<!-- IMAGE -->
ທ່ານແກຣີ ລ໊ອກຄ໌ ຣມຕ ກະຊວງການຄ້າຂອງສະຫະຣັຖ ກ່າວວ່າ ໃນຖານະທີ່ເປັນເສດຖະກິດທີ່ມີຜົນຜລິດຫລາຍທີ່ສຸດ ແລະມີຫົວຄິດປະດິດສ້າງຫລາຍທີ່ສຸດຂອງໂລກນັ້ນ ສະຫະຣັຖແລະຈີນ ແມ່ນຢູ່ໃນຖານະທີ່ພິເສດບໍ່ມີປະເທດໃດເໝືອນ ຄືມີຄວາມສາມາດທີ່ຜລິດເທັກໂນໂລຈີ່ດ້ານພະລັງງານທີ່ໃຊ້ແສງຕາເວັນ ລົມ ເຊື້ອໄຟຊີວະພາບ ແລະພະລັງງານອື່ນໆທີ່ເອົາມາໝຸນໃຊ້ຄືນໃໝ່ໄດ້ ທີ່ໝົດທັງໂລກຢາກໄດ້ແລະຕ້ອງການ ຊຶ່ງທ່ານກ່າວຕໍ່ໄປວ່າ ໃນຂະນະດຽວກັນ ໃນຖານະທີ່ທັງສອງເປັນປະເທດທີ່ປ່ອຍອາຍແກສຄາບອນໄດອ໊ອກໃຊ້ທ໌ ອອກສູ່ບັນຍາກາດຂອງໂລກຫລາຍທີ່ສຸດສອງປະເທດນີ້ ຈື່ງມີ ຄວາມຮັບຜິດຊອບພິເສດທີ່ຈະຕ້ອງດຳເນີນການ ເພື່ອແກ້ໄຂບັນຫາອາຍແກສດັ່ງກ່າວ
ທ່ານ ແກຣີ ລ໊ອກ ຣັຖມຸນຕຣີກະຊວງການຄ້າ ໄດ້ສະແດງຄວາມເຫັນດັ່ງກ່າວຕໍ່ກອງປະຊຸມຂອງສະພາການຄ້າສະຫະຣັຖ ກັບສະພາທຸລະກິດສະຫະ ຣັຖ-ຈີນ ທີ່ກຸງປັກກິ່ງເມື່ອວັນທີ່ 15 ຜ່ານມານີ້ ຊຶ່ງທ່ານໄດ້ໃຫ້ຂໍ້ສັງເກດວ່າ ງົປມານກະຕຸກຊຸກຍູ້ເສດຖະກິດ ທີ່ຣັຖບານຂອງປະທານາທິບໍດີບາຣັກ ໂອບາມາ ນຳອອກໃຊ້ເມື່ອຕົ້ນປີນີ້ ແມ່ນປະກອບດ້ວຍເງິນທຶນຈຳນວນ 112 ພັນລ້ານໂດລາ ສຳລັບສົ່ງເສີມບູລີມະສິດສີຂຽວໃຫ້ກ້າວໄກ ແລະໃນຮ່າງງົປມານປະຈຳປີ 2010 ນັ້ນ ປະທານາທິບໍດີ ໂອບາມາ ຍັງໄດ້ສະເນີໃຫ້ນຳໃຊ້ເງິນຈຳນວນ 15 ພັນລ້ານ$ ໃນແຕ່ລະປີສຳລັບລະຍະສິບປີຂ້າງໜ້າ ເພື່ອໃຊ້ຈ່າຍໃນການສຶກສາຄົ້ນຄວ້າແລະພັທະນາພະລັງງານທີ່ສາມາດນຳມາໝຸນໃຊ້ຄືນໃໝ່ໄດ້ ຊຶ່ງທ່ານລ໊ອກ ກ່າວວ່າ ຈີນກໍເຊັ່ນດຽວກັນ ຄືມີບົດບາດສຳຄັນທີ່ຈະຕ້ອງດຳເນີນໃນເລຶ່ອງນີ້ແລະພວກຜູ້ນຳຈີນທັງທັງຫລາຍ ກໍໄດ້ເລິ່ມທຳຄວາມກ້າວໜ້າຢ່າງສຳຄັນແລ້ວ ໃນການຮັບມືກັບສາເຫດຕ່າງໆທີ່ພາໃຫ້ເກີດມີສະພາບດິນຟ້າອາກາດປ່ຽນແປງນັ້ນ
ເກືອບສີ່ສິບເປີເຊັນຂອງງົປະມານກະຕຸກຊຸກຍູ້ເສດຖະກິດພາຍໃນປະເທດຂອງຈີນນັ້ນ ແມ່ນສຳລັບໃຊ້ຈ່າຍໃນໂຄງການສີຂຽວຕ່າງໆ. ຈີນໄດ້ນຳໃຊ້ນະໂຍບາຍເພື່ອການປະຢັດພະລັງງານທີ່ເອົາຈິງເອົາຈັງທີ່ສຸດໃນໂລກ ແລະກຳລັງຈະປະສົບຜົນສຳເລັດເກີນຄາດໝາຍ ໃນຫລາຍໆເປົ້າໝາຍໃນການຜລິດພະລັງງງານ ທີ່ນຳມາໝຸນໃຊ້ຄືນໃໝ່ໄດ້ຂອງຕົນ
