ທີ່ປາກີສຖານ : ປາກີສຖານ ທີ່ກ່າວວ່າຕົນກຳລັງທຳການສືບສວນລາຍງານຂ່າວຕ່າງໆ ທ່ີບໍ່ໄດ້ຮັບການຢືນຢັນ ວ່າໄດ້ມີການຍິງຕໍ່ສູ້ກັນ ທີ່ີພາໃຫ້ມີຜູ້ຄົນເສັຍຊີ ວິດ ລະຫວ່າງຜູ້ບັນຊາການ 2 ຄົນຂອງກຸ່ມຕາລີບັນທ່ີເປັນຄູ່ປໍຣະປັກກັນ ທ່ີກຳລັງພະຍາຍາມຂຶ້ນດຳຣົງຕຳແໜ່ງແທນນາຍ Baitullah Mehsud ຜູ້ນຳກຸ່ມດັ່ງກ່າວ ທ່ີກ່າວກັນວ່າ ໄດ້ເສັຍຊີວິດໄປຍ້ອນລູກສອນໄຟຂອງສະຫະຣັດນັ້ນ. ທ່ານ Rehman Malik ຣັຖມຸນຕີພາຍໃນຂອງປາກີສຖານກ່າວໃນວັນ ເສົາວານນີ້ວ່າ ລາຍງານຂ່າວຫລາຍກະແສເວົ້າວ່າ ໄດ້ເກີດການຕໍ່ສູ້ ກັນຂຶ້ນໃນລະຫວ່າງການພົບປະກັນລະຫວ່າງນາຍ Wali-ur-Rehman ແລະນາຍ Hakimullah Mehsud ແລະຄົນນຶ່ງໄດ້ເສັຍຊີວິດໄປນັ້ນ. ແຕ່ນາຍ Noor Sayed ຜູ້ບັນຊາການກຸ່ມຕາລີບັນອີກຄົນນຶ່ງໄດ້ປະຕິເສດວ່າ ບໍ່ໄດ້ມີການປະເຊີນໜ້າກັນໃດໆເລີຍ. ລາຍງານເວົ້າວ່າ ການພົບປະກັນເພື່ອເຈລະຈາເຣື່ອງການສືບຕຳ ແໜ່ງແທນຜູ້ນຳນີ້ ມີຂຶ້ນໃນເຂດ Waziristan ໃຕ້ ຊຶ່ງເປັນເຂດປົກຄອງຕົນເອງເຄິ່ງນຶ່ງຂອງຊົນເຜົ່າ ຕິດກັບຊາຍແດນອັຟການີສຖານ ບ່ອນທ່ີຣັຖມຸນຕີການຕ່າງປະເທດປາກີສຖານ ທ່ານ Shah Mehmood Qureshi ກ່າວວ່າ ນາຍ Baitullah Mehsud ໄດ້ຖືກຂ້າຕາຍໃນວັນພຸດຜ່ານມານີ້.
ທ່ານ Qureshi ກ່າວວ່າ ເຈົ້າໜ້າທີ່ປາກີສຖານວາງແຜນທ່ີຈະເດີນທາງ ໄປຍັງເຂດທ່ີໝັ້ນຂອງນາຍ Mehsud ເພື່ອພະຍາຍາມໃຫ້ໄດ້ ຮັບການຢືນຢັນ 100 ເປີເຊັນກ່ຽວກັບການເສັຍຊີວິດຂອງນາຍ Mehsud ນັ້ນ.
ທີ່ອິນໂດເນເຊັຍ: ພວກເຈົ້າໜ້າທີ່ໃນອິນໂດເນເຊຍກ່າວວ່າ ພວກເຂົາເຈົ້າຍັງກຳລັງລໍຖ້າ ເບິ່ງຜົນຂອງການ ກວດດດີເອັນເອ ເພື່ອຢືນຢັນວ່າຊາຍຄົນນຶ່ງທີ່ຖືກ ກຳລັງຮັກສາຄວາມປອດພັຍ ຂ້າຕາຍ ໃນການບຸກເຂົ້າຄົ້ນບ້ານເມື່ອ ວັນເສົາວານນີ້ ວ່າເປັນຫົວໜ້າວາງແຜນຂອງພວກກໍ່ການຮ້າຍ ນາຍ Noordin Mohammed Top ນັ້ນຫລືບໍ່. ອົງການຂ່າວອັນຕາຣາ ຂອງລັຖບານອິນໂດເນເຊຍເວົ້າວ່າ ພວກເຈົ້າ ໜ້າທີ່ໄດ້ນຳສົບດັ່ງກ່າວ ຊຶ່ງເຊື່ອວ່າເປັນສົບຂອງນາຍ Noordin ນັ້ນ ໄປຍັງໂຮງພະຍາບານຕຳຫລວດ ໃນເຂດຈາກາຕ້າຕາເວັນອອກ ເພື່ອ ສັນນະສູດສົບແລະ ພິສູດຮູປະພັນແລະຊື່ສຽງ.
