ການເລືອກຕັ້ງໃນຍີ່ປຸ່ນ: ຜົນການຢັ່ງຫາງສຽງພວກປ່ອນບັດໂດຍສື່ມວນຊົນຍີ່ປຸ່ນ ຫລັງຈາກການປ່ອນບັດໄດ້ອັດລົງ ສະແດງໃຫ້ເຫັນວ່າພັກຝ່າຍຄ້ານ ຄືພັກປະຊາທິປັດແຫ່ງຍີ່ປຸ່ນ ຫລືພັກ DPJ ໄດ້ຮັບໄຊຊະນະ ຢ່າງຖ້ວມລົ້ນໃນການເລືອກຕັ້ງສພາແຫ່ງຊາດໃນມື້ນີ້ ຊື່ງຖ້າ ຫາກວ່າຜົນການເລືອກຕັ້ງຂອງທາງການ ປາກົດອອກມາໃນຮູບດຽວກັນກັບການຢັ່ງສຽງພວກທີ່ອອກມາຈາກບ່ອນປ່ອນບັດ ກໍແມ່ນສະແດງວ່າ ການປົກຄອງປະເທດຂອງພັກເສຣີປະຊາທິປັດ ຫລືພັກ LDP ທີ່ມີມາຢ່າງເກືອບວ່າຕໍ່ເນື່ອງ ກັນ ເປັນເວລາດົນກ່ວາ 50 ປີນັ້ນ ຈະຕ້ອງສີ້ນສຸດລົງ. ພວກສະຖານີໂທລະພາບຕ່າງໆ ທຳນາຍວ່າ ພັກ DPJ ຈະໄດ້ບ່ອນນັ່ງໃນລະວ່າງ 300 ຫາ 321 ບ່ອນຢູ່ໃນສະພາຕ່ຳ ທີ່ມີ 480 ບ່ອນນັ້ນ. ປັດຈຸບັນນີ້ ພັກດັ່ງກ່າວມີບ່ອນນັ່ງຢູ່ 112 ບ່ອນໃນສະພາຕ່ຳ. ຜົນການຢັ່ງຫາງສຽງປະຊາຊົນໄດ້ຊີ້ບອກວ່າ ຄວາມເປັນຫ່ວງກ່ຽວ ກັບ ສະພາບການເສດຖະກິດທີ່ຊຸດໂຊມລົງນັບມື້ຂອງປະເທດ ແລະບັນຫາການແກ່ຊະລາໄວຂອງພົນລະເມືອງ ໄດ້ສົ່ງຜົນໃຫ້ຜູ້ປ່ອນບັດຫລາຍຄົນ ຫັນເຫອອກຈາກພັກຂອງລັດຖະບານ ທີ່ນຳໂດຍ ນາຍົກລັດຖະມົນຕີ TARO ASO ນັ້ນ. ພັກປະຊາທິປັດແຫ່ງຍີ່ປຸ່ນ ຫລືພັກ DPJ ແມ່ນຄວບຄຸມສະພາສູງໄວ້ໄດ້ແລ້ວ ໂດຍໄດ້ຮັບການສະໜັບສະໜູນຈາກພັກນ້ອຍໆຫລາຍພັກ ແລະການໄດ້ຮັບໄຊຊະ ນະຢູ່ໃນສະພາຕ່ຳ ກໍຈະສົ່ງຜົນໃຫ້ຜູ້ນຳພັກ DPJ ທ່ານ YUKIO HATOYAMA ໄດ້ເປັນນາຍົກລັດຖະ ມົນຕີຄົນຕໍ່ໄປຂອງຍີ່ປຸ່ນ.
ການເມືອງໃນອິຣ່ານ: ປະທານາທິບໍດີອີຣ່ານ
ທ່ານ MAHMOUD AMADINEJAD ໄດ້ສະເນີລາຍຊື່ ຄະນະລັດຖະບານຊຸດໃໝ່ຂອງທ່ານຕໍ່ສະພາແລ້ວ ເພື່ອໃຫ້ພິຈາລະ ນາຮັບຮອງເອົາ.
