ລິ້ງ ສຳຫລັບເຂົ້າຫາ

ຈີນຈະສ້າງ ແລະສົ່ງດາວທຽມ ສື່ສານຄົມມະນາຄົມ ໃຫ້ແກ່ລາວ


ປາກິສຖານ: ເຫດຣະເບີດຂນາດແຮງຈາກການ ໂຈມຕີສະລະຊີບ ໃນເຂດ ພາກຕາເວັນຕົກສຽງ ເໜືອຂອງປາກິສຖານເຮັດໃຫ້ມີ ຜູ້ເສັຽຊີວິດຢ່າງ ນ້ອຍ 16 ຄົນແລະໄດ້ຮັບບາດເຈັບອີກຈຳນວນ ນຶ່ງ. ຕຳຣວດກ່າວວ່າ ການໂຈມຕີສະລະຊີບໃນ ເຂດຍ່ານການຄ້າ ຂອງເມືອງ PESHAWAR ເຮັດໃຫ້ມີຜູ້ເສັຽຊີວິດຢ່າງນ້ອຍ 10 ຄົນ ແລະ ບາດເຈັບຫ ລາຍກວ່າ 70 ຄົນ ໃນວັນເສົາມື້ນີ້. ພວກທີ່ເຫັນເຫດການ ເວົ້າວ່າ ຜູ້ໂຈມຕີ ໄດ້ແກວ່ງຣະເບີດມືລູກນຶ່ງ ກ່ອນທີ່ຈະບີບ ຄະນວນຣະເບີດ ທີ່ຫ້າງໃສ່ຣົດ ໃຫ້ແຕກຂຶ້ນ ຊຶ່ງໄດ້ເຮັດໃຫ້ຣົດ ຈຳນວນນຶ່ງ ປິ້ນຂວ້ຳແລະປະຕູປ່ອງຢ້ຽມແກ້ວທີ່ແຕກ ພ້ອມດ້ວຍຊາກຫັກພັງ ຂອງຕຶກອາຄານ ໄດ້ຊະຊາຍຢັ່ງຢາຍ ຢູ່ຕາມຖນົນຫົນທາງ. ບໍ່ດົນການໜ້ານີ້ ກໍໄດ້ມີການໂຈມຕີ ສະລະຊີບທີ່ ປົດຕຳຣວດແຫ່ງນຶ່ງ ເຮັດໃຫ້ມີຜູ້ເສັຽຊີວິດ ຢ່າງນ້ອຍ 6 ຄົນ ແລະໄດ້ຮັບບາດເຈັບອີກ ຫລາຍກວ່າ 60 ຄົນ ຢູ່ໃນເຂດຊານເມືອງ ຂອງເມືອງ BANNU. ຣະເບີດຂນາດແຮງ ທີ່ວ່ານີ້ ໄດ້ທຳລາຍ ປົດຕຳຣວດ ແລະອາຄານ ທີ່ຢູ່ອ້ອມແອ້ມ.

