ລິ້ງ ສຳຫລັບເຂົ້າຫາ

ເຮືອບິນອີຣ່ານຕົກ ຜູ້ໂດຍສານແລະພະນັກງານທັງໝົດ 168 ຄົນ ເສັຽຊີວິດ


ອີຣ່ານ - ເຮືອບິນຕົກ: ສື່ມວນຊົນຂອງທາງ ການອີຣ່ານ ລາຍງານວ່າ ເຮືອບິນໂດຍສານລຳ ນຶ່ງ ໄດ້ປະສົບ ອຸບັດຕິເຫດຕົກ ໃນພາກຕາເວັນ ຕົກ ສຽງເໜືອຂອງອີຣ່ານ ເຮັດໃຫ້ຜູ້ໂດຍສານ ແລະພະນັກງານ ທັງໝົດ 168 ຄົນ ເສັຽຊີວິດ. ໂທຣະພາບ ຂອງທາງການ ອີຣ່ານ ລາຍງານ ໃນວັນພຸດ ມື້ນີ້ວ່າ ​ເຮືອບິນລຳ​ນັ້ນ ກຳລັງມຸ່ງໜ້າ ໄປຍັງ ນະຄອນຫຼວງ YEREVAN ຂອງ ARMENIA ເວລາປະສົບ ອຸບັດຕິເຫດຕົກ ໃກ້ໆເມືອງ QAZVIN ໃນພາກເໜືອ ຂອງອີຣ່ານ. ສື່ມວນຊົນ ລາຍງານວ່າ ເຮືອບິນ ປະສົບ ອຸບັດຕິເຫດ 16 ນາທີ ຫລັງຈາກບິນຂຶ້ນ ຈາກສນາມບິນ ນາໆຊາດ IMAM KHOMEINI ທີ່ນະຄອນຫລວງ ເຕຫະຣານ. ຮູບພາບວີດີໂອ ສະແດງໃຫ້ເຫັນ ຊາກຊີ້ນສ່ວນນ້ອຍໆ ທີ່ຍັງມີຄວັນກຸ້ມຢູ່ ຂອງ​ເຮືອບິນ​ລຳ​ນັ້ນ ຂອງ ສາຍການບິນ CASPIAN AIRLINES ຢາຍຊະຊາຍ ຢູ່ເຕັມທົ່ງແຫ່ງນຶ່ງ. ເຈົ້າໜ້າທີ່ ກ່າວວ່າ ເຮືອບິນລຳນີ້ ມີຜູ້ໂດຍສານ 153 ຄົນ ແລະພະນັກງານອີກ 15 ຄົນ. ສາຍການບິນ CASPIAN AIRLINES ແມ່ນວິສາຫະກິດຮ່ວມ ຣັດເຊັຽ ອີຣ່ານ ທີ່ຕັ້ງຂຶ້ນ ໃນຕົ້ນຊຸມປີ 1990. ເຮືອບິນ ໄດ້ປະສົບ ອຸບັດຕິເຫດ ຕົກເລື້ອຍໆ ຢູ່ໃນອີຣ່ານ ຍ້ອນການ​ບຳລຸງ ສ້ອມແປງ ເຮືອບິນ ທີ່ມີອາຍຸເກົ່າແກ່ ແລ້ວນັ້ນ ບໍ່ໄດ້ມາຕຖານ.

