ການເຈຣະຈາສັນຕິພາບລະຫວ່າງອີສຣາແອນແລະປາເລສໄຕນ໌: ປະທານາທິບໍດີບາຣັກໂອບາມາແຫ່ງສະຫະຣັດຈະພະຍາຍາມລິເລີ່ມການພົບປະເຈລະຈາສັນຕິພາບໃນພາກ ຕາເວັນອອກກາງຄືນໃໝ່ໃນ ສັບປະດານີ້ ເພື່ອທຳການພົບປະ ກັນກັບຜູ້ ນຳອີສຣາແອນແລະປາເລສໄຕນ໌. ທຳນຽບຂາວກ່າວວ່າ ການພົບປະກັນດັ່ງກ່າວກຳນົດຈະມີຂຶ້ນໃນວັນອັງຄານສັບປະດານີ້ຢູ່ນອກກອງປະຊຸມສະມັດ ຊາໃຫຍ່ສະຫະປະຊາຊາດໃນນະຄອນ ນີວຢອກນັ້ນ. ທ່ານໂອບາມາຈະທຳການພົບປະກັນຕ່າງ ຫາກກັບນາຍົກຣັຖມຸນຕີ ອີສຣາແອນ ທ່ານBenjamin Netanyahu ແລະປະທານາທິບໍດີ Mahmoud Abbas ແຫ່ງປາເລສໄຕນ໌ນັ້ນ ກ່ອນຈະນຳພວກທ່ານມາພົບປະຕໍ່ໜ້າກັນນັ້ນ.ທາງການຂອງອີສຣາແອນແລະປາເລສໄຕນ໌ ຕ່າງຝ່າຍຕ່າງຮັບເອົາຄຳ
ເຊື້ອເຊີນຂອງທ່ານໂອບາມານັ້ນ. ທ່ານ George Mitchell ທູດພິເສດຂອງສະຫະຣັດກ່ຽວກັບບັນຫາພາກຕາເວັນອອກກາງ ກ່າວວ່າ ການພົບປະຮ່ວມກັນທ່ີວ່ານີ້ສະແດງໃຫ້ເຫັນຄວາມໝັ້ນໝາຍຢ່າງເລິກເຊິ່ງຂອງປະທາ ນາທິບໍດີໂອບາມາໃນການນຳສັນຕິພາບຢ່າງຮອບດ້ານມາສູ່ຂົງເຂດນັ້ນ. ທ່ານ Mitchell ເດີນທາງ ກັບຄືນສູ່ສະຫະຣັດໃນວັນສຸກຜ່ານມານີ້ ຫລັງຈາກທຳການພະຍາຍາມທ່ີບໍ່ສຳເຣັດຜົນໃນການແກ້ໄຂອຸບປະສັກກີດກັນທ່ີສຳຄັນໃນການນຳມາຊຶ່ງສັນຕິພາບໃນຂົງເຂດນັ້ນ ກໍຄືການສ້າງບ້ານເຮືອນຂຶ້ນຂອງອີສຣາແອນໃນເຂດຝັ່ງຕາເວັນຕົກຂອງແມ່ນ້ຳຈໍແດນແລະໃນເຂດຕາເວັນອອກຂອງນະຄອນ Jerusalem ນັ້ນ.