ສະພາຂອງອີຣ່ານ ເປີດປະຊຸມ ເປັນເວລາສາມວັນໃນມື້ນີ້ ເພື່ອພິຈາລະນາ ຄະນະລັດຖະມົນຕີທີ່ຖືກສະເນີຊື່
ຈຳນວນ 21 ຄົນ ກ່ອນຈະລົງມະຕິໄວ້ວາງໃຈ. ພວກຜູ້ແທນສະພາທີ່ສັງກັດ ພັກນິຍົມແນວທາງເດີມ ຂອງທ່ານ
AHMADINEJAD ເອງ ໄດ້ ຄັດຄ້ານຢ່າງແຂງຂັນຕໍ່ຫລາຍຄົນ ທີ່ຖືກສະເນີຊື່ໃຫ້ເຂົ້າຮັບຕຳ ແໜ່ງລັດຖະມົນຕີນັ້ນ
ຊຶ່ງມີແມ່ຍິງໂຮມຢູ່ນຳສາມຄົນ. ສະມາຊິກ ສະພາບາງຄົນເວົ້າວ່າ ຜູ້ທີ່ຖືກຄັດເລືອກບາງຄົນ
ບໍ່ມີປະສົບປະ ການຫຍັງເລີຍ. ທ່ານ AHMADINEJAD
ໄດ້ຮັບໄຊຊະນະໃນການເລືອກ ຕັ້ງປະທານາທິບໍດີອີກຄັ້ງນື່ງ ເມື່ອເດືອນມິຖຸນາ ຜ່ານມາ ຊຶ່ງພວກຄັດຄ້ານລັດຖະບານກ່າວວ່າ
ມີການໂກງ ການເລືອກຕັ້ງ. ປະຊາຊົນ ອີຣ່ານຫລາຍພັນຄົນ ຖືກຈັບກຸມ
ຍ້ອນພາກັນປະທ້ວງ ຜົນການເລືອກຕັ້ງ. ທ່ານ AHMADINEJAD ໄດ້ຮຽກຮ້ອງ ໃຫ້ດຳເນີນຄະດີພວກທີ່ເປັນໂຕຕັ້ງໂຕຕີໃນການປະທ້ວງ
ທີ່ດຳເນີນໄປເປັນ ເວລາຫລາຍອາທິດ ລຸນຫລັງການເລືອກຕັ້ງນັ້ນ.
ປາກິສຖານ: ເຈົ້າໜ້າທີ່ປາກິສຖານກ່າວວ່າ ມີຕຳຫລວດເກນຢ່າງນ້ອຍ 14 ຄົນເສຍຊີວິດ ໃນການໂຈມຕີດ້ວຍລະເບີດສະລະຊີບ ຢູ່ໃນເຂດຮ່ອມພູ SWAT ໃນວັນອາທິດມື້ນີ້ ຊື່ນັບວ່າເປັນຄັ້ງຮ້າຍແຮງທີ່ສຸດ ນັບແຕ່ທາງກອງທັບໄດ້ຍາດເອົາການຄວບຄຸມເຂດດັ່ງກ່າວ ມາໄດ້ຈາກພວກກະບົດຕາລີບານ. ການໂຈມຕີ ມີຂື້ນໃນເມືອງ MINGORA ໃນເຂດຕາເວັນຕົກສ່ຽງເໜືອຂອງຮ່ອມພູ ໃນຂະນະທີ່ພວກນັກຮຽນຕຳຫລວດເຫລົ່ານັ້ນ ກຳລັງທຳການເຝິກແອບຢູ່ ໄກ້ໆກັບປົດຕຳຫລວດແຫ່ງນື່ງ. ການໂຈມຕີໃນມື້ນີ້ ແມ່ນຕິດຕາມມາຫລັງຈາກທີ່ກອງທັບປາກິສຖານ ໄດ້ອອກມາປະກາດໃນມື້ວານນີ້ວ່າ ຕົນໄດ້ທຳລາຍຄ້າຍເຝິກແອບແຫ່ງນື່ງ ຂອງພວກວາງລະເບີດສະລະຊີບ ໃນເຂດຮ່ອມພູ SWAT. ຖະແຫລງການຂອງກອງ ທັບເວົ້າວ່າ ລາຍງານຈາກແຫລ່ງສືບລັບແລະຈາກປະຊາຊົນທ້ອງຖິ່ນ ໄດ້ນຳພາພວກທະຫານໄປຍັງບ່ອນເຝິກແອບຂອງພວກກະບົດ ຢູ່ໃນພາກຕາເວັນຕົກສ່ຽງເໜືອນັ້ນ. ພວກກະບົດຫົກຄົນ ຖືກຂ້າຕາຍໃນການໂຈມຕີຂອງຝ່າຍກອງທັບ ແລະອີກຫລາຍຄົນໄດ້ຮັບບາດເຈັບ.
