ການໃຊ້ຢາຕ້ານເຊື້ອໂຣກຢ່າງບໍ່ຖືກຕ້ອງ ພາໃຫ້ເກີດເຊື້ອພະຍາດວັນນະໂຣກ ຫລື ໂຣກປອດແຫ້ງທີ່ດື້ຢາໄດ້.
ການສຶກສາຄົ້ນຄວ້າໃໝ່ສະແດງໃຫ້ເຫັນວ່າ ການໃຊ້ຢາຕ້ານເຊື້ອໂຣກ ທີ່ຄົນນິຍົມໃຊ້ກັນຫລາຍ ຊະນິດນື່ງ ຢ່າງບໍ່ຖືກຕ້ອງ ກຳລັງພາໃຫ້ເກີດເຊື້ອພະຍາດ ວັນນະໂຣກ ຫລື TB ທີ່ດື້ຢາ. ວັນນະໂຣກ ເປັນພະຍາດກ່ຽວກັບຫລອດລົມຫາຍໃຈ ທີ່ມີສາເຫດມາຈາກການຕິດເຊື້ອໂຣກ ຊຶ່ງອົງການອະນາໄມໂລກເວົ້າວ່າ ໄດ້ເຮັດໃຫ້ຜູ້ຄົນຢູ່ໃນທົ່ວໂລກ ເສຍຊີວິດ ຮອດ 2 ລ້ານຄົນ ໃນແຕ່ລະປີ.
ເຖິງແມ່ນວ່າ ວັນນະໂຣກ ຫລື ໂຣກປອດແຫ້ງ ເປັນພະ ຍາດທີ່ປິ່ນປົວໄດ້ ແຕ່ການ ປິ່ນປົວຕ້ອງໄດ້ໃຊ້ຢາປົວຫລາຍ ຢ່າງພ້ອມກັນບາດດຽວ ຢ່າງຕໍ່ເນື່ອງກັນເປັນເວລາ 6 ເດືອນ. ພວກນັກຄົ້ນຄວ້າໄດ້ມີຄວາມຫວັງວ່າ ຢາຕ້ານເຊື້ອ ພະຍາດລຸ້ນນື່ງ ທີ່ມີຊື່ວ່າ fluoroquinolones [floor-oh-KWIN-oh-loans] ອາດຊ່ວຍປ່ຽນແປງວິທີປິ່ນປົວໂຣກນີ້ ໄດ້. ຫາກແຕ່ວ່າ ທ່ານນາງ Rose Devasia [deh-VAHZ-ee-ah] ນັກຄົ້ນຄວ້າດ້ານພະຍາດທີ່ເກີດຈາກການຕິດເຊື້ອ ທີ່ມະຫາວິທະຍາໄລ Vanderbilt University ເວົ້າວ່າ ຍ້ອນວ່າຢາພວກນີ້ມີປະສິດທິຜົນ,ປອດໄພ ແລະ ໃຊ້ງ່າຍ ຈື່ງພາໃຫ້ພວກນາຍໝໍສັ່ງຢາ ໃຫ້ຄົນເຈັບກິນຢ່າງກວ້າງ ຂວາງ ເພື່ອປົວພະຍາດຫລາຍຊະນິດ, ບາງຄັ້ງກໍສັ່ງໃຫ້ກິນ ເຖິງແມ່ນບໍ່ຮູ້ແນ່ນອນວ່າ ຄົນເຈັບປ່ວຍເປັນພະຍາດຕິດເຊື້ອອັນໃດ ກໍຕາມ. ທ່ານນາງ Devasia ເວົ້າວ່າ ການເຮັດແນວນັ້ນ ສາມາດກໍ່ໃຫ້ເກີດບັນຫາໄດ້ ສຳລັບຄົນເຈັບທີ່ປ່ວຍເປັນວັນນະໂຣກແທ້ໆ. ທ່ານນາງກ່າວຕໍ່ໄປວ່າ ເວລາຄົນເຈັບເຂົ້າໄປຫ້ອງສຸກເສີນແລະ ໄອອອກມາ ຫລາຍໆຫລືແຮງໆ ນາຍໝໍກໍຄິດວ່າ, ໂອ້ ລາວຄົງຈະເປັນໂຣກປອດບວມ, ສະນັ້ນ, ຂ້ອຍຈະເອົາຢາ fluoroquinolones ໃຫ້ລາວ ກິນ. ແຕ່ຢາ fluoroquinolones ປົວພະຍາດ TB ໄດ້ແຕ່ບາງພາກສ່ວນເທົ່ານັ້ນ. ຄົນປ່ວຍຈະຮູ້ສຶກດີຂຶ້ນມາ ປະມານ 10 ຫາ 13 ມື້ ແລ້ວ ອາການໄອກໍຈະກັບມາຄືນອີກ. ສະນັ້ນ ລາວກໍຈະໄປຫານາຍໝໍອີກຜູ້ນຶ່ງ ຫລື ກັບຄືນໄປຫ້ອງສຸກເສີນອີກ ແລະ ບອກນາຍແພດວ່າ ລາວເປັນໄອອີກແລ້ວ ນາຍໝໍກໍຈະເອົາຢາ fluoroquinolones ໃຫ້ລາວກິນອີກຊຸດນຶ່ງ.
