ລັດຖະມົນຕີກະຊວງສຶກສາທິການຂອງລາວຢືນຢັນວ່າ ການພັດທະນາຫຼັກສູດແລະການປະຕິຮູບການສຶກສາເພື່ອຮອງຮັບການເພີ່ມການຮຽນການສອນ ໃນລະດັບມັດທະຍົມຕອນຕົ້ນ ອີກໜຶ່ງປີນັ້ນຈະໃຫ້ສໍາເລັດ ແລະສາມາດປະຕິບັດຕົວຈິງພາຍໃນກາງປີ 2010 ເປັນຕົ້ນໄປ.
ທ່ານ. ສົມກົດ ມັງນໍເມກ ລັດຖະມົນຕີ ກະຊວງ ສຶກສາທິການ ຂອງລາວໄດ້ຖະແຫລງຢືນຢັນວ່າ ການພັດທະນາຫລັກສູດການສຶກສາພາຍໃຕ້ແຜນ ການປະຕິຮູບການສຶກສາຂອງລາວ ໃຫ້ມີມາດຕະ ຖານດຽວກັນກັບ ບັນດາປະເທດໃນຂົງເຂດອາຊີຕາເວັນອອກສຽງໃຕ້ນໍາກັນ ແລະ ເພື່ອເປັນການຮອງຮັບການເພີ່ມໄລຍະເວລາເຂົ້າໃນການຮຽນການສອນ ເຂົ້າໃນລະດັບ ມັດທະຍົມຕອນຕົ້ນອີກໜຶ່ງປີຕື່ມນັ້ນຈະໃຫ້ສໍາເລັດ ແລະ ສາມາດປະຕິບັດໃຫ້ປະກົດຜົນເປັນຈິງແຕ່ປີ 2010 ເປັນຕົ້ນໄປ.
ໂດຍມີການເພີ່ມວິຊາໃໝ່ໆ ເຂົ້າໃນຫຼັກສູດການຮຽນການສອນ ຕົວຢ່າງທີ່ສຳຄັນກໍຄືການເພີ່ມພາສາຕ່າງປະເທດເປັນສອງພາສາ,ວິຊາຄວາມຮູ້ຮອບຕົວ ທີ່ກ່ຽວກັບສະພາບແວດລ້ອມແລະຊັບພະຍາກອນທໍາມະຊາດ.
ການເພີ່ມ ໄລຍະເວລາໃນການຮຽນ-ການສອນ ຂຶ້ນອີກ 1ປີ ນັ້ນ ເປັນການເພີ້ມເຂົ້າໃສ່ໃນ ລະດັບ ມັດທະຍົມຕົ້ນຈາກເດີມ 3 ປີ ເປັນ 4 ປີ ຊຶ່ງກໍຄື ການຮຽນ-ການສອນໃນລະດັບ ດັ່ງກ່າວ ຈະມີເຖິງ ມັດທະຍົມປີທີ 4 ແລະ ຫລັງຈາກທີ່ຈົບມັດທະຍົມ ປີທີ 4 ແລ້ວນັ້ນຈຶ່ງ ຈະສຶກສາຕໍ່ໃນລະດັບມັດທະ ຍົມປາຍອີກ 3 ປີ ກໍຄືມັດທະຍົມປີ ທີ 5 ປີທີ 6 ແລະ ປີທີ 7 ຕໍ່ໄປ. ສ່ວນການຮຽນການສອນໃນ ລະດັບປະຖົມສຶກສານັ້ນ ກໍຍັງຮັກສາໄລຍະຮຽນ 5 ປີໄວ້ ອີກຕໍ່ໄປ.
