ສະຫະຣັດ - ຣັດເຊັຽ: ປະທານາທິບໍດີ ສະ ຫະຣັດ ທ່ານ BARACK OBAMA ກ່າວວ່າ
ສະຫະຣັດ ແລະຣັດເຊັຽ ມີຜົນປໂຍດ ຫລາຍໆ ຢ່າງຮ່ວມກັນ ຮວມທັງ ການຕ່າວປີ້ນ
ໃນການແຜ່ຜາຍ ອາວຸດນິວເຄລັຽ ແລະການເອົາຊະນະ ພວກຫົວຮຸນແຮງຈັດ. ໃນການຖແລງ
ຕໍ່ພວກນັກສຶກສາ ທີ່ສະຖາບັນ ເສຖກິດໃໝ່ ໃນກຸງມົສກູ ທ່ານ OBAMA ກ່າວວ່າ ບັນຫາ
ການແຜ່ຜາຍ ອາວຸດນິວເຄລັຽ ແມ່ນຈຸດໃຈກາງ ຂອງບັນຫາ ທ້າທາຍ ກ່ຽວກັບເຣື່ອງ
ນິວເຄລັຽ ໃນສັດຕະວັດ ທີ 21. ທ່ານໄດ້ກ່າວເຖິງ ຂໍ້ຕົກລົງ ທີ່ທ່ານໄດ້ລົງນາມ
ໃນມື້ວັນຈັນ ກັບປະທານາທິບໍດີ ຣັດເຊັຽ ທ່ານ DMITRI MEDVEDEV ກ່ຽວກັບ
ຂໍ້ຕົກລົງ 2 ຝ່າຍ ທີ່ຈະຕັດ ຈຳນວນ ອາວຸດນິວເຄຼັຽ ແລະຈຣວດ
ຍິງລະເບີດນິວເຄລັຽ ທີ່ມີຢູ່ໃນຄັງ ຂອງສະຫະຣັດ ແລະຣັດເຊັຽນັ້ນ ລົງເປັນ
ຈຳນວນຫຼວງຫລາຍ. ທ່ານ OBAMA ໄດ້ກ່າວຢືນຢັນ ກ່ຽວກັບເປົ້າໝາຍ ຂອງທ່ານ
ໃນການປັບ ຄວາມສັມພັນ ກັບຣັດເຊັຽໃໝ່ ແລະຢ້ຳວ່າ ສະຫະຣັດ ຢາກໃຫ້ຣັດເຊັຽ
ເປັນປະເທດ ທີ່ເຂັ້ມແຂງ ມີສັນຕິພາບ ແລະອຸດົມຮັ່ງມີ.
ຈີນ - ຄວາມວຸ້ນວາຍ: ສື່ມວນຊົນຈີນ ກ່າວວ່າ ອຳນາດປົກຄອງ ໃນເຂດຊິນຈຽງທີ່ວຸ່ນວາຍ ໃນພາກຕາເວັນຕົກ ຂອງຈີນ ໄດ້ປະກາດ
ຫ້າມສັນຈອນ ໃນຍາມຄ່ຳຄືນ ລຸນຫລັງໄດ້ເກີດ ການຈະລາຈົນ
ລະຫວ່າງຊົນເຜົ່າ ທີ່ໄດ້ເຮັດໃຫ້ເມືອງເອກ URUMQI ຂອງເຂດດັ່ງກ່າວ
ເປັນອັມພາດໄປ. ອົງການຂ່າວຊິນຫົວ ຂອງທາງການຈີນ ລາຍງານວ່າ
ການຫ້າມສັນຈອນ ຈະເລີ້ມແຕ່ 9 ໂມງແລງ ວັນອັງຄານມື້ນີ້ ໄປຫາ 8
ໂມງເຊົ້າ ວັນພຸດມື້ອື່ນ ຕາມເວລາ ໃນທ້ອງຖິ່ນ. ການຫ້າມດັ່ງກ່າວ
ມີຂື້ນ ຫລັງຈາກ ພວກຊົນກຸ່ມນ້ອຍ ຊາວມຸສລິມ ເຜົ່າວີເກີ້ ແລະພວກຊາວຮັນ
ຊຶ່ງເປັນຊົນກຸ່ມໃຫຍ່ ໃນຈີນ ໄດ້ປະເຊີນໜ້າ ກັບຕຳຣວດ ປາບຈະລາ
