ລິ້ງ ສຳຫລັບເຂົ້າຫາ

ທ່ານນາງຄລິນຕັນສືບຕໍ່ທຳການເຄື່ອນໄຫວຢ້ຽມຢາມອິນເດັຍທີ່ກຸງນີວແດນລີ


ຂ່າວ​ການ​ຢ້ຽມຢາມ​ອິນ​ເດັຍຂອງທ່ານ​ນາງຄລິນ​ຕັນ: ຣັຖມຸນຕີ​ການ​ຕ່າງປະ​ເທດ​ສະຫະຣັດທ່ານ​ນາງ​ຮິນ​ລາຣີ ຄລິນ​ຕັນ ສືບ​ຕໍ່​ ທຳ​ການເຄື່ອນ​ໄຫວຢ້ຽມຢາມ​ອິນ​ເດັຍ​ທີ່ກຸງ​ນີວ​ແດນ​ລີ ​ໃນ​ວັນ​ອາທິດ​ມື້​ນີ້ ບ່ອນ​ທ່ີ​ທ່ານ​ນາງ​ຈະ​ທຳ​ການ​ໂອ້​ລົມສົນທະນາ​ກັບ​ນາຍົກຣັຖມຸນຕີ ມັນ​ໂມຫັນ​ ສິງ ກ່ຽວ​ກັບບັນຫາ​ເຣື່ອງ ທ່ີຮວມທັງ​ນະ​ໂຍບາຍ​ຕ່າງປະ​ເທດ ການ​ປ່ຽນ​ແປງ​ຂອງ​ດິນ​ຟ້າ​ອາກາດ ແລະ​ພລັງ​ງານ​. ​ໃນ​ຂະນະ​ທ່ີ​ພັກ​ຢູ່​ໃນ​ກຸງ​ນີວ​ແດນ​ລີນັ້ນ ທ່ານ​ນາງຄລິນ​ຕັນ​ກໍ​ຈະປະກອບສ່ວນ​ໃນ​ພິທີ​ອັນ​ນຶ່ງ​ ທ່ີເນ້ນເຖິງ​ຄວາມ​ພະຍາຍາມ​ໃນ​ການນຳ​ໃຊ້ພລັງ​ ງານ​ທ່ີ​ສະອາດ​. ​ເຣື່ອງການ​ປ່ຽນ​ແປງ​ຂອງ​ດິນ​ຟ້າ​ອາກາດ​ເປັນ​ນຶ່ງ​ໃນ​ບັນຫາ​ໂຕ້​ແຍ່ງ​ກັນ ໃນ​ສາຍ​ພົວພັນ​ລະຫວ່າງ​ສອງ​ປະ​ເທດ ​ເນື່ອງ​ຈາກ​ຣັຖບານ​ນີວ​ແດນ​ລີ ຂັດ​ຂືນຕໍ່​ການ​ຊຸກຍູ້​ຂອງຣັຖບານ​ທ່ານ​ໂອ​ບາ​ມາ​ ເພື່ອ​ໃຫ້​ມີສົນທິສັນຍາ​ຂອງ​ໂລກ​ ທ່ີ​ຈະ​ມີ​ການ​ບັງຄັບ​ໃຫ້ຫລຸດຜ່ອນການ​ປ່ອຍຄວັນ​ພິດອອກສູ່​ບັນຍາກາດ​ລົງ​ນັ້ນ. ນັກ​ການ​ທູດ​ຂັ້ນສູງ​ສຸດ​ຂອງ​ສະຫະຣັດເດີນທາງ​ໄປ​ຮອດ​ກຸງ​ນີວ​ແດນ​ລີ​ຈາກ​ເມືອງ​ມອມ​ໄບ ບ່ອນ​ທ່ີ​ທ່ານ​ນາງ​ໄດ້​ຮຽກ ຮ້ອງ​ໃຫ້​ໂລກ​ທຳ​ການ​ຕໍ່ສູ້​ກັບ​ພວກ​ກໍ່​ການ​ຮ້າຍ ຫລັງ​ຈາກ​ໄປ​ຮ່ວມ​ໃນ​ພິທີ​ໄວ້ອາ​ໄລໃຫ້​ແກ່ພວກ​ທ່ີ​ໄດ້​ຮັບ​ເຄາະ​ຮ້າຍ​ 166 ຄົນ ຈາກ​ການ​ໂຈມ​ຕີ​ຂອງ​ພວກ​ກໍ່​ການ​ຮ້າຍ​ໃນ​ນະ​ຄອຍ​ມອມ​ໄບ ເມື່ອເດືອນ​ພະຈິກ​ປີ 2008 ນັ້ນ. ນອກ​ນັ້ນ​ທ່ານ​ນາງ ຄລິນ​ຕັນ ​ກໍ​ໄດ້ທຳ​ການ​ພົບ​ປະ​ກັບ​ບັນ​ດາ​ນັກທຸ​ລະ​ກິດ ການ​ສຶກສາ​ແລະ​ກຸ່ມ​ແມ່ຍິງ​ເຊັ່ນ​ກັນ.