ງາຊ້າງ - ອາຟຣິກາ: ເຈົ້າໜ້າທີ່ ເຄນຢາ ກ່າວວ່າ ຕົນໄດ້ຢຶດງາຊ້າງ ຜິດກົດໝາຍໜັກ 300 ກິໂລ ຢູ່ໃນລັງ​ໄມ້​ທີ່ມີຮູບ ລັກສນະ​ຄື​ກັນ​ ກັບ​ຫີບ​ສົບ ເທິງເຮືອບິນ ທີ່ເດີນທາງຈາກ ໂມ ຊຳບິກ ໄປຍັງປະເທດໄທ ແລະສປປ ລາວ ​ເປັນປາຍທາງ ສຸດ​ທ້າຍ. ເຈົ້າໜ້າທີ່ ກ່າວວ່າ ຕົນໄດ້ພົບເຫັນ ງາຊ້າງ 16 ງາ ແລະນໍແຮດ 2 ນໍ ທີ່ມີມູນຄ່າ 1 ລ້ານໂດລາ ຢູ່ຂ້າງໃນຫີບໄມ້ ທີ່ສນາມບິນ JOMO KENYATTA ​ໃນນະຄອນຫລວງ ໄນໂຣບີ. ເຈົ້າໜ້າທີ່ ຈາກຜແນກສັດປ່າ ຂອງເຄນຢາ ກ່າວວ່າ ເລືອດທີ່ພົບເຫັນ ຕິດຢູ່ຕາມງາຊ້າງ ສະແດງໃຫ້ເຫັນວ່າ ຊ້າງເຫລົ່ານີ້ ໄດ້ຖືກຂ້າ ເມື່ອບໍ່ດົນຜ່ານມາ. ເຈົ້າໜ້າທີ່ກ່າວວ່າ ສັດເຫລົ່ານີ້ ອາດຈະຖືກຂ້າ ໃນບັນດາປະເທດ ໃນເຂດພາກໃຕ້ ຂອງທະວີບອາຟຣິກາ ບາງທີອາດຈະແມ່ນ ໃນແທນຊາເນັຽ ຫລື ອາຟຣິກາໃຕ້. ພວກນັກຊ່ຽວຊານ ດ້ານສັດປ່າ ເຊື່ອວ່າ ຄວາມຕ້ອງການ ງາຊ້າງທີ່ຜິດກົດໝາຍ ໃນເຂດເອເຊັຽ ໄດ້ຊຸກຍູ້ ໃຫ້ມີການ ລັກລອບລ່າສັດປ່າ. ເປັນທີ່ເຊື່ອກັນວ່າ ນໍແຮດ​ ເປັນຢາຊູກຳລັງ ຢູ່ໃນບາງເຂດ ຂອງເອເຊັຽ. ການຄ້າຂາຍ ງາຊ້າງ ລະຫວ່າງປະເທດ ໄດ້ຖືກຫ້າມ ໃນປີ 1989 ເພື່ອຊ່ອຍຮັກສາ ຈຳນວນຊ້າງ ແລະແຮດ ທີ່ໄດ້ຫລຸດລົງ ຢ່າງຫລວງຫລາຍ ຍ້ອນມີການລ່າ ຢ່າງແຜ່ກວ້າງນັ້ນ.

ຈີນ - ອາລຈີເຣັຽ: ສະຖານທູດຈີນທີ່ AL GERIA ເຕືອນປະຊາຊົນ ຂອງຕົນ ກ່ຽວກັບ ຄວາມເປັນໄປໄດ້ ໃນການໂຈມຕີ ຂອງກຸ່ມ ກໍ່ການຮ້າຍ AL-QAIDA ເພື່ອເປັນການ ຕອບໂຕ້ ຕໍ່ການທີ່ຈີນ ໄດ້ປາບປາມ ພວກ ມຸສລິມ ທີ່ເຂດຊິນຈຽງ. ສະຖານທູດຈີນ ໄດ້ອອກຄຳເຕືອນ ທາງເວັບໄຊທ໌ຂອງຕົນ ໃນຕອນແລງ ຂອງວັນອັງຄານ ວານນີ້ ​ແລະຮ້ອງຂໍ ໃຫ້ບໍຣິສັດ ທີ່ໄດ້ຮັບທຶນ ຈາກຈີນ ໃນ ALGERIA ເສີມຂຍາຍ ມາຕການປ້ອງກັນ ທາງດ້ານ ຄວາມປອດພັຍ. ການເຕືອນທີ່ວ່ານີ້ ມີຂຶ້ນ ຫລັງຈາກບໍຣິສັດ ຮັກສາ ຄວາມປອດພັຍ STERLING ASSYNT ຂອງອັງກິດ ກ່າວວ່າ ກຸ່ມເຄືອຂ່າຍ ຂອງ AL-QAIDA ໃນອາຟຣິກາເໜືອ ໄດ້ປະກາດ ທີ່ຈະແກ້ແຄ້ນ ໃຫ້ຊາວມຸສລິມວີເກີ້ ໃນເຂດຊິນຈຽງ ໂດຍຈະແນ ເປົ້າໝາຍ​ໃສ່ ພວກຄົນງານຈີນ ໃນ ALGERIA. ການປະທະກັນ ໃນຕົ້ນເດືອນນີ້ ລະຫວ່າງ ຊາວມຸສລິມ ເຜົ່າວີກີ ແລະຊາວຮັນ ຊຶ່ງເປັນຊົນກຸ່ມໃຫຍ່ ເຮັດໃຫ້ມີ ຜູ້ເສັຽຊີວິດ ຢ່າງນ້ອຍ 184 ຄົນ. ປັກກິ່ງເວົ້າວ່າ ພວກທີ່ເສັຽຊີວິດ ສ່ວນໃຫຍ່ ແມ່ນເປັນຊາວຮັນ ຊຶ່ງເປັນການ ກ່າວອ້າງ ທີ່ຊາວວີເກີ້ ເວົ້າວ່າບໍ່ ເປັນຄວາມຈິງ.

