ສະຫະລັດ - ມຽນມ້າ: ເຮືອບິນທະຫານລຳນື່ງ ທີ່ບັນທຸກນັກໂທດອາເມລິກັນທີ່ຖືກປ່ອຍອອກຈາກຄຸກໃນມຽນມ້າ ແລະສະມາຊິກສະພາສູງສະຫະລັດ ທີ່ໄດ້ເຈລະຈາກັບຜູ້ນຳທະຫານມຽນມ້າ ໃຫ້ປ່ອຍໂຕຜູ້ກ່ຽວນັ້ນ ໄດ້ໄປຮອດບາງ ກອກແລ້ວ. ນາຍ John Yettaw ໄດ້ຕິດຕາມໄປກັບສະມາຊິກສະພາສູງ Jim Webb ໃນຖ້ຽວບິນໄປຍັງປະເທດໄທ ໃນວັນອາທິດມື້ນີ້. ໃນວັນເສົາວານນີ້ ທ່ານ Webb ໄດ້ພົບປະສົນທະນາກັບຜູ້ນຳມຽນມ້ານາຍພົນ Than Shwe ທີ່ໄດ້ອະນຸຍາດໃຫ້ປ່ອຍໂຕນາຍ Yettaw ທີ່ຖືກໂທດຈຳຄຸກ 7 ປີ ຍ້ອນໄດ້ລອຍນ້ຳຂ້າມບຶງໄປພັກຢູ່ເຮືອນຂອງ ທ່ານນາງອອງ ຊານຊູຈີ. ທ່ານ Webb ເປັນເຈົ້າໜ້າທີ່ສະຫະລັດຄົນທຳອິດທີ່ໄດ້ພົບກັບທ່ານ Than Shwe. ໃນກອງປະຊຸມຖະແຫລງຂ່າວສັ້ນໆ ກ່ອນອອກຈາກມຽນມ້າ ທ່ານ Webb ໄດ້ກ່າວຂອບໃຈລັດຖະບານມຽນມ້າ ສຳລັບການປ່ອຍໂຕນາຍ Yettaw. ຫລັງຈາກເດີນທາງໄປຮອດບາງກອກ ທ່ານ Webb ໄດ້ບອກພວກນັກຂ່າວວ່າ ປະເທດຈີນມີພັນທະທີ່ຈະຕ້ອງໃຊ້ອິດທິພົນຂອງຕົນ ເພື່ອປະຕິຮູບລັດຖະບານທີ່ກົດຂີ່ ແລະແຍກໂຕເອງຢູ່ຢ່າງໂດດດ່ຽວ ຂອງມຽນມ້ານັ້ນ. ທ່ານກ່າວຕື່ມວ່າ ທ່ານມີແຜນການທີ່ຈະພົບປະ ກັບລັດຖະມົນຕີການຕ່າງປະເທດ Hillary Clinton ເພື່ອປຶກສາຫາລືກັນກ່ຽວກັບທາງເລືອກ ໃນການຫາທາງຢຸດຕິສະຖານະການທາງການເມືອງ ທີ່ຕົກຢູ່ໃນສະພາບບໍ່ໄປບໍ່ມາໃນມຽນມ້ານັ້ນ ແລະນຳເອົາຄວາມຈະເລີນ ຮຸ່ງເຮືອງ ວັດທະນາຖາວອນ ມາສູ່ປະຊາຊົນມຽນມ້າ. ທ່ານ Webb ເດີນທາງໄປຢ້ຽມຢາມເອເຊຍ ໃນຖານະປະທານອະນຸກຳມາທິການຄວາມສຳພັນກັບຕ່າງປະເທດ ຂອງສະພາສູງສະຫະລັດ ກ່ຽວກັບກິດຈະການເອເຊຍແລະປາຊີຟິກ.
