ດັ່ງທີ່ເຮົາໄດ້ສະເໜີໃນຂ່າວຮອບໂລກໄປແລ້ວ ຜູ້ແທນສະພາສູງສະຫະຣັດ Jim Webb ໄດ້ຢ້ຽມຢາມ ສປປ ລາວ ໃນອາທິດແລ້ວນີ້ ແລະ ໄດ້ພົບປະກັບ ເຈົ້າໜ້າທີ່ຂັ້ນສູງ ຂອງລັດຖະ ບານລາວ ແລະຜູ້ນຳທາງທຸລະກິດ ເພື່ອສົ່ງເສີມ ຜົນປະໂຫຍດ ຂອງສະຫະຣັດ.
ຫ້ອງການຂອງ ທ່ານ Jim Webb, ສະມາຊິກສະພາສູງ ປະ ຈຳລັດເວີຈີເນຍ ໄດ້ປະກາດໃຫ້ຊາບວ່າ ທ່ານຜູ້ແທນຣັດຖະ ສະພາ ສະຫະຣັດ ທີ່ສັງກັດພັກເດໂມແກຣດ ທ່ານນີ້ ໄດ້ເດີນ ທາງໄປຮອດນະຄອນຫລວງວຽງຈັນ ໃນວັນພະຫັດແລ້ວນີ້ ເພື່ອພົບກັບເຈົ້າໜ້າທີ່ຂັ້ນສູງ ຂອງລັດຖະບານລາວຈຳນວນນຶ່ງ ແລະຜູ້ນຳທາງອຸດສະຫະກຳ ເພື່ອເສີມຂະຫຍາຍຜົນປະໂຫຍດ ຂອງສະຫະຣັດ ຢູ່ໃນຂົງເຂດເອເຊຍຕາເວັນອອກສຽງໃຕ້.
ການຢ້ຽມຢາມລາວໃນຄັ້ງນີ້ ຂອງທ່ານຜູ້ແທນສະພາສູງ Webb ແມ່ນພາກສ່ວນນຶ່ງຂອງການເດີນທາງເຄື່ອນໄຫວຢ້ຽມຢາມ 5 ປະເທດໃນເອເຊຍ ເຊິ່ງລວມທັງມ້ຽນມ້າ, ໄທ, ກຳປູເຈຍ ແລະ ຫວຽດນາມນຳດ້ວຍ ເປັນເວລາ 2 ອາທິດ.
ທ່ານຜູ້ແທນສະພາສູງ Webb ຊື່ງເປັນຜູ້ນື່ງທີ່ມີປະສົບປະການໃນຂົງເຂດນີ້ ມາເປັນເວລາດົນນານ ດຳລົງຕຳແໜ່ງເປັນປະ ທານ ອະນຸກຳມາທິການດ້ານກິດຈະການເອເຊຍຕາເວັນອອກ ແລະ ເຂດມະຫາສະມຸດ ປາຊີຟິກ ຂອງຄະນະ ກຳມາທິການ ສາຍພົວພັນຕ່າງປະເທດ ຂອງສະພາສູງສະຫະຣັດ. ທ່ານ ກ່າວວ່າ:
"ມັນເປັນສິ່ງສຳຄັນຍິ່ງ ທີ່ສະຫະຣັດອາເມຣິກາ ຈະຕ້ອງ ກັບເຂົ້າໄປພົວພັນ ໃນຂົງເຂດເອເຊຍຕາເວັນອອກສຽງໃຕ້ໃນທຸກລະດັບ ຄືນອີກ". ໃນສ່ວນທີ່ກ່ຽວກັບປະເທດລາວນັ້ນ ທ່ານກ່າວ ວ່າ
"ສາຍພົວພັນຂອງພວກເຮົາກັບລາວ ບໍ່ເຄີຍໄດ້ຮັບການ ປົວແປງຢ່າງເຕັມສ່ວນ ນັບຕັ້ງແຕ່ ສົງຄາມຫວຽດນາມ ໄດ້ສິ້ນສຸດລົງ ເມື່ອ 30 ປີກວ່າຜ່ານມາແລ້ວ. ຂ້າພະເຈົ້າ ມີຄວາມມຸ້ງ ຫວັງ ແລະກະຕືລືລົ້ນ ທີ່ຈະທຳງານຮ່ວມກັນກັບເຈົ້າໜ້າທີ່ຂອງ ລັດຖະບານ ລາວ ເພື່ອເຮັດໃຫ້ສອງປະເທດຂອງພວກເຮົາ ມີຄວາມສຳພັນອັນຮັດແໜ້ນກວ່າເກົ່າ ທັງທາງດ້ານເສດຖະກິດ, ວັດທະນາທໍາ ແລະ ການທູດ.