ສະຫະຣັດ - ອັຟາກນິສຖານ: ປະທານາທິ ບໍດີສະຫະຣັດ ທ່ານ BARACK OBAMA ກ່າວໃນ ມື້ວານນີ້ວ່າ ເປົ້າໝາຍ ທີ່ສຳຄັນສຸດ ຂອງທ່ານ ໃນອັຟການິສຖານ ກໍຄືທັບມ້າງ ຕາໜ່າງກໍການຮ້າຍ AL-QAIDA ແລະທຳລາຍ ຄວາມສາມາດ ທາງທະຫານ ຂອງກຸ່ມດັ່ງກ່າວ ໃນການທີ່ຈະ ໂຈມຕີປະຊາຊົນ ຢູ່ໃນທົ່ວໂລກ. ໃນການກ່າວ ຄຳປາສັຍ ປິດທ້າຍກອງປະຊຸມ ສຸດຍອດ ຂອງກຸ່ມຈີ 20 ທີ່ນະຄອນ PITTSBURG ຣັດ PENNSYLVANIA ນັ້ນ ທ່ານ OBAMA ເວົ້າວ່າ ສະເຖັຽຣະພາບ ໃນອັຟການິສຖານ ແລະປາກິສການ ເປັນສິ່ງທີ່ ມີຄວາມຫລໍ່ແຫລມສຳຄັນ ສຳລັບການ ປະຕິບັດງານ ຂອງສະຫະຣັດ. ທ່ານກ່າວວ່າ ຫລັງຈາກເວລາຫລາຍໆປີ ໄດ້ຜ່ານພົ້ນໄປ ໃນອັຟການິສຖານ ກຸ່ມພັນທະມິດນາໂຕ້ ໄດ້ໃຫ້ຄວາມ ໝາຍໝັ້ນຕັ້ງໃຈ ຢ່າງແຂງຂັນ ໃນການດຳເນີນ ຄວາມພະຍາຍາມດັ່ງກ່າວ. ປະທານາທິບໍດີ ສະຫະຣັດ ເວົ້າວ່າ ຂັ້ນຕອນການທົບທວນ ເບິ່ງຍຸທສາດ ໃນອັຟການິສຖານ ທີ່ທ່ານໄດ້ລິເລີ້ມ ໃນຕອນທີ່ທ່ານ ເຂົ້າຮັບຕຳແໜ່ງນັ້ນ ຍັງດຳເນີນໄປ ຕາມເປົ້າໝາຍ ແລະເຕືອນວ່າ ບໍ່ມີຄຳຕອບໃດ ທີ່ຖືກຕ້ອງສົມບູນແທ້ ຕໍ່ຄຳຖາມທີ່ຍາກໆ ທີ່ທ່ານໄດ້ຕັ້ງໄວ້ນັ້ນ.

ອີຣ່ານ: ຫົວໜ້າຜູ້ຊ່ອຍຂອງຜູ້ນຳສູງສຸດອີຣ່ານ ກ່າວວ່າ ໂຮງກັ່ນທາດຢູເຣນຽມໃໝ່ ທີ່ຫາກໍມີ ການເປີດເຜີຍໃຫ້ຊາບ ຂອງອີຣ່ານນັ້ນຈະເລີ້ມ ໃຊ້ງານໃນໄວໆນີ້. ຫົວໜ້າຜູ້ຊ່ອຍຂອງ AYA TOLLAH ALI KHAMENEI ກ່າວຕໍ່ອົງການ ຂ່າວ FARS ຂອງອີຣ່ານ ໃນວັນເສົາມື້ນີ້ວ່າ ຕາມການບັນຊາ ຂອງພຣະຜູ້ເປັນເຈົ້າ ໂຮງງານໃໝ່ທີ່ວ່ານີ້ ຈະເລີ້ມໃຊ້ງານ ໃນໄວໆນີ້ ແລະເຮັດໃຫ້ສັດຕຣູຕາບອດ. ການປະກາດດັ່ງກ່າວ ມີຂຶ້ນນຶ່ງມື້ ຫລັງຈາກ ປະທານາທິບໍດີ ສະຫະຣັດ ທ່ານ BARACK OBAMA ເຕືອນອີຣ່ານວ່າ ອີຣ່ານຕ້ອງເປັນ ຜູ້ບໍຣິສຸດ ກ່ຽວກັບບັນຫາຂັດແຍ້ງ ໃນເຣື່ອງໂຄງການນິວເຄລັຽ ໃນການເຈຣະຈາຫາຣື ກັບນາໆຊາດ ໃນສັບປະດາໜ້າ ຫລືຖ້າບໍ່ດັ່ງນັ້ນແລ້ວ ກໍຈະປະເຊີນ ກັບການຖືກລົງໂທດຮອບໃໝ່ ຈາກປະຊາຄົມ ທີ່ເປັນເອກກະພາບຂອງໂລກ. ໃນການຖແລງຂ່າວ ມື້ວານນີ້ ປະທານາທິບໍດີ OBAMA ກ່າວຕໍ່ອີຣ່ານວ່າ ອີຣ່ານຈະສືບຕໍ່ ປະເຊີນໜ້າ ກັບປະເທດ ມະຫາອຳນາດຂອງໂລກ ນອກຈາກວ່າ ເຕຫະຣ່ານ ຈະຕົກລົງເປີດເຜີຍ ກິຈກັມນິວເຄລັຽຂອງຕົນ ທັງໝົດໃຫ້ຊາບ.