ສະຫະຣັດ​ພິຈາຣະນາ​ຈະ​ຈັດຕັ້ງໜ່ວຍສອບ​ສວນ​ພິ​ເສດ: ເຈົ້າ​ໜ້າ​ທ່ີ​ສະຫະຣັດຫລາຍ​ຄົນກ່າວ​ວ່າ ຣັຖບານ​ປະທານາທິບໍດີໂອ​ບາ​ມາ​ ກຳລັງ​ພິຈາຣະນາ​ຈະ​ຈັດຕັ້ງ​ໜ່ວຍ​ສອບ​ສວນ​ພິ​ເສດ​ຂື້ນ​ ທີ່​ຈະ​ປະກອບດ້ວຍ​ນັກ​ສອບ​ປາກຄຳ​ມືອາຊີບ​ ​ເພື່ອ​ຮັບ​ມື​ກັບ​ພວກຕ້ອງ​ສົງ​ໄສ​ວ່າ ເປັນ​ຜູ້ກໍ່​ການ​ຮ້າຍ​ທ່ີ​ມີ​ຄ່າ​ສູງ. ເຈົ້າ​ໜ້າ​ທ່ີ​ເຫລົ່າ​ນີ້​ກ່າວ​ຕໍ່​ໜັງສືພິມທ່ີ​ສຳຄັນ 2 ສະບັບ ​ຄື​ໜັງສືພິມ Wall Street Journal ​ແລະ Washington Post ​ກ່ຽວ​ກັບ​ການຈັດ​ຕັ້ງໜ່ວຍດັ່ງກ່າວ​ໂດຍ​ຂໍ​ສງວນຊື່ໄວ້​ວ່າ ໜ່ວຍ​ງານ​ພິ​ເສດ​ຂອງຣັຖບານ ​ກ່ຽວ​ກັບ​ວິທີ​ການ​ສອບ​ສວນທີ່​ເວົ້ານີ້ ຍັງ​ບໍ່​ທັນ​ໄດ້ໄປ​ລາຍ​ງານ​ໂຕ​ຕໍ່ປະທານາທິບໍດີ​ເທື່ອ ​ແລະວ່າ​ຈຸດປະສົງ​ຕົ້ນຕໍ​ຂອງ​ໜ່ວຍ​ງານ​ພິເສດ​ນີ້​ແມ່ນ​ ເພື່ອ​ຊອກ​ເກັບ​ກຳເອົາຂ່າວ​ລັບ​ ບໍ່​ແມ່ນສ້າງ​ຄະດີ​ອາຍາຂື້ນມາ​ເພື່ອດຳ​ເນີນ​ຄະດີ​ ​ແລະ​ໜ່ວຍ​ງານນີ້​ຍັງ​ຈະ​ມີໜ້າ​ທີ່​ຄິດ​ຄົ້ນ​ຫາ​ວິທີ​ການ​ສອບ​ສວນແບບໃໝ່ຂື້ນ​ມານຳ​ອີກ. ພວກເຈົ້າ​ໜ້າ​ທີ່​ເຫລົ່າ​ນີ້​ເວົ້າ​ຕື່ມ​ວ່າ ໜ່ວຍ​ງານ​ພິ​ເສດ​ນີ້​ຍັງ​ບໍ່​ທັນ​ໄດ້ຕັດ ສິນ​ໃຈ​ເທື່ອ​ວ່າ​ ຈະ​ໃຫ້​ອົງການ​ໃດ​ເປັນ​ຜູ້​ກຳກັບ​ນຳ​ໜ່ວຍ​ງານ​ນີ້ ​ແຕ່​ຈະ​ບໍ່​ແມ່ນ​ອົງການ​ສືບ​ລັບ CIA ຊຶ່ງ​ເປັນ​ອົງການ​ທ່ີ​ດຳ​ເນີນ​ການ​ສືບສວນ​ຕ່າງ​ໆ ພາຍ​ໃຕ້ຣັຖບານ​ອະດີດ​ປະທານາທິບໍດີ​ບຸ​ຊນັ້ນ.