ທ່ານໂອບາມາກ່າວປ້ອງກັນນະໂຍບາຍຂອງທ່ານ: ທ່ານບາຣັກໂອບາມາ ປະທານາທິບໍດີສະຫະຣັດກາດໂຕຢູ່ໃນຊ່ອງຂ່າວໂທຣະພາບ 5 ຊ່ອງຫລາຍເປັນປວັດການໃນວັນອາທິດມື້ນີ້
ໃນຂະນະທ່ີທ່ານພະຍາຍາມຫັນເຫພວກທ່ີຕຳໜິຕິຕຽນນະໂຍບາຍຂອງທ່ານ. ທ່ານຈະໃຫ້ສັມ ພາດຕໍ່ລາຍການຂ່າວໂທຣະພາບໃນຕອນເຊົ້າທັງໝົດໃນສະຫະຣັດນອກຈາກຕາໜ່າງໂທຣະພາບ Fox ຊຶ່ງເປັນຊ່ອງທ່ີນິຍົມແນວທາງເດີມ ທ່ີຕຳໜິຕິຕຽນຣັຖບານຂອງທ່ານຢ່າງແຂງແຮງນັ້ນ. ປະທານາທິບໍດີໂອບາມາພະຍາຍາມທຳການປະຕິຮູບຢ່າງຮອບດ້ານລະບົບຮັກສາສຸກຂະພາບຂອງສະຫະຣັດໃນປັດຈຸບັນໃນຂະນະດຽວກັນກຳລັງປະເຊີນກັບວິກິດການດ້ານ ເສດຖະ ກິດແລະສົງຄາມ ຢູ່ 2ແຫ່ງ. ແຜນການຮັກສາສຸກຂະພາບຂອງປະທານທິບໍດີສັງກັດພັກເດໂມກຣັດ ໄດ້ ປະເຊີນກັບການຄັດຄ້ານຢ່າງ ແຂງແຮງຈາກພວກສະມາຊິກສະພານິຕິບັນຍັດສັງກັດພັກ Republican ຊຶ່ງພວກສະມາຊິກເຫລົ່ານີ້ຫລາຍ ທ່ານກ່າວວ່າ ເປັນແຜນການແບບສັງຄົມນິຍົມ.ພວກຊາວອະເມຣິກັນນິຍົມແນວທາງເດີມຫລາຍໝື່ນຄົນພາກັນໂຮມຊຸມນຸມກັນໃນກຸງວໍຊິງຕັນຄັດຄ້ານແຜນການດັ່ງກ່າວແລະນະ ໂຍບາຍຕ່າງໆຂອງທ່ານໂອບາມາໃນສັບປະດາຜ່ານມາ. ບັນດານັກວິເຄາະ ກ່າວວ່າ ທ່ານໂອບາມາພະຍາຍາມປ່ຽນການຄັດຄ້ານເຫລົ່ານີ້ໂດຍຜ່ານ ທາງສື່ມວນຊົນໃນວັນອາທິດມື້ນີ້.
ສະຫະຣັດຈັບຜູ້ຕ້ອງຫາເປັນຜູ້ກໍ່ການຮ້າຍ: ເຈົ້າໜ້າທ່ີຣັຖບານກາງສະຫະຣັດໄດ້ຈັບກຸມຜູ້ຊາຍ 3 ຄົນໃນຂໍ້ຫາໃຫ້ຂ່າວຂໍ້ມູນຜິດພາດໃນການສືບສວນໃນການຕໍ່ຕ້ານພວກກໍ່ການຮ້າຍນັ້ນ. ທາງການສະຫະຣັດ ໄດ້ຈັບກຸມນາຍ Najibullah Zazi ແລະພໍ່ຂອງລາວໃນຕອນແລງວັນເສົາວານນີ້ທ່ີຣັດ Colorado ໃນພາກຕາເວັນຕົກຂອງສະຫະຣັດຫລັງຈາກນາຍ Zazi ລົບລ້າງແຜນການພົບປະກັບເຈົ້າ
ໜ້າທ່ີຣັຖບານກາງສຳລັບການສືບປາກຄຳເປັນມື້ທີ4.
ຊາຍຜູ້ທີສາມແມ່ນນາຍ Ahmad Wais Afzali ຖືກຈັບກຸມຕ່າງຫາກທ່ີນະຄອນນີວຢອກ.ກະຊວງຍຸຕິທັມສະຫະຣັດກ່າວຢູ່ ໃນ
ຖແລງການສະບັບນຶ່ງວ່າ ຜູ້ຊາຍແຕ່ລະຄົນຖືກກ່າວຫາໃນຖານ ທຳການໃຫ້ຂ່າວຂໍ້ມູນຜິດໂດຍເຈດຕະນາແລະດ້ວຍຄວາມສັມກໃຈຕໍ່ການສືບສວນຂອງຕຳຫລວດສັນຕິບານກາງສະຫະຣັດຫລື FBI ໃນການສືບ ສວນທ່ີພົວພັນກັບການກໍ່ການຮ້າຍໃນລະຫວ່າງຊາດແລະພາຍ ໃນປະເທດ. ພວກຜູ້ຊາຍທັງສາມຄົນນິ້ີ້ກຳນົດຈະໄປປາກົດໂຕຕໍ່ສານໃນວັນຈັນມື້ອື່ນ ແລະສາມາດປະເຊີນກັບ ການລົງໂທດຈຳຄຸກເຖິງ 8 ປີໄດ້ຖ້າທາງສານຕັດສິນວ່າພວກຜູ້ກ່ຽວມີຄວາມຜິດແທ້.