ອິຣ່ານ: ສື່ມວນຊົນອີຣ່ານກ່າວວ່າ ພວກທີ່ຖືກກັກຕົວຫລາຍກວ່າ 25 ຄົນໄດ້ ຖືກນຳມາຂື້ນສານດຳເນີນ ຄະດີໃນມື້ນີ້ ໃນຂໍ້ຫາທີ່ກ່ຽວພັນກັບການກໍ່ຄວາມບໍ່ສະງົບ ລຸນຫລັງການເລືອກຕັ້ງປະທານາທິບໍດີຂອງອິ ຣ່ານ ທີ່ໄດ້ກາຍມາເປັນບັນຫາຂັດແຍ້ງກັນນັ້ນ. ອົງການຂ່າວ IRNA ຂອງທາງການ ອິຣ່ານເວົ້າວ່າ ຄຳຟ້ອງຮ້ອງທີ່ອ່ານໃນສານ ໃນວັນອາທິດມື້ນີ້ ກ່າວຫາພວກກັກຂັງຈຳນວນ 25 ຄົນນັ້ນວ່າ ໄດ້ວາງແຜນ ເພື່ອ ສ້າງຄວາມວຸ້ນວາຍລຸນຫລັງການເລືອກຕັ້ງ ມາເປັນເວລາຫລາຍປີແລ້ວ. ລາຍງານຂ່າວເວົ້າວ່າໄດ້ມີການນຳເອົາວີດີໂອບັນທຶກພາບ ຂອງການກໍ່ການຈະລາຈົນຕາມຖະນົນຫົນທາງ ມາສາຍໃຫ້ເບິ່ງ ຢູ່ໃນສານ. ລັດຖະບານອິຣ່ານໄດ້ຈັບກຸມປະຊາຊົນ ຫລາຍຮ້ອຍ ຄົນ ໃນຂໍ້ຫາວ່າມີສ່ວນພົວພັນນຳການປະທ້ວງ ຕໍ່ຕ້ານ ຜົນການ ເລືອກ ຕັ້ງປະທານາທິບໍດີອິຣ່ານ ເມື່ອວັນທີ່ 12 ເດືອນມິຖຸນາ ຜ່ານມາ ທີ່ມອບໄຊຊະນະໃຫ້ປະທາ ນາທິບໍດີ Mahmoud Ahmadinejad ແຕ່ພວກຜູ້ນຳຝ່າຍຄ້ານ ກ່າວວ່າ ມີການສໍ້ໂກງການເລືອກຕັ້ງ.
ປາກິສະຖານ: ທູດພິເສດຂອງສະຫະລັດ ທ່ານ Richard Holbrooke ກຳລັງຢູ່ທີ່ປາກິສະຖານ ບ່ອນທີ່ທ່ານມີກຳນົດພົບພໍ້ ກັບເຈົ້າໜ້າທີ່ຂັ້ນສູງຂອງປາກິສະຖານ ໃນມື້ນີ້. ທ່ານ Holbrooke ໄດ້ມີແຜນການຈະເດີນທາງໄປຍັງເຂດຮ່ອມພູ Swat ທາງພາກຕາເວັນຕົກສ່ຽງເໜືອ ຂອງປາກິສະຖານຄືກັນ ແຕ່ເຈົ້າໜ້າທີ່ສະຖານທູດສະຫະລັດກ່າວວ່າ ຝົນຕົກໜັກໄດ້ເຮັດໃຫ້ທ່ານຕ້ອງໄດ້ລົບລ້າງແຜນການ. ກອງທັບປາກິສະຖານໄດ້ເປີດສາກ ທຳການບຸກໂຈມຕີຢູ່ໃນເຂດຮ່ອມພູ Swat ແລະເຂດອ້ອມເແອ້ມ ໃນທ້າຍເດືອນເມສາຜ່ານມາ ຫລັງຈາກທີ່ພວກຕາລີບານໄດ້ລະເມີດການຢຸດຍິງ ແລະເຣີ່ມເຄື່ອນກຳລັງເຂົ້າ ໄປ ຍັງເຂດນະຄອນຫລວງອິສະລາມາບັດ. ທາງກອງທັບກ່າວວ່າ ຕົນໄດ້ຂັບໄລ່ພວກຕາລີບານ ອອກໄປຈາກເຂດຮ່ອມພູແລ້ວເປັນສ່ວນໃຫຍ່ ແຕ່ກໍຍັງມີການຕໍ່ສູ້ກັນຢູ່ເປັນບາງຄັ້ງບາງ ຄາວ. ໄດ້ມີການພົບເຫັນ 18 ສົບທີ່ສົງໃສວ່າເປັນຂອງພວກຕາລີບານໃນມື້ນີ້ ໃນເຂດຮ່ອມພູ Swat ຊື່ງເຈົ້າໜ້າທີ່ທະຫານເຊື່ອວ່າ ຖືກພວກຊາວບ້ານທ້ອງຖິ່ນຂ້າຕາຍ ເພື່ອແກ້ແຄ້ນຄືນ.
