<!-- IMAGE -->
ທາງການທະຫານຂອງສະຫະລັຖໄດ້ເສັດສິ້ນການໂອນອຳນາດ ໃນການຄວບຄຸມຫົວເມືອງໃຫຍ່ແລະນ້ອຍທັງໝົດຂອງອີຣັກໃຫ້ແກ່ກຳລັງຮັກສາຄວາມປອດໄພຂອງອີຣັກແລ້ວ ຊື່ງການເຄຶ່ອນໄຫວດັ່ງກ່າວນີ້ເປັນພາກສ່ວນຂອງຂໍ້ຕົກລົງກັນລະວ່າງສະຫະລັຖແລະອີຣັກໃນປີ 2008. ການຮັບເອົາຄວາມຮັບຜິດຊອບໃນການຮັກສາຄວາມປອດໄພຕາມຫົວເມືອງຕ່າງໆຂອງອີຣັກ ມາເປັນພາລະຂອງຕົນແຕ່ຝ່າຍດຽວຂອງທາງການອິຣັກໃນຄັ້ງນີ້ແມ່ນເລີ່ມຂື້ນໃນວັນທີ່ 30 ເດືອນມິຖຸນາຜ່ານມານີ້ ຊຶ່ງເປັນມື້ທີ່ອີຣັກໄດ້ຕັ້ງໃຫ້ເປັນວັນພັກແຫ່ງຊາດ.
ປະທານາທິບໍດີ ບາຣັກ ໂອບາມາ ຊຶ່ງເອີ້ນການໂອນອຳນາດຄວບຄຸມໃນຄັ້ງນີ້ວ່າເປັນ “ເຫດການຄັ້ງປະວັດສາດ” ກ່າວວ່າ ການທີ່ປະຊາຊົນອີຣັກ ຖືເອົາວັນນີ້ເປັນເຫດຜົນຂອງການສະເລີມສະລອງນັ້ນ ແມ່ນຖືກຕ້ອງເໝາະສົມແລ້ວ ຊື່ງທ່ານກ່າວຕໍ່ໄປວ່າ:
“ນີ້ແມ່ນບາດກ້າວຕໍ່ໄປຂ້າງໜ້າທີ່ສຳຄັນບາດກ້າວນຶ່ງ ໃນຂະນະທີ່ປະເທດອີຣັກ ທີ່ມີອະທິປະໄຕແລະປຸ້ມລຸມສາມັກ ຄີເປັນອັນນື່ງເປັນນຶ່ງດຽວກັນ ສືບຕໍ່ຄວບຄຸມໂຊກຊາຕາຂອງຕົນເອງ.”
ກອງທະຫານສະຫະລັຖ ໄດ້ນຳພາກຳລັງຜະສົມຂອງນານາຊາດ ບຸກເຂົ້າໄປໃນອີຣັກໃນປີ 2003 ແລະຂັບໄລ່ຈອມຜະເດັດການ ຊັດດາມ ຮູສເຊນ ອອກຈາກອຳນາດ.ຍຸທະສາດຂອງປະທານາທິບໍດີໂອບາມາໃນເວລານີ້ ກໍຄືການຖອນກອງພົນນ້ອຍໜ່ວຍລົບຂອງສະຫະລັຖອອກໄປຈາກອີຣັກໃຫ້ໝົດ ພາຍໃນເດືອນກັນຍາປີ 2010 ປີໜ້ານີ້ ແລະຖອນກຳລັງຂອງສະຫະລັຖທັງໝົດອອກໄປພາຍໃນທ້າຍປີ 2011.
ປະທານາທິບໍດີໂອບາມາ ໃຫ້ຂໍ້ສັງເກດວ່າອີຣັກຍັງຈະປະເຊີນກັບວັນ ເວລາທີ່ຍຸ່ງຍາກລຳບາກຢູ່ ຊື່ງທ່ານໄດ້ຍົກຕົວຢ່າງນຶ່ງ ຄືເຫດການວາງລະເບີດໂດຍພວກກໍ່ການຮ້າຍໃນເມືອງເຄີຄຸກ ເມື່ອວັນທີ່ 30 ເດືອນມິຖຸນາ ທີ່ຍັງຜົນໃຫ້ມີຜູ້ເສຍຊີວິດຫລາຍກວ່າ 40 ຄົນ. ປະທານາທິບໍດີ ໂອບາມາ ກ່າວຕໍ່ໄປວ່າ:
“ແລະກໍຍັງມີພວກຄົນ ທີ່ຢາກທົດສອບກຳລັງຮັກສາຄວາມປອດໄພຂອງອີຣັກ ແລະການຕົກລົງໃຈຂອງປະຊາຊົນອີຣັກ ຜ່ານການວາງລະເບີດໂຈມຕີກັນລະວ່າງກຸ່ມນິກາຍຕ່າງໆຕື່ມອີກ ແລະເຂັ່ນຂ້າພວກປະຊາຊົນທີ່ບໍ່ມີຄວາມຜິດໃດໆ.”
