<!-- IMAGE -->
“ຢູ່ທຸກໆຫົນແຫ່ງໃນທົ່ວໂລກທີ່ເຮົາມອງເບິ່ງໄປ ແມ່ນພວກເຮົາຈະເຫັນປະຊາຊົນ ທີ່ໄດ້ກາຍເປັນອົບພະຍົບຈຳນວນຫລວງ ຫລາຍ ຍ້ອນການຂັດແຍ້ງສູ້ລົບກັນ ຍ້ອນການອຶດອາຫານ ພະຍາດໂຣຄາ ແລະການເສດຖະກິດ ຊຶ່ງເລື່ອງນີ້ນັບວ່າເປັນບັນຫາທີ່ສະລັບຊັບຊ້ອນຫລາຍ” ນັ້ນຄືຖ້ອຍຖະແຫລງຕອນນຶ່ງຂອງທ່ານນາງລັດຖະມົນຕີຕ່າງປະເທດຮິລແລຣີ ຄລິນຕັນ ໃນຕອນທ່ານນາງໄປໃຫ້ການຕໍ່ກຳມາທິການວ່າດ້ວຍຄວາມສຳພັນຕ່າງປະເທດຂອງສະພາສູງ ຊຶ່ງທ່ານນາງໄດ້ກ່າວຕໍ່ວ່າ
ພວກເຮົາຈະເຫັນມີພົນລະເມືອງອົບພະຍົບຢູ່ໃນຫລາຍໆແຫ່ງ ຊື່ງບາງພວກແມ່ນເປັນອົບພະຍົບມາໄດ້ດົນນານເຖິງຫລາຍສິບປີ ແລະບາງພວກ ຫາກໍເປັນມາໄດ້ບໍ່ເທົ່າໃດມື້ ກໍມີ. ຂ້າພະເຈົ້າຈະກະທຳສຸດຄວາມພະຍາຍາມຂອງ ຂ້າພະເຈົ້າ ເພື່ອແກ້ໄຂບັນຫານີ້. ພວກເຮົາຈະຍົກເອົາເລຶ່ອງນີ້ຂື້ນມາເປັນ ບູລິມະສິດໃນລະດັບສູງ ແລະຈະຊອກຫາທາງອອກໃຫ້ແກ່ບັນຫາທ້າທາຍຕ່າງໆກ່ຽວກັບເລື່ອງຊາວອົບພະຍົບ ທີ່ມີມາເປັນເວລາຍາວນານນັ້ນໃຫ້ໄດ້”
ອີງຕາມລັດຖະມົນຕີຊ່ວຍວ່າການກະຊວງຕ່າງປະເທດສະຫະລັດ ຮັບຜິດ ຊອບກິດຈະການປະຊາກອນ ຊາວອົບພະຍົບ ແລະການອົບພະຍົບຍ້າຍບ່ອນຢູ່ ທ່ານ Eric Schwartz ນັ້ນກໍແມ່ນວ່າ ປະຊາຊົນໃນທົ່ວໂລກປະມານ 42 ລ້ານຄົນ ໄດ້ຖືກຖອນຮາກຕ້ອງຍົກຍ້າຍບ່ອນຢູ່ ຍ້ອນການຂັດແຍ້ງ ແລະການປະຫັດປະຫານ. ໃນຈຳນວນພວກຄົນທີ່ມີຄວາມອ່ອນແອສູງເຫລົ່ານີ້ສ່ວນໃຫຍ່ແລ້ວແມ່ນພວກແມ່ຍິງແລະເດັກນ້ອຍ. 16 ລ້ານຄົນ ໃນຈຳນວນພວກປະຊາຊົນທີ່ພັດພາກຈາກຖິ່ນຢູ່ອາໃສນັ້ນ ແມ່ນເປັນອົບພະຍົບຢູ່ນອກປະເທດຂອງພວກເຂົາເຈົ້າ ໃນຂະນະທີ່ 26 ລ້ານຄົນເປັນອົພຍົບທີ່ຫລົບໄພຢູ່ພາຍໃນປະເທດຂອງຕົນເອງ. ນອກນັ້ນແລ້ວເມື່ອປີຜ່ານມານີ້ ມີປະຊາຊົນຫລາຍກວ່າ 235,000 ຄົນຖືກຂ້າຕາຍ ແລະອີກ 214 ລ້ານຄົນໄດ້ປະສົບກັບໄພທຳມະຊາດ ສົ່ງຜົນໃຫ້ເກີດການສູນເສຍທາງເສດຖະກິດ ຕົກເປັນມູນຄ່າປະມານ 190 ພັນລ້ານໂດລາ. ຕົວເລກທີ່ກ່າວມານັ້ນແມ່ນສູງກວ່າຕົວເລກສະເລ່ຍສຳຫລັບສອງສາມປີຜ່ານມາຢ່າງຫລວງຫລາຍ.
