ສະຫະຣັດແລະອີຣ່ານ: ທ່ານ Robert Gates ຣັຖມຸນຕີປ່ອງກັນປະເທດສະຫະຣັດ ກ່າວວ່າ ຣັຖບານຂອງທ່ານໂອບາມາຫວັງວ່າ ອິຣ່ານຈະຕອບຕໍ່ຂໍ້ສເນີຂອງສະ ຫະຣັດ ເພື່ອໃຫ້ທຳການເຈຣະຈາກັນກ່ຽວກັບເຣື່ອງໂຄງການນີວເຄລັຍ ຂອງອິຣ່ານ ໃນໄວໆນີ້. ທ່ານ Gates ໄດ້ກ່າວເຊັ່ນນີ້ ທ່ີອີສຣາແອນ ບ່ອນທ່ີທ່ານກຳລັງທຳການປຶກສາຫາລືເຣື່ອງຄວາມໄຝ່ຝັນຢາກມີອາວຸດນີວເຄລັຍຂອງອິຣ່ານ ກັບບັນດາເຈົ້າໜ້າທ່ີຂັ້ນສູງຂອງອີສຣາແອນ ຊຶ່ງທ່ານກ່າວວ່າທາງວໍຊິງຕັນຫວັງວ່າ ທາງອິຣ່ານຈະຕອບສນອງຕໍ່ຂໍ້ສເນີທາງການທູດນີ້ ທັນກັບເວລາໄຂກອງປະຊຸມສະມັດຊາໃຫຍ່ສະຫະປະຊາຊາດ ໃນເດືອນກັນຍາໜ້ານີ້.
ທ່ານ Ehud Barak ຣັຖມຸນຕີປ້ອງກັນປະເທດອີສຣາແອນ ທີ່ຢືນຢູ່ຄຽງຂ້າງກັຍທ່ານ Gates ກ່າວວ່າ ອິສຣາແອລບໍ່ໄດ້ຕັດທາງເລືອກໃດໆກ່ຽວກັບໂຄງການນີວເຄລັຍຂອງອິຣ່ານນັ້ນ ອອກຈາກການພິຈາລະນາ
ຊື່ງສໍ່ສະແດງໃຫ້ເຫັນວ່າການໂຈມຕີທາງທະຫານຍັງຄົງເປັນໄປໄດ້ຢູ່. ແຕ່ທ່ານບາຣັກກ່າວວ່າ ເຣື່ອງບໍລິມະສິດໃນປັດຈຸບັນນີ້ ຄວນຈະເປັນການດຳເນີນງານທາງການທູດ. ໃນຂະນະທ່ີຢ້ຽມຢາມອີສຣາແອນນັ້ນ ທ່ານ Gates ກໍຈະພົບປະກັບນາຍົກຣັຖມຸນຕີ Benjamin Netanyahu ເຊັ່ນກັນ. ທ່ານ George Mitchell ທູດພິເສດຂອງສະຫະຣັດ ກໍໄດ້ທຳການປຶກສາຫາລືກັບທ່ານບາຣັກເຊັ່ນກັນໃນວັນອາທິດວານນີ້ ແລະມີກຳນົດຈະພົບປະກັບທ່ານ Netanyahu ໃນວັນອັງຄານມື້ອື່ນ. ທ່ານ Gates ແລະທ່ານ Mitchell ເດີນທາງໄປຍັງພາກຕາເວັນອອກກາງ ຄົນລະເທື່ອ ຊຶ່ງເປັນພາກສ່ວນນຶ່ງຂອງການຊຸກຍູ້ຂອງສະຫະຣັດ ເພຶ່ອໃຫ້ມີສັນຕິພາບໃນຂົງເຂດນັ້ນ.