ສະຫະລັດ - ປາກິສຖານ: ໜັງສືພິມໃຫຍ່ສະບັບນື່ງຂອງສະຫະລັດລາຍງານຂ່າວວ່າ ວໍຊິງຕັນໄດ້ກ່າວຫາປາກິສຖານວ່າ ທຳການດັດແກ້ລູກສອນໄຟທີ່ຜະຫລິດໂດຍສະຫະລັດ ສຳລັບໃຊ້ໃນທະເລນັ້ນ ໃນແບບທີ່ຜິດກົດໝາຍ ເພື່ອເຮັດໃຫ້ສາມາດຍິງໄປໂຈມຕີເປົ້າໝາຍທາງພື້ນດິນໄດ້ ຊື່ງອາດສາມາດເປັນໄພຂົ່ມຂູ່ຕໍ່ອິນເດຍໄດ້ນັ້ນ. ລາຍງານຂອງໜັງສືພິມ NEW YORK TIMES ເວົ້າວ່າການກ່າວຫາທີ່ວ່ານີ້ ໄດ້ມີຂື້ນຢູ່ໃນສານປະທ້ວງທາງການທູດ ທີ່ບໍ່ໄດ້ເປີດເຜີຍໃຫ້ຮູ້ ທີ່ທາງສະຫະລັດໄດ້ຢື່ນຕໍ່ນາຍົກລັດຖະມົນ ຕີ YUSUF RAZA GILANI ແລະເຈົ້າໜ້າທີ່ຂັ້ນສູງຄົນອື່ນໆອີກຂອງປາກິສຖານ ໃນທ້າຍເດືອນມີຖຸນາຜ່ານມາ. ລາຍງານເວົ້າວ່າພວກ ເຈົ້າໜ້າທີ່ສະຫະລັດສົງໃສວ່າ ປາກິສຖານໄດ້ທຳການດັດແກ້ລູກສອນໄຟເຫລົ່ານັ້ນ ໃນລັກສະນະທີ່ເປັນການລະເມີດກົດໝາຍວ່າດ້ວຍການສົ່ງອອກອາວຸດທີ່ຖືກຄວບຄຸມ. ກ່ຽວກັບຂ່າວນີ້ ສຳນັກງານຂ່າວສານຂອງປະເທດຝຣັ່ງລາຍງານວ່າ ເຈົ້າໜ້າທີ່ຝ່າຍຄວາມໝັນຄົງຂອງປາກິສຖານທ່ານນື່ງກ່າວວ່າ ການ ກ່າວຂອງໜັງສືພິມນິວຢອກທາຍມ໌ ແມ່ນພາກສ່ວນນື່ງຂອງການປຸກລະດົມ ເພື່ອ ເຮັດໃຫ້ປາກິສຖານແລະກອງທັບເສຍຊື່ສຽງ. ການຂັດແຍ້ງກັນເລື່ອງລູກສອນໄຟນີ້ໂຜ່ໂຕຂື້ນມາ ໃນຂະນະທີ່ລັດຖະບານທ່ານໂອບາມາ ກຳລັງພະຍາຍາມໃຫ້ລັດຖະສະພາອະນຸມັດການຊ່ວຍເຫລືອ ມູນຄ່າ 7500 ລ້ານດອລລ່າ ໃຫ້ແກ່ປາກິສຖານ ສຳລັບໄລຍະຫ້າປີຂ້າງໜ້າ.
