ນາຍົກລັດຖະມົນຕີລາວຍອມຮັບວ່າບໍ່ສາມາດທີ່ ຈະຄາດໝາຍໄດ້ວ່າ ຜົນຜະຫລິດເຂົ້າ ໃນປີ 2009 ຫາ 2010 ນີ້ ຈະໄດ້ຕາມ ແຜນການ ແລະ ເປົ້າໝາຍທີ່ວາງເອົາໄວ້ ຫລືບໍ່ ເພາະສະ ພາບພູມມີອາກາດບໍ່ເອື້ອອຳນວຍ ແລະ ໃນຂະນະດຽວກັນ ລັດຖະບານ ລາວກໍຍັງປະເຊີນ ກັບບັນຫາຫຍຸ້ງຍາກທາງເສດຖະກິດລະດັບມະຫາພາກອີກດ້ວຍ.
ຄະນະລັດຖະບານລາວໄດ້ວາງແຜນການແລະ ເປົ້າໝາຍທີ່ຈະດຳເນີນມາດຕະການໃນທຸກວິທີທາງເພື່ອຊຸກຍູ້ ແລະ ສົ່ງເສີມໃຫ້ ກະເສດຕະກອນລາວ ເພີ້ມຜົນຜະຫລິດເຂົ້າ ທັງ ນາປີ ແລະນາແຊງ ປະຈຳລະດູການປີ 2009 ຫາ 2010 ນີ້ ໃຫ້ໄດ້ໃນປະລິມານລວມກັນບໍ່ໜ້ອຍກວ່າ 3 ລ້ານ 3 ແສນ ໂຕນ ຫລື ເພີ້ມຂຶ້ນ ຈາກລະດູການປະຈຳປີ 2008 ຫາ 2009 ຫລາຍກວ່າ 4 ແສນໂຕນ ຊຶ່ງກໍຈະເຮັດໃຫ້ລາວ ມີຜົນຜະຫລິດເຂົ້າເກີນລະດັບ ຄວາມຕ້ອງການບໍລິໂພກພາຍໃນ ເພື່ອສົ່ງອອກໄປຕ່າງປະເທດໄດ້ ໃນປະລິມານລວມຫລາຍກວ່າ 8 ແສນໂຕນ ອີກດ້ວຍ. ທັງນີ້ ໂດຍມາດຕະການ ໜຶ່ງທີ່ລັດຖະບານລາວຈະໃຫ້ການຊ່ວຍເຫລືອຕໍ່ ກະເສດຕະກອນລາວໃນປີການຜະຫລິດ ຕໍ່ໄປນີ້ ກໍຄືການຈັດຫາເທັກນິກການຜະຫລິດສະໄໝໃໝ່ ເພື່ອນຳໃຊ້ເຂົ້າໃນການເພີ້ມຜົນຜະຫລິດ ຕໍ່ພື້ນທີ່ໃຫ້ຫລາຍຂຶ້ນກວ່າປີທີ່ຜ່ານມາ ຊຶ່ງເມື່ອບໍ່ນານມານີ້ກໍປາກົດວ່າ ລັດຖະບານລາວ ໄດ້ອານຸມັດງົບປະມານ ໃຫ້ກັບການດຳເນີນມາດຕະການໃນພາກສ່ວນນີ້ໄປແລ້ວ ໃນມູນຄ່າລວມ 170 ຕື້ກີບ ຊຶ່ງຈະແບ່ງປັນງົບປະມານສຳລັບການສະໜັບສະໜູນກະເສດຕະ ກອນໃນ 5 ແຂວງ ພາກໃຕ້ 40 ຕື້ກີບ, ແລະ ໃນ 3 ແຂວງ ພາກເໜືອ 130 ຕື້ກີບ.
ອີງຕາມລາຍງານຂອງກະຊວງກະຊິກຳປ່າໄມ້ລາວໃນ ເດືອນສິງຫານີ້ ໄດ້ລະບຸວ່າກະເສດຕະກອນລາວໃນທົ່ວປະເທດ ສາມາດປັກດຳນາປີໄດ້ແລ້ວ ບົນເນື້ອທີ່ກວ້າງກວ່າ 644.000 ເຮັກຕ້າ ຫລື ເກີນກວ່າເປົ້າໝາຍທີ່ວາງເອົາໄວ້ກວ່າ 1%.
