ການຢ້ຽມຢາມເອເຊັຍຂອງທ່ານນາງຄລິນຕັນ: ທ່ານນາງ ຮີນລາຣີ ຄລິນຕັນ ຣັຖມຸນຕີການຕ່າງປະເທດສະຫະຣັດໄດ້ ພົບປະກັບທ່ານມັນໂມຫັນ ສິງ ນາຍົກຣັຖມຸນຕີອິນເດັຍທ່ີກຸງນີວແດນລີ ໃນວັນຈັນມື້ນີ້ ເພື່ອທຳການໂອ້ລົມສົນທະນາກັນທ່ີມີວັດຖຸປະສົງເພື່ອເສີມສ້າງສາຍພົວພັນດ້ານຍຸດທະສາດລະຫວ່າງສອງປະເທດໃຫ້ແຂງແຮງຍິ່ງຂຶ້ນ. ຄາດວ່າທັງສອງຝ່າຍຈະບັນລຸຂໍ້ຕົກລົງສອງສະບັບໃນຂັ້ນສຸດທ້າຍກັນ ຊຶ່ງສະບັບນຶ່ງຈະອະນຸຍາດໃຫ້ພວກບໍລິສັດສະຫະຣັດສ້າງໂຮງໄຟຟ້ານີວເຄລັຍຂຶ້ນ 2 ແຫ່ງໃນອິນເດັຍ ແລະອີກສະບັບນຶ່ງນັ້ນແມ່ນເພື່ອຮັບປະກັນວ່າ ການຂາຍເທັກໂນໂລຈີດ້ານອາວຸດຂອງສະຫະຣັດໃຫ້ ອິນເດັຍນັ້ນ ຈະບໍ່ແຜ່ລາມອອກໄປຍັງປະເທດອື່ນໆ. ຫລັງຈາກທຳການເຄື່ອນໄຫວຢ້ຽມຢາມອິນເດັຍແລ້ວ ທ່ານນາງຄລິນຕັນຈະເດີນທາງຕໍ່ໄປຍັງປະເທດໄທ ເພື່ອທຳການໂອ້ລົມສົນທະນາກັບນາຍົກຣັຖມຸນຕີອະພິສິດເວດຊາຊີວະ ແລະເຂົ້າຮ່ວມໃນກອງປະຊຸມລະດັບຣັຖມຸນຕີຕ່າງປະເທດຂອງກຸ່ມອາຊຽນ ກ່ອນຈະເດີນທາງກັບຄືນ ສູ່ກຸງວໍຊິງຕັນໃນວັນສຸກສັບປະດານີ້.
ກອງປະຊຸມກຸ່ມອາຊຽນ: ໃນຂະນະດຽວກັນ ບັນດາຣັຖມຸນຕີຕ່າງປະເທດຂອງກຸ່ມປະເທດໃນຂົງເຂດຕາເວັນອອກສຽງໃຕ້ ກໍເຣີ່ມພົບປະຫາລືກັນໃນວັນຈັນມື້ນີ້ທ່ີປະເທດໄທ ໃນກອງປະຊຸມທ່ີພວກເຂົາເຈົ້າວາງແຜນວ່າ ຈະຮັບຮອງເອົາການຈັດຕັ້ງກຸ່ມປົກປ້ອງສິດທິມະນຸດປະຈຳຂົງເຂດຂຶ້ນມາໃໝ່ນັ້ນ ຊື່ງໄດ້ຮັບການຕອບຮັບດ້ວຍຄວາມສົງໄສບໍ່ແນ່ໃຈປານໃດ ຈາກພວກນັກເຄື່ອນໄຫວໃນດ້ານສິດທິມະນຸດ.
ພວກທ່ີຕຳໜິຕິຕຽນຕໍ່ຂໍ້ສເນີຈັດຕັ້ງກຸ່ມປົກປ້ອງສິດທິມະນຸດຂຶ້ນນີ້ກ່າວວ່າ ກຸມທ່ີວ່ານີ້ຈະບໍ່ມີອຳນາດໃດໆ ໃນການຕິດຕາມເບິ່ງ ຫລືລົງໂທດ ພວກທ່ີລະເມີດສິດທິມະນຸດຢູ່ໃນຫລາຍໆບ່ອນ ເຊັ່ນໃນມຽນມ້າ ຊຶ່ງ ເປັນປະເທດສະມາຊິກນຶ່ງຂອງກຸ່ມອາຊຽນ ທ່ີໄດ້ຮັບການຕຳໜິຕິຕຽນຢ່າງແຂງແຮງ ຍ້ອນການປະຕິບັດຕໍ່ທ່ານນາງອອງຊານຊູຈີ ນັກເຄື່ອນໄຫວເພື່ອປະຊາທິປະໄຕໃນມຽນມ້ານັ້ນ.
