<!-- IMAGE -->
ທ່ານນາງ Hillary Rodham Clinton ລັດຖະມຸນຕີຕ່າງ ປະເທດສະຫະລັດກ່າວວ່າ ການສ້າງຄວາມເຂັ້ມແຂງໃຫ້ແກ່ສາຍພົວພັນດ້ານຍຸທະສາດທີ່ສຳຄັນ ລະວ່າງສະຫະລັດແລະອິນເດຍ ຖືວ່າເປັນເປົ້າໝາຍທີ່ສຳຄັນປະການນຶ່ງຂອງນະໂຍບາຍຂອງສະຫະລັດ. ໃນໂອກາດກ່າວຄຳປາໃສຕໍ່ບັນດາເຈົ້າໜ້າທີ່ແລະຜູ້ນຳສັງຄົມພົນລະເຮືອນຂອງອິນເດຍ ທີ່ເມືອງ ມຸມບາຍ ທ່ານນາງຄລິນຕັນ ກ່າວວ່າ ສະຫະລັດຢາກຈະເພີ່ມທະວີການຮ່ວມມືລະວ່າງສະຫະລັດແລະອິນເດຍໃນຫລາຍໆບັນຫາ ນັບຕັ້ງແຕ່ບັນຫາການເຕີບໂຕດ້ານເສດຖະກິດ ແລະການພັທະນາ ໄປຫາການປ່ຽນແປງຂອງສະພາບດິນຟ້າອາກາດ ການສຶກສາ ແລະການຮັກສາສຸຂະພາບ ການບໍ່ໃຫ້ມີການແຜ່ຜາຍອາວຸດນີວເຄລຍ ແລະການປາບປາມການກໍ່ການຮ້າຍ.
ໃນການພົບປະກັບພວກຜູ້ນຳທຸລະກິດຂອງອິນເດຍ ທ່ານນາງລັດຖະມຸນຕີຕ່າງປະເທດຄລິນຕັນ ໄດ້ຢືນຢັນຄືນໃໝ່ ເຖິງຄວາມໝັ້ນໝາຍຂອງອາເມລິກາ ຕໍ່ການປະຕິບັດງານກັບບັນດາພາຄີໃນອິນເດຍ ເພື່ອແຜ່ຂຍາຍຄວາມຈະເຣີນຮຸ່ງເຮືອງ ໄປໃຫ້ທົ່ວສັງຄົມຂອງທັງສອງປະເທດ ຊຶ່ງທ່ານນາງກ່າວຕໍ່ໄປວ່າ “ການຫລຸດຜ່ອນຄວາມທຸກຈົນ ຊື່ງ ຂ້າພະເຈົ້າຮູ້ດີວ່າ ເປັນເປົ້າໝາຍແກນກາງຂອງລັດຖະບານອິນເດຍ ແລະຂອງປະຊາ ຊົນອິນເດຍນັ້ນ ກໍເປັນບັນຫານຶ່ງ ທີ່ພວກເຮົາຈະສະເນີ ໃຫ້ການຊ່ວຍເຫລືອໃນທຸກໆດ້ານ.ນອກນີ້ ທ່ານນາງຄລິນຕັນຍັງໄດ້ບອກພວກນັກວິທະຍາສາດອິນເດຍວ່າ ສະຫະລັດ ຕ້ອງການຢາກຈະປະຕິບັດງານຢ່າງໄກ້ຊິດກັບອິນເດຍ ເພື່ອຕໍ່ຕ້ານຄວາມອຶດຫິວໃນທົ່ວໂລກ ແລະຊອກຫາພະລັງງານທີ່ສະອາດແລະຢັ້ງຢືນສຳຫລັບອະນາຄົດ.
