ສະພາແຫ່ງຊາດລາວ ໄດ້ອັດກອງປະຊຸມສະໄໝ ສາມັນຄັ້ງທີ່ 7 ລົງດ້ວຍການລົງປະຊາມະຕິຮັບຮອງເອົາລາຍງານຂອງພະ ແນກການຕ່າງໆ ລວມໄປເຖິງການຮັບຮອງເອົາກົດໝາຍ ດັດ ແກ້ໃໝ່ວ່າດ້ວຍການລົງທຶນ ເພື່ອເປີດໂອກາດໃຫ້ຕ່າງຊາດມີ ສິດໃນການເຊົ່າ ແລະ ຊື້ຂາຍອາຄານຢູ່ໃນປະເທດລາວອີກດ້ວຍ.
ທ່ານ ທອງເຕິນ ໄຊຍະເສນ ໂຄສົກສະພາແຫ່ງຊາດລາວ ໄດ້ ຖະແຫລງເນື່ອງໃນໂອກາດປິດ ກອງປະຊຸມສະໄໝສາມັນຄັ້ງທີ່ 7 ຂອງສະພາແຫ່ງຊາດ ລາວຊຸດທີ່ 6 ຊຶ່ງໄດ້ດໍາເນີນກອງປະຊຸມ ນັບຕັ້ງແຕ່ ວັນທີ 22 ມິຖຸນາເປັນຕົ້ນມາ ແລະ ກໍໄດ້ສິ້ນສຸດລົງຢ່າງເປັນທາງການໃນຕອນບ່າຍຂອງ ວັນທີ 9 ກໍລະກົດ ທີ່ຜ່ານມານີ້ວ່າ ຜົນທີ່ໄດ້ຮັບຈາກກອງປະຊຸມສະພາແຫ່ງຊາດລາວ ໃນຄັ້ງຫລ້າສຸດນີ້ ກໍມີທັງການລົງມະ ຕິຮັບຮອງເອົາລາຍງານການປະຕິບັດແຜນການພັດທະນາປະຈຳປີ 2008 ຫາ 2009 ການດັດແກ້ເປົ້າໝາຍທີ່ວາງເອົາໄວ້ໃນແຜນການດັ່ງກ່າວ ແລະ ການຮັບຮອງເອົາ ຄາດໝາຍຂອງແຜນການພັດທະນາປະຈຳປີ 2009 ຫາ ປີ 2010 ຂອງ ລັດຖະບານລາວ.
ສາລະສຳຄັນນັ້ນກໍຄື ການປັບລົດເປົ້າໝາຍການຂະຫຍາຍຕົວທາງເສດຖະກິດໃນແຜນ ການປະຈຳປີ 2008 ຫາ 2009 ນີ້ ລົງຈາກເດີມ 8% ມາເປັນ 7.5% ແລະ ກໍໃຫ້ຄົງ ລະດັບການຂະ ຫຍາຍຕົວໃນດັ່ງກ່າວນີ້ຕໍ່ໄປ ໃນຕະຫລອດແຜນການປະຈຳປີ 2009 ຫາ 2010 ອີກດ້ວຍ.
ສຳລັບໃນດ້ານງົບປະມານລາຍຮັບລາຍຈ່າຍ ປະຈຳປີ 2008 ຫາ 2009 ນັ້ນ ກໍໄດ້ມີ ການເພີ້ມລະດັບຂອງການຂາດດຸນທາງດ້ານ ງົບປະມານຈາກ 4.56% ເປັນ 5% ຂອງ GDP ທັງໝົດ ເພາະວ່າບໍ່ສາມາດຈັດເກັບ ລາຍຮັບໄດ້ຕາມເປົ້າໝາຍທີ່ວາງເອົາໄວ້. ຫາກແຕ່ວ່າ ໃນໄລຍະແຜນການປະຈຳປີ 2009 ຫາ 2010 ນັ້ນ ທາງການ ລັດຖະ ບານລາວ ກໍໄດ້ວາງເປົ້າໝາຍທີ່ຈະ ຈັດເກັບລາຍຮັບໃຫ້ໄດ້ໃນສັດສ່ວນ 17% ຂອງຍອດຜະຫລິດຕະພັນລວມພາຍໃນປະເທດ ຫລື ມູນຄ່າ GDP ທັງໝົດ ໂດຍເປັນລາຍຮັບພາຍໃນປະເທດບໍ່ໜ້ອຍກວ່າ 15% ຂອງ GDP, ສ່ວນທີ່ເຫລືອນັ້ນ ເປັນການກູ້ຢືມ ຫລື ຂໍຄວາມຊ່ວຍເຫລືອຈາກຕ່າງປະເທດ.