ລາຍການພົບປະຂອງ ທ່ານຜູ້ແທນສະພາສູງ Webb ຢູ່ໃນລາວ ລວມມີ ການພົບປະກັບຜູ້ຕາງໜ້າຈາກກະຊວງ ການຕ່າງປະເທດ, ແລະ ກະຊວງປ້ອງກັນຊາດ ພ້ອມທັງກະຊວງ ອຸດສະຫະກຳ ແລະ ການຄ້າຂອງລາວ ທີ່ຮັບຜິດຊອບວຽກງານ ໃນການດຳເນີນຄວາມພະຍາຍາມຂອງລາວ ເພື່ອໃຫ້ໄດ້ເຂົ້າເປັນສະມາຊິກຂອງ ອົງການການຄ້າໂລກນັ້ນ. ທ່ານ Webb ຍັງໄດ້ພົບກັບ ຄະນະກຳມາທິການແມ່ນ້ຳຂອງ ແລະ ບັນດາຜູ້ ນຳທາງ ທຸລະກິດ ເພື່ອຊອກຫາ ໂອກາດລົງທຶນໃຫ້ແກ່ ນັກລົງທຶນຂອງ ສະ ຫະຣັດຢູ່ໃນລາວ ແລະ ຊ່ອງທາງທີ່ຈະເສີມຂະຫຍາຍການ ຮ່ວມມືກັນລະຫວ່າງ 2 ປະເທດ.
ທ່ານ Webb ໄດ້ມີການພົວພັນ ເປັນການສ່ວນໂຕ ໃນກິດຈະ ການ ທີ່ກ່ຽວກັບຂົງເຂດເອເຊຍ ແລະ ປາຊີຟິກ ຢ່າງຕໍ່ເນື່ອງ ມາເປັນເວລາດົນນານ ກ່ອນໜ້າທີ່ທ່ານຈະໄດ້ຖືກເລືອກຕັ້ງເປັນ ຜູ້ແທນສະພາສູງຂອງສະຫະຣັດ ດ້ວຍຊ້ຳ. ນອກຈາກການຢ້ຽມ ຢາມ ໃນນາມຂອງສະມາຊິກຂອງຄະນະກຳມາທິການ ສາຍພົວ ພັນຕ່າງປະເທດຂອງສະພາສູງສະຫະຣັດ ໃນຄັ້ງນີ້ແລ້ວ, ທ່ານ Webb ຍັງໄດ້ເຄີຍປະຕິບັດງານ ແລະ ເດີນທາງ ໄປທົ່ວຂົງເຂດ ອັນກວ້າງໃຫຍ່ນີ້ ນັບແຕ່ເກາະ Micronesia ໄປຈົນເຖິງ ມ້ຽນມ້າ ມາເປັນເວລານານເກືອບ 4 ທົດສະວັດ ຫລືເກືອບ ສີ່ສິບປີແລ້ວ ເຊິ່ງທ່ານໄດ້ໄປໃນນາມ ນາຍທະການນາວີກະໂຍທິນ ຫລືທະຫານມາຣີນສ໌, ຜູ້ວາງແຜນການປ້ອງກັນຊາດ, ນັກຂ່າວ, ນັກຂຽນປຶ້ມ, ເຈົ້າໜ້າທີ່ລະດັບບໍລິຫານຂອງກະຊວງປ້ອງກັນປະເທດ ແລະ ໃນນາມທີ່ປຶກສາດ້ານທຸລະກິດ.
