ທີ່ປາກີສຖານ: ຕຳຫລວດປາກີສຖານກ່າວວ່າ ຜູ້ວາງລະເບີດສະລະຊີບຄົນນຶ່ງໄດ້ຈູດກະນວນວັດຖຸລະເບີດຕົວຕາຍ ໃນຫ້ອງການອົງການອາຫານໂລກແຫ່ງນຶ່ງໃນກຸງອີສລາມາບັດ ນະຄອນຫລວງຂອງປາກີສຖານ ໂດຍໄດ້ສັງຫານຜູ້ຄົນໄປຢ່າງນ້ອຍ 4 ຄົນ. ທ່ານ Rehman Malik ຣັຖມຸນຕີກະຊວງພາຍໃນປາກີສຖານ ກ່າວວ່າ ປາກົດວ່າຜູ້ວາງລະເບີດສະລະຊີບຄົນນີ້ໄດ້ນຸ່ງເຄື່ອງແບບຄົນຍາມຮັກສາຄວາມປອດໄພ ແລະໃຊ້ວັດຖຸລະເບີດປະມານ 8 ກິໂລກຣາມ. ທ່ານ Malik ກ່າວຕື່ມວ່າ ການໂຈມຕີຄັ້ງນີ້ມີວັດຖຸປະສົງເພື່ອຍັບຍັ້ງບໍ່ ໃຫ້ຣັຖບານປາກີສຖານທຳການຕໍ່ສູ້ກັບພວກນັກຕໍ່ສູ້ ຫົວຮຸນແຮງ ແຕ່ທ່ານກ່າວວ່າ ການປະຕິບັດງານໃນເຂດຮ່ອມພູ Swat ແລະໃນເຂດ Waziristan ຈະດຳເນີນສືບຕໍ່ໄປ. ບັນດາເຈົ້າໜ້າທ່ີອົງການ ອາຫານໂລກ ກ່າວວ່າ ຄົນປາກີສຖານ3 ຄົນແລະຄົນອິຣັກຄົນນຶ່ງເປັນພວກທ່ີເສັຍ ຊີວິດ ແລະເວົ້າວ່າ ປະຊຊົນອີກຫລາຍຄົນໄດ້ຮັບບາດເຈັບ ຊຶ່ງບາງຄົນມີອາການສາຫັດ. ຫລາຍຊົ່ວໂມງຫລັງຈາກການໂຈມຕີ ອົງການສະຫະປະຊາຊາດກ່າວວ່າ ຕົນອັດຫ້ອງການທັງໝົດຂອງຕົນເປັນການຊົ່ວຄາວໃນນະຄອນ
ຫລວງກຸງອີສລາມາບັດນັ້ນ. ໃນຂະນະທ່ີບໍ່ມີຜູ້ໃດອ້າງເອົາຄວາມຮັບຜິດຊອບ ໃນການໂຈມຕີຄັ້ງນີ້
ການວາງລະເບີດໂຈມຕີດັ່ງກ່າວມີຂຶ້ນໃນເວລາພຽງນຶ່ງມື້ ຫລັງຈາກຄນະນຳພາກຸ່ມຕາລີບັນ ໃນປາກີສຖານ ໃຫ້ຄຳໝັ້ນສັນຍາວ່າ ຈະທຳການແກ້ແຄ້ນຕໍ່ການສັງຫານທ່ານ Baitullah Mehsud ຜູ້ນຳຂອງກຸ່ມ ດ້ວຍການຍິງລູກສອນໄຟນັ້ນ.
ກ່ຽວກັບຜູ້ໄດ້ຮັບລາງວັນໂນແບນຂະແໜງແພດສາດ:ທ່ານນາງ Elizabeth Blackburn ທ່ານ ນາງ Carol Greider ແລະທ່ານ Jack Szostak ທັງໝົດເປັນຄົນອະເມຣິກັນ ໄດ້ຮັບລາງວັນໂນແບນ ຂະແໜງການແພດປະຈຳປີນີ້. ສະຖາບັນ Karolinska ກ່າວວ່າ ຄນະກັມມະການລາງວັນໂນແບນ ໄດ້ໃຫ້ກຽດ ແກ່ພວກນັກວິທຍາສາດ 3 ທ່ານນີ້ໃນວັນຈັນມື້ນີ້ທ່ີປະເທດ Sweden ສຳລັບການຄົ້ນຄວ້າຂອງພວກທ່ານກ່ຽວກັບໂຣກມະເຮັງ ຫລື Cancer ແລະເຣື່ອງອາຍຸຂອງຄົນ. ຕາມທັມມະດາທ່ີເປັນມາ ຄນະກັມມະການລາງວັນໂນແບນມອບລາງວັນຂະແໜງແພດສາດນີ້ ໃຫ້ກ່ອນລາງວັນອື່ນໆ.