ໂອບາມາ - ນິວເຄລັຽ: ນຶ່ງມື້ຫລັງຈາກກອງ ປະຊຸມສຸດຍອດ ຂອງກຸ່ມຈີ 20 ໄດ້ສິ້ນສຸດລົງ ປະທານາທິບໍດີ ສະຫະຣັດ ທ່ານ BARACK OBAMA ໄດ້ກ່າວຢ້ຳ ເຖິງການຮ່ວມມື ຂອງ ນາໆຊາດ ເພື່ອຮັບມືກັບ ການແຜ່ຜາຍ ອາວຸດນິວເຄລັຽ. ໃນຄຳປາສັຍ ທາງວິທຍຸ ແລະອິນເຕີແນັດ ປະຈຳສັບປະດາ ໃນວັນເສົາມື້ນີ້ ປະທານາທິບໍດີ ສະຫະຣັດກ່າວວ່າ ສະຫະຣັດໄດ້ໝາຍໝັ້ນຕັ້ງໃຈ ຕໍ່ບົດຕອນໃໝ່ ໃນການຮ່ວມມື ຂອງນາໆຊາດ. ທ່ານເວົ້າວ່າ ສະຫະຣັດ ກຳລັງຊອກຫາຊ່ອງທາງ ເພື່ອໃຫ້ມີການຕົກລົງ ກັບຣັດເຊັຽ ໃນການຫລຸດຜ່ອນ ຄັງເກັບສະສົມອາວຸດ ແລະເວົ້າວ່າ ປະເທດອື່ນໆ ເຊັ່ນວ່າອີຣ່ານ ແລະເກົາຫລີເໜືອ ກໍຕ້ອງໄດ້ປະຕິບັດຕາມ ພັນທະຂອງນາໆຊາດ. ປະທານາທິບໍດີ OBAMA ກ່າວວ່າ ສະຫະຣັດ ຈະສືບຕໍ່ ຢືນຄຽງບ່າຄຽງໄຫລ່ ແລະເປັນພາຄີ ເພື່ອຊຸກຍູ້ໃຫ້ເກົາຫລີເໜືອ ຢຸດເຊົາການ ພັທນາອາວຸດ ທີ່ມີອະນຸພາບຮ້າຍແຮງ. ໃນການກ່າວຢ້ຳ ກ່ຽວກັບການກ່າວຫາ ທີ່ທ່ານໄດ້ຖແລງ ຄຽງຂ້າງຜູ້ນຳ ຂອງຝຣັ່ງແລະອັງກິດ ທີ່ກຸ່ມຈີ 20 ນັ້ນ ທ່ານ OBAMA ເວົ້າວ່າ ອີຣ່ານກຳລັງ ສ້າງໂຮງກັ່ນ ທາດຢູເຣນຽມລັບໆແຫ່ງນຶ່ງ ທີ່ທ່ານເວົ້າວ່າ ເປັນພາກສ່ວນນຶ່ງ ໃນການຫລົບຫລີກ ທີ່ໜ້າກັງວົນໃຈ ຂອງອີຣ່ານ.