ໄຟໄໝ້ທີ່ຄູເວດ: ທາງການຄູເວດກ່າວວ່າ ປະຊາຊົນຈຳນວນ 41 ຄົນເສຍຊີວິດ ຫລັງຈາກໄຟໄໝ້ ເຕັ້ນຂອງງານແຕ່ງງານ ທີ່ເຕັມໄປ ດ້ວຍພວກແມ່ຍິງແລະເດັກນ້ອຍ. ເຈົ້າໜ້າທີ່ກ່າວວ່າ ພວກນັກ ຊ່ຽວຊານ ພິສູດຫລັກຖານ ກຳລັງ ທຳງານເພື່ອຊີ້ບອກ ຊື່ສຽງ ຂອງແມ່ຍິງ ທີ່ເສຍຊີວິດ 35 ຄົນ ແລະເດັກນ້ອຍ 6 ຄົນ ທີ່ ຖືກໄຟໄໝ້ນັ້ນຢູ່ ເນຶ່ອງຈາກວ່າ ຫລາຍ ສົບຖືກໄຟໄໝ້ຫລາຍ ຈົນບໍ່ສາມາດຈະຊີ້ບອກໄດ້ວ່າເປັນຜູ້ໃດ. ມີ ຜູ້ໄດ້ຮັບບາດເຈັບ ຢ່າງໜ້ອຍ 57 ຄົນໃນເຫດໄຟໄໝ້ດັ່ງກ່າວ ຊຶ່ງເກີດຂື້ນເມື່ອ ຕອນແລງຂອງວັນເສົາວານນີ້ ທີ່ເມືອງ Jahra ທາງພາກ ຕາເວັນຕົກຂອງຄູເວດ. ເຈົ້າໜ້າທີ່ກ່າວວ່າ ພວກເຄາະ ຮ້າຍ ຫລາຍໆຄົນ ຖືກຢຽບ ຍ້ອນຜູ້ຄົນແຕກຕື່ນຕົກໃຈ ແລະຟ້າວ ຫລົບໜີອອກ ຈາກເຕັ້ນ. ສາເຫດທີ່ພາໃຫ້ເກີດໄຟໄໝ້ທີ່ແທ້ຈິງນັ້ນ ຍັງບໍ່ຮູ້ເທື່ອໃນເວລານີ້ ເຖິງແມ່ນລາຍງານ ຂ່າວບົ່ງວ່າ ອາດ ເປັນເພາະ ການຕໍ່ສາຍໄຟຟ້າບໍ່ຖືກຕ້ອງ. ໂດຍທົ່ວໆໄປແລ້ວ ພິທີແຕ່ງງານໃນຄູເວດ ຊຶ່ງເປັນປະເທດທີ່ຖືແນວ ທາງເດີມຂອງອິສະລາມນັ້ນ ຈະຈັດແຍກກັນ ລະວ່າງພວກຜູ້ຊາຍແລະພວກແມ່ຍິງ. ສ່ວນພວກເດັກນ້ອຍ ຍິງຊາຍ ແມ່ນຮ່ວມໃນພິທີຂອງຝ່າຍຍິງ.
