<!-- IMAGE -->
ທ່ານນາງຮິລແລຣີຄລິນຕັນ ລັດຖະມົນຕີການຕ່າງ ປະເທດສະຫະລັດ ໄດ້ພົບປະກັບບັນດາລັດຖະມົນ ຕີວ່າການຕ່າງປະເທດຂອງກຳປູເຈຍ ລາວ ໄທ ແລະວຽດນາມ ເພື່ອເນ້ນໜັກເຖິງການຮ່ວມມືທີ່ເພິ່ມທະວີຂື້ນນັບມື້ ລະວ່າງ ສະຫະລັດແລະກຸ່ມ ປະເທດລຸ່ມແມ່ນ້ຳຂອງ. ການປະຊຸມກັນທີ່ຈັດຂື້ນ ຢູ່ທີ່ເກາະພູເກັດ ປະເທດໄທ ໃນວັນທີ່ 23 ກໍລະກົດ ເດືອນຜ່ານມານັ້ນ ແມ່ນເປັນເທື່ອທຳອິດຂອງການພົບປະກັນໃນທຳນອງນີ້.
ທີ່ກອງປະຊຸມດັ່ງກ່າວນັ້ນ ທ່ານນາງລັດຖະມົນຕີຕ່າງ ປະເທດຄລິນຕັນ ໄດ້ກ່າວເນ້ນເຖິງຄວາມສຳຄັນ ທີ່ສະ ຫະລັດ ອາເມລິກາມອບໃຫ້ແກ່ຂົງເຂດລຸ່ມແມ່ນ້ຳ ຂອງ ໃນຖານະເປັນພາກສ່ວນນຶ່ງຂອງຄວາມໝາຍໝັ້ນ ຂອງສະຫະລັດ ເພື່ອສົ່ງເສີມສັນຕິພາບແລະຄວາມຈະເລີນຮຸ່ງເຮືອງ ຢູ່ ໃນຂົງເຂດຂອງພວກປະເທດສະມາຊິກຂອງສະມາຄົມ ອາຊຽນທັງໝົດນັ້ນ. ບັນດາລັດຖະມົນຕີຕ່າງປະເທດຂອງກຳປູເຈຍ ໄທ ແລະວຽດ ນາມ ແມ່ນມີຄວາມຍິນດີນຳການຮ່ວມມືຢ່າງໄກ້ຊິດຂື້ນກ່ວາເກົ່າກັບສະຫະລັດ ກ່ຽວກັບບັນຫາສຳຄັນຕ່າງໆທີ່ທັງສອງຝ່າຍມີຄວາມສົນໃຈ ແລະມີຜົນປະໂຍດຮ່ວມກັນ ຊຶ່ງໂຮມທັງບັນຫາທ້າທາຍຂ້າມເຂດຊາຍແດນທີ່ກ່ຽວພັນກັບສະພາບແວດລ້ອມ ສາທາລະ ນະສຸກ ການສຶກສາ ແລະການພັທະນາໂຄງລ່າງພື້ນຖານ ເປັນຕົ້ນ
ເພື່ອເສີມຂຍາຍການຮ່ວມມືກັນໃນດ້ານສະພາບແວດລ້ອມນັ້ນ ທ່ານ ນາງລັດຖະມົນຕີຕ່າງປະເທດຄລິນຕັນ ໄດ້ນຳ ສະເນີ ຂໍ້ສະເນີເພື່ອພັດທະນາໂຕແບບອັນນື່ງຂື້ນມາ ທີ່ອິງໃສ່ຄອມພິວເຕີ ທີ່ໃຫ້ຊື່ວ່າ Fore-cast Mekong ຫລື “ການທຳນາຍແມ່ນ້ຳຂອງ” ເພື່ອສະແດງໃຫ້ເຫັນເຖິງຜົນກະທົບ ຈາກສະພາວະດິນຟ້າອາກາດປ່ຽນແປງ ແລະສິ່ງ ທ້າທາຍອື່ນໆຕໍ່ການພັທະນາເຂດລຸ່ມແມ່ນ້ຳຂອງແບບຍືນຍົງຖາວອນນັ້ນ. ອີກໂຄງການນຶ່ງກໍແມ່ນຂໍ້ຕົກລົງກັນ ລະວ່າງຄະນະກຳມາທິການ ແມ່ນ້ຳຂອງ ແລະຄະນະກຳມາທິການແມ່ນ້ຳມີສສີສຊິປປີ ເພື່ອຮ່ວມງານເປັນພາຄີກັນ ແບບ “ແມ່ນ້ຳເອື້ອຍແມ່ນ້ຳນ້ອງ” ເພື່ອປັບປຸງສົ່ງເສີມ ການຄຸ້ມຄອງແຫລ່ງນ້ຳ ທີ່ໄຫລຂ້າມເຂດແດນຕ່າງໆນັ້ນ.ສະຫະລັດ ແມ່ນຈະສືບຕໍ່ໃຫ້ການສະນັບສະນຸນໂຄງການຕ່າງໆທີ່ສົ່ງເສີມໃຫ້ມີ ການຊົມໃຊ້ຊັບພະຍາກອນປ່າໄມ້ ແລະນ້ຳ ແບບຍືນຍົງຖາວອນ ສະຫງວນແລະຮັກສາຊີວະນາໆພັນ ທີ່ຫລາກຫລາຍມະຫາສານຂອງເຂດລຸ່ມແມ່ ນ້ຳຂອງນັ້ນເອົາໄວ້ ແລະເພີ່ມການສະນອງໃຫ້ປະຊາຊົນໃນຈຳນວນຫລາຍຂື້ນໄດ້ມີນ້ຳດື່ມນ້ຳໃຊ້ທີ່ສະອາດປອດໄພ.