ທ່ານອະພິສິດ ເວດຊາຊີວະ ນາຍົກຣັຖມຸນຕີໄທ ປະຕິເສດຕໍ່ການຕຳ ນິຕິຕຽນນັ້ນ ໂດຍກ່າວວ່າ ກຸ່ມ ASEAN ຕ້ອງການເປັນປະຊາຄົມທ່ີ ປະຕິບັດການ. ແຕ່ວ່າ ຜູ້ນຳໄທໄດ້ກ່າວຢູ່ໃນຄຳປາໄສທາງວິທຍຸແລະ ໂທຣະພາບປະຈຳສັບປະດາຂອງທ່ານໃນວັນອາທິດວານນີ້ວ່າ ເຫລົ່າ ປະເທດອາຊຽນ ຄວນຈະຄັດຄ້ານການລົງໂທດຂອງຝ່າຍຕາເວັນຕົກຕໍ່ມຽນມ້ານັ້ນ ແລະຄວນສືບຕໍ່ທຳການໂອ້ລົມສົນທະນາກັບຣັຖບານທະ ຫານມຽນມ້າ.
ພວກຜູ້ນຳຂອງ 10 ປະເທດສະມາຊິກຂອງກຸ່ມອາຊຽນທັງໝົດ ຈະໃຫ້ ການອະນຸມັດແກ່ການຈັດຕັ້ງກຸ່ມປົກປ້ອງສິດທິມະນຸດປະຈຳຂົງເຂດທີ່ວ່ານີ້ ໃນກອງປະຊຸມສຸດຍອດທ່ີຈະມີຂຶ້ນໃນເດືອນຕຸລາ.
ການເມືອງທີ່ຍີ່ປຸ່ນ: ການສຳຫລວດຫາງສຽງປະຊາຊົນຄັ້ງໃໝ່ ສະແດງໃຫ້ເຫັນວ່າ ພັກເສຣີ ປະຊາທິປັດຂອງຣັຖບານຊຸດປັດຈຸບັນ ຈະໄດ້ຮັບການປາໄຊຢ່າງໃຫຍ່ໃນການເລືອກຕັ້ງທ່ີຈະມາເຖິງນີ້. ການສຳຫລວດຫາງສຽງປະຊາຊົນທາງໂທຣະສັບ ທ່ີໜັງສືພິມ Mainichi ເປີດເຜີຍໃຫ້ຮູ້ໃນວັນຈັນມື້ນີ້ ພົບວ່າ 56ເປີເຊັນຂອງພວກທ່ີຖືກ ສຳຫລວດນັ້ນ ໃຫ້ການສນັບສນຸນແກ່ພັກປະຊາທິປັດຝ່າຍຄ້ານຂອງຍີ່ປຸ່ນ ແລະມີພຽງແຕ່ 23 ເປີເຊັນເທົ່ານັ້ນ ທ່ີສນັບສນຸນພັກເສຣີປະຊາທິປັດຂອງຣັຖບານ. ສ່ວນການສຳຫລວດຂອງອົງການຂ່າວ Kyodo ທ່ີພິມເຜີຍແຜ່ໃຫ້ຮູ້ໃນວັນອາທິດວານນີ້ ກ່າວວ່າ 39.3 ເປີເຊັນຂອງພວກທ່ີຖືກສຳຫລວດນັ້ນ ຫວັງວ່າ ຈະມີຣັຖບານທ່ີນຳພາໂດຍພັກປະຊາທິປັດ ສົມທຽບໃສ່ກັບ 14.8 ເປີເຊັນ ຂອງພວກເຂົາເຈົ້າທີ່ມີສັດທາໃນພັກເສຣີປະຊາທິປັດ. ການສຳຫລວດຫາງສຽງປະຊາຊົນເຫລົ່ານີ້ ໄດ້ຖືກເປີດເຜີຍອອກມາໃນເວລາ 1 ມື້ ກ່ອນນາຍົກຣັຖມຸນຕີ Taro Aso ກຳນົດຈະຍຸບສະພາຕ່ຳ ເພື່ອເປີດການເລືອກຕັ້ງຂຶ້ນກ່ອນກຳນົດນັ້ນ.
ອິນເດັຍແລະປາກີສຖານ: ຜູ້ຊາຍປາກີສຖານຄົນນຶ່ງ ທ່ີກຳລັງຖືກດຳເນີນຄະດີກ່ຽວກັບການໂຈມຕີ ຂອງພວກກໍ່ການຮ້າຍທ່ີມີຜູ້ຄົນເສັຍຊີວິດຢ່າງຫລວງຫລາຍໃນປີແລ້ວນີ ທ່ີເມືອງມອມໄບຂອງອິນເດັຍ ໄດ້ຍອມຮັບຜິດໃນການຮັບສາລະພາບທ່ີບໍ່ຄິດບໍຝັນໃນສານແຫ່ງນຶ່ງຂອງອິນເດັຍ. ໄອຍະການUjjwal Nikam ກ່າວວ່າ ນາຍ Mohammed Ajman Kasab ໄດ້ຢືນຂຶ້ນໃນລະຫວ່າງການດຳເນີນຄະດີໃນວັນຈັນມື້ນີ້ ຢູ່ໃນສານພິເສດແຫ່ງນຶ່ງ ແລະກ່າວວ່າ ລາວຢາກຮັບຜິດໃນບົດບາດຂອງລາວໃນອາຊຍາກັມດັ່ງກ່າວ.
