ທ່ານ ສຸບັນ ສະລິດທິລາດ ລັດຖະມົນຕີປະ ຈຳສຳນັກງານປະທານປະເທດລາວ ໃນຖາ ນະປະທານກຳມາການຄວບຄຸມ ແລະ ກວດກາຢາເສບຕິດແຫ່ງຊາດ ຊຶ່ງທ່ານໄດ້ຖະແຫລງ ເນັ້ນຢ້ຳວ່າ, ການລັກລອບປູກຝິ່ນຢູ່ໃນລາວ ຍັງຄົງເກີດຂຶ້ນຢ່າງຕໍ່ເນື່ອງ ແລະ ກໍມີທ່າອ່ຽງ ທີ່ຈະເພີ້ມຜົນຜະຫລິດຫລາຍຂຶ້ນນັບມື້ອີກດ້ວຍ. ເຖິງແມ່ນວ່າທາງການລາວ ຈະໄດ້ປະກາດໃຫ້ລາວເປັນປະເທດທີ່ປອດຈາກການປູກຝິ່ນຢ່າງສິ້ນເຊີງ ນັບຈາກປີ 2006 ເປັນຕົ້ນມາແລ້ວກໍຕາມ, ຫາກແຕ່ວ່າ ດ້ວຍການທີ່ໄດ້ຮັບຄວາມຊ່ອຍເຫລືອຈາກ ຕ່າງປະເທດ ຕ່ຳ,ກວ່າລະດັບຄວາມຕ້ອງການ,ທີ່ເປັນຈິງ ສຳລັບທີ່ຈະນຳໃຊ້ເຂົ້າໃນການດຳເນີນໂຄງການພັດທະນາຕ່າງໆ ເພື່ອຫລຸດຜ່ອນບັນຫາຄວາມທຸກຍາກຂອງປະຊາຊົນລາວ ຢູ່ໃນເຂດທີ່ເຄີຍປູກຝິ່ນນັ້ນ ໄດ້ເຮັດໃຫ້ປະຊາຊົນໃນເຂດດັ່ງກ່າວພາກັນກັບຄືນໄປທຳການລັກລອບປູກຝິ່ນອີກເທື່ອໃໝ່.
ທັງນີ້ ທ່ານ ສຸບັນ ໄດ້ລະບຸອີກດ້ວຍວ່າ ໃນປີ 2007 ຍັງຄົງມີການລັກລອບປູກຝິ່ນບົນເນື້ອທີ່ ທີ່ກວ້າງກວ່າ 1.500 ເຮັກຕ້າ ແລະ ກໍໄດ້ເພີ້ມຫລາຍຂຶ້ນເປັນພື້ນທີ່ກວ້າງກວ່າ 1.600 ເຮັກຕ້າ ໃນປີ 2008 ອັນເປັນຜົນເຮັດໃຫ້ຜົນຜະຫລິດຢາຝິ່ນໄດ້ເພີ້ມຂຶ້ນຈາກ 9,2 ໂຕນ ໃນປີ 2007 ເປັນ 9,6 ໂຕນ ໃນປີ 2008 ທີ່ຜ່ານມາ ແລະ ໃນຂະນະດຽວກັນ ການທີ່ຍັງປາກົດວ່າມີປະຊາຊົນລາວ ລະຫວ່າງ 12.000 ຫາ 15.000ຄົນ ທີ່ຍັງພາກັນສູບຝິ່ນຢູ່ນັ້ນ ກໍຍັງໄດ້ເປັນຜົນເຮັດໃຫ້ຢາຝິ່ນມີລາຄາແພງຂຶ້ນຈາກລະດັບ 100 ໂດລາສະຫະຣັດ ເປັນເກີນກວ່າ 1.300 ໂດລາສະຫະຣັດຕໍ່ກິໂລກາມ ແລ້ວໃນປະຈຸບັນ. ຊຶ່ງດ້ວຍສະ ພາວະຢາຝິ່ນທີ່ແພງຫລາຍຂຶ້ນຫລາຍເທົ່າຕົວດັ່ງກ່າວນີ້ ກໍຍັງຖືເປັນອີກປັດໃຈໜຶ່ງ ທີ່ເຮັດໃຫ້ປະຊາຊົນລາວ ໄດ້ພາກັນກັບຄືນໄປທຳການລັກລອບປູກຝິ່ນເພີ້ມຫລາຍຂຶ້ນອີກດ້ວຍເຊັ່ນກັນ.