ການເຈຣະຈາລະຫວ່າງສະຫະຣັດກັບຈີນ: ບັນດາເຈົ້າໜ້າທ່ີສະຫະຣັດແລະຈີນ ເຣີ່ມທຳການພົບປະເຈຣະຈາກັນ ເປັນເວລາສອງມື້ໃນວັນຈັນມື້ນີ້ ທ່ີມີວັດຖຸປະສົງເພື່ອເສີມຂະຫຍາຍການຮ່ວມມືກັນໃນດ້ານເສດຖະກິດ ສິ່ງແວດລ້ອມແລະຄວາມປອດໄພໃນຂັ້ນຕໍ່ໄປ.ທ່ານນາງຮີນລາຣີ ຄລິນຕັນ ຣັຖມຸນຕີການຕ່າງປະເທດແລະທ່ານ Timothy Geither ຣັຖມຸນຕີການເງິນສະຫະຣັດ ເປັນຜູ້ນຳພາຄນະຜູ້ຕາງໜ້າສະຫະຣັດ ໃນການສົນທະນາຫາລືປະຈຳປີເຣື່ອງຍຸດທະສາດແລະການເສດຖະກິດ ຄັ້ງທຳອິດ ກັບຈີນ. ຝ່າຍກຸງປັກກິງນັ້ນ ຈະສົ່ງເຈົ້າໜ້າທ່ີຈີນ 150 ທ່ານ ມາຮ່ວມກອງປະຊຸມ ທີ່ກຸງວໍຊິງຕັນ ໃນຄັ້ງນີ້ ຊຶ່ງນັບວ່າເປັນຄນະຜູ້ແທນທີ່ໃຫຍ່ທ່ີສຸດທ່ີຈີນໄດ້ສົ່ງມາຍັງສະຫະຣັດ. ປະທານາທິບໍດີບາຣັກໂອບາມາ ມີໝາຍກຳນົດທ່ີຈະໄປກ່າວເປີດກອງປະຊຸມດັ່ງກ່າວ. ບັນດາເຈົ້າໜ້າທ່ີໃນວົງການຣັຖບານສະຫະຣັດກ່າວວ່າ ສະຫະຣັດຢາກໃຫ້ຈີນກາງຕໍ່ນຳສິນຄ້າສົ່ງອອກຂອງຕົນໜ້ອຍລົງ ແລະໃຫ້ສຸມໃສ່ການຂະຫຍາຍຕລາດພາຍໃນປະເທດຂອງຕົນ ເພື່ອສົ່ງເສີມການເຕີບໂຕທາງດ້ານເສດຖະກິດນັ້ນ. ບັນດາເຈົ້າໜ້າທ່ີສະຫະຣັດຍັງກ່າວເຊັ່ນກັນວ່າ ພວກເຂົາເຈົ້າຈະເນັ້ນຍ້ຳວ່າ ໃນຂະນະທ່ີການເສດຖະກິດຂອງສະຫະຣັດຈະຟື້ນໂຕຄືນນີ້ ຂັ້ນຕອນການຟື້ນໂຕຄືນ ກໍຈະບໍ່ຖຶກຂັບດັນໂດຍໃຫ້ຄົນອະເມຣິກັນຊື້ສິນຄ້ານຈາກຕ່າງປະເທດ.