ຄວາມເຄ່ງຕຶງລະວ່າງເກົາຫລີ: ເກົາຫລີເໜືອ ຫລືສາທາລະນະລັດປະຊາທິປະໃຕເກົາຫລີ ໄດ້ກ່າວຄຳຂູ່ໃນມື້ນີ້ວ່າ ຈະທຳລາຍສະຫະລັດກັບເກົາຫລີໃຕ້ ໃຫ້ຮາບຄາບດ້ວຍອາວຸດນິວເຄລຍ ຖ້າຫາກວ່າສອງປະເທດນີ້ຄຸກຄາມຕົນ. ສຳນັກງານຂ່າວກາງຂອງເກົາຫລີ ຊື່ງເປັນອົງການຂ່າວທາງການຂອງ ຣັຖບານພຽງຢາງ ອ້າງຄຳຖະແຫລງຂອງກອງທັບເກົາຫລີເໜືອ ທີ່ເວົ້າວ່າ "ຖ້າວ່າພວກຈັກກະພັດສະຫະລັດອາເມລິກາ ແລະກຸ່ມລີມິອຸງພັກ ໝາຍເຖິງເກົາຫລີໃຕ້ ຫາກຂົ່ມຂູ່ສາທາລະນະລັດປະຊາທິປະໃຕເກົາຫລີ ດ້ວຍອາວຸດນິວເຄລຍ ຕົນກໍຈະຕອບໂຕ້ຄືນດ້ວຍອາວຸດນິວເຄລຍ ຄືກັນ." ສະຫະລັດກັບເກົາຫລີໃຕ້ ມີກຳນົດຈະລົງມື ທຳການຊ້ອມລົບຈຳລອງປະຈຳປີຮ່ວມກັນ ໂດຍໃຊ້ຄອມພິວເຕີຈັດສາກ ໃນວັນຈັນມື້ອື່ນນີ້ ຊື່ງເກົາຫລີ ເໜືອຖືວ່າ ເປັນການກະກຽມເພື່ອບຸກລຸກຕົນ. ລັດຖະບານພຽງຢາງໄດ້ອອກຄຳຖະແຫລງ ທີ່ແຂງກະດ້າງຢູ່ສະເໝີ ເວລາໃດທີ່ສະຫະລັດກັບເກົາກລີໃຕ້ ກຳລັງຈະຊ້ອມລົບຮ່ວມກັນ.
ຄວາມວຸ້ນວາຍໃນຟີລິບປິນ: ທີ່ປະເທດຟິລິບປິນ ປະທານາທິບໍດີ ກລໍເຣຍ ອາໂຣຍໂຍ ໄດ້ສັ່ງໃຫ້ພວກທະຫານທຳລາຍລ້າງ ພວກຫົວຮຸນແຮງ ມູສລິມ Abu Sayyaf ໃນເຂດພາກໃຕ້ຂອງ ຟິລິບປິນ ຫລັງຈາກ ການສູ້ລົບກັນ ທີ່ຍັງຜົນໃຫ້ພວກທະຫານຖືກຂ້າ ຕາຍ 23 ຄົນ. ທ່ານນາງ ໄດ້ຖະແລງ ທີ່ເມືອງ Zamboanga ທາງພາກໃຕ້ ບ່ອນທີ່ ທ່ານນາງໄດ້ໄປຢ້ຽມຢາມພວກທະຫານບາດເຈັບ ເມື່ອວັນເສົາ ວານນີ້ ແລະເຂົ້າຮ່ວມພິທີຢ້ຽມຢາມແລະງັນສົບ ຂອງທະຫານ ທີ່ເສຍຊີວິດໃນການສູ້ລົບກັບກຸ່ມມູສລິມຫົວຮຸນແຮງ Abu Sayyaf ເມື່ອວັນພຸດຜ່ານ ມາທີ່ເກາະບາຊິລັນນັ້ນ. ລັດຖະມົນຕີຕ່າງປະເທດຟິລິບປິນ ທ່ານ Gilbert Teodoro ກ່າວ ວ່າ ທ່ານນາງປະທານາທິບໍດີອາໂຣຍໂຢ ຍັງໄດ້ເຕືອນວ່າ ສະມາຊິກ ຂອງກຸ່ມແນວໂຮມປົດປ່ອຍອິສລາມ Moro ທີ່ໄດ້ຮ່ວມກັບກຸ່ມ Abu Sayyaf ສັງຫານພວກທະຫານນັ້ນ ກໍຈະຖືກຕາມລ່າໂຕເຊ່ນກັນ ເຖິງແມ່ນມີການ ຢຸດຍິງ ກັບພວກກຸ່ມກະບົດດັ່ງກ່າວ ກໍຕາມ.
