ການເມືອງໃນຍີ່ປຸ່ນ: ທ່ານຕາໂຣ ອາໂຊະ ນາຍົກຣັຖມຸນຕີຍີ່ປຸ່ນ ກ່າວວ່າ ທ່ານຈະປະກາດ ຍຸບສະພາແຫ່ງຊາດໃນສັບປະດາໜ້າ ແລະຮຽກການເລືອກຕັ້ງຂຶ້ນກ່ອນກຳນົດ ໃນວັນທີ 30 ສິງຫາ ເດືອນໜ້ານີ້. ຫລັງຈາກທ່ານອາໂຊະປະກາດການຕັດສິນໃຈດັ່ງກ່າວໃຫ້ຮູ້ໃນວັນຈັນມື້ນີ້ ພັກປະສົມຝ່າຍຄ້ານຂອງຍ່ີປຸ່ນກ່າວວ່າ ຕົນ ໄດ້ຍື່ນຍັດຕິບໍ່ໄວ້ວາງໃຈນາຍົກຣັຖມຸນຕີພ້ອມກັບຄນະຣັຖບານຂອງທ່ານ ຕໍ່ສະພາແຫ່ງຊາດ.
ການເຄື່ອນໄຫວດັ່ງກ່າວຂອງພັກປະຊາທິປັດຂອງຍ່ີປຸ່ນແລະ 3 ພັນທະມິດໃນພັກປະສົມຝ່າຍຄ້ານ ມີຂຶ້ນຫລັງຈາກພັກປະສົມຂອງຣັຖບານທ່ານອາໂຊະ ບໍ່ສາມາດຮັກສາຕຳແໜ່ງພັກສຽງສວ່ນຫລາຍ ໃນສະພາເທດສະ ບານກຸງໂຕກຽວໄວ້ໄດ້ ໃນການເລືອກຕັ້ງໃນວັນອາທິດວານນີ້. ນາຍົກຣັຖມຸນຕີອາໂຊະປະກາດການຕັດສິນໃຈຂອງທ່ານທີ່ຈະຈັດການເລືອກຕັ້ງຂຶ້ນກ່ອນກຳນົດນັ້ນໃຫ້ຮູ້ ຫລັງຈາກໄດ້ໂອ້ລົມສົນທະນາກັບບັນດາເຈົ້າໜ້າທ່ີພັກເສຣີປະຊາທິປັດຂອງຣັຖບານຂອງທ່ານ. ພັກເສຣີປະຊາທິປັດໄດ້ຊະນະບ່ອນນັ່ງພຽງແຕ່ 38 ບ່ອນໃນສະພາໂຕກຽວທ່ີມີສະມາຊິກທັງໝົດ 127 ບ່ອນ ໃນຂະນະທີ່ພັກປະຊາທິປັດ ຝ່າຍຄ້ານທ່ີນຳພາໂດຍທ່ານ Yukio Hatoyama ໄດ້ຊະນະບ່ອນນັ່ງ 54 ບ່ອນ ຊຶ່ງໄດ້ກາຍເປັນພັກໃຫຍ່ທ່ີສຸດໃນສະພາເທດສະບານໂຕກຽວນັ້ນ.
ກ່ຽວກັບສຸກຂະພາບຂອງຜູ້ນຳເກົາຫລີເໜືອ: ສະຖານີໂທລະພາບ Yonhap Television News ຊື່ງເປັນໂທຣະພາບຂ່າວທີ່ໃຫຍ່ສຸດຂອງເກົາຫລີໃຕ້ ລາຍງານຂ່າວວ່າ ທ່ານກິມຢອງອີລ ຜູ້ນຳເກົາຫລີເໜືອກຳລັງປ່ວຍເປັນໂຣກມະເຮັງໃນມ້າມ ແລະວ່າ ອາການປ່ວຍຂອງທ່ານເຖິງຂັ້ນຄຸກຄາມຕໍ່ຊີວິດແລ້ວ. ໂທລະພາບYTV ກ່າວວ່າ ຂ່າວຂອງຕົນແມ່ນອິງຕາມຂໍ້ມູນທ່ີໄດ້ຮັບມາຈາກບັນດາເຈົ້າໜ້າທ່ີສືບລັບເກົາຫລີໃຕ້ແລະຈີນ. ແຕ່ກະຊວງທ້ອນໂຮມເກົາຫລີຂອງຣັຖບານກຸງໂຊນກ່າວວ່າ ຕົນບໍ່ມີຂໍ້ມູນກ່ຽວກັບລາຍງານຂ່າວນີ້.
