ລິ້ງ ສຳຫລັບເຂົ້າຫາ

ກຸ່ມຈີ 8 ແລະປະເທດທີ່ກຳລັງພັທນາ ສົນທະນາຫາຣືກັນ ກ່ຽວກັບເຣື່ອງການຄ້າ ການປ່ຽນແປງຂອງດິນຟ້າອາກາດ


ກອງປະຊຸມສຸດຍອດຈີ 8: ພວກຜູ້ນຳຂອງ ກຸ່ມຈີ 8 ຫລື 8 ປະເທດທີ່ຈະເຣີນທາງດ້ານ ອຸສາຫະກັມກຳລັງສົນທະນາຫາຣືກັນ ກ່ຽວກັບ ເຣື່ອງການຄ້າ ການປ່ຽນແປງ ຂອງດິນຟ້າອາ ກາດ ກັບ 5 ປະເທດ ກຳລັງພັທນາ ທີ່ສຳຄັນ ຢູ່ອີຕາລີ ໃນວັນພະຫັດ ມື້ນີ້. ປະທານາທິບໍດີ ສະຫະຣັດ ທ່ານ BARACK OBAMA ແລະ ພວກຜູ້ນຳ ຂອງປະເທດ ທີ່ຈະເຣີນ ທາງດ້ານ ອຸສາຫະກັມອື່ນໆ ພວມປະຊຸມກັນ ທີ່ເມືອງ L’AQUILA ໃນພາກກາງ ຂອງອີຕາລີ ກັບພວກຜູ້ນຳ ຈາກບຣາຊີລ ຈີນ ອິນເດັຽ ເມັກຊິໂກ ແລະອາຟຣິກາໃຕ້. ທ່ານ OBAMA ໄດ້ພົບປະ ສົນທະນາກັບ ປະທານາທິບໍດີ ບຣາຊີລ ທ່ານ LUIS ANACIO LULA DA SILVA ກ່ຽວກັບ ການປ່ຽນແປງ ຂອງດິນຟ້າ ອາກາດ ພະລັງງານ ແລະວິກິຕການ ທາງດ້ານການເມືອງ ໃນຮອນດູຣັສ ແລະອີຣ່ານ. ໂຄສົກຂອງທຳນຽບຂາວ ທ່ານ ROBERT GIBBS ກ່າວວ່າ ທ່ານ OBAMA ໄດ້ສະແດງ ຄວາມຫວັງອອກມາວ່າ ບຣາຊີລຈະສວຍໃຊ້ ຄວາມສັມພັນໃກ້ຊິດ ທາງດ້ານການຄ້າ ກັບອີຣ່ານ ​ເຮັດໃຫ້ອີຣ່ານ ໄດ້​ເຂົ້າ​ໃຈ​ຢ່າງ​ແຈ່ມ​ແຈ້ງ ເຖິງທ່າທີ ຂອງກຸ່ມຈີ 8 ທີ່​ທີ​ຕໍ່​ອິຣ່ານນັ້ນ.

ອີຣັກ: ເຈົ້າໜ້າທີ່ອີຣັກ ກ່າວວ່າ ການໂຈມຕີ ດ້ວຍຣະເບີດ ສະລະຊີບ 2 ຄັ້ງເຮັດໃຫ້ມີຜູ້ເສັຽ ຊີວິດຢ່າງນ້ອຍ 34 ຄົນ ແລະໄດ້ຣັບບາດເຈັບ ອີກ 62 ຄົນ ທີ່ເມືອງ TAL AFAR ໃນພາກ ເໜືອ ຂອງອີຣັກ. ຕຳຣວດກ່າວວ່າ ຜູ້ໂຈມຕີ ຄົນທຳອິດ ໄດ້ບີບຄະນວນຣະເບີດ ໃຫ້ແຕກຂຶ້ນ ໃນວັນພະຫັດມື້ນີ້ ທີ່ເມືອງ TAL AFAR ຊຶ່ງຢູ່ຫ່າງຈາກ ນະຄອນຫລວງ ແບັກແດັດ ໄປທາງຕາເວັນຕົກ ສຽງເໜືອ ປະມານ 400 ຫລັກກິໂລແມັດ. ຜູ້ໂຈມຕີ ຄົນທີ 2 ໄດ້ຣະເບີດ ໂຕເອງ ບໍ່ເທົ່າໃດ ນາທີຕໍ່ມາ ຂະນະທີ່ຜູ້ຄົນ ຫຸ້ມໄປຊ່ອຍ ພວກເຄາະຮ້າຍ ຈາກເຫດຣະເບີດ ຄັ້ງທຳອິດ. ຂະນະດຽວກັນ ຕຳຣວດ ທີ່ນະຄອນຫລວງ ແບັກແດັດກ່າວວ່າ ການວາງຣະເບີດ ທີ່ຄຸ້ມ SADR ເຮັດໃຫ້ມີຜູ້ເສັຽຊີວິດ ຢ່າງນ້ອຍ 6 ຄົນ ແລະໄດ້ຮັບບາດເຈັບ ອີກ 16 ຄົນ ໃນມື້ນີ້. ໄດ້ມີການໂຈມຕີ ຮ້າຍແຮງຫລາຍໆຄັ້ງ ຢູ່ໃນອີຣັກ ນັບແຕ່ກຳລັງສູ້ຣົບ ຂອງສະຫະຣັດ ໄດ້ຖອນອອກ​ໄປ ຈາກຫົວ​ເມືອງ​ຕ່າງໆ ໃນສັບປະດາແລ້ວນີ້.