ກ່ອນໜ້ານີ້ ກໍຄືພາຍຫລັງທີ່ໄດ້ມີການປະ ກາດລົບລ້າງ ການປູກຝິ່ນຢ່າງສິ້ນເຊີງ ນັບຈາກປີ 2006 ເປັນຕົ້ນມານັ້ນ ທາງການລາວກໍໄດ້ຖະແຫລງຢືນຢັນວ່າ ມີຄວາມ ຕ້ອງການທີ່ຈະໄດ້ຮັບການຊ່ອຍເຫລືອຈາກຕ່າງປະເທດ ຄຶດເປັນມູນຄ່າບໍ່ໜ້ອຍກວ່າ 80ລ້ານ ໂດລາສະຫະຣັດ ເພື່ອໃຊ້ຈ່າຍດຳເນີນໂຄງການພັດທະນາຕ່າງໆ ສຳລັບການຫລຸດຜ່ອນບັນຫາຄວາມທຸກຈົນຂອງປະຊາ ຊົນລາວ ທີ່ພາກັນປະລະຈາກການປູກຝິ່ນໄປແລ້ວ ຢູ່ໃນເຂດ 10 ແຂວງ ພາກເໜືອຂອງລາວ. ຫາກແຕ່ເນື່ອງຈາກວ່າ ບໍ່ໄດ້ຮັບການຊ່ອຍເຫລືອ ຕາມລະດັບຄວາມຕ້ອງການທີ່ເປັນຈິງດັ່ງກ່າວ ຈຶ່ງເຮັດໃຫ້ ທ່ານ ສຸບັນ ຕ້ອງອອກມາຖະແຫລງ ການຮຽກຮ້ອງໃນຄັ້ງຫລ້າສຸດນີ້. ສຳລັບໃນໄລຍະຈາກປີ 2009 ໄປຈົນເຖິງປີ 2013 ນັ້ນ ກໍປາກົດວ່າ ທາງການລາວໄດ້ວາງເປົ້າໝາຍທີ່ຈະຕ້ອງໄດ້ຮັບການ ຊ່ອຍເຫລືອຈາກຕ່າງປະເທດ ໃນມູນຄ່າລວມບໍ່ໜ້ອຍກວ່າ 60ລ້ານ ໂດລາສະຫະລັດ ສຳ ລັບນຳໃຊ້ເຂົ້າໃນໂຄງການພັດທະນາຕ່າງໆ ເພື່ອການຫລຸດຜ່ອນບັນຫາຄວາມຍາກຈົນ ຂອງປະຊາຊົນລາວຢູ່ໃນພື້ນທີ່ 1.100 ກວ່າໝູ່ບ້ານໃນເຂດ 10 ແຂວງພາກເໜືອ ຊຶ່ງ ເຄີຍປູກຝິ່ນ ແລະ ກໍມີທ່າອ່ຽງສູງ ທີ່ປະຊາຊົນໃນເຂດເຫລົ່ານີ້ ຈະພາກັນຫວນກັບຄືນໄປ ທຳການລັກລອບປູກຝິ່ນອີກເທື່ອໃໝ່ເພີ້ມຫລາຍຂຶ້ນນັບມື້ອີກດ້ວຍ.
ລາວເຄີຍເປັນປະເທດອັນດັບທີ່ 3 ທີ່ມີການປູກຝິ່ນຫລາຍທີ່ສຸດໃນໂລກ ລອງຈາກປະເທດພະມ້າ ແລະ ອັຟການິສຖານ ໂດຍໃນໄລຍະກ່ອນປີ 1985 ນັ້ນ ປະຊາຊົນລາວຢູ່ໃນເຂດ 10 ແຂວງພາກເໜືອ ໄດ້ພາກັນປູກຝິ່ນບົນເນື້ອທີ່ ທີ່ກວ້າງກວ່າ 30.000 ເຮັກຕ້າ ແລະ ກໍມີຜົນຜະຫລິດຝິ່ນໃນແຕ່ລະປີນັ້ນ ຫລາຍກວ່າ 150 ໂຕນ.
ຊົງຣິດ ໂພນເງິນ ລາຍງານຈາກບາງກອກ ໃນວັນທີ 20 ກໍລະກົດ 2009