ທີ່ມຽນມ້າ : ພວກ​ເຫັນ​ເຫດການຫລາຍ​ຄົນ​ກ່າວ​ວ່າ ​ເຈົ້າໜ້າ​ທີ່​ມຽນມ້າ​ໄດ້​ກັກ​ໂຕ ສະມາ​ຊິກ​ຂອງ​ພັກ​ຝ່າຍ​ຄ້ານ​ໄວ້ ຢ່າງ​ນ້ອຍ 15 ຄົນ ຂນະ​ທີ່​ເຂົາ​ເຈົ້າກຳລັງ​ກັບ​ຄືນ​ມາ ຈາກ​ພິທີລະນຶກ​ເຖິງ​ວັນ​ເສຍ​ຊີວິດ​ຂອງ​ບິດາ​ຂອງ ຜູ້ນຳ​ຝ່າຍ​ຄ້ານ ທ່ານ​ນາງ​ອອງຊານ​ຊູ​ຈີ. ​ເຖິງ​ແມ່ນ​ມີ​ການ​ຮັກສາ​ຄວາມ​ປອດໄພ​ຢ່າງ​ເຄ່ງ​ຄັດ​ກໍ​ຕາມ ພວກ​ເຄື່ອນ​ໄຫວ​ທີ່​ນິຍົມປະຊາທິປະ​ໄຕ ຫລາຍ​ສິບ​ຄົນ ພາກັນ​ຍ່າງ​ໄປຍັງ​ສຸສານ​ຂອງ​ຜູ້ສລະ​ຊີບເພື່ອຊາດ ​ໃນ​ເຊົ້າວັນ​ອາທິດ​ມື້​ນີ້ ​ເພື່ອ​ລະນຶກ​ເຖິງ​ວັນ​ທີ່​ທ່ານ ອອງຊານ ກັບ​ວິຣະບຸຣຸດຕໍ່ສູ້​ເພື່ອ​ເອກກະຣາດຂອງ​ມຽນມ້າ​ອີກ 10 ຄົນ​ຖືກ​ລອບ​ສັງຫານ​ ເມື່ອ​ວັນທີ 19 ​ເດືອນ​ກໍລະກົດ ປີ 1947.
ພວກ​ຜູ້ນຳ​ທະຫານ​ມຽນມ້າ ​ເຄີຍ​ໄດ້​ຈັດ​ພິທີ​ຂື້ນ​ໃນ​ທົ່ວ​ປະ​ເທດ​ເພື່ອ​ເປັນ​ຂີດ​ໝາຍ ວັນ​ຂອງ​ຜູ້​ສລະ​ຊີບ​ເພື່ອ​ຊາດ​ ​ແຕ່ໃນ​ວັນ​ທີ 19 ກໍລະກົດ​ມື້​ນີ້ ​ພິທີ​ທາງ​ການ ​ແມ່ນ​ມີ​ແຕ່​ການວາງ​ພວງ​ພາ​ມາລາ ທີ່​ສຸສານ​ໃນ​ນະຄອນ ຢ່າງ​ກຸ້ງ​ເທົ່າ​ນັ້ນ.