ນາຍ Noordin ເປັນຜູ້ຕ້ອງສົງໄສວ່າເປັນພວກກໍ່ການຮ້າຍ ທີ່ທາງການອິນໂດເນເຊຍ ຕ້ອງການຕົວ ຫລາຍທີ່ສຸດ. ຜູ້ກ່ຽວເປັນເປົ້າຂອງ ການບຸກເຂົ້າກວດຄົ້ນເມື່ອວັນເສົາວານນີ້ ທີ່ບ້ານພັກແຫ່ງນຶ່ງໃນເຂດ ພາກກາງຂອງເກາະ Java ຊຶ່ງໃຊ້ເປັນບ່ອນລີ້ຊ່ອນຂອງພວກຫົວຮຸນແຮງອິສລາມນັ້ນ.
ພວກເຈົ້າໜ້າທີ່ເຊຶ່ອວ່າ ນາຍນໍຣ໌ດິນ ເປັນຜູ້ອອກຄຳສັ່ງໃຫ້ໂຈມຕີໂຮງແຮມຫລູຫລາສອງແຫ່ງ ໃນນະຄອນຫລວງຈາກາຕ້າເມື່ອເດືອນແລ້ວນີ້ ມີຜູ້ເສຍຊີວິດ 9 ຄົນ ແລະບາດເຈັບອີກຫລາຍກວ່າ 50 ຄົນໃນການ ໂຈມຕີທີ່ ໂຮງແຮມ Marriot ແລະ Ritz-Carlton ນັ້ນ
ສະຫະຣັດແລະອັງໂກລາ: ທ່ານນາງຮິນລາຣີ ຄລິນຕັນ ຣັຖມຸນຕີການຕ່າງປະເທດສະຫະຣັດເດີນ ທາງໄປຮອດປະເທດອັງໂກລາແລ້ວ ເພື່ອສົນທະນາຫາລືກັບທາງການ ອັງໂກລາ ກ່ຽວກັບເຣື່ອງຄວາມໝັ້ນຄົງທາງພລັງງານແລະອາຫານ. ທ່ານນາງຄລິນຕັນ ມີກຳນົດຈະພົບປະກັບປະທານາທິບໍດີ Jose Eduardo dos Santos ພ້ອມກັບ ຣມຕ ວ່າການ ຕ່າງປະເທດ ແລະການນ້ຳມັນຂອງອັງໂກລານຳ.
ພວກເຈົ້ໜ້າທີ່ສະຫະຣັດກ່າວວ່າ ທ່ານນາງຄລິນຕັນພະຍາຍາມຫາທາງ ເສີມສ້າງສາຍພົວພັນໃຫ້ແໜ້ນໜາຂຶ້ນ ກັບອັງໂກລາ ຊຶ່ງເປັນຄູ່ແຂ່ງກັບໄນເຈເຣັຍ ໃນຖານະເປັນປະເທດຜລິດນ້ຳມັນດັບລາຍໃຫຍ່ທ່ີສຸດ ໃນທະວີບອາຟຣິກາ ແລະຜູ້ຂາຍທັງນ້ຳມັນແລະແກສທຳມະຊາດ ລາຍ ໃຫຍ່ໃຫ້ສະຫະຣັດ.
ການຢ້ຽມຢາມຂອງທ່ານນາງຄລິນຕັນ ມີຂຶ້ນ ໃນເວລາທ່ີຈີນໄດ້ເພີ່ມທະວີອິດທິພົນຂອງຕົນຂຶ້ນໃນວົງການອຸດສາຫະກັມນ້ຳມັນຂອງອັງໂກລາ. ອັງໂກລາເປັນບ່ອນຢຸດແວ່ຢ້ຽມຢາມແຫ່ງທີສາມຂອງທ່ານນາງໃນການທ່ຽວຢ້ຽມຢາມ 7 ປະເທດ ໃນທະວີບອາຟຣິກາຄັ້ງນີ້.