ການເພີ່ມໄລຍະເວລາໃນການຮຽນ ການສອນຂຶ້ນອີກ 1 ປີດັ່ງກ່າວນີ້ກໍ ຈະເປັນຜົນເຮັດໃຫ້ການສຶກສາໃນ ສາຍສາມັນຂອງລາວມີໄລຍະເວ ລາລວມເປັນ 12 ປີຄືກັນ ກັບປະເທດ ອື່ນໆ ໃນພູມີພາກເອເຊຍຕາເວັນອອກສຽງໃຕ້ ຫລືໃນກຸ່ມອາຊ້ຽນດ້ວຍ ກັນ. ພ້ອມກັນນັ້ນກໍ່ຍັງຈະເຮັດໃຫ້ ທາງການລາວ ສາມາດທີ່ຈະປັບລົດເວລາ ໃນການສຶກລະດັບປະລິນຍາຕີລົງຈາກ ເດີມ 5 ປີເຫຼືອ 4 ປີໄດ້ຄືກັນກັບປະເທດອື່ນໆ ອີກດ້ວຍ.
ແຕ່ຢ່າງໃດກໍ່ຕາມການ ເພີ່ມໄລຍະເວລາໃນການຮຽນການສອນໃນລະດັບມັດທະຍົມຕົ້ນດັ່ງກ່າວນີ້ກໍ່ເຮັດໃຫ້ກະຊວງສຶກສາທິການຂອງລາວ ມີຄວາມຈຳເປັນທີ່ຈະຕ້ອງດຳເນີນການກໍ່ສ້າງອາຄານເພີ້ມຂຶ້ນອີກໃຫ້ໄດ້ບໍ່ໜ້ອຍກວ່າ 1.224 ຫ້ອງຮຽນ ເພື່ອຮອງຮັບນັກຮຽນຊັ້ນມັດທະ ຍົມປີທີ່ 4 ຈຳນວນ ຫລາຍ 36.000 ຄົນໃນທົ່ວປະເທດ. ໃນຂະນະດຽວກໍ່ຍັງມີຄວາມຈຳເປັນ ທີ່ຈະຕ້ອງເພີ່ມບຸກຄະກອນໃນດ້ານການສຶກສາຂຶນອີກ ຈຳນວນ 9.327 ຄົນ ເປັນຢ່າງ ໜ້ອຍອີກດ້ວຍ.
ຫາກແຕ່ວ່າສຳລັບໃນໄລຍະແຜນການງົບປະມານປະຈຳປີ 2009-2010 ທີ່ກຳລັງຈະເລີ່ມປະ ຕິບັດຕົວຈິງໃນເດືອນຕຸລາປີນີ້ ກັບປະກົດວ່າລັດຖະບານລາວໄດ້ອະນຸຍາດໃຫ້ກະຊວງສຶກ ສາທິການສາມາດທີ່ຈະຮັບເອົາບຸກຄະກອນ ດ້ານການສຶກສາໄດ້ພຽງ 4.800 ຄົນເທົ່ານັ້ນ ແລະໃນໄລຍະດຽວກັນການທີ່ ລັດຖະບານລາວໄດ້ຈັດສັນງົບປະມານໃຫ້ກັບກະຊວງສຶກສາທິການພຽງແຕ່ 6 ຕື້ 500 ລ້ານກີບ ເທົ່ານັ້ນ ກໍ່ຍັງເຮັດໃຫ້ສາມາດທີ່ຈະຝຶກອົບຮົມເພື່ອເພີ້ມຄວາມ ສາມາດຂອງບຸກລະກອນໃນການຮອງຮັບການເພີ່ມການຮຽນການສອນໃນລະດັບມັດທະ ຍົມປີທີ່ 4 ໄດ້ພຽງແຕ່ 2.900 ກວ່າຄົນເທົ່ານັ້ນໃນທົ່ວປະເທດ ເພາະວ່າງົບປະມາດດັ່ງກ່າວນີ້ກໍ່ຍັງຈະຕ້ອງໃຊ້ສຳລັບການກໍ່ສ້າງອາຄານຮຽນ ແລະ ຈັດພີມຕຳລາຮຽນໃຫມ່ອີກດ້ວຍ.
ຊົງຣິດ ໂພນເງິນ ລາຍງານມາຈາກ ໃນວັນທີ 31 ສິງຫາ 2009
