ຜູ້ນຳຊາວມົ້ງຢູ່ບ້ານຫວ້ຍນ້ຳຂາວຢືນຢັນ
ວ່າການປິດລ້ອມ ແລະ ການປາບປາມ
ຊາວມົ້ງຢູ່ໃນລາວຍັງຄົງສືບຕໍ່ເລື້ອຍມາ
ຈົນເຖິງທຸກມື້ນີ້. ເພາະສະນັ້ນ ການສົ່ງ
ຊາວມົ້ງກັບຄືນໄປລາວຈຶ່ງມີຄວາມສ່ຽງ
ຕໍ່ຊີວິດ ແລະ ຮ່າງກາຍ ໃນຂະນະທີ່
ທາງການລາວນັ້ນ ກໍຢືນຢັນມາໂດຍຕະຫລອດວ່າຈະໃຫ້ການຊ່ອຍເຫລືອ ແລະ ເບິ່ງແຍງ
ຊາວມົ້ງທຸກຄົນເປັນຢ່າງດີເມື່ອຖືກສົ່ງກັບຄືນໄປລາວແລ້ວ.
ທ້າວ ຫລີສື ແກນນຳຄົນສຳຄັນຂອງຊຸມຊົນຊາວມົ້ງ ທີ່ພັກອາໃສຢູ່ໃນສູນຮອງຮັບຊົ່ວຄາວ
ບ້ານຫ້ວຍນ້ຳຂາວໃນເຂດອຳເພີເຂົາຄໍ້ຈັງຫວັດເພັດສະບູນທາງພາກເໜືອຕອນຫລາງ
ຂອງປະເທດໄທ ໄດ້ໃຫ້ຢືນຢັນວ່າ ການທີ່ທາງການໄທ ໄດ້ດຳເນີນມາດຕະການໃນທຸກວິ
ທີທາງເພື່ອກົດດັນໃຫ້ ຊາວມົ້ງຕ້ອງເດີນທາງກັບຄືນໄປລາວທັງໝົດນັ້ນ ນອກຈາກຈະເປັນ
ການກະທຳທີ່ຄັດຕໍ່ຫລັກສາກົນວ່າດ້ວຍຜູ້ອົບພະຍົບແລ້ວກໍຍັງເປັນການກະທຳທີ່ເຮັດໃຫ້
ຊາວມົ້ງຕ້ອງມີຄວາມສ່ຽງສູງເຖິງຊີວິດ ແລະ ຮ່າງກາຍອີກດ້ວຍ.
ທັງນີ້ ທ້າວ ຫລີສື ໄດ້ໃຫ້ການອະທິບາຍວ່າ ການສ່ຽງໄພເຖິງຊີວິດຂອງບັນດາຊາວມົ້ງທີ່
ຈະຖືກກົດດັນໃຫ້ຕ້ອງເດີນທາງກັບຄືນໄປລາວ ໂດຍສະເພາະແມ່ນຊາວມົ້ງປ່ານັ້ນ ກໍຍ້ອນ
ວ່າ ທາງການລາວ ໂດຍກອງທັບປະຊາຊົນລາວ ຍັງຄົງດຳເນີນມາດຕະການປິດລ້ອມ
ແລະ ປາບປາມຊາວມົ້ງຢ່າງຕໍ່ເນື່ອງນັບຈາກປີ 1975 ເປັນຕົ້ນມາ ຈົນເຖິງປະຈຸບັນນີ້
ແລະ ເຖິງແມ່ນວ່າ ທ່ານ ພົນຈັດຕະວາ ບົວສ້ຽງຈຳປາພັນ ຮອງຫົວ ໜ້າກົມໃຫຍ່ເສນາ
ທິການ ກອງທັບປະຊາຊົນລາວຈະໄດ້ເດີນທາງໄປໃຫ້ການຢືນຢັນ ຕໍ່ບັນດາແກນນຳຂອງ
ຊາວມົ້ງຢູ່ບ້ານຫ້ວຍນ້ຳຂາວ ເມື່ອຕົ້ນປີນີ້ວ່າ ຢູ່ໃນປະເທດລາວບໍ່ມີປະຕິບັດການ ດັ່ງກ່າວ
ກໍຕາມ ຫາກແຕ່ກໍເຊື່ອຖືບໍ່ໄດ້.
ສາເຫດທີ່ທາງການລາວ ຕ້ອງທຳການ
ປິດລ້ອມ ແລະ ປາບປາມຊາວມົ້ງນັ້ນ
ກໍຍ້ອນວ່າ ພວກເຂົາເຈົ້າເປັນອະດີດ
ແລະ ລູກຫລານຂອງຫນ່ວຍສືບລາດ
ຊະການລັບ ຫລື CIA ຂອງສະຫະລັດ
ອາເມລິກາ ໃນໄລຍະສົງຄາມອິນດູຈີນ. ແຕ່ຢ່າງໃດກໍຕາມທາງການ ລາວ ກໍໄດ້ຖະ
ແຫລງການ ເພື່ອປະຕິເສດຕໍ່ກໍລະນີດັ່ງກ່າວນີ້ ມາໂດຍຕະຫລອດເຊັ່ນດຽວກັນໂດຍຢືນ
ຢັນວ່າ ບໍ່ມີຝ່າຍຕໍ່ຕ້ານລັດຖະບານ ແລະ ບໍ່ມີການປາບປາມຊາວມົ້ງຢູ່ໃນປະເທດລາວ
ຫາກແຕ່ມີພຽງການຍົກຍ້າຍບັນດາຊົນເຜົ່າຕ່າງໆຈາກໝູ່ບ້ານຂະໜາດນ້ອຍ ມາລວມ
ກັນ ຢູ່ໃນໝູ່ບ້ານຂະໜາດໃຫຍ່ ເພື່ອເຮັດໃຫ້ສະດວກຕໍ່ການນຳເອົາ ໂຄງການພັດທະນາ
ຕ່າງໆ ລົງໄປໃນທ້ອງຖິ່ນໃຫ້ໄດ້ຢ່າງທົ່ວຖິງ ແລະ ໃຫ້ມີປະສິດທະຜົນ ກັບທັງຍັງເພື່ອ
ເປັນການລົບລ້າງ ການຖາງປ່າເຮັດໃຫ້ເລື່ອນລອຍ ຂອງບັນດາຊົນເຜົ່າຕ່າງໆອີກດ້ວຍ.