ກ່ຽວກັບນີວເຄລັຍຂອງເກົາຫລີເໜືອ :ເກົາຫລີເໜືອໄດ້ກ່າວຊ້ຳອີກເຖິງຄວາມເຕັມໃຈຂອງຕົນທີ່ຈະເຂົ້າພົວ ພັນໃນການໂອ້ລົມສົນທະນາກັນໃໝ່ ກ່ຽວກັບໂຄງການຜລິດອາວຸດນີວເຄລັຍຂອງຕົນ ແຕ່ໃນຂະນະດຽວກັນ ກໍຢືນຢັດວ່າຕົນຈະບໍ່ກັບຄືນສູ່ ການເຈຣະຈາ 6 ຝ່າຍ. ໃນຖແລງການສະບັບນຶ່ງທ່ີສູນກາງຂ່າວທາງການຂອງເກົາຫລີເໜືອ ປະກາດໃຫ້ຮູ້ໃນວັນຈັນມື້ນີ້ ໂຄສົກກະຊວງການຕ່າງປະເທດກ່າວວ່າ ມີການໂອ້ລົມສົນທະນາກັນ ໃນຮູບແບບທ່ີເຈາະຈົງ ທ່ີສາມາດແກ້ໄຂສະຖານະການໃນປັດຈຸບັນນີ້ໄດ້. ຖະແຫລງການບໍ່ໄດ້ໃຫ້ລາຍລະອຽດໃດໆຕື່ມອີກ ແຕ່ທາງກຸງພຽງຢ້າງໄດ້ພະຍາຍາມຫາທາງທຳການເຈຣະຈາໂດຍກົງກັບຝ່າຍວໍຊິງຕັນມາເປັນເວລາດົນນານມາແລ້ວ. ຖະແຫລງການວັນຈັນມື້ນີ້ ມີຂຶ້ນຫລັງຈາກເອກອັກຄະຣັດຖະທູດເກົາຫລີເໜືອ ທ່ານ Sin Son Ho ໄດ້ກ່າວຕໍ່ບັນດານັກຂ່າວທ່ີນະຄອນນີວຢອກເມື່ອວັນສຸກຜ່ານມາວ່າ ກຸງພຽງຢັ້ງພ້ອມແລ້ວສຳລັບອັນທ່ີທ່ານເອີ້ນວ່າ ການເຈຣະຈາກ່ຽວກັບບັນຫາຕ່າງໆທ່ີທັງສອງຝ່າຍມີຄວາມເປັນຫ່ວງນຳກັນ ແຕ່ທ່ານກ່າວຕໍ່ໄປວ່າ ປະເທດຂອງທ່ານໄດ້ເວົ້າອອກມາຢ່າງຈະແຈ້ງແລ້ວວ່າ ການເຈຣະຈາ 6 ຝ່າຍວ່າດ້ວຍການປົດອາວຸດປະເທດຂອງທ່ານນັ້ນ ແມ່ນຈົບລົງຢ່າງຖາວອນແລ້ວ.
ທ່ານນາງອອງຊານຊູຈີ ໄດ້ຮັບລາງວັນຈາກ Amnesty International: ກຸ່ມປົກປ້ອງສິດທິມະນຸດ Amnesty International ກ່າວໃນວັນຈັນມື້ນີ້ວ່າ ຕົນຈະມອບລາງວັນອັນມີກຽດອັນສູງສຸດຂອງຕົນ ທ່ີເອີ້ນວ່າ” Ambassador of Conscience Award” ໃຫ້ທ່ານນາງອອງຊານຊູຈີຜູ້ນຳຝ່າຍຄ້ານຂອງມຽນມ້າ ຊື່ງຈະມີການປະກາດມອບລາງວັນທ່ີມີກຽດນີ້ ຢ່າງເປັນທາງການໃນງານສະແດງດົນຕີ Concert ຂອງວົງດົນຕີຄນະ U2 ທີ່ນະຄອນຫລວງ Dublin ປະເທດ Ireland ໃນຄໍ່າວັນຈັນມື້ນີ້ ໂດຍ Bono ດາຣານັກຮ້ອງນຳຂອງວົງ ຊຶ່ງເປັນຜູ່ນື່ງ ທີ່ໄດ້ຮັບລາງວັນນີ້ມາແລ້ວ. ຄຳປະກາດດັ່ງກ່າວມີຂຶ້ນ ໃນຂະນະທ່ີຝ່າຍໄອຍະການ ສເນີຄຳແຖລງອັດການດຳເນີນຄະດີຕໍ່ທ່ານນາງອອງຊານຊູຈີ ໃນນະຄອນຢັ້ງກຸ້ງ ໃນຂໍ້ຫາລະເມີດເງື່ອນໄຂໃນການກັກບໍລິເວນທ່ານນາງນັ້ນ. ພວກທະນາຍຄວາມຝ່າຍຈຳເລີຍໄດ້ສເນີຂໍ້ໂຕ້ແຍ່ງບັ້ນສຸດທ້າຍຂອງຕົນ ເມື່ອວັນສຸກຜ່ານມາ ໃນຄວາມພະຍາຍາມເພື່ອຊ່ອຍບໍ່ໃຫ້ທ່ານນາງອອງຊານຊູຈີທ່ີໄດ້ຮັບລາງວັນໂນແບນຂະແໜງສັນຕິພາບນັ້ນ ລອດພົ້ນຈາກການຖືກຈຳຄຸກເຖິງ 5 ປີ ຖ້າທາງສານຕັດສິນວ່າທ່ານນາງ ມີຄວາມຜິດແທ້ນັ້ນ.