ອັຟການິສຖານ: ປາກົດວ່າ ປະທານາທິບໍດີອັຟການີສຖານ ທ່ານ HAMID KARZAI ໄດ້ມີຄະແນນ ນຳໜ້າຄູ່ແຂ່ງທີ່ໄກ້ຊິດທີ່ສຸດຂອງທ່ານ ຄືອະດີດລັດຖະມົນຕີ ວ່າການ ຕ່າງປະເທດ ABDULLAH ABDULLAH ນັ້ນ ຫລາຍຂື້ນ ອິງຕາມຜົນການ ເລືອກຕັ້ງຄັ້ງລ່າສຸດ ເມື່ອວັນເສົາວານນີ້. ພວກເຈົ້າໜ້າທີ່ເລືອກຕັ້ງກ່າວວ່າ ຫລັງ ຈາກການນັບບັດເລືອກ ຕັ້ງ ຈາກນຶ່ງສ່ວນສາມຂອງບ່ອນປ່ອນບັດທັງໝົດ ໃນການເລືອກ ຕັ້ງຄັ້ງ ວັນທີ່ 20 ເດືອນ ສິງຫານີ້ ປາກົດວ່າ ທ່ານ KAZAI ໄດ້ຮັບຄະແນນສຽງ 46 ເປີເຊັນ ໃນຂະນະທີ່ທ່ານ ABDULLAH ໄດ້ຮັບ 31 ເປີເຊັນ. ປະທານາທິບໍດີ ກາຊາຍ ຖືກຕຳໜິ ຕິຕຽນວ່າ ເກນເອົາການສະໜັບສະໜູນຈາກພວກ ຂຸນເສິກ ເພື່ອຊ່ວຍໃຫ້ ທ່ານໄດ້ຮັບໄຊຊະນະໃນການເລືອກຕັ້ງ. ນາຍ ABDUL RASHID DOSTUM ທີ່ມີລາຍງານຂ່າວ ຢ່າງກວ້າງຂວາງ ວ່າເປັນຜູ້ມີສ່ວນຮັບຜິດຊອບ ໃນການສັງຫານໝູ່ ພວກນັກໂທດ ຕາລິບານຈຳນວນປະມານ 2 ພັນຄົນນັ້ນ ກໍໄດ້ໂຄສະນາຫາ ສຽງເລືອກຕັ້ງ ຊ່ວຍປະທານາທິບໍດີກາຊາຍ ໃນອັຟການີສຖານ ໃນອາທິດແລ້ວນີ້. ແຕ່ຢ່າງໃດກໍຕາມ ຜົນການເລືອກຕັ້ງຄັ້ງນີ້ ອາດບໍ່ຖືກຮັບຮູ້ ຫລືອາດຖືກລົບລ້າງໄດ້ ໂດຍຄະນະກຳມາທິການຮັບຟັງຄຳຮ້ອງທຸກກ່ຽວກັບການເລືອກຕັ້ງ ທີ່ໄດ້ຮັບໜັງສືຮ້ອງທຸກ ຫລາຍກວ່າ 2 ພັນສະບັບ ໂຮມທັງ 450 ສະບັບ ທີ່ຖືວ່າໜັກແໜ້ນພໍທີ່ຈະເຮັດໃຫ້ຜົນການເລືອກຕັ້ງປ່ຽນໄປໄດ້.
ອອສເຕຣເລຍກັບເລື່ອງອາວຸດຂອງເກົາຫລີເໜືອ: ເຈົ້າໜ້າທີ່ອອສເຕຣເລຍກຳລັງກວດກາເບິ່ງວ່າ ໄດ້ມີການກະທຳຜິດກົດໝາຍຫລືບໍ່ ຫລັງຈາກທີ່ເຮືອເດີນທະເລຂອງຕົນລຳນື່ງ ທີ່ມຸ້ງໜ້າໄປຍັງອີຣ່ານ ຖືກຈັບໄດ້ວ່າ ບັນທຸກອາວຸດຂອງເກົາຫລີເໜືອ. ທ່ານ ANTHONY ALBANESE ລັດຖະມົນຕີການຂົນສົ່ງ ທາງເຮືອ ຂອງອອສເຕຣເລຍ ໄດ້ໃຫ້ການຢືນຢັນໃນວັນອາທິດມື້ນີ້ວ່າ ກຳປັ່ນ ANL AUSTRALIA ໄດ້ ບັນທຸກອາວຸດ ຈາກເກົາຫລີເໜືອແທ້ ຊຶ່ງມີໂຮມທັງລະເບີດທີ່ຂັບດັນໂດຍຈະຫລວດແລະຍິງຈາກບ່າໄຫລ.ເຮືອລຳດັ່ງກ່າວຖືກ ຍຶດໄວ້ ເມື່ອຕົ້ນເດືອນນີ້ ໂດຍສະຫະລັດອາຫລັບເອມິເຣດສ໌ ພາຍໃຕ້ອຳນາດການລົງໂທດຂອງອົງການ ສະຫະປະຊາຊາດ ຕໍ່ເກົາຫລີເໜືອ ຊື່ງສະພາຄວາມໝັ້ນຄົງຂອງອົງການສະຫະປະຊາຊາດ ໄດ້ກຳໜົດການ ລົງໂທດເຫລົ່ານັ້ນ ຍ້ອນໂຄງການອາວຸດນິວເຄລຍຂອງເກົາຫລີເໜືອ. ມາດຕາການລົງໂທດເຫລົ່ານີ້ ທີ່ໄດ້ຖືກຮັບຮອງເອົາເມື່ອເດືອນມິຖຸນາຜ່ານມາ ຮຽກຮ້ອງໃຫ້ນາໆຊາດທຳການກວດກາ ກຳປັ່ນແລະເຮືອບິນຂົນສົ່ງ ຂອງເກົາຫລີເໜືອ ທີ່ຜ່ານເຂດນ້ຳແລະເຂດນ່ານຟ້າຂອງຕົນ.
