ລິ້ງ ສຳຫລັບເຂົ້າຫາ

site logo
ວັນອັງຄານ, 17 ພຶດສະພາ 2022

ບັນຫາແຮງງານຫວຽດນາມ ແລະ ຈີນທີ່ຜິດກົດໝາຍຢູ່ໃນລາວ


ທາງການລາວຍອມຮັບວ່າ ມີແຮງ ງານຈາກຫວຽດນາມ ແລະ ຈີນ ຢູ່ ໃນລາວຫລາຍຂຶ້ນນັບມື້ ແລະ ໃນ ຂະນະດຽວກັນ ການທີ່ຄົນລາວ ສ່ວນໃຫຍ່ກໍເປັນແຮງງານທີ່ບໍ່ມີຝີມື ຢູ່ແລ້ວ ກໍຍັງເຮັດໃຫ້ຕ້ອງປະສົບ ກັບບັນຫາ ການຫວ່າງານຫລາຍ ຂຶ້ນຢ່າງຕໍ່ເນື່ອງອີກດ້ວຍ.

ທ່ານ ນາງ ອ່ອນ​ຈັນ​ ທຳ​ມະ​ວົງ ລັດຖະມົນຕີ​ວ່າການ​ກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ​ຂອງ​ລາວ ​ໄດ້​ຖະ​ແຫລ​ງຍອມຮັບ​ວ່າ ​ໃນ​ປະຈຸ​ບັນນີ້ ມີ​ແຮງ​ງານ​ຈາກ ຫວຽດນາມ, ຈີນ ​ແລະ ​ໄທ ຢູ່​ໃນ​ລາວ​ຈຳນວນ​ລວມກັນ​ຫລາຍ​ກວ່າ 290.000 ຄົນ ​ແລະ ສ່ວນ​ຫລາຍ ກໍ​ເປັນ​ແຮງ​ງານ​ທີ່​ລັກລອບ​ທຳ​ງານ​ຢູ່​ໃນ​ລາວ​ໂດຍ​ຜິດ​ກົດໝາຍອີກ​ດ້ວຍ. ​ໂດຍ​ພາຍໃຕ້​ສະພາບ​ການ​ດັ່ງກ່າວ​ນີ້ ​ເມື່ອ​ປະກອບ​ກັບ​ການ​ທີ່ປາກົດ​ວ່າ ມີ​ແຮງ​ງານ​ລາວ​ທີ່​ຖືກ​ເຊົາ​ຈ້າງງານ​ໃນ​ປະ​ເທດ​ໄທ ​ແລະ ກໍ​ໄດ້​ພາກັນເດີນທາງ​ກັບ​ຄືນ​ພູມ ລຳ​ເນົາ​ຢູ່​ໃນ​ປ​ະ​ເທດ​ລາວ​ເພີ້ມຫລາຍ​ຂຶ້ນກໍ​ຄື​ຫລາຍ​ກວ່າ 12.000 ຄົນ ​ແລ້ວ ​ໃນ​ໄລຍະ ຫ້າເດືອນ​ທີ່​ຜ່ານ​ມານີ້ ​ແລະ ​ໃນ​ຂະນະ​ດຽວກັນ​ກໍ​ປາກົດ​ດ້ວຍວ່າ ມີ​ແຮງ​ງານ​ລາວ​ຈາກ​ເຂ​ດ ຊົນນະບົດ ​ເດີນທາງ​ເຂົ້າມາ​ໃນ​ເຂດ​ຕົວ​ເມືອງ​ໃຫຍ່ ​ເພີ້ມຫລາຍ​ຂຶ້ນນັບ​ມື້ດ້ວຍ​ແລ້ວ ກໍ​ຍິ່ງ​ເຮັດ​ໃຫ້​ຄົນ​ລາວ​ຕ້ອງ​ປະ​ເຊີນ​ກັບ​ບັນຫາ​ບໍ່ມີ​ວຽກງານ​ທຳ​ເພີ້ມຫລາຍ​ຂຶ້ນຢ່າງ​ຕໍ່​ເນື່ອງ​ເຊັ່ນ​ດຽວກັນ.