ຈົນທີ່ເຂດຊິນຈຽງ ໃນວັນອັງຄານ ມື້ນີ້ 2 ມື້ ຫລັງຈາກ ໄດ້ມີການ ເດີນຂະບວນ
ປະທ້ວງ ທີ່ຮຸນແຮງ ໃນເຂດດັ່ງກ່າວ ທີ່ເຮັດໃຫ້ ມີຜູ້ເສັຽຊີວິດ ຢ່າງນ້ອຍ 156
ຄົນ. ທຳອິດ ຕຳຣວດ ໄດ້ປະເຊີນໜ້າ ກັບປະມານ 200 ຄົນ ທີ່ພາກັນ ປະທ້ວງ
ການປາບປາມ ຂອງຣັຖບານ ຕໍ່ຊາວວີເກີ້ ທີ່ກ່າວວ່າ ສະມາຊິກ ໃນຄອບຄົວ
ຂອງພວກເຂົາເຈົ້າ ໄດ້ຖືກຈັບ ໂດຍພະລະການ ໃນມື້ວັນຈັນ ວານນີ້ ລຸນຫລັງ
ທີ່ໄດ້ມີການ ກໍ່ຈະລາຈົນ ໃນວັນອາທິດ.
ປາກິສຖານ: ເຈົ້າໜ້າທີ່ ສືບລັບ ປາກິສຖານ ກ່າວວ່າ ຍານອາກາດທີ່ສົງສັຍວ່າເປັນເຮືອບິນ ທີ່ບໍ່ມີຄົນຂັບ ຂອງສະຫະຣັດ ໄດ້ຍິງລູກສອນ ໄຟ ໃສ່ຄ້າຍຝຶກ ຂອງພວກທາລີບານ ໃນພາກຕາເວັນຕົກ ສຽງເໜືອ ຂອງປາກິສຖານ ເຮັດໃຫ້ ພວກຫົວຮຸນແຮງ ເສັຽຊີວິດ ຫລາຍເຖິງ 14 ຄົນ. ເຈົ້າໜ້າທີ່ ເວົ້າວ່າ ການໂຈມຕີ ໄດ້ມີຂຶ້ນ ໃນວັນອັງຄານ ມື້ນີ້ ທີ່ເຂດ WAZIRISTAN ໃຕ້ ຢູ່ຕາມ ບໍຣິເວນຊາຍແດນ ທີ່ຕິດກັບ ອັຟການິສຖານ. ມີລາຍງານວ່າ ມີຊາວຕ່າງປະເທດ ຫລາຍໆຄົນ ຮວມຢູ່ໃນ ພວກທີ່ເສັຽຊີວິດ. ເຂດດັ່ງກ່າວ ເປັນທີ່ໝັ້ນ ຂອງນາຍ BAITULLAH MEHSUD ຜູ້ນຳຂອງກຸ່ມ ທາລີບານ ແລະພັນທະມິດ ຂອງກຸ່ມ ກໍ່ການຮ້າຍ AL-QAIDA ຊຶ່ງທັງປາກິສຖານ ແລະສະຫະຣັດ ຕ່າງກໍ ຕ້ອງການໂຕຢູ່ນັ້ນ. ມີການຖິ້ມໂທດ ໃສ່ວ່າ ນາຍ MEHSUD ເປັນຜູ້ຮັບຜິດຊອບ ຕໍ່ການໂຈມຕີ ຈຳນວນນຶ່ງ ຕໍ່ເປົ້າໝາຍ ຂອງຣັຖບານ ແລະພົລເຮືອນ ແລະເຊື່ອກັນວ່າ ເປັນຜູ້ ໃຫ້ການຊ່ອຍເຫລືອ ທີ່ສຳຄັນ ແກ່ພວກນັກຣົບ AL-QAIDA ໃນປາກິສຖານ. ກອງທັບປາກິສຖານ ໄດ້ສູ້ຣົບ ກັບພວກຫົວຮຸນແຮງ ທາລີບານ ໃນທົ່ວເຂດ ພາກຕາເວັນຕົກ ສຽງເໜືອ ຂອງປາກິສຖານ ມາເປັນເວລາ ສອງເດືອນກວ່າແລ້ວ.