ຄວາມວຸ້ນວາຍໃນມຽນມ້າ: ລາຍງານຂ່າວຫລ້າສຸດແຈ້ງວ່າ ການສູ້ລົບກັນໃນພາກຕາເວັນອອກສ່ຽງເໜືອຂອງມຽນມ້າ ຢູ່ເລາະຕາມຊາຍແດນຈີນນັ້ນ ໄດ້ຢຸດຕິລົງແລ້ວ ລຸນຫລັງມີການປະທະກັນມາເປັນເວລາຫລາຍມື້ ລະວ່າງກອງທະຫານຂອງຝ່າຍລັດຖະບານ ກັບພວກກະບົດຊົນເຜົ່າ. ມີທະຫານຢ່າງນ້ອຍ 700 ຄົນຈາກກຸ່ມທະຫານບ້ານຂອງຊົນເຜົ່າ KOKAN ທີ່ເອີ້ນວ່າ ກອງທັບພັນທະມິດປະຊາທິປະໄຕແຫ່ງຊາດມຽນມ້າ ຂ້າມຊາຍແດນເຂົ້າໄປຍັງປະເທດຈີນ ໃນວັນອາທິດມື້ນີ້ ແລະມອບອາວຸດຂອງເຂົາເຈົ້າ ໃຫ້ເຈົ້າ ໜ້າທີ່ທ້ອງຖິ່ນ ແລະກອງທັບຈີນໄດ້ຢາຍ ເຄື່ອງນຸ່ງ ຊຸດສົ້ງຂາຍາວ ຄຸມຮອດບ່າ ສີຟ້າ ໃຫ້ພວກທະຫານເຫລົ່ານັ້ນນຸ່ງ ແທນຊຸດເຄື່ອງແບບຂອງເຂົາເຈົ້າ. ປະຊາຊົນຫລາຍພັນຄົນໄດ້ພາກັນຫລັ່ງໄຫລໜີໄປຈາກເມືອງຊາຍແດນ NANSAN ໃນແຂວງຢຸນນານຂອງຈີນໃນເດືອນນີ້ ເພື່ຫລົບໜີການສູ້ລົບກັນໃນເຂດ KOKANG ຂອງມຽນມ້າ ຫລັງຈາກທີ່ລັດຖະ ບານມຽນມ້າ ໄດ້ສົ່ງກອງທະຫານໄປຍັງເຂດນັ້ນ. ອົງການຂ້າຫລວງໃຫຍ່ຝ່າຍອົບພະຍົບຂອງສະຫະປະຊາຊາດກ່າວວ່າ ມີປະຊາຊົນຫລາຍຮອດສາມໝື່ນຄົນ ຫລົບໜີໄພໄປຍັງ ປະເທດຈີນ.
ພິທີສົ່ງສະການທ່ານເຄນເນດີ: ສົບຂອງມື້ລາງທ່ານ EDWARD ຫລື TEDDY KENNEDY ທີ່ປະທານາທິບໍດີ ບາຣັກ ໂອບາມາ ໄດ້ກ່າວສະດຸດີວ່າ ເປັນນັກນິຕິບັນຢັດ ຜູ້ຍິ່ງໃຫຍ່ ທີ່ສຸດ ໃນຍຸກຂອງພວກເຮົານັ້ນ ໄດ້ຖືກນຳໄປຝັງທີ່ສຸສານແຫ່ງຊາດ ອາລິງຕັນ ໄກ້ນະຄອນຫລວງວໍຊິງຕັນແລ້ວ. ສົບຂອງ ທ່ານ ເອັດເວີດ ເຄນເນດີ້ ໄດ້ຖືກຝັງ ເມື່ອຕອນແລງວັນເສົາວານນີ້ ໄກ້ໆ ກັບຫລຸມຝັງ ສົບຂອງອ້າຍທັງສອງທີ່ ຖືກລອບສັງຫານ ຄືປະທາ ນາທິບໍດີ ຈອນ ເອັຟ ເຄນເນດີ້ ແລະສະມາຊິກສະພາສູງ ໂຣເບີດ ເຄນເນດີ້.
ຟັງສຽງ ຢູ່ທາງຂວາມື ຂ້າງເທິງ