ທັງນີ້ ​ໂດຍ​ຈາກ​ການ​ປະ​ເມີນ​ສະຖານະ​ການ​ເບື້ອງຕົ້ນ ທ່ານ ນາງ ອ່ອນ​ຈັນ ​ໄດ້​ລະບຸ​ວ່າ ມີ​ແຮງ​ງານ​ລາວ​ຫລາຍ​ກວ່າ 68.000 ຄົນ ທີ່​ຕົກ​ຢູ່​ໃນ​ສະພາ​ວ່າການ​ຫວ່າງ​ງານ ​ແລະ ກໍ​ມີ​ແນວໂນ້ມທີ່​ຈະ​ມີ​ການ​ຫວ່າງ​ງານ​ເພີ້ມຫລາຍ​ຂຶ້ນ​ເລື້ອຍໆອີກ​ດ້ວຍ. ສ່ວນ​ທາງ​ດ້ານ ທ່ານ ອ່ອນ​ສີ ບຸດ​ສີ​ວົງ​ສັກ ປະທານ​ຄະນະ​ກຳມະການ​ຜູ້​ຕາງໜ້າຂອງ​ບັນດາ​ນາຍ​ຈ້າງໃນລາວ ​ໄດ້​ໃຫ້ການ​ອະທິ​ບາຍ​ວ່າ ສາ​ເຫດ​ທີ່​ສຳຄັນ​ອີກ​ປະການໜຶ່ງ ທີ່​ເຮັດໃຫ້​ແຮງ​ງານ​ໃນ​ລາວ ຕ້ອງ​ປະ​ເຊີນ​ກັບ​ບັນຫາ​ຫວ່າງ​ງານ​ຫລາ​ຍ ຂຶ້ນນັບ​ມື້ນັ້ນ ກໍ​ຄື ການ​ທີ່ແຮງ​ງານ​ສ່ວ​ນໃຫຍ່ ​ເປັນ​ແຮງ​ງານ​ບໍ່ມີ​ຝີມື ຈຶ່ງ​ບໍ່ສອດ​ຄ່ອງ​ກັບ​ຄວາມ​ຕ້ອງການ​ຂອງ​ບັນດາ​ນາຍ​ຈ້າງ​ຢູ່​ໃນ​ປະ​ເທດ​ລາວ. ​ໂດຍ​ສະ​ເພາ​ະ​ແມ່ນ ບັນດາ​ບໍລິສັດ​ລົງທຶນ​ຈາກ​ຕ່າງປະ​ເທດ.

ສາ​ເຫດ​ທີ່​ເຮັດ​ໃຫ້​ແຮງ​ງານ​ລາວ ເປັນ​ແຮງ​ງານ​ບໍ່ມີ​ຝີມືນັ້ນ ກໍ​ຍ້ອນ​ວ່າ​ແຮງ​ງານ​ລາວ​ສ່ວນ​ຫລາຍ​ຂາດ​ການ​ສຶກສາ ​ແລະ​ ກໍ​ເດີນທາງ​ມາ​ຈາກເຂດຊົນນະບົດ ​ແລະ ທີ່ຖື​ວ່າ​ເປັນ​ບັນຫາ​ຢ່າງ​ຍິ່ງ​ນັ້ນກໍ​ຄື ການ​ທີ່​ຈະ​ພັດທະນາ ​ເພື່ອ​ຍົກ​ລະດັບ​ຄຸນ​ນະພາ​ບຝີ​ມື​ແຮງ​ງານ​ລາວ​ເຫລົ່າ​ນີ້ ກໍ​ຍັງ​ນັບ​ເປັນ​ການ​ຍາກ​ອີກ​ດ້ວຍ.

ນອກຈາກນີ້ ການທີ່ຢູ່ໃນລາວກໍມີລະດັບຄ່າ ຈ້າງທີ່ຕ່ຳຫລາຍ, ເມື່ອທຽບໃສ່ກັບລະດັບຄ່າ ຄອງຊີບທີ່ເພີ້ມສູງຂຶ້ນຢ່າງຕໍ່ເນື່ອງ ແລະ ໃນຂະນະດຽວກັນ ເຖິງແມ່ນວ່າທາງການລາວ ຈະໄດ້ອານຸມັດ ໃຫ້ມີການປັບຂຶ້ນອັດຕາຄ່າຈ້າງຂັ້ນຕ່ຳ,ຈາກ 290.000 ກີບ ເປັນ​ເກືອບ 400.000 ກີບ​ ຕໍ່​ເດືອນ​ແລ້ວ ນັບ​ຈາກ​ເດືອນ​ພຶດສະພາ​ນີ້​ເປັນຕົ້ນມາ ກໍ​ປາ​ກົດ​ວ່າ ຈົນ​ເຖິງ​ປະຈຸ​ບັນ ບັນດາ​ລູກຈ້າງ​ກໍ​ຍັງ​ຄົງ​ບໍ່​ທັນໄດ້​ຮັບ​ຄ່າ​ຈ້າງຕາມ​ອັດຕາ​ໃໝ່ນີ້ແຕ່​ຢ່າງ​ໃດ. ​ເພາະສະນັ້ນ ຈຶ່ງນັບ​ເປັນ​ອີກ​ເງື່ອນ​ໄຂ​ທີ່​ສຳຄັນ​ປະການ​ໜຶ່ງ ທີ່​ເຮັດ​ໃຫ້​ແຮງ​ງານ​ລາວ​ຕ້ອງ​ພາກັນ​ລັກ​ລອບ​ເຂົ້າ​ໄປ​ທຳ​ງານ​ຢູ່​ໃນ​ໄທ​ ໂດຍ​ຜິດ​ກົດໝາຍ ​ເພີ້ມຫລາຍ​ຂຶ້ນນັບ​ມື້ ກັບທັງ​ຍັງ​ສ່ຽງ ທີ່​ຈະ​ຕ້ອງ​ຕົກ​ເປັນ​ເຫຍື່ອຂອງ​ການ​ຄ້າ​ມະນຸດ​ຂ້າມ​ຊາດ ​ເພີ້ມຫລາຍ​ຂຶ້ນນັບ​ມື້ອີກ​ດ້ວຍ.

ຊົງຣິດ ໂພນເງິນ ລາຍງານຈາກບາງກອກ ໃນວັນທີ 24 ກໍລະກົດ 2009


XS
SM
MD
LG