ບັນດາສະມາຊິກສະພາແຫ່ງຊາດລາວ ຈະເຄື່ອນໄຫວ ເພື່ອຊອກຫາປະເທດທີ່ຈະຕ້ອງຮັບຜິດຊອບຕໍ່ບັນຫາ ລະເບີດ UXO ທີ່ຕົກຄ້າງຢູ່ໃນລາວໂດຍມີເປົ້າໝາຍ ເພື່ອຮຽກຮ້ອງໃຫ້ ປະກອບສ່ວນເຂົ້າໃນການແກ້ໄຂ ບັນຫາດັ່ງກ່າວຫລາຍຂຶ້ນ.
ນີ້ກໍແມ່ນການປະກອບຄວາມຄິດເຫັນສ່ວນໜຶ່ງ ຂອງ ສະມາຊິກສະພາແຫ່ງຊາດລາວ ທີ່ມີຂຶ້ນໃນລະຫວ່າງກອງປະຊຸມສະໄໝສາມັນຄັ້ງທີ່ 7 ຊຶ່ງໄດ້ສິ້ນສຸດຢ່າງເປັນທາງການເມື່ອບໍ່ນານມານີ້ ໂດຍການປະກອບຄວາມຄິດເຫັນດັ່ງກ່າວນີ້ ກໍຖືເປັນສ່ວນໜຶ່ງຂອງຄວາມພະຍາຍາມຂອງບັນດາສະມາຊິກສະພາແຫ່ງຊາດລາວ ໃນການທີ່ຈະຈັດຕັ້ງຄະນະທຳງານຂຶ້ນມາ ຮັບຜິດຊອບໃນການເຄື່ອນໄຫວ ແລະ ລົນນະລົງ ເພື່ອຫາປະເທດທີ່ຈະຕ້ອງຮັບຜິດຊອບຕໍ່ບັນຫາລະເບີດບໍ່ທັນແຕກ ຫລື ລະເບີດ UXO ທີ່ຕົກຄ້າງຢູ່ໃນປະເທດລາວ ນັບຕັ້ງແຕ່ປາງສົງຄາມອິນດູຈີນເປັນຕົ້ນມາຈົນເຖິງທຸກມື້ນີ້. ເຖິງແມ່ນວ່າ
ບັນດາສະມາຊິກສະພາແຫ່ງຊາດລາວ ຈະບໍ່ໄດ້ລະບຸວ່າ ປະເທດໃດທີ່ຈະຕ້ອງຮັບ ຜິດຊອບຕໍ່ບັນຫາ
ລະເບີດ UXO ທີ່ຕົກຄ້າງຢູ່ໃນລາວນີ້ກໍຕາມ ຫາກແຕ່ກໍເປັນການທີ່ຮັບຮູ້ ແລະ
ເຂົ້າໃຈໂດຍທົ່ວໄປວ່າ ໝາຍເຖິງສະຫະຣັດ ອາເມຣິກາ ຊຶ່ງຕາມລາຍງານຂອງອົງການກັບກູ້ລະເບີດແຫ່ງຊາດລາວ
ຫລື LAO UXO ນັ້ນ ກໍໄດ້ລະບຸວ່າ ໃນໄລຍະຈາກປີ 1964 ຫາ ປີ 1973 ນັ້ນ ເຄື່ອງບິນຂອງກອງທັບສະຫະຣັດ
ຈຳນວນຫລາຍກວ່າ 500.000 ຖ້ຽວບິນ ໄດ້ຖິ້ມລະເບີດລົງໃສ່ດິນລາວ ຄຶດເປັນນ້ຳໜັກລວມເຖິງ
3 ລ້ານ ໂຕນ.