ກອງປະຊຸມສຸດຍອດທີ່ເມັກຊິໂກ: ບັນດາຜູ້ນຳຂອງສະຫະລັດ ຄານາດາ ແລະແມ໊ກຊິໂກ ເລີ່ມຕົ້ນກອງ ປະຊຸມສຸດຍອດກຸ່ມປະເທດອາເມລິກາເໜືອ ທີ່ປະເທດແມ໊ກຊິໂກ ໃນວັນອາທິດມື້ນີ້. ປະທານາທິບໍດີ ບາຣັກ ໂອບາມາ ພ້ອມດ້ວຍນາຍົກຣັດຖະມຸນຕຣີ ຄານາດາ ທ່ານ ສຕີເວັ່ນ ຮາບເປີ ແລະປະທານາທິບໍດີແມ໊ກຊິໂກ ທ່ານ ຟີລິບເປ ຄາລເດີໂຣນ (Felipe Calderon) ປະຊຸມກັນເປັນເວລາ ສອງວັນ ທີ່ເມືອງກົວດາລາຮາລາ (Guadalajara) ປະເທດແມ໊ກຊິໂກ. ຄາດກັນວ່າ ພວກທ່ານຈະສົນທະນາຫາລືກັນ ເລຶ່ອງການຟື້ນຕົວຄືນ ຂອງເສດຖະກິດ ແລະການກໍ່ຄວາມຮຸນແຮງ ທີ່ເພີ່ມທະວີຂຶ້ນນັບມື້ ຂອງພວກຄ້າຢາເສບຕິດ ແມ໊ກຊິໂກ
ປະເທດຄານາດາ ເປັນພາຄີດ້ານການຄ້າອັນດັບນຶ່ງຂອງສະຫະລັດ ແລະ ແມ໊ກຊິໂກ ແມ່ນອັນດັບສາມ.
ການດຳເນີນຄະດີທີ່ອິຣ່ານ: ອິຣ່ານປະເຊີນກັນການປະນາມຈາກນາໆຊາດ ຫລັງຈາກໄຂການດຳເນີນຄະດີໝູ່ພວກທ່ີຖືກຈັບກຸມທາງດ້ານການເມືອງ ຈຳນວນຫລວງຫລາຍ ທ່ີຖືກກ່າວຫາວ່າ ກໍ່ກວນໃຫ້
ເກີດຄວາມບໍ່ສງົບໃນລະຫວ່າງການປະທ້ວງຕໍ່ຕ້ານການເລືອກຕັ້ງປະທານາທິບໍດີອິຣ່ານ ທ່ີເປັນບັນຫາຂັດແຍ່ງກັນນັ້ນ. ພວກທ່ີຖືກດຳເນີນຄະດີໃນວັນເສົາວານນີ້ ແມ່ນຮວມທັງ ແມ່ຍິງຝຣັ່ງຄົນນຶ່ງ ແລະພນັກງານຊາວອິຣ່ານຂອງສະຖານທູດຝຣັ່ງ ແລະສະຖານທູດອັງກິດ ປະຈຳກຸງເຕຮະຣ່ານນຳ.
ສະຫະພາບຢູໂຣບແລະອັງກິດໄດ້ປະນາມອິຣ່ານ ທ່ີດຳເນີນຄະດີທ່ານ ນາງ Clotilde Reiss ອາຈານບັນລະຍາຍທີ່ມະຫາວິທຍາໄລ ຊື່ງ ເປັນຄົນຝຣັ່ງ ແລະພນັກງານສະຖານທູດຝຣັ່ງກັບອັງກິດອີກ2 ຄົນນັ້ນ.
Sweden ຊຶ່ງເປັນປະທານໝຸນວຽນຂອງສະຫະພາບຢູໂຣບໃນປັດຈຸບັນ ກ່າວວ່າ ການເຄື່ອນໄຫວຕໍ່ຕ້ານປະເທດ ພົນລະເມືອງ ຫລືພນັກງານ ສະຖານທູດຂອງປະເທດສະມາຊິກໃດໆກໍຕາມ ຂອງສະຫະພາບຢູໂຣບ ແມ່ນຖືວ່າເປັນການເຄື່ອນໄຫວຕໍ່ຕ້ານສະຫະພາບຢູໂຣບທັງໝົດ ແລະຮຽກຮ້ອງໃຫ້ອິຣ່ານປ່ອຍໂຕພວກທ່ີຖືກຈັບກຸມເຫລົ່ານີ້ໂດຍທັນທີ.
