ຜູ້ນໍາລາວລະບຸວ່າຊື່ມວນຊົນລາວຍັງມີຄວາມຈໍາເປັນ ທີ່ຈະຕ້ອງໄດ້ມີການປັບປຸງທາງດ້ານຄຸນນະພາບ ຂອງບຸກຄະລາກອນແລະ ເນື້ອໃນການນໍາສະເໜີ ຂໍ້ມູນຂ່າວສານໄປສູ່ ການຮັບຮູ້ຂອງປະ ຊາຊົນລາວ ແລະຕ້ອງໃຫ້ສອດຄ້ອງຕໍ່ແນວທາງການເມືອງ ຂອງພັກ-ລັດທີ່ວາງອອກ.
ທ່ານ ບຸນຍັງ ວໍລະຈິດ ຮອງປະທານປະເທດລາວ ໄດ້ຖະແຫຼງເນັ້ນຢໍ້າ ໃນໂອກາດເປັນປະທານໃນງານສະເຫຼີມສະຫຼອງວັນຊື່ມວນຊົນແຫ່ງຊາດ ແລະ ການພິມຈໍາຫນ່າຍໃນລາວ ຄົບຮອບ 59 ປີ ເມື່ອບໍ່ດົນມານີ້ຢູ່ນະຄອນຫຼວງວຽງຈັນວ່າ ຊື່ມວນຊົນລາວໃນປະຈຸບັນນີ້ໄດ້ຮັບການພັດທະນາແລະເຕີບໃຫຍ່ຂະຍາຍໂຕໃນທຸກໆ ດ້ານ ໂດຍສາມາດຕອບສະ ໜອງແລະເຜີຍແຜ່ຂໍ້ມູນຂ່າວ ສານສູ່ສັງຄົມລາວໄດ້ຢ່າງກ້ວາງຂວາງພໍສົມຄວນ ເຊິ່ງ ສະແດງອອກ ໂດຍມີຊື່ສິ່ງພິມຂອງພັກ ແລະລັດຖະບານຈໍານວນ 8 ສະບັບ ແລະ ມີສະຖານນີກະຈາຍສຽງອີກ 35 ແຫ່ງ ສ່ວນສະຖານນີໂທລະພາບແຫ່ງຊາດ ກໍ່ມີເຖິງ 32 ແຫ່ງໃນທຸກແຂວງທົ່ວປະເທດ.
ສ່ວນໃນດ້ານການສະແດງບົດບາດຂອງຊື່ມວນຊົນລາວໃນໄລຍະຜ່ານມານັ້ນ ທ່ານ ບຸນຍັງ ກໍ່ໄດ້ລະບຸວ່າຊື່ມວນຊົນລາວໄດ້ປະກອບສ່ວນຢ່າງສໍາຄັນເຂົ້າໃນການປ່ຽນແປງໃໝ່ຂອງພັກປະຊາຊົນປະຕິບັດລາວໄດ້ເປັນຢ່າງດີ ເຊິ່ງສະແດງອອກໃນການຂະຫຍາຍໂຕທາງເສດຖະກິດແລະການພັດທະນາທາງສັງຄົມລາວໃນທຸກໆດ້ານ ລວມທັງຍັງໄດ້ສະແດງບົດບາດໃນຖານະເປັນກະບອກສຽງທາງແນວຄິດອັນແຫຼມຄົມຂອງພັກ-ລັດໃນການໂຄສະນາເຜີຍແຜ່ສຶກສາອົບຮົມ, ເຕົ້າໂຮມ-ຈັດຕັ້ງ ແລະປຸກລະດົມປະຊາຊົນບັນດາເຜົ່າ ໃຫ້ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດມາໂດຍຕະຫຼອດ.
ແຕ່ຢ່າງໃດກໍ່ຕາມ ເນື້ອງຈາກປະຈຸບັນເປັນຍຸກສະໄໝຂອງໂລກບໍ່ມີພົມແດນທາງດ້ານຂໍ້ມູນຂ່າວສານນອກຈາກປະຊາຊົນລາວຈະສາມາດເຂົ້າເຖິງຂ່າວສານແລະຂໍ້ມູນຈາກຕ່າງປະເທດໄດ້ຢ່າງກ້ວາງຂວາງ ແລະເທົ່າທັນກັບສະຖານະການທີ່ເກີດຂື້ນໃນທົ່ວໂລກແລ້ວການຮັບຮູ້ຂໍ້ມູນຂ່າວສານດັ່ງກ່າວກໍ່ຍັງຈະສົ່ງຜົນຕໍ່ແນວຄິດການເມືອງຂອງປະຊາຊົນລາວເຊັ່ນກັນ.
ພາຍໃຕ້ສະພາບການດັ່ງກ່າວນີ້ ຈຶ່ງເຮັດໃຫ້ ທ່ານ ບຸນຍັງໄດ້ສະແດງການຮຽກຮ້ອງຂໍໃຫ້ຊື່ມວນຊົນລາວແກ້ໄຂບັນຫາຈຸດອອນ, ຂໍ້ບົກຜ່ອງ ແລະຂໍ້ຈໍາກັດຂອງພວກຕົນໃນຫຼາຍດ້ານເພື່ອໃຫ້ຊື່ມວນຊົນລາວສາມາດນໍາສະເໜີຂໍ້ມູນຂ່າວສານຕ່າງໆທີ່ມີຄຸນນະພາບຕໍ່ສັງຄົມລາວ ໃຫ້ທ່ວງທັນກັບສະຖານະການ.
ໂດຍອິງຕາມແຜ່ນການພັດທະນາຂອງກະຊວງແຫລງຂ່າວແລະວັດທະນະນຳລາວໃນຊ່ວງປີ 2009-2010 ທີ່ຈະເລີ້ມປະຕິບັດການນັບຈາກເດືອນຕຸລາປີນີ້ໄປຈົນເຖິງທ້າຍເດືອນກັນຍາ ປີໜ້ານັ້ນ ທາງການລາວກໍໄດ້ວາງເປົ້າໝາຍທີ່ຈະຂະຫຍາຍພື້ນທີ່ໃນການສົ່ງສັນຍານສຽງການອອກອາກາດລາຍການຕ່າງໆ ຂອງວິທະຍຸກະຈາຍສຽງແຫ່ງຊາດໃຫ້ຄອບຄຸມພື້ນທີ່ 90% ຂອງປະເທດ.ແລະໃນຂະນະດຽວກັນກໍຈະຂະຫຍາຍ ພື້ນທີ່ການສົ່ງສັນຍານໂທລະພາບແຫ່ງຊາດໃຫ້ຄອບຄຸມພື້ນທີ່ 70% ຂອງປະເທດໃຫ້ໄດ້.
ນອກຈາກນີ້ລັດຖະບານກໍຍັງໄດ້ປະກາດແຜນການການພັດທະນາລະບັບໂຄງຂ່າຍເຄໂບ ສາຍໃຍແກ້ວໃນທົ່ວປະເທດຫວ່າງມໍ່ໆມານີ້ອິີກດ້ວຍ. ໂດຍລັດຖະບານລາວຈະໃຊ້ເງິນທຶນເພື່ອດຳເນີນການດັ່ງກ່າວຖິງ 100 ລ້ານ ສະຫະຣັດ ຊຶ່ງຈະເຮັດໃຫ້ການສົ່ງຂໍ້ມູນ ຂ່າວສານຕ່າງໆ ດ້ວຍລະບົບອີນເຕີເນັດການ ສົ່ງສັນຍານສຽງ ແລະ ພາບຮວມໄປເຖິງບໍລິການຄົມ ມະນາຄົມທັງຂອງລັດຖະ ບານ ແລະ ເອກກະຊົນໃຫ້ສາມາດເຊື່ອມໂຍງເຖິງກັນໃນທົ່ວປະເທດ ແລະເຊື່ອນຕໍ່ໄປທົ່ວໂລກໄດ້ຢາງຄົບຊຸດໃນປີ 2012 ເປັນຢ່າງຊ້າ.