ອັຟການິສຖານ: ເຈົ້າໜ້າທີ່ຄົນນຶ່ງຂອງອັຟກາ ນິສຖານ ກ່າວວ່າ ຣະເບີດທີ່ຫ້າງໄວ້ ໃນຣົດບັນ ທຸກຄັນນຶ່ງ ໄດ້ແຕກຂຶ້ນ ໃນພາກກາງ ອັຟການິສ ຖານ ເຮັດໃຫ້ມີຜູ້ເສັຽຊີວິດ ບໍ່ຕ່ຳກວ່າ 25 ຄົນ ​ໂຮມ​ທັງ ເດັກນ້ອຍ ນັກຮຽນ ຢ່າງນ້ອຍ 12 ຄົນ. ຜູ້ບັນຊາການ ຕຳຣວດ ໃນເຂດທ້ອງຖິ່ນ ຄົນນຶ່ງ ຂອງອັຟການິສຖານ ກ່າວວ່າ ເປັນທີ່ ປາກົດວ່າ ຣົດບັນທຸກໄມ້ ໄດ້ຖືກປີ້ນຂວ້ຳດ້ວຍ ຄວາມຕັ້ງໃຈ ທີ່ທາງສາຍນຶ່ງ ໃນແຂວງ LOGAR. ທ່ານເວົ້າວ່າ ຫລັງຈາກນັ້ນ ພວກໂຈມຕີ ກໍໄດ້ບີບ ຄະນວນຣະເບີດ ທີ່ຫ້າງໃສ່ຣົດບັນທຸກ ຈາກໄລຍະໄກ ໃຫ້ແຕກຂຶ້ນ ໃນວັນພະຫັດ ມື້ນີ້ ຂະນະທີ່ພວກເດັກນ້ອຍ ພວມພາກັນຍ່າງ ໄປໂຮງຮຽນ. ມີພວກ ເດັກນ້ອຍ ນັກຮຽນ ຢ່າງນ້ອຍ 12 ຄົນ ຕຳຣວດ 4 ຄົນ ແລະບຸກຄົນ ອື່ນໆອີກ 9 ຄົນ ໄດ້ເສັຽຊີວິດ ໃນເຫດຣະເບີດ ທີ່ວ່ານີ້. ພວກຫົວຮຸນແຮງ ມັກຈະໃຊ້ ຣະເບີດແຄມທາງ ເພື່ອໂຈມຕີ ທະຫານຕ່າງປະເທດ ແລະກຳລັງ ອັຟການິສຖານ ແຕ່ພວກເຄາະຮ້າຍ ສ່ວນໃຫຍ່ ເປັນພົລເຮືອນ. ຂະນະດຽວກັນ ກຳລັງຂອງ ອົງການນາໂຕ້ ໃນອັຟການິສຖານ ກ່າວວ່າ ຣະເບີດແຄມທາງລູກນຶ່ງ ໃນພາກໃຕ້ ອັຟການິສຖານ ເຮັດໃຫ້ທະຫານ ພັນທະມິດ 2 ຄົນ ເສັຽຊີວິດ ໃນມື້ວານນີ້.