ກ່ຽວກັບນີວເຄລັຍຂອງອິຣ່ານ: ຫົວໜ້າກວດກາພະລັງນີວເຄລັຍຂອງອົງການສະຫະປະຊາຊາດກ່າວວ່າ ອິຣ່ານຈະອະນຸຍາດໃຫ້ພວກນັກກວດກາພະລັງນີວເຄລັຍຂອງອົງການໄປຢ້ຽມຢາມສະຖານທ່ີນີວເຄລັຍຂອງອິຣ່ານທ່ີຫາກໍເປີດເຜີຍໃຫ້ຮູ້ໃໝ່ໆຢູ່ໃກ້ໆກັບເມືອງ Qom ໃນວັນທີ25 ເດືອນນີ້. ທ່ານ Mahamed ElBaradei ປະກາດແຜນການນີ້ໃຫ້ຮູ້ໃນວັນອາທິດວານນີ້ ຫລັງຈາກການພົບປະກັບບັນດາເຈົ້າໜ້າທ່ີອິຣ່ານທ່ີ ກຸງເຕຮິຣ່ານແລ້ວ. ໃນລະຫວ່າງການພົບປະຫາລືກັນນັ້ນ ທາງຣັຖບານກຸງເຕຮິຣ່ານໄດ້ຕົກລົງທ່ີຈະພົບປະກັນອີກກັບ 6 ປະເທດມະຫາອຳນາດທ່ີກຸງ Vienna ໃນວັນທີ19 ເດືອນນີ້. ເວລາພວກ 6 ປະເທດເຫລົ່ານີ້ພົບປະກັນທ່ີນະຄອນເຈເນວາ ໃນວັນພະຫັດຜ່ານມານີ້ ອິຣ່ານກ່າວວ່າ ຕົນຈະອະນຸຍາດໃຫ້ມີການກວດກາສະຖານນີວເຄລັຍ
ທ່ີເມືອງ Qomນັ້ນ. ທ່ານ ElBaradei ກ່າວໃນວັນອາທິດວານນີ້ວ່າ ອົງການ ກວດກາພະລັງປະຣະມະນູສາກົນ ບໍ່ມີຫລັກຖານທ່ີໜັກແໜ້ນໃດໆທ່ີສະແດງໃຫ້ເຫັນວ່າ ຣັຖບານກຸງເຕຮິຣ່ານກຳລັງດຳເນີນໂຄງການຜລິດອາວຸດນີວເຄລັຍ ແຕ່ທ່ານກ່າວວ່າ ຕົນຍັງຈະທຳການສືບສວນຕໍ່ໄປ ກ່ຽວກັບຄຳກ່າວຫາຕ່າງໆ ທ່ີວ່າ ອິຣ່ານໄດ້ສຶກສາເຣື່ອງສ້າງອາວຸດນີວເຄລັຍນີ້. ທ່ານນາງ Susan Rice ເອກອັກຄະຣັຖທູດ ສະຫະຣັດປະຈຳສະຫະປະຊາຊາດ ກ່າວຢູ່ທ່ີກຸງວໍຊິງຕັນວ່າ ໄດ້ມີການປະເມີນການຫລາຍ ຢ່າງ ກ່ຽວກັບເເສນຍານຸພາບດ້ານນີວເຄລັຍຂອງອິຣ່ານນີ້ແຕ່ ການປະເມິນທັງໝົດບໍ່ມີຄວາມກົງກັນ.