ທາງການກ່າວຕໍ່ສື່ມວນຊົນວ່າ ນາຍ Zazi ເປັນຜູ່ຕ້ອງສົງໄສໃນການວາງແຜນເຮັດລະເບີດ ແຕ່ຜູ້ ກ່າວປະຕິເສດວ່າ ລາວບໍ່ມີສ່ວນພົວພັນໃດໆກັບການກໍ່ການຮ້າຍ.
ກ່ຽວກັບລະບົບປ້ອງກັນລູກສອນໄຟຂອງສະຫະຣັດ: ທ່ານ Robert Gates ຣັຖມຸນຕີປ້ອງ ກັນປະເທດສະຫະຣັດປະຕິເສດຕໍ່ການຕຳໜິຕິຕຽນກ່ຽວກັບແຜນການປ້ອງກັນລູກສອນໄຟໃໝ່ສຳລັບຢູໂຣບ ໂດຍບໍ່ຍອມຮັບເອົາການກ່າວອ້າງທ່ີວ່າ ເປັນການຍິນຍອມໃຫ້ແກ່ຣັດເຊັຍນັ້ນ. ທ່ານ Gates ກ່າວປ້ອງ ກັນຍຸດທະສາດຂອງຣັຖບານທ່ານໂອບາມາຢູ່ໃນບົດຄວາມທ່ີອອກຄວາມເຫັນທ່ີພິມເຜີຍແຜ່ໃນໜັງສືພິມ New York Times ໃນວັນເສົາວານນີ້. ຣັຖບານຂອງທ່ານໂອບາມາປະຕິບັດຕາມຄຳແນະນຳຂອງທ່ານ Gatesໃຫ້ ປ່ຽນແຜນການຈາກລະບົບປ້ອງກັນລູກສອນໄຟທາງພາກພື້ນດິນ ໄປໃສ່ໂຄງການປ້ອງກັນທາງທະເລແລະພາກພື້ນດິນນັ້ນ. ທ່ານ Gates ກ່າວວ່າ ແຜນການໃໝ່ຈະເຮັດໃຫ້ສະຫະຣັດສາມາດປ້ອງກັນຕົນເອງໄດ້ ແລະປ້ອງກັນ ພວກປະເທດພັນທະມິດຂອງຕົນໄດ້ໃນການຕໍ່ຕ້ານການ ໂຈມຕີດ້ວຍລູກສອນໄຟຂອງອິຣ່ານເປັນເວລາຫລາຍປີກ່ອນແຜນການທຳອິດທຳອໍ່ຂອງສະຫະຣັດນັ້ນ ແລະທ່ານກ່າວຕໍ່ໄປວ່າ ພວກທ່ີກ່າວວ່າ ຣັຖບານກຳລັງປະລະຖິ້ມແຜນການປ້ອງກັນລູກສອນໄຟໃນຢູໂຣບນັ້ນ ແມ່ນບໍ່ໄດ້ຮັບຂໍ້ມູນຖືກຕ້ອງ ຫລືເຂົ້າໃຈຜິດກ່ຽວກັບແຜນການໃໝ່ນີ້. ທ່ານ Gates ກ່າວຕໍ່ໄປວ່າ ແຜນການໃໝ່ຈະສົ່ງເຄື່ອງຈັບລູກສອນໄຟໄດ້ຈາກທາງທະເລ ພາຍໃນປີ2011 ແລະຈະຕິດຕັ້ງເທັກໂນໂລຈີຄ້າຍໆ ກັນທາງພາກພື້ນດິນໃນພາກໃຕ້ແລະພາກກາງຂອງຢູໂຣບໃນເວລາຕໍ່ໄປອີກ 4 ປີ.