ຄົບຮອບວັນຍອມຈຳນົນຂອງຍິ່ປຸ່ນ: ນາຍົກລັດຖະມົນຕີ ຍີ່ປຸ່ນ ທ່ານ Taro Aso ໄດ້ກ່າວສະແດງຄວາມເສົ້າເສຍຢ່າງສຸດຊຶ້ງ ຕໍ່ການທີ່ປະເທດຂອງທ່ານໄດ້ສ້າງຄວາມທຸກທໍລະມານໃຫ້ແກ່ເອເຊຍ ໃນລະວ່າງສົງຄາມໂລກຄັ້ງທີສອງ. ທ່ານອາໂຊະໄດ້ເຊ່ນນັ້ນ ຢູ່ໃນພິທີທີ່ຈັດຂື້ນຢ່າງເຄ່ງຂຶມທີ່ໂຕກຽວ ໃນວັນເສົາ ວານນີ້ ເພື່ອເປັນຂີດໝາຍວັນຄົບຮອບ 64 ປີ ທີ່ຍິ່ປຸ່ນຍອມຈຳນົນຕໍ່ຝ່າຍພັນທະມິດ ໃນສົງຄາມໂລກຄັ້ງທີ່ສອງ. ຄຳເຫັນຂອງທ່ານອາໂຊະ ໄດ້ຖືກຖ່າຍທອດທາງໂທລະພາບອອກໄປທົ່ວປະເທດ ແລະທ່ານໄດ້ສະແດງເສຍໃຈ ແລະກິນແໜງໃຈຢ່າງທີ່ສຸດ ຕໍ່ການເສຍຊີວິດຂອງຊາວຍິ່ປຸ່ນ ຫລາຍກ່ວາສາມລ້ານຄົນໃນລະວ່າງສົງຄາມນັ້ນ ຕລອດທັງພວກທີ່ໄດ້ຮັບເຄາະຈາກການຮຸກຮານຂອງຍິ່ປຸ່ນ. ເຈົ້າຈັກກະພັດອາກິຮິໂຕະ ແລະພະຊາຍາ Michiko ກໍໄດ້ຊົງເຂົ້າຮ່ວມໃນພິທີຄົບຮອບນີ້ເຊ່ນກັນ ຊື່ງພະອົງກໍໄດ້ສະແດງຄວາມເສົ້າ ພະໄທ ຕໍ່ຄອບຄົວຂອງພວກທີ່ໄດ້ເສຍຊີວິດໄປ ແລະຊົງສະແດງຄວາມປາດຖະນາຂອງພະອົງວ່າ ໂສກນາຕະກຳແບບນີ້ ຄົງຈະບໍ່ເກີດຂື້ນອີກຈັກເທື່ອ. ພະບິດາຂອງຈັກກະພັດອາກິຮິໂຕະ ມື້ລາງຈັກກະພັດຮິໂຣຮິໂຕະ ເປັນຜູ້ປະກາດຍອມແພ້ໃນສົງຄາມໂລກຄັ້ງທີ່ສອງນັ້ນ ເມື່ອວັນທີ 15 ສິງ ຫາ ປີ 1945.
ໄຕ້ຫວັນ - ໄຕ້ຝຸ່ນ: ທ່ານ ໝາຫຢິງ ຈີວ ປະທານາທິບໍດີໄຕ້ຫວັນ ໄດ້ກ່າວຂໍໂທດຕໍ່ປະຊາຊົນ ສຳຫລັບການປະຕິບັດງານ ຮັບມືຕໍ່ ໄພລົມພາຍຸໄຕ້ຝຸ່ນທີ່ຊັກຊ້າຂອງລັດຖະບານ ທີ່ຍັງຜົນໃຫ້ ມີຜູ້ຊີວິດ ຫລາຍຮ້ອຍຄົນນັ້ນ. ປະທານາທິບໍດີ ໝາ ກ່າວໃນ ຖະແລງການ ທາງທີວີເມື່ອວັນເສົາຜ່ານມານີ້ວ່າ ທ່ານມີຄວາມເສຍ ໃຈຫລາຍ ທີ່ລັດຖະບານຂອງທ່ານບໍ່ໄດ້ປະຕິບັດງານຮັບມືກັບໄພພິບັດຄັ້ງນີ້ ໄດ້ດີ ແລະວ່ອງໄວກ່ວານັ້ນ. ລັດຖະບານໄຕ້ຫວັນ ໄດ້ຖືກຕຳໜິ ຕິຕຽນ ຢ່າງໃຫຍ່ ທີ່ບໍ່ສາມາດຄາດຄະເນໄດ້ ເຖິງລະດັບຄວາມຮ້າຍແຮງຂອງວິກິດການລົມໄຕ້ຝຸ່ນ ມໍຣະກົດ ທີ່ປະທະເກາະໄຕ້ຫວັນ ເມື່ອຕົ້ນເດືອນນີ້.
