ທາງການແນວລາວສ້າງຊາດຢືນຢັນວ່າ ເປົ້າໝາຍສຳຄັນປະການໜຶ່ງຂອງຮ່າງກົດໝາຍທີ່ຕົນໄດ້ສະເຫນີຕໍ່ສະພາແຫ່ງຊາດ ເພື່ອຮັບຜ່ານເປັນກົດໝາຍ ກໍຄືເພື່ອເຕົ້າໂຮມເອົາການປະ ກອບສ່ວນຈາກຄົນລາວໃນຕ່າງປະເທດ ທີ່ຕ້ອງການຈະກັບຄືນໄປລາວ ເພື່ອຮ່ວມສ້າງສາ ພັດທະນາປະເທດຊາດ.
ທ່ານ ຕົງ ເຢີທໍ ຮອງປະທານສູນກາງແນວລາວ ສ້າງຊາດ ໄດ້ຖະແຫລງຢືນຢັນວ່າ ການສະເໜີ ຮ່າງກົດໝາຍວ່າດ້ວຍ ແນວລາວສ້າງຊາດເຂົ້າ ສູ່ການພິຈາລະນາໃນກອງປະຊຸມສະໄໝສາມັນ ຄັ້ງທີ່ 7 ຂອງສະ ພາແຫ່ງຊາດລາວຊຸດທີ່ 6 ທີ່ ກຳລັງດຳເນີນກອງປະຊຸມຢູ່ໃນເວລານີ້ ນອກ ຈາກຈະມີເປົ້າໝາຍເພື່ອເຮັດໃຫ້ການຈັດຕັ້ງ ແລະ ເຄື່ອນໄຫວວຽກງານຂອງແນວລາວ ສ້າງຊາດໃຫ້ ເປັນໄປຕາມລັດຖະທຳມະນູນ ການປົກຄອງສະ ບັບປະຈຸບັນຂອງລາວແລ້ວ ກໍຍັງມີເປົ້າໝາຍ ທີ່ ສຳຄັນອີກປະການໜຶ່ງ ຊຶ່ງກໍຄື ເພື່ອເປັນການເຕົ້າໂຮມເອົາຄວາມສາມັກຄີປອງດອງຊາດລະ ຫວ່າງ ປະຊາຊົນລາວບັນດາເຜົ່າ ທັງທີ່ຢູ່ໃນປະເທດລາວ ແລະ ທີ່ຢູ່ໃນຕ່າງປະເທດ. ທັງນີ້ ໂດຍສະເພາະແມ່ນການເຕົ້າໂຮມເອົາຄົນລາວຈາກຕ່າງປະເທດ ເພື່ອໃຫ້ປະກອບສ່ວນເຂົ້າ ໃນການສ້າງສາ ແລະ ພັດທະນາປະເທດຊາດ ໃຫ້ມີຄວາມຈະເລີນກ້າວໜ້ານັບມື້ຫລາຍຂຶ້ນ ເນື່ອງຈາກວ່າ ຍຸກສະໄໝ ແລະ ສະຖານະການໂລກທີ່ປ່ຽນແປງໄປຢ່າງໄວວານັ້ນມັນໄດ້ເຮັດ ໃຫ້ມີຄວາມຮຽກຮ້ອງຕ້ອງການທີ່ຈະຕ້ອງລະດົມເອົາທຸກກ້ອນກຳລັງສາມັກຄີ ໃຫ້ປະ ກອບສວ່ນເຂົ້າໃນການສ້າງສາ ແລະ ພັດທະນາປະເທດຊາດໃນໄລຍະໃໝ່ຕາມແຜນການ ແລະ ເປົ້າໝາຍທີ່ພັກປະຊາຊົນປະຕິບັດລາວໄດ້ວາງອອກ.
ຮ່າງກົດໝາຍວ່າດ້ວຍແນວລາວສ້າງຊາດ ທີ່ກອງປະຊຸມສະພາແຫ່ງຊາດລາວກຳລັງພິຈາ ລະນາຢູ່ໃນເວລານີ້ ປະກອບມີ 12 ໝວດ 50 ມາດຕາ ຊຶ່ງກຳນົດກ່ຽວກັບໂຄງປະກອບ ການຈັດຕັ້ງພາລະບົດບາດສິດທິໜ້າທີ່ຂໍ້ກຳນົດ ທີ່ເປັນຫລັກການ ລະບຽບການ ແລະ ມາດ ຕະການຕ່າງໆ ທີ່ຈະເຮັດໃຫ້ການປະຕິບັດວຽກງານຂອງແນວລາວສ້າງຊາດມີປະສິດທິ ພາບຫລາຍຂຶ້ນຢ່າງແທ້ຈິງ. ໂດຍລວມໄປເຖິງວຽກງານໃນການຂະຫຍາຍ ແລະ ຂົນຂວາຍ ເອົາຄົນລາວຈາກຕ່າງປະເທດ ເພື່ອປະກອບສ່ວນເຂົ້າໃນການສ້າງສາ ແລະ ພັດທະນາປະ ເທດຊາດໃຫ້ຫລາຍຂຶ້ນນັບມື້.