ຈຳນວນເງິນທີ່ສະຫະລັດໄດ້ຮ່ວມບໍລິຈາກ ໃຫ້ແກ່ຄວາມພະຍາຍາມຊ່ວຍເຫລືອເພື່ອມະນຸດສະທຳຂອງໂລກ ສຳຫລັບປີ 2009 ຕາມທີ່ໄດ້ປະເມີນມາກ່ອນໜ້ານີ້ ແມ່ນຕົກເປັນປະມານ 4500 ຮ້ອຍລ້ານໂດລາແລ້ວ ຊຶ່ງບໍ່ໄດ້ລວມເອົາການຊ່ວຍເຫລືອໂດຍທາງການທະຫານສະຫະລັດ.ແລະເມື່ອວັນທີ່ 19 ສິງຫາຜ່ານມານີ້ ທ່ານ Schwartz ລັດຖະມົນຕີຊ່ວຍວ່າຕ່າງປະເທດສະຫະລັດກໍໄດ້ປະກາດງົປມານການຊ່ວຍເຫລືອເພິ່ມອີກຂອງສະຫະລັດ ເພື່ອສະນັບສະນຸນຄວາມພະຍາຍາມເພື່ອຊ່ວຍເຫລືອແລະປົກປ້ອງດ້ານມະນຸດສະທຳຂອງນາໆຊາດ ພ້ອມທັງການປະຕິບັດງານເພື່ອກໍ່ສ້າງສະພາບການທີ່ເອື້ອອຳນວຍໃຫ້ມີການຟື້ນຕົວຄືນຢ່າງຍືນຍົນຖາວອນ.ທ່ານລັດຖະມົນຕີຊ່ວຍ Shwartz ກ່າວວ່າ “ພວກເຮົາມີສິນລະທຳປະຈຳໃຈ ທີ່ຈຳເປັນຈະຕ້ອງໄດ້ຊ່ວຍຊີວິດຜູ້ຄົນເອົາໄວ້”ທ່ານກ່າວຕໍ່ໄປວ່າ
ຖ້າຫາກວ່າມັນເກີດວິກິດການດ້ານມະນຸດສະທຳລະວ່າງຊາດຢູ່ບ່ອນໃດ ບ່ອນນຶ່ງຢູ່ໃນໂລກ ແຫລ່ງຊ່ອຍເຫລືອຕ່າງໆ ຂອງສະຫະລັດ ບໍ່ວ່າຈະໄປຈາກກະຊວງການຕ່າງປະເທດ ຈາກອົງການພັທະນາລະວ່າງຊາດ ແລະຈາກແຫລ່ງຊ່ອຍ ເຫລືອຂອງພົນລະເຮືອນສະຫະລັດ ບໍ່ວ່າຈະເປັນວິທີໃດວິທີນຶ່ງ ກໍແມ່ນມີທາງວ່າການຊ່ອຍເຫລືອທີ່ວ່ານັ້ນຈະໄປຮອດ ໄປເຖິງບ່ອນຫັ້ນໂລດ ເພື່ອປົກປ້ອງຄຸ້ມຄອງຜູ້ໄດ້ຮັບເຄາະກັມທັງຫລາຍ
ທ່ານລັດຖະມົນຕີຊ່ວຍ Eric Shwartz ກ່າວໃນທີ່ສຸດວ່າ “ຄວາມພະຍາຍາມດ້ານມະນຸດສະທຳຂອງສະຫະລັດ ບໍ່ໄດ້ ສຸມໃສ່ສະເພາະແຕ່ວິກິດການຕ່າງໆທີ່ເປັນຂ່າວໃຫຍ່ເທົ່ານັ້ນ. ມັນບໍ່ແມ່ນສິ່ງທີ່ນັກຊ່ວຍເຫລືອເພື່ອມະນຸດສະທຳຄວນຈະເຮັດ ແລະກໍບໍ່ແມ່ນສິ່ງທີ່ພວກເຮົາເຮັດ. ພວກເຮົາພະຍາຍາມສຸມຄວາມສົນໃຈໄປໃສ່ທົ່ວທຸກຫົນແຫ່ງໃນໂລກ ບ່ອນທີ່ມີປະຊາຊົນຈຳນວນຫລວງຫລາຍໄດ້ຮັບຄວາມເດືອດຮ້ອນ ທຸກທໍລະມານ ແລະຄວາມຮ້າຍແຮງຂອງວິກິດການຢູ່ໃນຂັ້ນທີ່ຈຳເປັນຕ້ອງໄດ້ມີການພົວພັນຊ່ວຍເຫລືອຂອງນານາຊາດ ໃນລະດັບໃດລະດັບນຶ່ງ.