ພົນເອກ ເຣມອນ ໂອເດຍໂນ ແຫ່ງກອງທັບບົກສະຫະລັຖ ຊຶ່ງເປັນຜູ້ບັນຊາການກຳລັງທະຫານປະສົມນານາຊາດໃນອີຣັກ ກ່າວວ່າ ກຸ່ມອາລເຄອີດານັ້ນ ເຖິງແມ່ນໄດ້ຕົກຕ່ຳລຸດລະດັບຄວາມແຂງແຮງລົງໄປແລ້ວກໍຕາມ ແຕ່ກໍຍັງສືບຕໍ່ເຂັ່ນຂ້າປະຊາຊົນ ອີຣັກຜູ້ບໍລິສຸດຢູ່ຢ່າງບໍ່ລົດລະ ເພື່ອພະຍາຍາມຈຸດໄຟແຫ່ງຄວາມຮຸນແຮງຂື້ນອີກ ໃນ ລະວ່າງກຸ່ມນິກາຍຕ່າງໆຂອງສາສະນາອີສລາມຢູ່ໃນອີຣັກ ນາຍພົນໂອເດຍໂນກ່າວ ອີກວ່າສ່ວນອີຣ່ານນັ້ນກໍຍັງສຶບຕໍ່ສ້າງບັນຫາຂື້ນມາດ້ວຍການຈັດການເຝິກອົບລົມ ແລະຈັດສົ່ງອາວຸດຕ່າງໆໃຫ້ແກ່ພວກຫົວຮຸນແຮງທີ່ຢູ່ພາຍໃນອີຣັກນັ້ນ.
ພົນເອກໂອເດຍໂນ ກ່າວຕໍ່ໄປວ່າ “ແຕ່ຄວາມສາມາດຂອງກຳລັງຮັກ ສາຄວາມປອດໄພຂອງອີຣັກ ກໍໄດ້ເຕີບໂຕຂື້ນໄປຢ່າງໃຫຍ່ຫລວງ ໃນລະຍະສາມປີຜ່ານມາ ແລະທ່ານກໍຫວັງວ່າອີຣັກຈະກ້າວຕໍ່ໄປຂ້າງໜ້າໃນຖານະເປັນປະເທດນື່ງທີ່ມີຄວາມໝັ້ນຄົງ ມີສະຖຽນລະພາບ ແລະມີອະທິປະໄຕ.
ປະທານາທິບໍດີໂອບາມາກໍໄດ້ສະແດງຄວາມໝັ້ນໃຈອອກມາເຊັ່ນກັນວ່າ ປະຊາຊົນອີຣັກຈະສາມາດຮັກສາຄວາມກ້າວໜ້າຕ່າງໆ ທີ່ໄດ້ມາໃນປະເທດຂອງເຂົາເຈົ້ານັ້ນໄວ້ໄດ້ ຊຶ່ງທ່ານກ່າວວ່າ:
“ອະນາຄົດແມ່ນເປັນຂອງຜູ້ທີ່ສ້າງສາ ບໍ່ແມ່ນເປັນຂອງຜູ້ທັບມ້າງທຳລາຍ ແລະການໂອນອຳນາດຄວບຄຸມໃຫ້ແກ່ກຳລັງຮັກສາຄວາມປອດໄພຂອງອີຣັກໃນມື້ນີ້ ກໍເປັນສິ່ງພິສູດໃຫ້ເຫັນຕື່ມອີກວ່າ ພວກທີ່ຢາກຈະດຶງອີຣັກ ໃຫ້ຕົກລົງສູ່ເຫວເລິກແຫ່ງຄວາມແຕກແຍກກັນ ແລະສົງຄາມກາງເມືອງນັ້ນ ແມ່ນເປັນພວກທີ່ຢູ່ໃນ ຝ່າຍຜິດຂອງປະວັດສາດ”
ປະທານາທິບໍດີໂອບາມາກ່າວໃນທີ່ສຸດວ່າ “ຍັງມີຫລາຍສິ່ງຫລາຍຢ່າງ ພວກເຮົາຈະຕ້ອງໄດ້ເຮັດໄດ້ທຳອີກຢູ່ ແຕ່ພວກເຮົາກໍໄດ້ສ້າງຄວາມ ກ້າວໜ້າທີ່ສຳຄັນຫລາຍແລ້ວ ໃນການສະນັບສະນຸນຊຸກຍູ້ໃຫ້ອີຣັກເປັນປະເທດທີ່ມີອະ ທິປະໄຕ ມີສະຖຽນລະພາບ ແລະອາໃສເພິ່ງອິງຕົນເອງໄດ້.