ຈີນ - ລາວ: ສື່ມວນຊົນ ຂອງທາງການຈີນ ລາຍງານວ່າ ຈີນຈະສ້າງ ແລະສົ່ງດາວທຽມ ສື່ສານຄົມມະນາຄົມໃຫ້ແກ່ລາວ ຫລັງຈາກໄດ້ ມີການ ດຳເນີນການແບບດຽວກັນນີ້ ໃຫ້ແກ່ໄນ ຈີເຣັຽ ແລະເວເນຊູເອລາ. ອົງການຂ່າວຊິນຫວາ ໄດ້ອ້າງແຫລ່ງຂ່າວ ຈາກບໍຣິສັດ ວິທຍາສາດ ແລະເທັກໂນໂລຈີ ອະວະກາດ ຂອງຈີນ ທີ່ແຈ້ງໃຫ້ຊາບ ໃນມື້ວານນີ້ວ່າ ດາວທຽມທີ່ມີ ຊື່ວ່າ LAOS-1 ຈະຖືກສົ່ງຂຶ້ນສູ່ ອະວະກາດ ໂດຍຈະຣວດ LONG MARCH ທີ່ຜລິດໂດຍຈີນ. ບໍຣິສັດວິທສາດ ແລະເທັກໂນໂລຈີ ອະວະກາດຂອງຈີນ ບໍ່ໄດ້ແຈ້ງໃຫ້ຊາບວ່າ ເວລາໃດ ການສົ່ງດາວທຽມດັ່ງກ່າວ ຈຶ່ງຈະມີຂຶ້ນ. ນອກນັ້ນ ອົງການຂ່າວຊິນຫວາ ຍັງເວົ້າວ່າ ຈີນຈະສ້າງສະຖານີ ຕິດຕາມຄວບຄຸມ ແລະຕາໜ່າງ ອອກອາກາດ ພາກພື້ນດິນ ໃຫ້ແກ່ລາວນຳດ້ວຍ. ລາຍງານຂ່າວ ໃນວັນເສົາມື້ນີ້ ແຈ້ງວ່າ ໂຄງການນີ້ ແມ່ນສັນຍາສະບັບທຳອິດ ໃນການຜລິດ ແລະໃຫ້ບໍຣິການ ຈັດສົ່ງດາວທຽມຂອງຈີນ ສຳລັບປະເທດ ໃນສະມາຄົມ ບັນດາປະຊາຊາດ ໃນເຂດເອເຊັຽ ຕາເວັນອອກສຽງໃຕ້ ຫລືອາຊ່ຽນ.

ຈີນ - ມຽນມາ: ຈີນຮຽກຮ້ອງໃຫ້ມຽນມາເອົາ ມາຕການ ທີ່ມີປະສິດພິພາບ ເພື່ອປົກປ້ອງຄຸ້ມ ຄອງສິດທິຂອງພົລເມືອງຈີນ ຢູ່ໃນມຽນມາ. ກະ ຊວງການຕ່າງປະເທດຈີນ ກ່າວຜ່ານທາງເວັບ ໄຊທ໌ຂອງຕົນ ໃນວັນເສົາມື້ນີ້ວ່າ ຫົວໜ້າຜແນກ ກິຈການກົງສຸນ ທ່ານ WEI WEI ໄດ້ສະແດງ ຄວາມວິຕົກກັງວົນຂອງຈີນ ກ່ຽວກັບເຣື່ອງນີ້ ໃນລະຫວ່າງ ການພົບພໍ້ ກັບເຈົ້າໜ້າທີ່ທ່ານນຶ່ງ ຈາກສະຖານທູດມຽນມາ. ຖແລງຂ່າວເວົ້າວ່າ ທ່ານ WEI ໄດ້ພົບປະ ກັບທ່ານ KYI KYI SEIN ທີ່ປຶກສາ ຂອງສະຖານທູດມຽນມາ ໃນວັນທີ 21 ກັນຍາຜ່ານມານີ້. ທ່ານ WEI ໄດ້ຮຽກຮ້ອງໃຫ້ມຽນມາ ທຳການສືບສວນ ກ່ຽວກັບ ລາຍງານຂ່າວທີ່ວ່າ ບັນຫາຂັດແຍ້ງ ທາງທະຫານ ຢູ່ເຂດພາກເໜືອ ຂອງມຽນມາ ໃນເດືອນສິງຫາຜ່ານມານັ້ນ ໄດ້ສ້າງຄວາມເສັຽຫາຍ ໃຫ້ແກ່ສິດທິ ແລະຜົນປໂຍດ ຂອງປະຊາຊົນຈີນ ທີ່ອາສັຍຢູ່ ໃນບໍຣິເວນດັ່ງກ່າວ. ມີອົພຍົບມຽນມາ ຫລາຍສິບພັນຄົນ ໄດ້ຂ້າມຊາຍແດນ ເຂົ້າໄປໃນຈີນ ເພື່ອຫລົບໜີການສູ້ຣົບ ລະຫວ່າງທະຫານ ຣັຖບານມຽນມາ ແລະພວກກະບົດຊົນເຜົ່າ ໃນເຂດ KOKANG ຊຶ່ງເປັນເຂດທີ່ ພວກຊາວຈີນ ມັກອາສັຍຢູ່ ໃນຣັດ SHAN ຂອງມຽນມາ.

ເຊີນຟັງຂ່າວລາຍລະອຽດ ໂດຍຄລິກບ່ອນສຽງ.

XS
SM
MD
LG