ທ່ານ Hah Tae-kyoung ປະທານສະຖານີວິທະຍຸພາກເອກະຊົນ Open Radio for North Korea ຊຶ່ງອາໄສຂ່າວຈາກແຫລ່ງຂ່າວລັບໃນເກົາຫລີເໜືອ ເພື່ອລາຍງານກ່ຽວກັບສະພາບການໃນເກົາຫລີເໜືອນັ້ນ ກ່າວວ່າ ທ່ານຍັງບໍ່ທັນແນ່ໃຈປານໃດກ່ຽວກັບລາຍງານຂ່າວ ທ່ີວ່ານີ້. ບັນດານາຍແພດກ່າວວ່າ ໂຣກມະເຮັງໃນມ້າມແມ່ນເປັນໂຣກທ່ີຮ້າຍແຮງເຖິງຕາຍເລື້ອຍໆ ແລະມັກກວດເຫັນເມື່ອມັນຢູ່ໃນຂັ້ນສຸດທ້າຍແລ້ວ.
ສຸກຂະພາບຂອງທ່ານກິມຢອງອີລ ໄດ້ກາຍມາເປັນຈຸດເພ່ງເລັງຂອງການວິພາກວິຈານກັນມາໃນປີແລ້ວນີ້ ຫລັງຈາກມີລາຍງານຂ່າວວ່າ ທ່ານໄດ້ເປັນລົມສາລະບາດ ຫລື stroke ຍ້ອນເສ້ນເລືອດຕັນໃນສະໝອງ.
ທີອິນໂດເນເຊັຍ: ທາງການອິນໂດເນເຊັຍກ່າວວ່າ ໄດ້ມີການພົບເຫັນສົບຂອງຕຳຫລວດຄົນນຶ່ງ ໃນວັນຈັນມື້ນີ້ ເຮັດໃຫ້ຈຳນວນຜູ້ເສັຍຊີວິດເພ່ີມຂຶ້ນເປັນ 3 ຄົນຈາກການໂຈມຕີ 2 ບັ້ນ ຢູ່ໃກ້ກັບບໍລິສັດຂຸດບໍ່ແຮ່ Freeport ຂອງອະເມຣິກາ. ເຈົ້າໜ້າທີ່ກ່າວວ່າ ຕຳຫລວດຄົນນີ້ເສັຍຊີວິດໃນການໂຈມຕີໃນວັນອາທິດວານນີ້ ຕໍ່ຂະບວນລົດບັນທຸກເຈົ້າໜ້າທ່ີຮັກສາຄວາມປອດໄພຂະບວນນຶ່ງ ຊື່ງຄົນຍາມຮັກສາຄວາມປອດໄພຂອງບໍລິສັດ Freeport ຄົນນື່ງ ກໍເສັຍຊີວິດ. ການພົບເຫັນສົບດັ່ງກ່າວມີຂຶ້ນ ຫລັງຈາກ ທ່ານ Drew Grant ນັກຊ່ຽວຊານດ້ານບໍ່ແຮ່ Australia ວັຍ 29 ປີ ຖືກຄົນຮ້າຍ ດັກຍິງຕາຍໃນວັນເສົາຜ່ານມາ.
ການໂຈມຕີ 2 ບັ້ນທີ່ວ່ານີ້ ໄດ້ເກີດຂຶ້ນຢູ່ໃກ້ໆກັບບໍ່ຄຳແລະທອງແດງ Grasberg ນຶ່ງໃນບັນດາເໝືອງແຮ່ທີ່ໃຫຍ່ທ່ີສຸດຂອງໂລກ. ບໍ່ແຮ່ດັ່ງກ່າວເປັນສາເຫດຂອງຄວາມຂັດແຍ້ງກັນກັບຊາວປາປົວ ໃນທ້ອງຖິ່ນ ທີ່ຍັງທຸກຈົນຢູ່ຕໍ່ມາ ໃນຂະນະທ່ີກຳໄລຈາກພວກແຮ່ທາດດັ່ງກ່າວ ຫລັ່ງໄຫລໄປເຂົ້າກະເປົາເງິນຂອງພວກນັກລົງທຶນຕ່າງປະເທດ.