ເກົາຫລີເໜືອແລະຈີນ: ທ່ານເຫວິ້ນເຈັຍບາວທ່ີກຳລັງທຳການຢ້ຽມຢາມເກົາຫລີເໜືອຢູ່ໃນເວ
ລານີ້ໄດ້ພົບ ປະກັບທ່ານ ກິມຢອງນຳ ປະທານສະພາແຫ່ງຊາດ ຫລືສະພານິຕິບັນຍັດຂອງເກົາ ຫລີເໜືອ ໃນມື້ທີສອງຂອງການຢ້ຽມຢາມກຸງພຽງຢ້າງຂອງທ່ານ. ອົງການຂ່າວຊິນຫົວທາງການຂອງຈີນ ບໍ່ໄດ້ບອກລາຍລະອຽດໃຫ້ຊາບຂອງການພົບປະຫາລືກັນດັ່ງກ່າວ. ທ່ານເຫວິ້ນເຈັຍບາວເດີນທາງໄປຮອດເກົາຫລີເໜືອ ໃນວັນອາທິດວານນີ້ ແລະໄດ້ຖືກຕ້ອນຮັບຈາກທ່ານກິມຢອງອີລ ຜູ້ນຳເກົາຫລີເໜືອທ່ີສະໜາມບິນກຸງພຽງຢ່າງນັ້ນ.
ແຜ່ນດິນໄຫວທີ່ອິນໂດເນເຊັຍ: ບັນດາເຈົ້າໜ້າທ່ີອິນໂດເນເຊັຍກ່າວໃຫ້ຮູ້ໃນວັນຈັນມື້ນີ້ວ່າ ເຂົາເຈົ້າໄດ້ຢຸດການຊອກຄົ້ນຫາພວກທ່ີອາດລອດຊີວິດມາໄດ້ຈາກໄພແຜ່ນດິນໄຫວໃນເຂດເມືອງປາດັງທ່ີໄດ້ພັງທະລາຍຢ່າງຮາບຄາບຈາກແຜ່ນດິນໄຫວນັ້ນ.
ບັນດາໜ່ວຍກູ້ໄພໃນຂົງເຂດເກາະຊູມາຕຣາຕາເວັນ ຕົກຂອງອິນໂດເນເຊັຍທ່ີໄດ້ຮັບຄວາມເສັຍຫາຍໜັກຈາກແຜ່ນດິນໄຫວ ກ່າວວ່າ ເຂົາເຈົ້າໄດ້ປ່ຽນຈຸດເພ່ງເລັງຂອງເຂົາເຈົ້າໄປໃສ່ການເກັບກູ້ສົບທ່ີຖືກຝັງຢູ່ກ້ອງສິ່ງສລັກຫັກພັງນັ້ນອອກມາ.
ໃນຂະນະດຽວກັນ ພວກເດັກນ້ອຍບາງຄົນໄດ້ຮັບອະນຸຍາດໃຫ້ກັບຄືນໄປຫ້ອງຮຽນຂອງເຂົາເຈົ້າໄດ້ ໄປຮັບຄຳໃຫ້ກຳລັງໃຈ ຫລືພົບປະ ກັບພວກນາຍຄູຂອງເຂົາເຈົ້າໄດ້ ແລະພວກເດັກອື່ນໆບໍ່ໄດ້ຮັບ ອະນຸຍາດໃຫ້ກັບຄືນໄປຫ້ອງຮຽນຍ້ອນຄວາມບໍ່ປອດໄພຂອງຕຶກອາຄານໂຮງຮຽນ. ທ່ານ Siti Fadillah Supari ຣັຖມຸນຕີກະຊວງສາທາຣະນະສຸກຂອງອິນໂດເນເຊັຍ ກ່າວວ່າ ຈຳນວນ ຜູ້ເສັຍຊີວິດຈາກໄພແຜ່ນດິນໄຫວທ່ີມີຄວາມແຮງ 7.6 ຕາມເຄື່ອງວັດແທກແຜ່ນດິນໄຫວ Richter ທ່ີເກີດຂຶ້ນຢູ່ນອກຝັ່ງທະເລ ເກາະຊູມາຕຣາ ສາມາດເພີ່ມຂຶ້ນເຖິງ 3 ພັນຄົນໄດ້. ສ່ວນ ສະຫະປະຊາຊາດກ່າວວ່າ ຢ່າງນ້ອຍປະຊາຊົນໄດ້ເສັຍຊີວິດໄປແລ້ວ1100 ຄົນ.
ວັນເສົາ, ໒໗ ກໍລະກົດ ໒໐໒໔