ຍິ່ງໄປກວ່ານັ້ນ ຈາກການສຳຫລວດກໍພົບອີກດ້ວຍວ່າມີ ລະເບີດ UXO
ຄຶດເປັນສັດສ່ວນເຖິງ 30% ຂອງຈຳນວນລະເບີດທັງໝົດນັ້ນເປັນລະເບີດທີ່ເປັນຍັງບໍ່ທັນເກີດການລະເບີດ
ແລະ ກໍຕົກຄ້າງຢູ່ໃນລາວຈຳນວນຫລາຍກວ່າ 270 ລ້ານ ໜ່ວຍໃນພື້ນທີ່ ທີ່ກ້ວາງກວ່າ
87.200 ກິໂລແມັດມົນທົນ ຢູ່ໃນເຂດ 15 ແຂວງຈາກທັງ ໝົດ 17 ແຂວງໃນທົ່ວປະເທດລາວ
ຫລື ຄຶດເປັນສັດສ່ວນ 1 ໃນ 3 ຂອງພື້ນທີ່ທັງໝົດໃນປະເທດລາວ. ເພາະສະນັ້ນ ການທີ່ມີລະເບີດ
UXO ຕົກຄ້າງເປັນຈຳນວນຢ່າງຫລວງຫລາຍ ແລະ ກໍຍາກຕໍ່ການຊອກຫາເພື່ອທີ່ຈະທຳການເກັບກູ້ແລ້ວ
ກໍຍັງໄດ້ສົ່ງຜົນກະທົບຕໍ່ເນື່ອງໄປເຖິງ ສະພາບຊີວິດຂອງປະຊາຊົນລາວຢ່າງຫລີກຫລ້ຽງບໍ່ໄດ້ອີກດ້ວຍ.
ຖ້າຫາກນັບຈາກປີ 1992 ຈົນເຖິງທ້າຍປີທີ່ຜ່ານມາແລ້ວ ກໍພົບວ່າ ມີປະຊາຊົນລາວຢູ່ໃນເຂດ 2.500 ກວ່າໝູ່ບ້ານ ຫລື ກວາມເອົາ 25% ຂອງຈຳນວນໝູ່ບ້ານທັງໝົດໃນລາວນັ້ນ ມີຜູ້ທີ່ໄດ້ຮັບເຄາະກຳຈາກລະເບີດ UXO ຈຳນວນ ຫລາຍກວ່າ 13.000 ຄົນ, ໂດຍສ່ວນໃຫຍ່ກໍຈະເກີດຂຶ້ນ ໃນຂະນະທີ່ໄດ້ທຳການບຸກເບີກທີ່ດິນທຳກິນ. ສ່ວນເດັກນ້ອຍທີ່ເສຍຊີວິດ ຫລື ທີ່ໄດ້ຮັບບາດເຈັບຈາກລະເບີດບໍ່ທັນແຕກນັ້ນ ສ່ວນຫລາຍແລ້ວ ກໍເປັນເພາະວ່າບໍ່ຮູ້ຈັກ ແລະ ບໍ່ຮູ້ເຖິງໄພອັນ ຕະລາຍຂອງລະເບີດ UXO ດັ່ງກ່າວ. ສ່ວນການເກັບກູ້ລະເບີດ UXO ນັບຈາກປີ 1996 ເປັນ ຕົ້ນມາ ກໍປາກົດວ່າ LAO UXO ສາມາດເກັບກູ້ລະເບີດບໍ່ທັນແຕກ ອອກຈາກທີ່ດິນຂອງປະຊາ ຊົນລາວໄດ້ບໍ່ເຖິງ 1% ຂອງພື້ນທີ່ທັງໝົດທີ່ມີລະເບີດຕົກຄ້າງຢູ່ ແລະ ກໍໄດ້ໃຊ້ງົບປະມານໃນການເກັບກູ້ໄປແລ້ວຫລາຍກວ່າ 40 ລ້ານ ໂດລາສະຫະຣັດ ຊຶ່ງທັງໝົດ ກໍເປັນຄວາມຊ່ວຍເຫລືອຈາກຕ່າງປະເທດນັ້ນເອງ.
ຊົງຣິດ ໂພນເງິນລາຍງານຈາກບາງກອກ ໃນວັນທີ 27 ກໍລະກົດ 2009