ຈີນ - ອອສເຕຣເລັຽ: ຈີນກ່າວວ່າ ຕົນມີຫຼັກ ຖານພຽງພໍ ທີ່ຈະພິສູດໃຫ້ເຫັນວ່າຄະນະບໍຣິຫານ 4 ຄົນ ຂອງບໍຣິສັດ RIO TINTO ຊຶ່ງເປັນບໍ ຣິສັດບໍ່ແຮ່ ລົງທຶນຮ່ວມ ຂອງອັງກິດ ກັບອອສ ເຕຣເລັຽນັ້ນ ພົວພັນ ໃນການ ລັກຂະໂມຍ ຄວາມລັບຂອງຣັດ. ທ່ານ QIN GANG ໂຄ ສົກກະຊວງ ການຕ່າງປະເທດ ຂອງຈີນ ກ່າວຕໍ່ພວກນັກຂ່າວ ທີ່ນະຄອນຫລວງ ປັກກິ່ງ ໃນວັນພະຫັດ ມື້ນີ້ວ່າ ຄະນະບໍຣິຫານ ກຸ່ມນີ້ ໄດ້ສ້າງຄວາມເສັຽຫາຍ ຢ່າງໃຫຍ່ຫລວງ ໃຫ້ແກ່ຜົນປໂຍດ ທາງດ້ານເສຖກິດ ແລະຄວາມໝັ້ນຄົງ ຂອງຈີນ ແຕ່ບໍ່ໄດ້ໃຫ້ລາຍລະອຽດ ຫຍັງເລີຍ ກ່ຽວກັບຄະດີ ດັ່ງກ່າວ. ພວກທີ່ຖືກຈັບ ທັງ 4 ແມ່ນຮວມທັງ ທ່ານ STERN HU ຊາວອອສເຕຣເລັຽ ເຊື້ອສາຍຈີນ ແລະຊາວຈີນ ອີກ 3 ຄົນ. ພວກເຂົາເຈົ້າ ໄດ້ຖືກຈັບ ທີ່ນະຄອນຊຽງໄຮ້ ນັບແຕ່ ວັນອາທິດແລ້ວ ເປັນຕົ້ນມາ. ຣັຖມຸນຕຣີ ການຕ່າງປະເທດ ອອສເຕຣເລັຽ ທ່ານ STEPHEN SMITH ທວງໃຫ້ ທາງການຈີນ ອະນຸຍາດໃຫ້ ເຈົ້າໜ້າທີ່ ສະຖານທູດ ອອສເຕຣເລັຽ ທີ່ກຸງປັກກິ່ງ ໄປພົບກັບ ທ່ານ STERN HU ແຕ່ໂຄສົກ ຂອງຈີນ ບໍ່ຍອມແຈ້ງໃຫ້ຊາບວ່າ ເວລາໃດ ຈຶ່ງຈະມີ ການອະນຸຍາດ ດັ່ງກ່າວ.

ຈີນ - ຊິນຈຽງ: ຫົວໜ້າເຈົ້າໜ້າທີ່ ຮັກສາ ຄວາມສະງົບ ຂອງຈີນ ຮຽກຮ້ອງໃນມື້ວານນີ້ ໃຫ້ລົງໂທດ ຢ່າງໜັກ ຕໍ່ພວກຜູ້ນຳ ໃນການກໍ່ ຄວາມຮຸນແຮງ ທີ່ແຂວງຊິນຈຽງ ທາງພາກ ຕາເວັນຕົກ ສຽງເໜືອຂອງຈີນ ໃນມື້ວັນອາທິດ ຜ່ານມາ. ອົງການຂ່າວ ຊິນຫວາຂອງທາງການ ຈີນ ໄດ້ອ້າງຄຳເວົ້າ ຂອງທ່ານ MENG JIANZU ສະມາ​ຊິກ​ ສະພາ​ປົກຄອງຣັດ ແລະຣັຖມຸນຕຣີ ຮັກສາຄວາມປອດພັຍ ຂອງຈີນ ທີ່ກ່າວວ່າ ຂະນະທີ່ ພວກຜູ້ນຳ ໃນການປະທ້ວງ ຄວນຖືກລົງໂທດ ຢ່າງໜັກ ແຕ່ພວກເດີນຂະ ບວນອື່ນໆ ຄວນໄດ້ຮັບ ໃນອັນທີ່ທ່ານເອີ້ນວ່າ “ການເກັ້ຽກ່ອມ ແລະອົບຮົມສັ່ງສອນ”. ທ່ານ MENG ໃຫ້ທັສນະດັ່ງກ່າວ ຂະນະທີ່ທ່ານ ໄປຢ້ຽມຢາມ ປະຊາຊົນ ທີ່ໄດ້ຮັບບາດເຈັບ ໃນລະຫວ່າງ ການປະທະກັນ ເປັນເວລາຫລາຍໆມື້ ຢູ່ທີ່ເມືອງ URUMQI ເມືອງເອກ ຂອງແຂວງຊິນຈຽງ. ຣັຖບານຈີນ ກ່າວວ່າ ມີ 156 ຄົນ ເສັຽຊີວິດ ໃນການກໍ່ ຈະລາຈົນ ໃນວັນອາທິດ ຜ່ານມາ ແລະອີກປະມານ 1 ພັນຄົນ ໄດ້ຮັບບາດເຈັບ ໃນການປະທະກັນ ລະຫວ່າງ ພວກມຸສລິມ ເຜົ່າວີເກີ້ ຊຶ່ງເປັນຊົນກຸ່ມນ້ອຍ ແລະຊາວຮັນ ຊຶ່ງເປັນຄົນກຸ່ມໃຫຍ່ ຂອງຈີນ ຊື່​ງຕຳຣວດ ຕ້ອງໄດ້ເຂົ້າ ແຊກແຊງ ເພື່ອຟື້ນຟູ ຄວາມເປັນລະບຽບ ຮຽບຮ້ອຍ.