ຂ່າວ​ຄື​ບໜ້າ​ກ່ຽວ​ກັບ​ການວາງ​ລະ​ເບີດ​ທີ່ອິນ​ໂດ​ເນ​ເຊັຍ: ຕຳຫລວດ​ອິນ​ໂດ​ເນ​ເຊັຍ​ກ່າວ​ວ່າ ການວາງ​ເບີດ​ໂຈມ​ຕີ​ ທ່ີ​ໂຮງ​ແຮມ2 ​ແຫ່ງ​ໃນ​ກຸງ Jakarta ​ໃນ​ວັນ​ສຸກ​ຜ່ານ​ມາ​ນີ້​ ແມ່ນ​ນ້ຳມື​ຂອງ​ກຸ່ມ Je-maah Islamiya ກຸ່ມ​ກໍ່​ການ​ຮ້າຍ​ໃນ​ຂົງ​ເຂດ​ ທ່ີ​ມີ​ສາຍ​ພົວພັນ​ກັບກຸ່ມ al-Qaida ນັ້ນ. ​ໂຄສົກ​ຕຳຫລວດ​ແຫ່ງ​ຊາດ​ອິນ​ໂດ​ເນ​ເຊັຍ ທ່ານ Nan Soekarna ກ່າວ​ຕໍ່​ບັນດາ​ນັກ​ຂ່າວ​ໃນ​ວັນ​ອາທິດ​ມື້​ນີ້ວ່າ ລະ​ເບີດ​ລູກນຶ່ງ​ທ່ີ​ຍັງ​ບໍ່​ທັນ​ ແຕກ ​ທ່ີ​ປະ​ໄວ້​ໃນ​ຫ້ອງ​ນອນ​ແຂກໃນ​ໂຮງ​ແຮມ Marriott ຊຶ່ງ​ຖືກ​ໂຈມ​ຕີ​ພ້ອມ​ກັນ​ກັບ​ໂຮງ​ແຮມ Ritz-Carlton ທ່ີຢູ່​ໃກ້ໆ​ກັນ​ນັ້ນ ມີ​ລັກສະນະ​ຄ້າຍຄື​ກັນ​ກັບ​ພວກ​ວັດຖຸລະ​ເບີດ​ ທ່ີ​ໃຊ້​ໃນ​ການ​ໂຈມ​ຕີ​ເທິງ​ເກາະ​ບາ​ຫລີ ​ແລະ​ລະ​ເບີດ​ທ່ີ​ພົບ​ເຫັນໃນ​ການ​ບຸກ​ເຂົ້າ​ກວດ​ຄົ້ນໂຮງ​ຮຽນ​ກິນນອນອີສ ລາມ​ແຫ່ງ​ນຶ່ງ ຫວ່າງບໍ່​ນານ​ມາ​ນີ້​.
ນາງ Sidney Jones ນັກວິ​ເຄາະ​ກັບ​ກຸ່ມ Inetrnational Crisis ກ່າວ​ວ່າ ນາຍ Noordin Top ຄົນ​ມາ​ເລ​ເຊັຍ​ທ່ີ​ເປັນ​ຜູ້ນຳ​ພາ​ຂອງ​ກຸ່ມ ຫົວ​ຮຸນ​ແຮງ​ຈັດ Jemaah Islamiyah ນັ້ນ​ ມີ​ທາງວ່າ​ເປັນ​ຜູ້​ວາງ​ແຜນ​ໃນ​ການ​ໂຈມ​ຕີ​ຄັ້ງນີ້. ນາງ​ກ່າວ​ຕື່ມ​ວ່າ ກ່ອນ​ການວາງ​ລະ​ເບີດ​ໂຈມຕີ ຕຳຫລວດ​ໄດ້​ຮັບ​ຂ່າວ​ລັບ​ ທ່ີ​ສໍ່ສະ​ແດງວ່າ ນາຍ Noordin Top ກຳລັງ​ວາງ​ແຜນການ​ແນວ​ໃດ​ແນວ​ນຶ່ງ​ຢູ່.