ກ່ຽວກັບການດຳເນີນຄະດີອະດີດຜູ້ນຳ Liberia:ການດຳເນີນຄະດີອາຊະຍາກັມສົງຄາມຕໍ່ອະດີດປະທານາທິບໍດີ Charles Taylor ແຫ່ງ Liberia ໄດ້ເຣີ່ມຂື້ນຄືນໃນວັນຈັນມື້ນີ້ ທ່ີກຸງ Hague ປະເທດໂຮນແລນ. ພວກທະນາຍຄວາມຂອງທ່ານ Charles Taylor ກ່າວວ່າ ທ່ານ Taylor ຈະທຳການໂຕ້ແຍ້ງຕໍ່ສານອາຊະຍາກັມສົງຄາມ ທ່ີໄດ້ຮັບການໜຸນຫລັງຈາກສະຫະປະຊາຊາດນັ້ນວ່າ ແມ່ນທ່ານພະຍາຍາມ ທີ່ຈະ ເກັ້ຍກ່ອມໃຫ້ມີສັນຕິພາບ ບໍ່ແມ່ນກໍ່ຄວາມຮຸນແຮງຂຶ້ນໃນລະຫວ່າງສົງຄາມກາງເມືອງໃນປີ 1991 ຫາ 2002 ທ່ີປະເທດ Sierra Leone ນັ້ນ. ທະນາຍຄວາມຄົນນຶ່ງຂອງທ່ານ Taylor ກ່າວຕໍ່ສານໃນວັນຈັນມື້ນີ້ວ່າ ການດຳເນີນການຟ້ອງຮ້ອງນີ້ ບໍ່ມີຫລັກຖານພຽງພໍ. ຄາດວ່າ ອະດີດຜູ້ນຳປະເທດ Liberia ຈະກ່າວປ້ອງກັນໂຕຕໍ່ສານໃນວັນອັງຄານມື້ອື່ນ. ທ່ານກຳລັງປະເຊີນກັບຂໍ້ກ່າວຫາ 11 ກະທົງ ໃນຖານກໍ່ອາຊະຍາກັມ ສົງຄາມແລະອາຊະຍາກັມຕ້ານມະນຸດຊາດ.
ທີ່ Nigeria: ກຸ່ມຫົວຮຸນແຮງທີ່ມີຊື່ສຽງໂດ່ງດັງທ່ີສຸດໃນໄນຈີເຣັຍ ກ່າວວ່າ ພວກຕົນໄດ້ທຳການໂຈມຕີ ບ່ອນສູບນ້ຳມັນໃສ່ກຳປັ່ນບັນທຸກນ້ຳມັນແຫ່ງນຶ່ງໃນຣັດ Lagos. ຂະບວນການປົດປ່ອຍເຂດສາມຫລຽມແມ່ນ້ຳ Niger ຫລື MEND ໄດ້ອອກຖແລງການສະບັບນຶ່ງໃນວັນຈັນມື້ນີ້ ກ່າວວ່າ ພວກຕົນໄດ້ກໍ່ວິນາດສະກຳຕໍ່ບ່ອນສູບນ້ຳມັນໃສ່ກຳປັ່ນ Atlas Cove Jetty ທີ່ຣັດ Lagos. ຂະບວນການ MEND ກ່າວຕ່ື່ມວ່າ ບ່ອນເຕີມນ້ຳມັນແລະພວກກຳປັ່ນ ທີ່ທອດສະໝໍລໍຖ້າຮັບເອົານ້ຳມັນຢູ່ທ່ີນັ້ນ ໄດ້ເກີດໄຟໄໝ້ຂຶ້ນຫລັງຈາກການໂຈມຕີ ແຕ່ບໍ່ມີການຢືນຢັນຂ່າວນີ້ ຈາກບັນດາເຈົ້າໜ້າທ່ີໃນຣັດ Lagos ນັ້ນ.
ການໂຈມຕີດັ່ງກ່າວນີ້ ຈະເປັນຄັ້ງທຳອິດທ່ີພວກຫົວຮຸນແຮງກະທຳຂື້ນ ໃນນະຄອນຫລວງການຄ້າຂອງປະເທດ. ພວກຫົວຮຸນແຮງດັ່ງກ່າວໄດ້ທຳການໂຈມຕີແລະລັກຈັບຜູ້ຄົນໄປຫລາຍບັ້ນໃນຂົງເຂດ Niger Delta ນັບແຕ່ປີ 2005 ເປັນຕົ້ນມາ ສົ່ງຜົນໃຫ້ການຜລິດນ້ຳມັນໃນ Nigeria ລົດລົງຢ່າງຫລວງຫລາຍ.