ທ່ານ ລ໊ອກ ກ່າວຕໍ່ໄປວ່າ “ກ່ຽວກັບດ້ານການຄ້າແລ້ວ ແມ່ນຍັງມີຄວາມເປັນຫ່ວງຢູ່ຫລາຍປະການ ແລະບັນຫາດ້ານໂຄງສ້າງສຳຄັນຕ່າງໆທີ່ຈະຕ້ອງໄດ້ທຳການແກ້ໄຂຢູ່ ຊຶ່ງສຳຄັນທີ່ສຸດໃນນັ້ນກໍຄືຄວາມບໍ່ສົມດູນຂອງການຄ້າສອງຝ່າຍ ທີ່ເຮົາບໍ່ສາມາດຈະປ່ອຍໃຫ້ຍືນຍົງຕໍ່ໄປໄດ້. ການເຕີບໂຕຂອງເສດຖະກິດ ທີ່ອິງໃສ່ສິນຄ້າສົ່ງອອກຂອງຈີນ ທີ່ຖີບຂື້ນເລື້ອຍໆ ທີ່ ບໍລິໂພກໂດຍປະຊາຊົນອາເມລິກັນ ທີ່ມີໜີ້ສິນຖ້ວມໂຕນັ້ນ ໄດ້ອຳນວຍໃຫ້ມີຄວາມຈະເຣີນຮຸ່ງເຮືອງມາເປັນເວລາຫລາຍປີ ແຕ່ວ່່າໃນຂະນະດຽວກັນ ມັນກໍຍັງວ່ານພືດຂອງບັນຫາເສດຖະກິດຂອງເຮົາໃນປັດຈຸບັນນີ້ນຳ
ທ່ານລ໊ອກໃຫ້ຂໍ້ສັງເກດວ່າ ການຂາດດຸນການຄ້າຂອງສະຫະຣັຖກັບຈີນນັ້ນ ໄດ້ຖີບຕົວສູງຂື້ນເຖິງເກືອບ 270 ພັນລ້ານໂດລາ ໃນປີ 2008 ຊຶ່ງທ່ານ ລ໊ອກກ່າວຕໍ່ໄປວ່າ “ໃນຫລາຍໆເດືອນຂ້າງໜ້ານີ້ ປະທານາທິບໍດີໂອບາມາ ຈະພຍາຍາມຟື້ນຟູ ໃຫ້ສາຍພົວພັນໃນດ້ານນີ້ ມີຄວາມສົມດຸນກັນຄືນໃໝ່.
ຖ້າວ່າຈີນຫາກເປີດຕະລາດພາຍໃນປະເທດຂອງຕົນໃຫ້ກວ້າງອອກອີກ ເພື່ອຮັບເອົາສິນຄ້າຈາກຕ່າງປະເທດ ແລະການລົງທືນໂດຍກົງຈາກຕ່າງ ປະເທດແລ້ວ ມັນກໍຈະເລັ່ງລັດການເຕີບໂຕຂອງເສດຖະກິດໂລກໄດ້. ຄຽງຄູ່ກັນໄປພ້ອມກັບສະພາບແວດລ້ອມສຳລັບການຄ້າທີ່ເສລີນັ້ນ ກໍຄວນຈະມີຄວາມໝັ້ນໝາຍຕໍ່ການບັງຄັບກົດໝາຍ ແລະສັນຍາຕ່າງໆກ່ຽວກັບການຄ້າລະວ່າງປະເທດນັ້ນ. ຜ່ານມາ ຈີນແມ່ນໄດ້ສ້າງຄວາມກ້າວໜ້າພໍສົມຄວນໃນດ້ານການປົກປ້ອງຊັບສິນທາງສະຕິປັນຍາຂອງພວກບໍລິສັດຕ່າງໆຂອງສະຫະຣັຖ ທີ່ປະກອບທຸລະກິດຢູ່ພາຍໃນເຂດຊາຍແດນຂອງຕົນ ແຕ່ກໍຍັງມີອີກ ຫລາຍສິ່ງຫລາຍປະການຢູ່ ທີ່ຈີນຈະຕ້ອງໄດ້ປະຕິບັດ
ທ່ານ ແກຣີ ລ໊ອກຄ໌ ຣັຖມຸນຕຣີກະຊວງການຄ້າສະຫະຣັຖກ່າວໃນທີ່ສຸດວ່າ ສະຫະຣັຖແລະຈີນແມ່ນຈະສືບຕໍ່ມີຄວາມແຕກ ຕ່າງລະຫວ່າງກັນແລະກັນຢູ່ຕໍ່ໄປ ແຕ່ຂ້າພະເຈົ້າເຊື່ອວ່າທັງສອງປະເທດຈະສາມາດເຊື່ອມຕໍ່ຊ່ອງຫວ່າງ ຫລືເຮັດໃຫ້ຄວາມແຕກຕ່າງກັນນັ້ນລຸດນ້ອຍຖອຍລົງໄດ້ ຍ້ອນຄ່ານິຍົມຕ່າງໆທີ່ສອງປະເທດມີຮ່ວມກັນ ທີ່ເຮັດໃຫ້ປະຊາຊົນຂອງພວກເຮົາມີຄວາມກົມກຽວເປັນອັນນຶ່ງອັນດຽວກັນ ແລະຍ້ອນການຮັບຮູ້ໃນສິ່ງທີ່ແລເຫັນໄດ້ຢ່າງຊັດແຈ້ງ ນັ້ນກໍຄືໂຊກຊະຕາຂອງພວກເຮົາແມ່ນກ້ຽວພັນກັນ.