ອັຟການິສຖານ: ເຈົ້າໜ້າທີ່ ອັຟການິສຖານ ກ່າວວ່າ ມີການແກວ່ງຣະເບີດມືລູກນຶ່ງໃສ່ຣົດ ຕຳຣວດ ທີ່ເປັນເຫດ ໃຫ້ພົລເຮືອນ ຄົນນຶ່ງເສັຽ ຊີວິດ ແລະອີກ 29 ຄົນ ໄດ້ຮັບບາດເຈັບ ໃນພາກຕາເວັນອອກ ອັຟການິສຖານ. ເຈົ້າໜ້າທີ່ ກ່າວວ່າ ການໂຈມຕີ ທີ່ແຂວງ KHOST ແມ່ນແນເປົ້າໝາຍ ໃສ່ຣົດຕຳຣວດ ຂະບວນນຶ່ງ. ພວກເຄາະຮ້າຍ ສ່ວນໃຫຍ່ ເປັນພົລເຮືອນ ແຕ່ຕຳຣວດ 4 ຄົນ ກໍຮວມຢູ່ໃນ ຈຳນວນພວກ ທີ່ໄດ້ຮັບບາດເຈັບ. ຂະນະດຽວກັນ ກຳລັງຮັກສາ ຄວາມປອດພັຍ ຂອງນາໆຊາດ ພາຍໃຕ້ການນຳພາ ຂອງອົງການເນໂຕ້ ກ່າວວ່າ ທະຫານ ອົງການເນໂຕ້ 3 ຄົນ, 2 ຄົນ ເປັນຄົນ ການາດາ ແລະອີກຜູ້ນຶ່ງ ເປັນຄົນອັງກິດ ໄດ້ເສັຽຊີວິດ ຍ້ອນອຸບັດຕິເຫດ ເຮຣີຄອບເຕີ້ຕົກ ທີ່ແຂວງ ZABUL ທາງພາກໃຕ້ ຂອງອັຟການິສຖານ ໃນມື້ວານນີ້ ຊຶ່ງໂຄສົກຄົນນຶ່ງ ຂອງອົງການເນໂຕ້ ເວົ້າວ່າ ເປັນອຸບັດຕິເຫດ ແລະບໍ່ໄດ້ ມີສາເຫດ ມາຈາກການໂຈມຕີ ຂອງຝ່າຍສັດຕຣູ. ກ່ອນໜ້ານັ້ນ ໃນວັນຈັນ ວານນີ້ ໂຄສົກຄົນນຶ່ງ ຂອງກອງທັບ ສະຫະຣັດ ກ່າວວ່າ ທະຫານ ອະເມຣິກັນ 4 ຄົນ ເສັຽຊີວິດ ເວລາຣົດເຂົາເຈົ້າ ຢຽບຣະເບີດ ແຄມທາງ ທີ່ແຂວງ KUNDUZ ໃນພາກເໜືອ ຂອງ ອັຟການິສຖານ.
ຮອນດູຣາສ: ປະທານາທິບໍດີ ທີ່ຖືກຂັບໄລ່ ອອກຈາກອຳນາດ ຂອງຮອນດູຣາສ ທ່ານ MANUEL
ZELAYA ມີກຳນົດ ທີ່ຈະພົບປະ ກັບຣັຖມຸນຕຣີ ການຕ່າງປະເທດ ສະຫະຣັດ ທ່ານນາງ
HILLARY CLINTON ທີ່ກຸງວໍ ຊິງຕັນ ໃນວັນອັງຄານ ມື້ນີ້ ຂະນະທີ່ທ່ານ
ຊອກຫາຊ່ອງທາງ ເພື່ອເສີມຂຍາຍ ການສນັບ ສນຸນ ຂອງນາໆຊາດ ໃນການກັບຄືນ
ເຂົ້າສູ່ອຳນາດ ຂອງທ່ານ. ການພົບປະ ທີ່ວ່ານີ້ ຈະເປັນການຕິດຕໍ່ ຣະດັບສູງສຸດ
ລະຫວ່າງທ່ານ ZELAYA ແລະ ຣັຖບານທ່ານ OBAMA ນັບແຕ່ທ່ານ ໄດ້ຖືກຂັບໄລ່ ອອກຈາກ
ຮອນດູຣາສ ລຸນຫລັງ ການກໍ່ຣັຖປະຫານ ຂອງພວກທະຫານ ໃນວັນທີ 28 ມິຖຸນາ ຜ່ານມາ.