ກ່ອນໜ້ານີ້ ທ່ານ ສີສະຫວາດ ແກ້ວບຸນພັນ ປະທານສູນກາງແນວລາວສ້າງຊາດ ໄດ້ຖະ ແຫລງຢືນຢັນວ່າ ຈະມີການປ່ຽນຊື່ແນວລາວສ້າງຊາດ ໄປເປັນແນວໂຮມແຫ່ງຊາດໃນຫມໍ່ໆ ນີ້ ເພື່ອເປັນການສະແດງອອກເຖິງກະແສການຮຽກຮ້ອງ ແລະ ຄວາມຕ້ອງການທີ່ຈະເຕົ້າ ໂຮມເອົາກ້ອນກຳລັງຄວາມສາມັກຄີປອງດອງຊາດ ລະຫວ່າງປະຊາຊົນລາວບັນດາເຜົ່າ ທັງ ທີ່ຢູ່ໃນປະເທດ ແລະ ທີ່ຢູ່ໃນຕ່າງປະເທດ ໃນໄລຍະໃໝ່ຢ່າງແທ້ຈິງ.
ທັງນີ້ ແນວລາວສ້າງຊາດ ກໍຍັງມີແຜນການທີ່ຈະຈັດສົ່ງເຈົ້າໜ້າທີ່ໄປປະຈຳການຢູ່ຕາມສະ ຖານທູດ ແລະ ສະຖານກົງສູນຂອງລາວຢູ່ໃນຕ່າງປະເທດ ເພື່ອໃຫ້ປະຕິບັດໜ້າທີ່ ໃນການ ອຳນວຍຄວາມສະດວກ ແລະ ໃຫ້ການຊ່ອຍເຫລືອແກ່ບັນດາຄົນລາວໃນຕ່າງປະເທດ ທີ່ ຕ້ອງການຈະເດີນທາງກັບຄືນໄປລາວເປັນການສະເພາະອີກດ້ວຍ.
ຍິ່ງໄປກວ່ານັ້ນ ພາຍຫລັງຈາກຮ່າງກົດໝາຍວ່າດ້ວຍ ແນວລາວສ້າງຊາດ ໄດ້ຜ່ານການຮັບ ຮອງຂອງສະພາແຫ່ງຊາດລາວ ແລະ ໄດ້ມີການປະກາດບັງຄັບໃຊ້ ຢ່າງເປັນທາງການແລ້ວ ນັ້ນ ກໍຍັງຈະເຮັດໃຫ້ແນວລາວສ້າງຊາດ ກາຍເປັນອົງການທີ່ມີສ່ວນຢ່າງສຳຄັນ ໃນການທີ່ ຈະພິຈາລະນາ ເພື່ອໃຫ້ສັນຊາດແກ່ຄົນລາວໃນຕ່າງປະເທດ ທີ່ຕ້ອງການຈະກັບຄືນໄປປັກ ຫລັກຖານ ຢູ່ໃນລາວເປັນການຖາວອນອີກດ້ວຍ.
ການດຳເນີນງານໃນແນວທາງດັ່ງກ່າວນີ້ຂອງລາວ ນັບເປັນແນວທາງດຽວກັນກັບການທີ່ ທາງການຫວຽດນາມໄດ້ໃຊ້ກັບຊາວຫວຽດນາມໃນຕ່າງປະເທດ ຫລື ຊາວຫວຽດກຽວ ຊຶ່ງກໍປາກົດວ່າ ປະສົບຜົນສຳລັດເປັນຢ່າງດີ ນັບເປັນເວລາຍາວນານກວ່າ 10 ປີມາແລ້ວ.
ຊົງຣິດ ໂພນເງິນລາຍງານຈາກ ບາງກອກໃນວັນທີ 08 ກໍລະກົດ 2009