ແຕ່ຢ່າງໃດກໍຕາມ ເນື່ອງຈາກວ່າລັດຖະບານລາວ ໄດ້ຕັ້ງງົບປະມານລາຍຈ່າຍໄວ້ໃນມູນ ຄ່າລວມຫລາຍກວ່າ 11.000ຕື້ກີບ ຫລື ທຽບເທົ່າກັບ 20.34% ຂອງ GDP, ໃນຂະ ນະດຽວກັນ ກໍໄດ້ວາງເປົ້າໝາຍທີ່ຈະສາມາດຈັດເກັບລາຍຮັບພາຍໃນໄດ້ພຽງແຕ່ 8.115,76 ຕື້ກີບ ເທົ່ານັ້ນ. ດ້ວຍເຫດນີ້ ຈຶ່ງເຮັດໃຫ້ທາງການລາວ ຕ້ອງເພິ່ງພາການກູ້ຢືມ ແລະ ການຊ່ອຍເຫລືອຈາກຕ່າງ ປະເທດ ຄຶດເປັນມູນຄ່າລວມກັນຫລາຍກວ່າ 2.889 ຕື້ກີບ ນັ້ນເອງ.
ສຳລັບກົດໝາຍທີ່ຜ່ານການຮັບຮອງຈາກກອງປະຊຸມສະພາແຫ່ງຊາດລາວໃນຄັ້ງຫລ້າສຸດ ຈຳນວນ ສີ່ສະບັບ ຊຶ່ງປະກອບດ້ວຍກົດໝາຍວ່າດ້ວຍການປະມົງ ກົດໝາຍວ່າດ້ວຍການນ້ຳປະປາ, ກົດໝາຍ ວ່າດ້ວຍແນວລາວສ້າງຊາດ, ແລະ ກົດໝາຍວ່າດ້ວຍການລົງທຶນ ນັ້ນ ກໍໄດ້ມີຢູ່ສອງສະບັບ ທີ່ທາງການລາວໄດ້ຕັ້ງຄວາມຫວັງໄວ້ວ່າ ຈະມີສ່ວນຢ່າງສຳຄັນຕໍ່ການພັດທະນາປະເທດລາວໃນໄລຍະໃໝ່ ຊຶ່ງກໍຄື ກົດໝາຍວ່າດ້ວຍແນວລາວສ້າງຊາດ ຊຶ່ງຈະເປັນການເປີດໂອກາດ ແລະ ດຶງດູດເອົາການປະກອບສ່ວນ ຈາກຄົນລາວໃນຕ່າງປະເທດ ເຂົ້າສູ່ການພັດທະນາປະເທດລາວໃຫ້ຫລາຍຂຶ້ນ.
ສ່ວນກົດໝາຍວ່າດ້ວຍການລົງທຶນນັ້ນ ກໍຈະໃຫ້ສິດແກ່ບັນດານັກລົງທຶນຊາວຕ່າງປະເທດໃນການເຊົ່າທີ່ດິນຢູ່ໃນລາວ ໃນໄລຍະເວລາເຖິງ 99ປີ ກັບທັງຍັງມີສິດທີ່ຈະຊື້ຂາຍອາ ຄານ ແລະ ສຳນັກງານໄດ້ອີກດ້ວຍ ຖ້າຫາກວ່າເປັນການລົງທຶນທີ່ມີມູນຄ່າຕັ້ງແຕ່ 2.5 ຕື້ກີບ ຫລື ປະມານ 287.400 ໂດລາ ສະຫະຣັດ ຂຶ້ນໄປ.
ຊົງຣິດ ໂພນເງິນ ລາຍງານຈາກບາງກອກ ໃນວັນທີ 18 ກໍລະກົດ 2009