ຄລິນຕັນ - ເອເຊັຽ: ຣັຖມຸນຕຣີການຕ່າງປະ ເທດ ສະຫະຣັດ ທ່ານນາງ HILLARY CLIN TON ຈະກ່າວຄຳປາສັຍ ກ່ຽວກັບ ນະໂຍບາຍ ການຕ່າງປະເທດ ທີ່ກຸງວໍຊິງຕັນ ໃນວັນພຸດມື້ນີ້ ນຶ່ງມື້ ກ່ອນອອກເດີນທາງ ໄປຢ້ຽມຢາມ ອິນເດັຽ ແລະປະເທດໄທ. ນີ້ແມ່ນ ເທື່ອທຳອິດ ທີ່ທ່ານ ນາງ CLINTON ຈະອອກເດີນທາງ ໄປຢ້ຽມ ຢາມຕ່າງປະເທດ ນັບແຕ່ທ່ານນາງ ໄດ້ປະສົບ ​ອຸບັດ​ຕິ​ເຫດ​ລົ້ມ ກະດູກຂໍ້ສອກແຕກ ໃນເດືອນມິຖຸນາ ຜ່ານມາ. ທ່ານ IAN KELLY ໂຄສົກ ກະຊວງການຕ່າງ ປະເທດ ສະຫະຣັດ ກ່າວວ່າ ທ່ານນາງ CLINTON ຈະອອກເດີນ ທາງ ໃນມື້ວັນສຸກ ໄປຍັງເມືອງມູມໄບ ປະເທດອິນເດັຽ ຊື່ງຢູ່​ທີ່​ນັ້ນ ນາງຈະໄວ້ອາລັຍ ໃຫ້ແກ່ພວກເຄາະຮ້າຍ ຈາກການໂຈມຕີ ຂອງຜູ້ກໍ່ການຮ້າຍ ໃນປີກາຍ. ໃນວັນອາທິດ ທ່ານນາງ ມີກຳນົດ ເດີນທາງໄປຍັງ ນະຄອນຫລວງ ນິວເດລີ ເພື່ອເຈຣະຈາຫາຣື ກັບພວກຜູ້ນຳ ອິນເດັຽ ເພື່ອຊອກຫາ ຊ່ອງທາງ ເສີມຂຍາຍ ຄວາມສັມພັນ ດ້ານຍຸທສາດ ລະຫວ່າງ ປະເທດທັງສອງ. ທ່ານນາງ CLINTON ມີກຳນົດ ເດີນທາງໄປເຖິງ ປະເທດໄທ ໃນວັນອັງຄານ ອາທິດໜ້າ ບ່ອນທີ່ທ່ານນາງຈ ະໄດ້ພົບປະ ກັບນາຍົກ ຣັຖມຸນຕຣີ ອະພິສິດ ເວດຊາຊີວະ ແລະເຈົ້າໜ້າທີ່ອື່ນໆ ທີ່ບາງກອກ.