ການເລືອກຕັ້ງທ່ີອັຟການີສຖານ:ດິນຟ້າອາກາດຍາມໝາວຂອງອັຟການີສຖານທ່ີກຳລັງ ຫຍັບໃກ້ເຂົ້າມາ
ອາດຈະເປັນໄພຂົ່ມຂູ່ຮວມກັບຄວາມວຸ້ນວາຍແລະການກ່າວຫາໃນການສໍ້ໂກງການເລືອກຕັ້ງຕ່າງໆ ຊຶ່ງຈະເປັນບັນຫາໃຫຍ່ໃນການເລືອກເອົາປະທານາທິບໍດີຂອງປະເທດໄດ້. ໃນການໃຫ້ສັມພາດກັບອົງການຂ່າວ Reuters ຫົວໜ້າກຳກັບການເລືອກຕັ້ງຂອງອັຟການີສຖານກ່າວວ່າ ຖ້າຈຳເປັນຕ້ອງມີການເລືອກຕັ້ງ
ຂັ້ນຊີຂາດນັ້ນ ການເລືອກຕັ້ງຈະຕ້ອງມີຂຶ້ນກ່ອນສັບປະດາທີສາມຂອງເດືອນຕຸລາໜ້ານີ້.
ທ່ານ Daoud Ali Najafi ກ່າວວ່າ ຫິມະຍາມໜາວຈະເຮັດໃຫ້ເລືອກຕັ້ງທ່ີຈະມີຂຶ້ນໃນທ້າຍປີເປັນໄປບໍ່ໄດ້.
ຜົນການນັບບັດຄະແນນສຽງຂັ້ນຕົ້ນທ່ີເປັເຜີຍໃຫ້ຮູ້ໃນວັນພຸດຜ່ານມານີ້ສະແດງໃຫ້ເຫັນວ່າ ປະທານາທິບໍດີ Hamid Karzai ໄດ້ຮັບສຽງສນັບສນຸນ 54 ເປີເຊັນຈາກຈຳນວນບັດຄຕະແນນສຽງທັງໝົດ ຊຶ່ງເປັນຈຳນວນ ທ່ີເກີນກວ່າ 50 ເປີເຊັນທ່ີຕ້ອງການເພື່ອຫລີກເວັ້ນການປ່ອນບັດຮອບສອງຫລືຮອບຊີ້ຂາດນັ້ນ. ແຕ່ກຸ່ມທ່ີຕິດ ຕາມເບິ່ງການເລືອກຕັ້ງທ່ີໄດ້ຮັບການໜຸນຫລັງຈາກສະຫະປະຊາຊາດໄດ້ສັ່ງໃຫ້ທຳການນັບບັດເລືອກ ຕັ້ງຄືນອີກເປັນບາງສ່ວນຍ້ອນມີການກ່ອນຫາວ່າມີການສໍ້ໂກງການປ່ອນບັດນັ້ນ. ແລະທ່ານNajafi ກ່າວວ່າ ກຸ່ມດັ່ງກ່າວຄວນຈະທຳການເລັ່ງລັດການສືບສວນກ່ຽວກັບການສໍ້ໂກງການປ່ອນບັດຂອງ ຕົນຂຶ້ນ ຫລືສະພາບດິນຟ້າອາກາດໃນຂົງເຂດຊົນນະບົດຈະບັງຄັບໃຫ້ການເລືອກຕັ້ງຂັ້ນຊີ້ຂາດນັ້ນຊັກຊ້າໄປອີກດົນຖ້າຫາກມີນັ້ນ.
ໃນຂະນະດຽວກັນ ໂຄສົກປະຈຳສະຫະປະຊາຊາດກ່າວຕໍ່ອົງການຂ່າວ Reuters ວ່າ ທ່ານມີ ຄວາມໝັ້ນໃຈວ່າການບັນບັດຄະແນນສຽງຄືນນີ້ສາມາດເສັດສິ້ນລົງໄດ້ທັນກັບເວລາໃນປີນີ້ຖ້າຈຳເປັນຕ້ອງມີການເລືອກ
ຕັ້ງຮອບຊີ້ຂາດນັ້ນ.
ວັນພະຫັດ, ໒໕ ເມສາ ໒໐໒໔