ໃນໂອກາດຢ້ຽມຢາມອະນຸສາວະລີສຳຫລັບພວກເຄາະຮ້າຍໃນການໂຈມຕີຂອງພວກກໍ່ການຮ້າຍ ທີ່ເມືອງມຸມບາຍເມື່ອເດືອນພະຈິກປີຜ່ານມາ ທ່ານນາງຄລິນຕັນ ກ່າວວ່າ ການໂຈມຕີຢ່າງຂາດສະຕິບໍ່ມີເຫດຜົນເຫລົ່ານີ້ ກໍຄື ກັນກັບການໂຈມຕີຕໍ່ສະຫະລັດ ເມື່ອວັນທີ່ 11 ເດືອນກັນຍາ ປີ 2001 ແລະການວາງລະເບີດ ທີ່ນະຄອນຫລວງຈາກາຕ້າ ປະເທດອິນໂດເນເຊຍ ເມື່ອໝໍ່ໆມານີ້ແມ່ນເປັນສິ່ງເຕືອນຄວາມຊົງຈຳທີ່ເຈັບປວດ ທີ່ເຕືອນໃຫ້ຮູ້ວ່າ ໄພຂົ່ມຂູ່ຈາກພວກຫົວຮຸນແຮງຈັດນັ້ນ ຍັງຄົງເປັນພັຍຂົ່ມຂູ່ຕົວຈິງທີ່ສຸດຢູ່ ຊຶ່ງທ່ານນາງກ່າວຕໍ່ໄປວ່າ ໄພຂົ່ມຂູ່ທີ່ວ່ານີ້ເປັນໄພຂົ່ມຂູ່ທີ່ມີຢູ່ທົ່ວໂລກ ທີ່ໂຫດ ຮ້າຍປ່າເຖືອນ ທີ່ທຳລາຍລ້າງຜານແລະຈະຕ້ອງໄດ້ຖືກກຳຈັດປາບປາມໃຫ້ໝົດໄປ.
ລັດຖະມຸນຕີຕ່າງປະເທດຄລິນຕັນກ່າວວ່າ ສະຫະລັດຈະປະຕິບັດງານກັບລັດຖະບານອິນເດຍ ແລະປະເທດອື່ນໆ ແລະພວກປະຊາຊົນທີ່ຕ້ອງການແລະສະແຫວງຫາສັນຕິພາບ ແລະຄວາມໝັ້ນຄົງນັ້ນເພື່ອປະເຊີນໜ້າແລະເອົາຊະນະພວກຫົວຮຸນແຮງຈັດເຫລົ່ານີ້. ແລະພວກເຮົາຈະກະທຳສຸດຄວາມສາມາດ ເພື່ອກໍ່ສ້າງໃຫ້ມີໂລກແຫ່ງໂອກາດ ທີ່ມີບ່ອນຫລາຍຂື້ນສຳຫລັບ ຄວາມກ້າວໜ້າ ສັນຕິພາບແລະຄວາມວັທະນາຖາວອນ ແລະມີບ່ອນໜ້ອຍລົງ ສຳຫລັບການບໍ່ຍອມທົນຫລືອະນຸໂລມຜ່ອນຜັນໃຫ້ກັນແລະກັນ ສຳຫລັບຄວາມຮຸນແຮງ ແລະຄວາມກຽດຊັງກັນ.
ລັດຖະມຸນຕີການຕ່າງປະເທດສະຫະລັດ ກ່າວໃນທີ່ສຸດວ່າ ປະທານາທິບໍດີໂອບາມາແລະຂ້າພະເຈົ້າເອງເຊື່ອວ່າ ພວກເຮົາກຳລັງກ້າວເຂົ້າສູ່ຍຸກໃໝ່ ທີ່ໃຫ້ຄວາມຫວັງຫລາຍຂື້ນກ່ຽວກັບສາຍພົວພັນກັບອິນເດຍນັ້ນ ແລະພວກເຮົາກໍມີຄວາມກະຕືລື ລົ້ນທີ່ຈະປະຕິບັດງານເພື່ອສ້າງຄວາມເປັນພາຄີທີ່ກວ້າງໄກ ແລະເລິກເຊິ່ງກວ່າເກົ່າລະວ່າງ ປະເທດເຮົາທັງສອງ.