ໄທ - ຄວາມວຸ້ນວາຍ: ຕຳຣວດໃນເຂດ ພາກໃຕ້ ທີ່ວຸ້ນວາຍຂອງໄທ ກ່າວວ່າ ພວກ​ທີ່ສົງສັຍວ່າເປັນພວກ ຫົວຮຸນແຮງຢາກແບ່ງ​ແຍກ ​ດິນ​ແດນ ໄດ້ຍິງສັງຫານ ຜູ້ຊາຍຊາວມຸສ ລິມ 2 ຄົນ. ເຈົ້າໜ້າທີ່ເວົ້າວ່າ ການໂຈມຕີທັງ ສອງບັ້ນ ໄດ້ມີຂຶ້ນ ເມື່ອຄືນແລ້ວນີ້ ທີ່ຈັງຫວັດ ປັດຕະນີ ຊຶ່ງເປັນນຶ່ງ ໃນ 3 ຈັງຫວັດ ທີ່ປະຊາ ຊົນສ່ວນໃຫຍ່ ນັບຖືສາສນາ ອິສລາມ ແລະມີຊາຍແດນ ຕິດກັບ ມາເລເຊັຽ. ຕຳຣວດເວົ້າວ່າ ຢ່າງນ້ອຍ ນຶ່ງໃນການໂຈມຕີ ແມ່ນເປັນການ ຂີ່ຣົດຜ່ານ ແລ້ວຍິງປືນກາດໃສ່. ພວກກະບົດ ຊາວມາເລ ໃນເຂດພາກໃຕ້ ຂອງໄທ ມັກຈະແນເປົ້າໝາຍ ໃນການໂຈມຕີ ໃສ່ຊາວມຸສລິມ ທີ່ເຮັດວຽກ ໃຫ້ຣັຖບານໄທ ແລະພວກທີ່ສົງສັຍວ່າ ເປັນສອດແນມ ໃຫ້ຕຳຣວດ. ມີຫລາຍກວ່າ 3 ພັນ 500 ຄົນ ໄດ້ຖືກຂ້າຕາຍ ທີ່ຈັງຫວັດ ນະຣາທິວາດ, ປັດຕະນີ ແລະຢະລາຂອງໄທ ນັບແຕ່ ການກໍ່ກະບົດ ແບ່ງແຍກດິນແດນ ເລີ້ມຂຶ້ນ ໃນເດືອນມັງກອນ ປີ 2004. ເຂດດັ່ງກ່າວ ເປັນເຂດ ປົກຄອງຕົນເອງ ຂອງສຸລຕ່ານ ຊາວມາເລ ທີ່ນັບຖື ສາສນາ ອິສລາມ ຈົນກະທັ່ງ ປະເທດ​ໄທ ທີ່ຜູ້ຄົນ ສ່ວນໃຫຍ່ ນັບຖືສາສນາພຸດ ໄດ້ປະກາດ ໂຮມເອົາ ດິນແດນນີ້ ເຂົ້າເປັນ ພາກສ່ວນນຶ່ງ ຂອງຕົນ ໃນປີ 1902 ຊຶ່ງໄດ້ກໍ່ໃຫ້ເກີດ ຄວາມເຄັ່ງຕຶງ ມາເປັນເວລາ ຫລາຍໆທົສວັດ.

ອິສຣາແອລ - ປາແລສໄຕນ໌: ອະດີດທະ ຫານອິສຣາແອລ ກຸ່ມນຶ່ງກ່າວວ່າ ກອງທັບ ໄດ້ໃຊ້ກຳລັງ ແບບບໍ່ມີການ ໄຕ່ຕອງ ຢ່າງ ຮອບຄອບ ໃນລະຫວ່າງ ການສູ້ຣົບ ຢູ່ໃນ ເຂດກາຊາ ໃນຕົ້ນປີນີ້ ຊຶ່ງຍັງຜົນໃຫ້ ມີການເສັຽຊີວິດ ແລະສ້າງ ຄວາມເສັຽຫາຍ ແບບບໍ່ຈຳເປັນ. ກຸ່ມຈັດຕັ້ງ ຂອງທະຫານ ກອງໜຸນ ແລະ ກຳລັງສູ້ຣົບ ຂອງອິສຣາແອລ ທີ່ເອີ້ນວ່າ ອົງການທັບມ້າງ ຄວາມງຽບ ໄດ້ນຳອອກ ເຜີຍແຜ່ ຄຳໃຫ້ການ ຈຳນວນນຶ່ງ ໃນວັນພຸດ ມື້ນີ້ ທີ່ກ່າວວ່າ ກຳລັງປ້ອງກັນໂຕ ຂອງອິສຣາແອລ ໄດ້ທຳລາຍ ບ້ານເຮືອນ ຢູ່ໃນເຂດກາຊາ ແບບບໍ່ມີເຫດຜົນ ແລະໃຊ້ ກຳລັງ ເກີນຄວາມຈຳເປັນ. ກອງທັບ ອິສຣາແອລ ໄດ້ປະຕິເສດ ຕໍ່ຄຳໃຫ້ການ ເຫລົ່ານີ້ ໂດຍເວົ້າວ່າ ກຸ່ມຈັດຕັ້ງ ດັ່ງກ່າວ ກຳລັງໃສ່ຮ້າຍ ປ້າຍສີ ແລະໝິ່ນປມາດ ຜູ້ບັງຄັບບັນຊາ ຂອງຕົນ. ກອງທັບ ອິສຣາແອລ ກ່າວວ່າ ກຸ່ມປົກປ້ອງ ສິດທິມະນຸດ ທີ່​ວ່ານີ້ ໄດ້ນຳສເນີ ລາຍງານ ສະບັບນຶ່ງ ອີງຕາມ ຄຳໃຫ້ການ ທີ່ບໍ່ເປີດເຜີຍຊື່ ໂດຍບໍ່ໄດ້ກວດກາ ວ່າມີຄວາມເຊື່ອຖືໄດ້ ຫລາຍປານໃດ.

ເຊີນຟັງຂ່າວລາຍລະອຽດ ໂດຍຄລິກບ່ອນສຽງ.

XS
SM
MD
LG