<!-- IMAGE -->
ຜູ້ນຳສອງປະເທດມະຫາອຳນາດນີວເຄລຍ ທີ່ຍິ່ງໃຫຍ່ຂອງໂລກ ໄດ້ຕົກລົງກັນທີ່ຈະລົດອາວຸດນີວເຄລຍຂອງປະເທດຂອງພວກຕົນລົງ. ປະທານາທິບໍດີສະຫະຣັດ ທ່ານບາຣັກ ໂອບາມາ ແລະປະທານາທິບໍດີຣັດເຊຍ ທ່ານ ດີມີຕຣີ ເມັດວີເດຟ ໄດ້ເຊັນສັນຍາວ່າດ້ວຍ "ຄວາມເຂົ້າໃຈຮ່ວມກັນ" ສະບັບນຶ່ງ ເພື່ອລົດຜ່ອນຫົວລະເບີດນີວເຄລຍ ແລະພາຫານະນຳສົ່ງ ຫລືຍິງລະເບີດເຫລົ່ານັ້ນ ຂອງປະເທດຂອງພວກຕົນ ລົງໃຫ້ໄດ້ເຖິງນຶ່ງສ່ວນສາມຂອງລະດັບປັດຈຸບັນ ໂດຍມີກຳນົດຈະເຮັດສົນທິສັນຍາທີ່ມີຜົນຜູກມັດໃນທາງກົດໝາຍໃຫ້ສຳເລັດພາຍໃນປີນີ້. ສົນທິສັນຍາສະບັບໃໝ່ທີ່ວ່ານີ້ ຈະໃຊ້ແທນສົນທິສັນຍາວ່າດ້ວຍການລົດຜ່ອນອາວຸດຍຸທະສາດ ທີ່ເຊັນກັນເມື່ອປີ 1991 ທີ່ຮູ້ກັນໃນຊື່ຫຍໍ້ວ່າ START ຊຶ່ງຈະໝົດອາຍຸໃນວັນທີ່ຫ້າ ທັນວາ ປີ 2009 ນີ້.
ນອກຈາກນີ້ແລ້ວ ຜູ້ນຳທັງສອງຍັງໄດ້ຕົກລົງເຫັນພ້ອມກັນ ອອກຖະແລງການຮ່ວມສະບັບນຶ່ງ ວ່າດ້ວຍການຮ່ວມມືດ້ານຄວາມໝັ້ນຄົງທາງນີວເຄລຍ ທີ່ຈະຊ່ວຍໃຫ້ບັນລຸເປົ້າໝາຍໃນການຂົນຂວາຍເອົາວັດຖຸນີວເຄລຍທີ່ອັນຕະລາຍທັງໝົດ ມາຮັກສາໄວ້ໃຫ້ໄດ້ພາຍໃນສີ່ປີຂ້າງໜ້ານີ້.
ປະທານາທິບໍດີໂອບາມາ ກ່າວວ່າ ມັນສຳຄັນທີ່ສຸດທີ່ສະຫະຣັດ ແລະ ຣັດເຊຍ ຈະຕ້ອງເປັນຕົວຢ່າງນຳພາໃນການຍຸດຕິການແຜ່ຜາຍອາວຸດນີວເຄລຍ ແລະປ້ອງບໍ່ໃຫ້ມີການນຳໃຊ້ອາວຸດເຫລົ່ານັ້ນ ຊຶ່ງທ່ານກ່າວວ່າ
ຄວາມຄິດທ່ີວ່າອິດທິພົນມາຈາກການມີອາວຸດເຫລົ່ານີ້ ຫລືວ່າພວກເຮົາສາມາດປ້ອງກັນເຮົາເອງໄດ້ໂດຍຄັດເອົາແລະເລືອກເອົາວ່າປະເທດໃດສາມາດມີອາວຸດເຫລົ່ານີ້ໄດ້ນັ້ນ ເປັນຄວາມຫລອກລວງອັນນຶ່ງ. ໃນໄລຍະສັ້ນນັບແຕ່ສົງຄາມເຢັນໄດ້ຍຸດຕິລົງ ພວກເຮົາໄດ້ເຫັນອິນເດັຍປາກີສຖານແລະເກົາຫລີເໜືອທຳການທົດລອງອາວຸດນີວເຄລັຍນີ້ແລ້ວ.