ທ່ານ Webb ຍັງເຄີຍໄດ້ຮັບໃຊ້ເປັນທະຫານມາຣີນສ໌ ຢູ່ຫວຽດນາມ, ແລະ ຕໍ່ມາ ກໍໄດ້ເປັນ ລັດຖະມົນຕີຊ່ວຍວ່າການ ກະຊວງປ້ອງກັນປະເທດ ແລະ ລັດຖະມົນຕີກອງທັບເຮືອ ທີ່ທຳນຽມ 5 ແຈ ຫລື Pentagon.
ທ່ານຍັງເຄີຍເປັນຜູ້ວາງແຜນການທະຫານສຳລັບຂົງເຂດເອເຊຍ ແລະ ປາຊີຟິກ ປະຈຳເກາະ Guam, ໄດ້ຂຽນປຶ້ມ ຢ່າງຫລວງ ຫລາຍ ກ່ຽວກັບບັນຫາຕ່າງໆ ຢູ່ໃນຍີ່ປຸ່ນ, ໄທ, ຫວຽດນາມ, ແລະ ຟີລິບປິນ ໃນລະດັບທ້ອງຖິ່ນ ກໍຄື ລະດັບ ຊາດ ແລະ ລະດັບສາກົນ ແລະ ໃນຊຸມປີ 1990 ທ່ານໄດ້ທຳງານເປັນ ທີ່ປຶກສາໃຫ້ແກ່ ບໍລິສັດທຸລະກິດ ທີ່ມີຄວາມມຸ້ງຫວັງຢາກເຮັດ ທຸລະກິດຢູ່ຫວຽດນາມ. ທ່ານໄດ້ເຮັດວຽກ ໃນຄະນະກຳມາທິ ການສາຍພົວພັນຕ່າງປະເທດ ຂອງສະພາສູງສະຫະຣັດ ນັບຕັ້ງ ແຕ່ທ່ານໄດ້ຖືກເລືອກຕັ້ງ ໃຫ້ເປັນຜູ້ແທນສະພາສູງສະຫະ ຣັດ ໃນ ເດືອນ ມັງກອນ ປີ 2007 ເປັນຕົ້ນມາ.
ໃນຖານະ ປະທານ ຂອງອະນຸກຳມາທິການດ້ານກິດຈະການກ່ຽວກັບຂົງເຂດ ເອເຊຍຕາເວັນອອກ ແລະ ເຂດຝັ່ງມະຫາສະມຸດປາຊີຟິກນັ້ນ, ທ່ານ Webb ແມ່ນມີໜ້າທີ່ຮັບຜິດຊອບ ແລະກຳກັບເບິ່ງນຳ ສາຍພົວພັນຂອງສະຫະຣັດ ກັບບັນດາປະ ເທດໃນຂົງເຂດເອເຊຍຕາເວັນອອກ ເອເຊຍຕາເວັນອອກສຽງໃຕ້, ເຂດເລາະແຄມຝັ່ງມະຫາສະມຸດປາຊີຟິກ ແລະເຂດໂອຊິອານາ. ນອກນັ້ນ ອະນຸກຳມາທິການຂອງຄະນະກຳມາທິການ ສາຍພົວພັນຕ່າງປະເທດຂອງສະພາສູງສະຫະລັດ ຍັງຮັບຜິດ ຊອບ ພວກອົງການຈັດຕັ້ງ ລະດັດບຂົງເຂດ ເຊັ່ນ ສະມາຄົມ ກຸ່ມປະເທດໃນເຂດເອເຊຍຕາ ເວັນອອກສຽງໃຕ້ ຫລື ASEAN ແລະ ອົງການ ຮ່ວມມື ເສດຖະກິດ ເອເຊຍ-ປາຊີຟິກ ຫລື APEC ນຳອີກ