ທ່ານນາງ Devasia ເວົ້າວ່າ ໃນແຕ່ລະຄັ້ງທີ່ຄົນເຈັບທີ່ຍັງ ບໍ່ໄດ້ຖືກກວດເຫັນວ່າ ເປັນໂຣກປອດແຫ້ງ ແຕ່ໄດ້ກິນຢາ fluoroquinolones ເພື່ອປິ່ນປົວພະຍາດອື່ນ ຕາມໃບສ່ັງຂອງນາຍແພດນັ້ນ, ມັນກໍຈະເພິ່ມທະວີຄວາມສ່ຽງ ທີ່ວ່າ ລາວຈະເປັນພະຍາດ TB ທີ່ດື້ຕໍ່ຢາ fluoroquinolones.
ຢູ່ໃນການສຶກສາຄົ້ນຄວ້າໃໝ່ ທີ່ລົງພິມຢູ່ໃນວາລະສານ ການແພດຂອງອາເມລິກາ ກ່ຽວກັບ ພະຍາດຫລອດລົມ ແລະການປິ່ນປົວພະຍາດ ທີ່ໜັກໜ່ວງ ຫລື American Journal of Respiratory and Critical Care Medicine, ທ່ານນາງ Devasia ກ່າວວ່າ ນາງແລະເພື່ອນ ຮ່ວມງານຂອງນາງ ໄດ້ຄົ້ນພົບວ່າ ຄົນປ່ວຍເປັນ TB ຫລືປອດ ແຫ້ງ ເກືອບ 1 ຄົນໃນ 5 ຄົນໃດ ແມ່ນໄດ້ຮັບໃບສັ່ງໃຫ້ກິນຢາ fluoroquinolones ໃນປີ ກ່ອນທີ່ເຂົາເຈົ້າຈະຖືກ ກວດພົບວ່າ ເປັນວັນນະໂຣກ. ການກິນຢາ fluoroquino-lones ງວດນຶ່ງແມ່ນ 10 ມື້. ທຸກໆ 10 ມື້ໃດທີ່ຄົນເຈັບກິນຢາ fluoroquinolones ຕື່ມອີກນັ້ນ ໂອກາດທີ່ຈະພາໃຫ້ເກີດເຊື້ອພະຍາດ ປອດແຫ້ງ ທີ່ດື້ຕໍ່ຢາ fluoroquino-lones ນັ້ນ ແມ່ນເພີ້ມຂຶ້ນ 50%.
ຢູ່ໃນຮ້ານຂາຍຢາໃນບັນດາປະເທດກຳລັງພັດທະນາ ຢາ fluoroquinolones ມີໄວ້ໃຫ້ຊື້ໄດ້ງ່າຍ ໂດຍບໍ່ຈຳເປັນຕ້ອງມີໃບສັ່ງຢາຈາກໝໍ ພາຍໃຕ້ຊື່ ເຊັ່ນ Cipro ເແລະ Levaquin ແລະໃຊ້ເພື່ອປິ່ນປົວພະຍາດທຸກຢ່າງ ນັບແຕ່ໂຣກຖອກທ້ອງຈົນເຖິງປອດບວມ.
ທ່ານນາງ Devasia ເວົ້າວ່າ ຜົນການຄົ້ນຄວ້າຄັ້ງນີ້ ເຮັດໃຫ້ທ່ານນາງລັງເລໃຈ ທີ່ຈະສະນັບສະໜູນໃຫ້ໃຊ້ຢາ fluoroquinolones ເປັນຢາທຳອິດ ເພື່ອປົວໂຣກ TB ໃນທັນທີໂລດ. ທ່ານນາງ ຢາກໃຫ້ລໍຖ້າໃຊ້ ໃນພາຍຫລັງໃນກໍລະນີທີ່ໃຊ້ຢາອ່ອນອ່ອນບໍ່ໄດ້ຜົນແລ້ວ.
