<!-- IMAGE -->
ສະຫະລັດອາເມລິກາ ແລະປະເທດໂຄລັມເບຍ ກຳລັງເຄື່ອນໄຫວໄປສູ່ການສ້າງ ຄວາມເຂັ້ມແຂງຍິ່ງຂື້ນໃຫ້ແກ່ການຮ່ວມມືກັນໃນດ້ານຄວາມໝັ້ນຄົງປອດໄພ ຄືລັດຖະບານສະຫະລັດແລະໂຄລັມເບຍ ໄດ້ບັນລຸການຕົກລົງ ຊົ່ວຄາວກັນກ່ຽວກັບຂໍ້ຕົກລົງຫລືສັນຍາ ວ່າດ້ວຍການຮ່ວມມືດ້ານການປ້ອງກັນ ຫລື DCA ເມື່ອວັນທີ່ 14 ເດືອນສິງຫານີ້.ຂະນະນີ້ກຳລັງມີການທົບທວນເບິ່ງຂໍ້ຕົກລົງບັ້ນສຸດທ້າຍກັນຢູ່ ໂດຍຄາດວ່າທັງສອງປະເທດ ຈະຮ່ວມລົງນາມໃນຂໍ້ຕົກລົງດັ່ງກ່າວ.
ສະຫະລັດ ແລະໂຄລັມເບຍ ມີຄວາມສຳພັນສອງຝ່າຍດ້ານຍຸທະສາດທີ່ໄກ້ຊິດກັນ. ການລົງນາມໃນຂໍ້ຕົກລົງ ວ່າດ້ວຍຄວາມຮ່ວມມືດ້ານປ້ອງກັນທີ່ຄາດວ່າຈະມີຂື້ນນັ້ນ ແມ່ນຈະເຮັດໃຫ້ຄວາມສຳພັນຂອງທັງສອງປະເທດ ໝັ້ນແກ່ນຍິ່ງຂື້ນໄປອີກ.ຂໍ້ຕົກລົງ ທີ່ວ່ານີ້ຈະອຳນວຍຄວາມສະດວກໃຫ້ມີການຮ່ວມມືກັນແບບສອງຝ່າຍທີ່ມີປະສິດທິຜົນ ໃນເລຶ່ອງບັນຫາຄວາມໝັ້ນຄົງຕ່າງໆຂອງໂຄລັມເບຍ ອັນໂຮມທັງການຜລິດ ແລະການ ລັກລອບຄ້າຂາຍຢາເສບຕິດ ການກໍ່ການຮ້າຍ ການລັກລອບທີ່ຜິດກົດໝາຍໝົດທຸກ ປະເພດ ແລະການຊ່ວຍເຫລືອ ດ້ານມະນຸດສະທຳ ແລະພັຍທຳມະຊາດເປັນຕົ້ນ.ຂໍ້ ຕົກລົງນີ້ເປັນຂໍ້ຕົກລົງສອງຝ່າຍໂດຍສະເພາະ ຊຶ່ງບໍ່ກ່ຽວຂ້ອງກັບປະເທດອື່ນໃດທັງນັ້ນ.
ຂໍ້ຕົກລົງຮ່ວມມືດ້ານການປ້ອງກັນນີ້ ບໍ່ອະນຸຍາດໃຫ້ສະຫະລັດຕັ້ງຖານທັບ ຫລືຖານ ປະຕິບັດການໃດໆຂື້ນໃນ ປະເທດໂຄລັມເບຍ ແລະທ່ານນາງລັດຖຸມົນຕີຕ່າງປະເທດ ສະຫະລັດ ຮິລແລຣີ ຄລິນຕັນ ກໍໄດ້ກ່າວອອກມາໃຫ້ເປັນທີ່ແຈ້ງຂາວແລ້ວວ່າສະຫະ ລັດບໍ່ມີຄວາມປະສົງທີ່ຈະຕັ້ງຖານທັບຂື້ນໃນໂຄລັມເບຍນັ້ນ. ແຕ່ຂໍ້ຕົກລົງສະບັບນີ້ ຮັບປະກັນໃຫ້ສະຫະລັດມີສິດສືບຕໍ່ຊົມໄຊ້ສະຖານທີ່ອຳນວຍຄວາມສະດວກຕ່າງໆ ທີ່ໄດ້ຕົກລົງກັນໄວ້ໂດຍສະເພາະແລ້ວນັ້ນ ເພື່ອທີ່ຈະດຳເນີນການຮ່ວມກັນໃນກິດ ຈະກຳຕ່າງໆພາຍໃນໂຄລັມເບຍ ທີ່ໄດ້ຕົກລົງກັນໄວ້ແລ້ວ.
ຂໍ້ຕົກລົງນີ້ແມ່ນເອື້ອອຳນວຍ ໃຫ້ສະຫະລັດເຂົ້າໃຊ້ຖານທັບອາກາດສາມແຫ່ງຂອງ ໂຄລັມເບຍ ທີ່ຕັ້ງຢູ່ປາລານເກໂຣ ອາປີອາຍ ແລະມາລາມໂບ ແລະສະຖານທີ່ອຳນວຍຄວາມສະດວກທາງທະຫານແຫ່ງອື່ນໆອີກຂອງໂຄລັມ ເບຍຕາມທີ່ໄດ້ຕົກລົງເຫັນພ້ອມນຳກັນແລ້ວນັ້ນ.ສະຖານທີ່ປະຕິບັດການທາງທະຫານທັງໝົດເຫລົ່ານີ້ແມ່ນຢູ່ພາຍ ໃຕ້ ແລະກໍຈະຢູ່ພາຍໃຕ້ການຄວບຄຸມຂອງໂຄລັມເບຍຕະຫລອດໄປ.ກອງທັບບົກ ໂຄລົມເບຍແມ່ນຈະສືບຕໍ່ເປັນຜູ້ບັນຊາການ ຄວບຄຸມ ປົກຄອງ ບໍລິຫານ ແລະຮັກສາ ປອດໄພຢູ່ໃນຖານທັບເຫລົ່ານັ້ນ. ກິດຈະກຳທັງໝົດທີ່ ດຳເນີນໄປຢູ່ຖານທັບເຫລົ່ານັ້ນ ຫລືຈາກຖານທັບເຫລົ່ານັ້ນ ໂດຍຝ່າຍສະຫະລັດນັ້ນແມ່ນຈະມີຂື້ນໄດ້ ກໍຕໍ່ເມື່ອໄດ້ຮັບ ອະນຸຍາດລ່ວງໜ້າຈາກລັດຖະບານໂຄລັມເບຍເສຍກ່ອນ. ແລະການມີໜ້າຂອງ ເຈົ້າໜ້າທີ່ ຫລືພະນັກງານ ສະຫະລັດຢູ່ໃນສະຖານທີ່ອຳນວຍຄວາມສະດວກເຫລົ່າ ນີ້ຈະມີຂື້ນບົນພື້ນຖານຂອງຄວາມຈຳເປັນ ແລະການຕົກລົງເຫັນພ້ອມນຳກັນເທົ່ານັ້ນ.
