ເວລານີ້ ສະຫະລັດກຳລັງດຳເນີນການສຳຫລວດທົບທວນຄືນເບິ່ງນະໂຍບາຍຂອງຕົນກ່ຽວກັບລັດຖະບານໃນມຽນມ້ານັ້ນ ໃນລະດັບທີ່ກວ້າງ ຂວາງ ໃນຄວາມພະຍາຍາມເພື່ອຊອກຫາວິທີທາງທີ່ດີທີ່ສຸດ ເພື່ອເຮັດ ໃຫ້ມີການຫັນປ່ຽນໄປສູ່ລະບອບປະຊາທິປະໄຕ ແລະໃຫ້ມີການເຄົາລົບ ນັບຖືສິດທິມະນຸດຂອງປະຊາຊົນມຽນມ້າ. ຜ່ານມາ ຄວາມສົນໃຈຂອງໂລກແມ່ນສຸມໃສ່ ເລື່ອງທີ່ລັດຖະບານຍັງສືບຕໍ່ກັກຂັງຜູ້ນຳພວກເຄື່ອນໄຫວເພື່ອປະຊາທິປະໄຕ ທ່ານນາງອອງຊານ ຊູຈີ ແລະນັກການເມືອງຄົນອື່ນໆອີກ 2100 ຄົນໃນມຽນມ້ານັ້ນ ແຕ່ວ່າການທົບທວນຄືນເບິ່ງ ນະໂຍບາຍຂອງສະຫະລັດ ແມ່ນມີຫລາຍດ້ານຫລາຍເປົ້າໝາຍ. ການ ຄັດແຍ້ງຕໍ່ສູ້ກັນລະຫວ່າງຊົນເຜົ່າ ທີ່ເຈົ້າໜ້າທີ່ມຽນມ້າໄດ້ສວາຍເອົາປະໂຫຍດນັ້ນ ແມ່ນເປັນບັນຫາທ້າທາຍຕໍ່ອະນາຄົດຂອງມຽນມ້າ ແລະກໍບໍ່ແມ່ນແຕ່ການຕໍ່ສູ້ກັນ ເມື່ອອາທິດແລ້ວນີ້ໃນເຂດໂກກັ້ງເທົ່ານັ້ນ ແຕ່ຍັງຮວມໄປເຖິງຜົນກະທົບ ທີ່ສະທ້ອນໃຫ້ເຫັນ ໃນຊະຕາກຳຂອງຊົນເຜົ່າກຸ່ມນ້ອຍ ມຸສລິມໂຣຮິງຢາ ຂອງມຽນມ້າ ແລະເຜົ່າອື່ນໆອີກ.
ສະຫະລັດແມ່ນມີຄວາມສົນໃຈອັນໃຫຍ່ຫລວງ ຢາກຈະເຫັນມຽນມ້າ ສົ່ງເສີມສະຖຽນລະພາບຢູ່ໃນຂົງເຂດ ໂດຍການປະຕິບັດຕາມຄຳຮຽກ ຮ້ອງຂອງອົງການສະຫະປະຊາຊາດ ທີ່ທວງໃຫ້ມຽນມ້າປ່ອຍໂຕນັກໂທດການເມືອງທັງໝົດ ແລະຈັດການສົນທະນາຫາລືຢ່າງແທ້ຈິງຂື້ນ ລະຫວ່າງເຈົ້າໜ້າທີ່ມຽນມ້າ ກັບບັນດາຜູ້ແທນຂອງຝ່າຍຄ້ານ ແລະພວກຜູ້ນຳຊົນເຜົ່າພື້ນເມືອງຕ່າງໆ ເພື່ອປຶກສາກັນກ່ຽວກັບທັດສະນະວິໄສທີ່ມີຮ່ວມກັນ ກ່ຽວກັບຫົນທາງກ້າວໄປຂ້າງໜ້າຢູ່ໃນມຽນມ້ານັ້ນ. ການເອົາບາດກ້າວໃນທາງບວກຕ່າງໆ ໄປສູ່ການມີລະບອບປະຊາທິ ປະໄຕທີ່ແທ້ຈິງ ແລະຕາງໜ້າປະຊາຊົນນັ້ນ ແມ່ນຈະຊ່ວຍໄດ້ຫລາຍ ໃນການຢຸດຕິການຖືກໂດດດ່ຽວຂອງມຽນມ້າ ແລະຢຸດຕິການຄັດແຍ້ງ ຕໍ່ສູ້ກັນ ທີ່ໄດ້ນຳເອົາຄວາມເສຍຫາຍ ເດືອດຮ້ອນ ແລະທຸກທໍລະມານ ຢ່າງຫລວງຫລາຍ ມາສູ່ປະຊາຊົນມຽນມ້ານັ້ນ.
