັນຈັນມື້ນີ້ ໂດຍການຈັດຕັ້ງແຜນການນື່ງຂື້ນມາ ທີ່ພວກເຂົາເຈົ້າກ່າວວ່າ ຈະສາມາດຊ່ວຍຊີວິດເດັກ ນ້ອຍໄວ້ໄດ້ ຫລາຍກ່ວາ 5 ລ້ານຄົນ ພາຍໃນປີ 2015. ອົງການອະນາໄມໂລກແລະກອງທືນເດັກ ຂອງສະຫະປະຊາຊາດກ່າວ ວ່າໂຣກປອດບວມເອົາຊີວິດເດັກນ້ອຍໄປນື່ງຄົນ ໃນທຸກໆຫ້າວິນາທີໃດ ຊື່ງແມ່ນຫລາຍກ່ວາໂຣກ ໝາກສຸກໝາກໃສ ໄຂ້ຍຸງແລະໂຣກເອດສ໌ ຮວມກັນ. ເດັກນ້ອຍເກືອບທັງໝົດທີ່ເສຍຊີວິດຍ້ອນໂຣກປອດບວມ ຄື 98 ສ່ວນຮ້ອຍ ແມ່ນຢູ່ໃນເຂດເອເຊຍໃຕ້ ແລະໃນເຂດໃຕ້ທະເລຊາຍ SAHARA ໃນທະວີບອັຟຟຣິກາ. ສອງອົງການດັ່ງກ່າວຂອງສະຫະປະຊາຊາດ ກັບເກືອບນື່ງຮ້ອຍອົງການອະນາໄມໃນທົ່ວໂລກກ່າວວ່າ ໂຣກປອດບວມເປັນໂຣກທີ່ປ້ອງກັນໄດ້ງ່າຍຫລາຍທີ່ສຸດ ແລະກໍປິ່ນປົວໄດ້ງ່າຍ ແຕ່ຫາກໄດ້ຮັບຄວາມສົນໃຈໜ້ອຍຫລາຍ.