ບັນດາເຈົ້າໜ້າທ່ີສານ ກ່າວວ່າ ການດຳເນີນຄະດີອາດຈະເສັດສິ້ນລົງ ໃນວັນຈັນມື້ນີ້ ກໍເປັນໄດ້ ແຕ່ທ່ານ Nyan Win ທະນາຍຄວາມຝ່າຍ ຈຳເລີຍກ່າວຕໍ່ບັນດານັກຂ່າວວ່າ ມັນຈະໃຊ້ເວລາອີກ 2 ຫລື 3 ອາ ທິດ ຕ່ືມອີກກໍເປັນໄດ້ ກ່ອນຈະມີການຕັດສິນຄວາມນັ້ນ.
ກ່ຽວກັບອັຟການີສຖານ: ຣັຖບານອັຟການີສຖານກ່າວວ່າ ປະເທດໄດ້ບັນລຸຂໍ້ຕົກລົງຢຸດຍິງໃນລະດັບທ້ອງຖ່ິນຄັ້ງທຳອິດທ່ີບໍ່ເຄີຍມີມາກ່ອນ ກັບພວກກະບົດຕາລີບັນ. ຂໍ້ຕົກລົງຢຸດຍິງທີ່ວ່ານີ້ ໄດ້ບັນລຸກັນທ່ີແຂວງ Badghis ໃນພາກຕາເວັນຕົກສຽງເໜືອຂອງປະເທດ ໃນຄວາມພະຍາຍາມເພື່ອປັບປຸງເຣື່ອງຄວາມປອດໄພໃຫ້ດີຂຶ້ນ ກ່ອນການເລືອກຕັ້ງປະທານາທິບໍດີທ່ີຈະມີຂຶ້ນໃນເດືອນໜ້ານີ້. ພາຍໃຕ້ສັນຍາຍຸດຍິງດັ່ງກ່າວ ພວກຕາລີບັນໄດ້ຕົກລົງທ່ີຈະປ່ອຍໃຫ້ພວກຜູ້ສມັກຮັບເລືອກຕັ້ງ ຈັດຕັ້ງຫ້ອງການຂອງຕົນຂຶ້ນໄດ້ໃນແຂວງດັ່ງກ່າວໂດຍຈະບໍ່ຖືກໂຈມຕີໃດໆ. ທາງຣັຖບານຫວັງວ່າ ຈະມີການຕົກລົງຄ້າຍຄືກັນນີ້ໃນເຂດອື່ນໆອີກຂອງປະເທດ.
ການປ່ອນບັດເລືອກຕັ້ງປະທານາທິບໍດີໃນວັນທີ 20 ສິງຫາໜ້ານີ້ ເປັນການທົດສອບທ່ີສຳຄັນຂອງຄວາມພະຍາຍາມຕ່າງໆທ່ີໄດ້ຮັບການໜຸນຫລັງຈາກສະຫະຣັດແລະກຸ່ມເນໂຕ ເພື່ອສ້າງຕັ້ງລະບອບປະຊາທິປະໄຕຂຶ້ນໃນອັຟການີສຖານ ຫລັງຈາກໄດ້ປະເຊີນກັບບັນຫາຂັດແຍ່ງກັນມາເປັນເວລາຫລາຍທົດສວັດນັ້ນ.
ວັນພະຫັດ, ໐໕ ທັນວາ ໒໐໒໔