ອາຊຽນ: ບັນດາລັຖມຸນຕຣີຕ່າງປະເທດຂອງສະມາຄົມອາຊຽນ ກຳລັງເຕົ້າໂຮມ ກັນ ທີ່ເກາະພູເກັດຂອງໄທໃນວັນອາທິດມື້ນີ້ ເພື່ອ​ເຂົ້າຮ່ວມໃນ​ການສົນ ທະນາຫາລືທີ່ໃຫຍ່ທີ່ສຸດ ກ່ຽວກັບເລຶ່ອງຄວາມໝັ້ນຄົງຂອງຂົງເຂດເອ ເຊຍ ຄືກອງປະຊຸມຂອງ​ສະພາປະຈຳຂົງເຂດຂອງອາຊຽນ ຫລື ARF ທີ່​ປະກອບ​ດ້ວຍ 27 ປະ​ເທດສະມາຊິກ ຊື່​ງນອກຈາກ​ສມາ​ຄົມ​ອາ​ຊ່ຽນ ​ແລ້ວ ກໍ​ມີ​ໂຮມ​ທັງຫລາຍປະເທດຈາກຂົງເຂດເອເຊຍ ຕລອດ​ທັງ ສະຫະພາບຢຸໂຣບ ຣັສເຊຍ ແລະສະຫະລັຖອາເມລິກາ. ຄາດ​ວ່າ​ກອງ ປະຊຸມ​ຄັ້ງນີ້ ຈະທຳການປຶກສາຫາລືກັນ ເລຶ່ອງຄວາມໝັ້ນຄົງ ບັນຫາ ການປ່ຽນແປງຂອງດິນຟ້າອາກາດ ບັນຫາ ການລະ​ເມີ​ດສິດທິມະນຸດ ໃນມຽນມາ ບັນຫານີວເຄລຍຂອງເກົາຫລີ ແລະ ເລຶ່ອງອື່ນໆອີກ ຊຶ່ງ ກອງປະຊຸມດັ່ງກ່າວນີ້ຈະດຳເນີນໄປ ຈົນຮອດວັນພະຫັດ. ເມື່ອວັນເສົາວານນີ້ ບັນດາລັຖມຸນຕຣີຕ່າງປະເທດຂອງສະມາຄົມອາ ຊຽນ ໄດ້ທຳການປະນາມຢ່າງແຂງຂັນ ຕໍ່ເຫດການວາງລະເບີດ ເມື່ອ ວັນສຸກຜ່ານນີ້ທີ່ກຸງຢາກາຕ້າ. ໃນຖະແລງການຮ່ວມສະບັບນຶ່ງ ບັນດາ ລັຖມຸນຕຣີຕ່າງປະເທດ ໄດ້ປະນາມການກະທຳທີ່​ເຮັດໃຫ້ຜູ້ຄົນທີ່ບໍ່ມີ ຄວາມຜິດໃດໆໄດ້ຮັບບາດເຈັບແລະເສຍຊີວິດ ​ແລະ​ພ້ອມ​ດຽວ​ກັນ ກໍ​ໄດ້ສະ​ແດງຄວາມສະນັບສະນຸນ ຕໍ່ຄວາມພະຍາຍາມຂອງລັຖບານອິນ ໂດນີເຊຍ ທີ່​ຈະນຳ​ເອົາຕົວຜູ້ກໍ່ເຫດ ມາດຳເນີນຄະດີ​ໃຫ້​ໄດ້​ນັ້ນ

XS
SM
MD
LG