ໃນລະຫວ່າງ ການຖແລງ ທີ່ກຸງມົສກູ ເຊົ້າມື້ນີ້ ປະທານາທິບໍດີ ສະຫະຣັດ ທ່ານ
BARACK OBAMA ໄດ້ກ່າວສນັບສນຸນ ທ່ານ ZELAYA ຢ່າງເປີດເຜີຍ ເຖິງແມ່ນທ່ານ
OBAMA ເວົ້າວ່າ ຜູ້ນຳຂອງ ຮອນດູຣາສ ໄດ້ຄັດຄ້ານ ຢ່າງແຂງຂັນ ຕໍ່ນະໂຍບາຍ
ຂອງສະຫະຣັດ.
ເກົາຫລີເໜືອ: ສະພາຄວາມໝັ້ນຄົງ ຂອງອົງການ ສະຫະປະຊາຊາດ ໄດ້ປະນາມການຍິງທົດລອງລູກ ສອນໄຟ ຂີປະນາວຸດ ເທື່ອລ່າສຸດ ຂອງເກົາຫລີເໜືອ ນັ້ນວ່າ
ເປັນພັຍຂົ່ມຂູ່ ຕໍ່ຄວາມໝັ້ນຄົງ ຂອງໂລກ. ທ່ານ RUHAKANA RUGUNDA
ເອກອັຄຣັຖທູດ ຂອງຢູການດາ ຊຶ່ງເປັນປະທານ ຄົນປັດຈຸບັນ ຂອງ ສະພາ ຄວາມໝັ້ນຄົງ
ກ່າວລຸນຫລັງ ການປະຊຸມ ໃນມື້ວານນີ້ວ່າ ສະມາຊິກທັງ 15 ປະເທດ ຂອງສະພາ
ຄວາມໝັ້ນຄົງ ແມ່ນມີຄວາມວິຕົກ ກັງວົນ ເປັນທີ່ສຸດ. ທ່ານເຕືອນ
ເກົາຫລີເໜືອວ່າ ເກົາຫລີເໜືອ ຕ້ອງໄດ້ປະຕິບັດ ຕາມທຸກມະຕິ ຂອງສະພາ
ຄວາມໝັ້ນຄົງ ກ່ຽວກັບ ການທົດລອງ ລູກສອນໄຟ ແລະໂຄງການ ອາວຸດນິວເຄລັຽ
ຂອງຕົນນັ້ນ. ນອກນີ້ ທ່ານ RUGUNDA ຍັງກ່າວວ່າ ສະມາຊິກ ສະພາຄວາມໝັ້ນຄົງ
ທຸກປະເທດ ໄດ້ກ່າວຢ້ຳ ເຖິງຄວາມໝາຍໝັ້ນ ຕັ້ງໃຈຂອງຕົນ ທີ່ຈະແກ້ໄຂ ບັນຫານີ້
ໂດຍທາງການທູດ ແບບສັນຕິວິທີ. ເກົາຫລີເໜືອ ໄດ້ທົດລອງ ຍິງລູກສອນໄຟ ຂີປະນາວຸດ
7 ລູກ ໄປໃສ່ ທະເລຍີ່ປຸ່ນ ໃນມື້ວັນເສົາແລ້ວ ຊຶ່ງເປັນການ ຝ່າຝືນຢ່າງຈະແຈ້ງ
ຕໍ່ອົງການ ສະຫະປະຊາຊາດ.
ເຊີນຟັງຂ່າວລາຍລະອຽດ ໂດຍຄລິກບ່ອນສຽງ.