ຈຳເລີຍວັຍ 21 ປີຄົນນີ້ ທ່ີໄດ້ໃຫ້ການຕໍ່ສານໃນເດືອນພຶດສະພາຜ່ານມາວ່າ ຕົນບໍ່ມີຄວາມຜິດນັ້ນ ເປັນບຸກຄົນດຽວທ່ີຖືກຈັບເປັນ ໃນຈຳນວນພວກມືປືນ 10 ຄົນ ທີ່ທຳການໂຈມຕີໂຮງແຮມ Taj Mahal ແລະສະຖານທ່ີອື່ນໆອີກໃນເຂດໃຕ້ຂອງເມືອງມອມໄບ ໃນເດືອນພະຈິກປີ ຜ່ານມາ ທີ່ໄດ້ສັງຫານຜູ້ຄົນໄປ 166 ຄົນ ແລະເຮັດໃຫ້ສາຍພົວພັນ ລະຫວ່າງອິນເດັຍແລະປາກີສຖານ ຊຶ່ງເປັນຄູ່ສັດຕູກັນ ຍ່ິງເຄັ່ງຕຶງຂຶ້ນ ອີກ. ປາກີສຖານໄດ້ຍອມຮັບວ່າ ພວກຄົນຮ້າຍໄດ້ວາງແຜນການໂຈມຕີ ສ່ວນນື່ງຢູ່ໃນດິນແດນຂອງຕົນ ແຕ່ປະຕິເສດຕໍ່ການຢືນຢັດຂອງອິນເດັຍ ທ່ີວ່າພວກເຈົ້າໜ້າທ່ີຣັຖບານປາກີສຖານມີສ່ວນພັວພັນນຳນັ້ນ.
ບັນຫາການເມືອງຂອງຮອນດູຣັສ: ການພົບປະເຈຣະຈາທີ່ມີວັດຖຸປະສົງເພື່ອແກ້ໄຂບັນຫາຂັດແຍ່ງກັນທາງ ການເມືອງໃນຮອນດູຣັສ ໄດ້ພງັທະລາຍລົງໃນວັນອາທິດວານນີ້ ໂດຍບໍ່ໄດ້ບັນລຸຂໍ້ແກ້ໄຂກັນໃດໆ. ປະທານາທິບໍດີ Oscar Arias ແຫ່ງ Costa Rica ກ່າວໃນມື້ວານນີ້ວ່າ ທ່ານໄດ້ຮຽກຮ້ອງໃຫ້ທັງສອງຝ່າຍ ກັບຄືນໄປເຈຣະຈາກັນອີກ ທ່ີນະຄອນຫລວງ San Jose ໃນວັນພຸດຈະມານີ້ ຫລັງຈາກຢຸດພັກເປັນເວລາ 3 ມື້ ເພື່ອຊອກຫາວິທີແກ້ໄຂບັນຫາ. ທາງຝ່າຍສະຫະຣັດນັ້ນ ໂຄສົກກະຊວງການຕ່າງປະເທດສະຫະຣັດ ໄດ້ອອກມາກ່າວວ່າ ການພົບປະເຈຣະຈາກັນໄດ້ສ້າງໃຫ້ມີພື້ນຖານສຳລັບຄວາມເປັນໄປໄດ້ ໃນການແກ້ໄຂບັນຫາ.
ປະທານາທິບໍດີຮອນດູຣັສ ທ່ານ Manuel Zelaya ໄດ້ລີ້ພັຍຢູ່ໃນຕ່າງປະເທດ ນັບແຕ່ທ່ານໄດ້ຖືກພວກທະຫານໂຄ່ນລົ້ມອອກຈາກຕຳແໜ່ງເມື່ອວັນທີ 28 ມິຖຸນາຜ່ານມາ. ທ່ານ Zelaya ຢືນຢັດວ່າ ທ່ານມີສິດກັບຄືນໄປຮອນດູຣັສ ແຕ່ຣັຖບານຊົ່ວຄາວຂອງຮອນດູຣັສ ທ່ີນຳພາໂດຍທ່ານ Roberto Micheletti ກ່າວວ່າ ການເດີນທາງກັບຄືນປະເທດຂອງທ່ານ Zelaya ເປັນທ່ີຮັບເອົາບໍ່ໄດ້.
ວັນພະຫັດ, ໑໒ ທັນວາ ໒໐໒໔