ຍິ່ງໄປກວ່ານັ້ນທ່ານ ພົນ ຈັດຕະວາບົວສ້ຽງ ຍັງໄດ້ໃຫ້ການເນັ້ນຢ້ຳ ໃນລະຫວ່າງທີ່ເດີນ
ທາງໄປກວດຢ້ຽມ ແລະ ພົບປະກັບ ບັນດາແກນນຳຂອງຊາວມົ້ງ ຢູ່ບ້ານຫ້ວຍນ້ຳຂາວ
ໃນຊວ່ງຕົ້ນປີນີ້ອີກດ້ວຍວ່າ:
ຕໍ່ກັບພາກສ່ວນທີ່ ສະມັກໃຈໄປຢູ່ບ້ານພັດທະນາໃໝ່. ໜຶ່ງ ປຸກເຮືອນໃຫ້ຄອບຄົວລະ
ຫລັງພື້ນທີ່ໜີ້ກໍແບ່ງໃຫ້ກວ້າງຂວາງ ເພາະວ່າໃນອານາຄົດເຂົາເຈົ້າຈະຫາເງິນຫາທອງ
ແລ້ວຈະຕັ້ງເຮືອນໃຫຍ່ກວ້າງກວ່ານັ້ນ, ສອງ ຈະຈ່າຍເຂົ້າໃຫ້ກິນໜຶ່ງປີເຕັມ, ສາມ ເອົາ
ໄຟຟ້າເຂົ້າໄປເຮືອນ ແລະ ນຳໃຊ້ກະແສໄຟຟ້າໜຶ່ງປີ ໄປບໍ່ໃຫ້ເສຍເງິນ, ສີ່ ກໍເອົາເງິນໃຫ້
ຜູ້ລະສາມແສນໃຫ້ເບື້ອງຕົ້ນຄືກັນ, ຫ້າ ພວກເຮົາດຳເນີນການກໍ່ສ້າງພື້ນຖານໂຄງຫລ່າງ
ເພື່ອຮອງຮັບເຮັດໃຫ້ພີ່ນ້ອງຈຳນວນນີ້ ມີບ່ອນຜະຫລິດຄົງທີ່ເປັນຂອງຕົວເອງຍາວນານ.
ຕັ້ງໂຮງຮຽນເອົານາຍຄູໄປສິດສອນຕັ້ງສຸກສະລາປະກອບແພດ ປະກອບຢາ ພ້ອມກັນນັ້ນ
ກໍອານຸຍາດໃຫ້ໄປຢາມພີ່ນ້ອງຕ່າງບ້ານຕ່າງແຂວງ ແລະ ອານຸຍາດໃຫ້ພີ່ນ້ອງຕ່າງບ້ານ
ຕ່າງ ແຂວງມາຢ້ຽມຢາມຕົນເອງໄດ້. ແລະ ກໍມີສິດອິດສະລະພາບຄືພົນລະເມືອງຄົນອື່ນໆ
ແລ້ວເຮັດສຳມະໂນຄົວ. ຖ້າມີຄວາມຈຳເປັນຕ້ອງການຢາກໄປຢາມພີ່ນ້ອງຕ່າງປະເທດ
ພວກຂ້າພະເຈົ້າ ກໍຈະເຮັດ ພາສປອດໃຫ້.
ນັບຈາກປີ 2007 ເປັນຕົ້ນມາ ທາງການໄທໄດ້ທຳການສົ່ງຊາວມົ້ງ ກັບຄືນໄປໃຫ້ທາງ
ການລາວ ແລ້ວ 14 ຄັ້ງ ໂດຍມີຊາວມົ້ງທີ່ຖືກສົ່ງກັບໄປລາວລວມກັນ 2.807 ຄົນ ຫລື
578 ຄອບຄົວ ແລະ ໃນປະຈຸບັນນີ້ ກໍຍັງຄົງເຫລືອຊາວມົ້ງຢູ່ສູນຮອງຮັບຊາວຄາວ ບ້ານ
ຫ້ວຍນ້ຳຂາວ ຈຳນວນ ຫ້າພັນກວ່າຄົນ ທີ່ທາງການລາວ ແລະ ໄທ ໄດ້ຕົກລົງຮ່ວມກັນ
ຢ່າງຄັກແນ່ແລ້ວວ່າ ຈະດຳເນີນ ການສົ່ງ ແລະ ຮັບເອົາພວກເຂົາເຈົ້າກັບຄືນໄປລາວ ໃຫ້
ໄດ້ທັງໝົດພາຍໃນທ້າຍປີນີ້.