ເກົາຫລີໃຕ້ - ອິນເຕີແນັດ: ບໍຣິສັດຮັກສາ ຄວາມປອດພັຍ ທາງອິນເຕີແນັດ ບໍຣິສັດນຶ່ງ ຂອງເກົາຫລີໃຕ້ກ່າວວ່າ ເກົາຫລີໃຕ້ ອາດຈະ ປະເຊີນກັບການໂຈມຕີທາງອິນເຕີແນັດເປັນມື້ທີ 3 ໃນວັນພະຫັດມື້ນີ້ ຊຶ່ງເກົາຫລີໃຕ້ ໄດ້ຖິ້ມໂທດ ໃສ່ວ່າ ເປັນນ້ຳມື ຂອງພວກຄອມມູນິສ ເກົາຫລີເໜືອ. ເວັບໄຊທ໌ ຂອງຣັຖບານ ໃນເກົາຫລີໃຕ້ ແລະສະຫະຣັດ ໄດ້ຕົກເປັນເປົ້າ ໃນການໂຈມຕີ ທີ່ມີຂຶ້ນ ຢ່າງແຜ່ກວ້າງ ແລະປະສານງານກັນ. ໜ່ວຍສືບລັບ ຂອງເກົາຫລີໃຕ້ ກ່າວຕໍ່ ສະມາຊິກ ຣັຖສະພາ ໃນມື້ວານນີ້ວ່າ ເຂົາເຈົ້າສົງສັຍວ່າ ພຽງຢາງ ຫລືບໍ່ກໍ ພວກທີ່ເປັນໃຈ ອາດມີສ່ວນພົວພັນ ໃນການໂຈມຕີ ທີ່ວ່ານີ້. ມີການອ້າງຄຳເວົ້າ ຂອງເຈົ້າໜ້າທີ່ ສືບລັບເກົາຫຼີໃຕ້ ທີ່ກ່າວວ່າ ການໂຈມຕີ ທີ່ປະສານງານກັນ ແບບນີ້ ມີທ່າທາງວ່າ ເປັນການກະທຳ ຂອງອົງການຈັດຕັ້ງ ທີ່ໃຫຍ່ໆ ຫລືບໍ່ກໍ ປະເທດ​ໃດ​ນື່ງ ຫລາຍ​ກວ່າ. ທີ່ເກົາຫຼີໃຕ້ ການໂຈມຕີ ທາງອິນເຕີແນັດ ໄດ້ມີຜົນກະທົບ ຕໍ່ເວັບໄຊທ໌ ຂອງທຳນຽບ ປະທານາທິບໍດີ, ພັກຣັຖບານ, ກະຊວງ ປ້ອງກັນປະເທດ ແລະອື່ນໆອີກ.

ເຊີນຟັງຂ່າວລາຍລະອຽດ ໂດຍຄລິກບ່ອນສຽງ.

XS
SM
MD
LG