ແຕ່ຢ່າງໃດກໍຕາມ ເນື່ອງຈາກວ່າ ລະບົບຄອງຊົນລະປະທານໃນທົ່ວປະເທດລາວນັ້ນ ສາມາດທີ່ຈະຕອບ ສະໜອງນ້ຳໃຫ້ກັບເນື້ອທີ່ນາໃນລາວໄດ້ພຽງແຕ່, 20% ຂອງພື້ນທີ່ ນາປີທັງໝົດເທົ່ານັ້ນ ແລະ ໃນຂະນະດຽວກັນ ກະເສດຕະກອນລາວກໍຍັງຕ້ອງປະເຊີນ ກັບໄພນ້ຳຖ້ວມ, ແລະ ໄພແຫ້ງແລ້ງຢ່າງໜັກຫນ່ວງ ເປັນປະຈຳທຸກປີອີກດ້ວຍ ຈຶ່ງເຮັດ ໃຫ້ຜູ້ນຳລັດຖະບານລາວບໍ່ສາມາດທີ່ຈະຄາດໝາຍໄດ້ວ່າ ແຜນການ ແລະ ເປົ້າໝາຍທີ່ ວາງເອົາໄວ້ແລ້ວນັ້ນ ຈະເກີດຂຶ້ນໄດ້ຢ່າງແທ້ຈິງ ຫລືບໍ່.
ຍິ່ງໄປກວ່ານັ້ນ ຖ້າຫາກວ່າ ລາວຈະຕອງປະເຊີນກັບໄພນ້ຳຖ້ວມ, ແລະ ໄພແຫ້ງແລ້ງ ຢ່າງໜັກ ຫນ່ວງດັ່ງກ່າວຈິງ ກໍຍັງຈະສົ່ງຜົນກະທົບຕໍ່ເນື່ອງໄປເຖິງສະພາບເສດຖະກິດ ໂດຍລວມ ຫລື ລະດັບມະຫາພາກໃນຫລາຍໆດ້ານຂອງລາວ ຢ່າງຫລີກລ້ຽງບໍ່ໄດ້ ອີກດ້ວຍ.
ໃນປະຈຸບັນນີ້ກໍປາກົດວ່າ ຫລາຍພື້ນ ທີ່ໃນລາວ ກໍ່ກຳລັງປະເຊີນກັບໄພນ້ຳ, ຖ້ວມ, ໃນລະດັບທີ່ຮຸນແຮງພໍສົມ ຄວນ ໂດຍສະເພາະແມ່ນຢູ່ແຄມຝັ່ງແມ່ນ້ຳເຊບັ້ງໄຟ, ຊຶ່ງຢູ່ໃນເຂດຕອນ ຫລ່າງຂອງ ໂຄງການເຂື່ອນນ້ຳເທີນ, II ໃນແຂວງຄຳມ່ວນນັ້ນ ກໍປາກົດວ່າ ເຂດເມືອງຍົມມະລາດ, ເມືອງມະຫາໄຊ ແລະ ເມືອງໜອງບົກ ລວມໄປເຖິງເມືອງໄຊບູລີ ໃນແຂວງສະຫວັນນະເຂດອີກດ້ວຍນັ້ນ ກຳລັງປະເຊີນ ກັບໄພນ້ຳຖ້ວມຢ່າງໜັກ, ເປັນບໍລິເວນກ້ວາງກວ່າ, 7.000 ເຮັກຕ້າ ຊຶ່ງສ່ວນໃຫຍ່ກໍຄືພື້ນທີ່ນາເຂົ້າຂອງກະເສດຕະກອນລາວນັ້ນເອງ.
ສຳລັບໃນປະກາຍນີ້ ໄພນ້ຳຖ້ວມໃນລາວ, ກໍໄດ້ເປັນຜົນເຮັດໃຫ້ເນື້ອທີ່ນາຂອງກະເສດຕະ ກອນລາວຖືກນ້ຳຖ້ວມໄປເປັນບໍລິເວນກວ້າງກວ່າ, 128.000 ເຮັກຕ້າ ໃນທົ່ວປະເທດ ຊຶ່ງໃນຈຳນວນນີ້ກໍປາ ກົດວ່າໄດ້ຮັບຄວາມເສຍຫາຍຢ່າງສິ້ນເຊີງ ເປັນບໍລິເວນກວ້າງກວ່າ 36.000 ເຮັກຕ້າ ພ້ອມກັນນັ້ນ ກໍຍັງໄດ້ເຮັດໃຫ້ຄອງຊົນລະປະທານ ແລະ ຖະໜົນຫົນ ທາງເປ່ເພໄປຢ່າງຫລວງຫລາຍອີກດ້ວຍ, ໂດຍເຮັດໃຫ້ລັດຖະບານລາວຈຳເປັນຕ້ອງໃຊ້ງົບປະມານຫລາຍກວ່າ 838 ຕື້ກີບ ຫລື ເກືອບ 100 ລ້ານ ໂດລາສະຫະລັດໃນການສ້ອມແປງໃນຕະຫລອດປີທີ່ຜ່ານມາ.