ຖ້າບໍ່ມີການປ່ຽນແປງຂັ້ນພື້ນຖານແລ້ວ ສຳລັບພວກເຮົາແລ້ວມີຜູ້ໃດເຊື່ອແທ້ຈິງບໍວ່າໃນອີກ 2 ທົດສວັດຕໍ່ໜ້າ ຈະບໍ່ມີການແຜ່ຂະຫຍາຍພວກອາວຸດນີວເຄລັຍເຫລົ່ານີ້ອອກໄປອີກນັ້ນ.
ປະທານາທິບໍດີໂອບາມາ ກ່າວວ່າ ອາເມຣິກາແມ່ນມີຄວາມໝັ້ນໝາຍທີ່ຈະຍຸດຕິການແຜ່ຜາຍນີວເຄລຍ ແລະດຳເນີນການເພື່ອໃຫ້ໂລກນີ້ປາສະຈາກອາວຸດນີວເຄລຍໃນທີ່ສຸດ. ຂໍ້ຕົກລົງຕ່າງໆລະວ່າງສະຫະຣັດ ກັບ ຣັດເຊຍ ເພື່ອລົດຜ່ອນຄັງອາວຸດນີວເຄລຍຂອງພວກຕົນລົງ ແລະປະຕິບັດງານຮ່ວມກັນ ເພື່ອໃຫ້ໄດ້ວັດຖຸນີວເຄລຍຕ່າງໆມາເກັບຮັກສາໄວ້ນັ້ນ ແມ່ນເປັນບາດກ້າວທີ່ສຳຄັນໄປສູ່ການບັນລຸເປົ້າໝາຍທີ່ສຳຄັນເປັນຕາຍເຫລົ່ານັ້ນ.
ປະທານາທິບໍດີໂອບາມາກ່າວວ່າ ໃນຂະນະທີ່ສະຫະຣັດ ແລະຣັດເຊຍ ພາກັນຮັກສາຄວາມໝັ້ນໝາຍທາງດ້ານນີວເຄລຍຂອງພວກຕົນໄວ້ນັ້ນ ກໍມີຄວາມສຳຄັນເຊ່ນກັນ ທີ່ປະເທດອື່ນໆຈະຕ້ອງມີຄວາມຮັບຜິດຊອບ ໃນການປະຕິບັດຕາມພັນທະຕ່າງໆຂອງພວກຕົນນຳ ຊຶ່ງທ່ານໂອບາມາ ກ່າວຕໍ່ໄປວ່າ
"ຍ້ອນເຫດຜົນດັ່ງນີ້ ພວກເຮົາຈຶ່ງຄວນຈະຮ່ວມສາມັກຄີກັນຄັດຄ້ານຕໍ່ ຄວາມພະຍາຍາມຂອງເກົາຫລີເໜືອທ່ີຈະກາຍເປັນອຳນາດນີວເຄລັຍແຫ່ງນຶ່ງ ແລະຄັດຄ້ານຕໍ່ຄວາມພະຍາຍາມຂອງອິຣ່ານທ່ີຢາກມີອາວຸດ ນີວເຄລັຍນັ້ນ"
ປະທານາທິບໍດີໂອບາມາ ໄດ້ເນັ້ນຍ້ຳອີກວ່າໝົດທຸກປະເທດ ມີຄວາມຮັບຜິດຊອບຮ່ວມກັນ ທີ່ຈະຕ້ອງປ້ອງກັນບໍ່ໃຫ້ພວກອາວຸດທີ່ອັນຕະລາຍ ທີ່ສຸດເຫລົ່ານີ້ຂອງໂລກ ແຜ່ຜາຍອອກໄປຕົກຢູ່ໃນກຳມືຂອງພວກຜູ້ນຳອັນຕະພານ ທີ່ຂາດຄວາມຮັບຜິດຊອບ. ທ່ານກ່າວຕໍ່ໄປວ່າຖ້າຫາກວ່າພວກເຮົາບໍ່ສາມາດທີ່ປຸ້ມລຸມເປັນນ້ຳນື່ງໃຈດຽວກັນໄດ້ແລ້ວ ກົດໝາຍ ສາກົນກໍຈະກາຍເປັນກົດໝາຍປ່າ ຫລືກົດໝາຍເຖື່ອນ ຂາດຄວາມສັກສິດໄປ ຊື່ງນັ້ນຈະບໍ່ເປັນປະໂຍດແກ່ຜູ້ໃດທັງສີ້