ສະເພາະໃນ ປີ 2009 ນີ້ ສະຫະລັດຈະໃຊ້ຈ່າຍເງິນຫລາຍກວ່າ 7 ລ້ານດອລລາ ສຳລັບໂຄງການຕ່າງໆດ້ານ ສະພາບແວດລ້ອມ ໃນຂົງເຂດແມ່ນ້ຳຂອງ.ນອກຈາກນີ້ແລ້ວ ທ່ານນາງລັດຖະມົນຕີຄລິນຕັນຍັງພະຍາຍາມຂໍຮ້ອງ ໃຫ້ສະພາຄອງແກຣສຂອງສະຫະລັດ ອະນຸມັດເງິນເພີ່ມອີກ 15 ລ້ານໂດລາ ສຳຫລັບປີ 2010 ເພື່ອການຊ່ວຍ ເຫລືອທີ່ກ່ຽວຂ້ອງກັບການສົ່ງ ເສີມປັບປຸງຄວາມໝັ້ນຄົງທາງດ້ານສະບຽງອາຫານ ໃນບັນດາປະເທດໃນເຂດແມ່ ນ້ຳຂອງ
ສ່ວນການຊ່ວຍເຫລືອດ້ານສາທາລະນະສຸກຂອງສະຫະລັດ ແກ່ກຸ່ມປະ ເທດເຂດແມ່ນ້ຳຂອງນັ້ນ ຈະມີຈຳນວນ ທັງໝົດ 138 ລ້ານກວ່າໂດລາ ໃນປີ 2009 ນີ້ ເພື່ອສະນັບສະນຸນໂຄງການປິ່ນປົວແລະປ້ອງກັນເຊື້ອເອຊໄອວີ-ເອດສ໌ ໂຄງການປ້ອງກັນການລະບາດຢ່າງໃຫຍ່ຂອງໂຣກໄຂ້ຫວັດ ແລະຄວາມພະຍາຍາມຕ່າງໆເພື່ອປິ່ນປົວເຊື້ອພະຍາດທີ່ຕໍ່ຕ້ານຢາ ຂອງໂຣກໄຂ້ຍຸງແລະໂຣກປອດແຫ້ງ.ສະຫະລັດຈະຈັດກອງປະຊຸມ ທີ່ເອີ້ນວ່າ “ກອງປະຊຸມ ສະຫະລັດ-ແມ່ນ້ຳຂອງ ກ່ຽວກັບການປະຕິບັດງານຮ່ວມກັນເພື່ອຮັບມືກັບພະຍາດຕິດຕໍ່ຜ່ານເຊື້ອໂຣກ” ນັນຂື້ນ ເພື່ອຈະພິດຈາະລະນາຮ່ວມກັນ ວິທີທາງທີ່ຈະເຮັດໃຫ້ຄວາມພະຍາຍາມເຫລົ່ານີ້ມີປະສິດທິຜົນຫລາຍຂື້ນ
ໃນດ້ານການສຶກສາ ສະຫະລັດແມ່ນກຳລັງໃຫ້ການສະນັບສະນຸນການ ແລກປ່ຽນນັກຮຽນແລະເຈົ້າໜ້າທີ່ສຶກສາ ຈຳນວນຫລາຍກວ່າ 500ຄົນ ໃນຂົງເຂດ ໃນປີ 2009 ນີ້ ເປັນຕົ້ນວ່າ ຊ່ວຍເຫລືອສະນັບສະນຸນໃຫ້ໄດ້ຮັບການ ສຶກສາເບື້ອງຕົ້ນ ແລະຂຍາຍການສື່ສານທາງອິນເທີເນັທ ໃນເຂດຊົນນະບົດໃຫ້ມີຫລາຍຂື້ນ.ນອກຈາກນີ້ແລ້ວ ສະຫະລັດຍັງມີແຜນການທີ່ຈະຈັດກອງປະຊຸມ “ສະຫະລັດ-ແມ່ນ້ຳຂອງ ກ່ຽວກັບອິນເທີເນັທ ການສຶກສາ ແລະ ການພັທະນາ” ຂື້ນ ເພື່ອສົ່ງເສີມພາກປະຕິບັດທີ່ດີທີ່ສຸດ ແລະການຮ່ວມງານໃນຂົງເຂດ ກ່ຽວກັບການນຳໃຊ້ການຕິດຕໍ່ທາງອິນເທີເນັທ ເພື່ອສົ່ງເສີມການພັທະນາ.ການຊ່ວຍເຫລືອຂອງສະຫະລັດທີ່ກ່ຽວພັນກັບການ ສຶກສາໃນປີ 2009 ນີ້ ຈະຕົກເປັນທັງໝົດ 16 ລ້ານໂດລາ.
ການຮ່ວມໄມ້ຮ່ວມມືກັນຢ່າງໄກ້ຊິດຂື້ນລະວ່າງສະຫະລັດ ແລະກຸ່ມປະເທດເຂດ ລຸ່ມແມ່ນ້ຳຂອງນັ້ນ ແມ່ນນອນຢູ່ໃນ ຜົນປະໂຍດຂອງສະຫະລັດຂອງກຸ່ມປະເທດໃນເຂດລຸ່ມແມ່ນ້ຳຂອງ ຕລອດທັງຂອງສະມາຄົມອາຊ່ຽນ ແລະຂົງ ເຂດເອເຊຍທັງໝົດ.