ສະຖານະການໃນອິຣ່ານ: ສະພາບການໃນນະຄອນຫລວງຂອງອິຣ່ານປາກົດວ່າເຄັ່ງຕຶງ ແຕ່ສງົບງຽບໃນວັນຈັນມື້ນີ້ ແລະບໍ່ມີລາຍງານຂ່າວກ່ຽວກັບການເດີນຂະບວນ ປະທ້ວງລາຍໃຫຍ່ ຫລືການກໍ່ຄວາມຮຸນແຮງຕາມຖນົນຫົນທາງ ດັ່ງທີ່ເຄີຍມີມາໃນທົ່ວຕົວເມືອງ ນັບແຕ່ເກີດບັນຫາຂັດແຍ່ງກັນເຣື່ອງການເລືອກຕັ້ງປະທານາທິບໍດີ ເມື່ອວັນທີ 12 ເດືອນນີ້ເປັນຕົ້ນມາ. ພວກສນັບສນຸນທ່ານ Mir Hossein Mousavi ຜູ້ປາໄຊໃນການເລືອກຕັ້ງ ໄດ້ຮຽກຮ້ອງໃຫ້ປະຊາຊົນ ເປີດໄຟຕາລົດຂອງເຂົາເຈົ້າໃນຕອນແລງ ເພື່ອເປັນຮ່ອງຮອຍອັນນຶ່ງຂອງການປະທ້ວງແລະສະແດງເຖີງຄວາມເປັນເອກກະພາບພ້ອມພຽງກັນ. ວິທຍຸແຫ່ງຣັດອິຣ່ານລາຍງານຂ່າວໃນວັນຈັນມື້ນີ້ວ່າ ປະຊາຊົນຢ່າງນ້ອຍ 457 ຄົນໄດ້ຖືກຈັບກຸມໃນວັນເສົາຜ່ານມານີ້ ອັນເປັນມື້ນື່ງທີ່ເຕັມໄປດ້ວຍການປະທະກັນ ລະຫວ່າງກຳລັງຮັກສາຄວາມປອດໄພແລະ ພວກປະທ້ວງທ່ີຍັງຜົນເຮັດໃຫ້ມີຄົນເສັຍຊີວິດໄປ ຢ່າງນ້ອຍ 10 ຄົນ.
ທີ່ປາກີສຖານ: ບັນດາເຈົ້າໜ້າທ່ີປາກີສຖານກ່າວວ່າ ການສູ້ລົບກັນລະຫວ່າງກຳລັງຮັກສາຄວາມປອດໄພ ກັບພວກຫົວຕໍ່ສູ້ກຸ່ມຕາລີບັນໄດ້ທະວີຄວາມຮຸນແຮງຂື້ນ ໃນວັນຈັນມື້ນີ້ ໃນເຂດຊົນເຜົ່າຂອງປະເທດ ເຮັດໃຫ້ມີຄົນເສັຍຊີສິດ ຢ່າງນ້ອຍ 14 ຄົນ. ເຈົ້າໜ້າທີ່ເວົ້າວ່າ ພວກຫົວຕໍ່ສູ້ໄດ້ລະດົມຍິງຈລວດໃສ່ຖານທັບຫລາຍແຫ່ງໃນແຂວງ Waziristan ເໜືອແລະໃຕ້ ໃນຕອນເດິກວັນອາທິດວານນີ້. ບໍ່ມີລາຍງານກ່ຽວກັບການບາດເຈັບລົ້ມຕາຍຂອງທະຫານຝ່າຍຣັຖບານ. ທາງການກ່າວວ່າ ທາງກອງທັບໄດ້ໂຕ້ຕອບຄືນ ໂດຍການໂຈມຕີທາງອາກາດ ຕໍ່ເປົ້າໝາຍຂອງກຸ່ມຕາລີບັນໃນຫລາຍໝູ່ບ້ານ ເຮັດໃຫ້ພວກຫົວຮຸນແຮງເສັຍຊີວິດໄປ 14 ຄົນ. ຣັຖບານປາກິສຖານໄດ້ເປີດສາກທຳການບຸກໂຈມຕີເທື່ອໃໝ່ ຕໍ່ພວກຕາລີບັນໃນບໍ່ເທົ່າໃດມື້ຜ່ານມານີ້ ໂດຍແນເປົ້າໝາຍໃສ່ທີ່ໝັ້ນຂອງນາຍ Baitullah Mehsud ຫົວໜ້າກຸ່ມຕາລິບັນໃນປາກິສຖານ ຢູ່ໃນແຂວງ Wazistan ໃຕ້.
ທີ່ຣັດເຊັຍ: ຜູ້ນຳສາທາຣະນະຣັດ Ingushetia ໃນເຂດ Caucasus ເໜືອຂອງ ຣັດເຊັຍໄດ້ຮັບບາດເຈັບຢ່າງສາຫັດຈາກການວາງລະເບີດໂຈມຕີຂະບວນລົດຂອງທ່ານ. ສື່ມວນຊົນຣັດເຊັຍກ່າວວ່າ ປະທານາທິບໍດີ Yunus Bek Yevkurov ແຫ່ງ Ingushetia ກຳລັງເດີນທາງໄປກັບລົດຂະບວນນຶ່ງ ເວລາລະເບີດທ່ີຫ້າງໄວ້ແຄມທາງ ແຕກຂື້ນໃສ່ຂະບວນລົດຂອງທ່ານໃນຕອນເຊົ້າວັນຈັນມື້ນີ້. ທ່ານ Yevkurov ລອດຊີວິດມາໄດ້ ແຕ່ 3 ຄົນເສັຍຊີວິດ ຊື່ງຮວມທັງພວກອາຣັກຂາທ່ານ ແລະອີກຫລາຍຄົນໄດ້ຮັບບາດເຈັບ. ທ່ານ Yevkurov ເປັນເຈົ້າໜ້າທ່ີຂັ້ນສູງຄົນທີສາມຂອງ Ingushetia ທ່ີໄດ້ຮັບບາດເຈັບ ຫລືບໍ່ກໍເສັຍຊີວິດ ຍ້ອນການໂຈມຕີຫລາຍຄັ້ງຕິດຕໍ່ກັນມາໃນລະຍະ 3 ສັບປະດາຜ່ານມານີ້. ປະທານາທິບໍດີ Dmitri Medvedev ແຫ່ງຣັດເຊັຍໄດ້ແຕ່ງຕັ້ງທ່ານ Yevkurov ເປັນປະທານາທິບໍດີສາທາລະນະຣັດ Ingushetia ໃນເດືອນຕຸລາປີແລ້ວນີ້ ຫລັງຈາກທ່ານຂັບໄລ່ປະທານາທິບໍດີ Murat Zyazikov ຊຶ່ງເປັນຜູ້ນຳຂົງເຂດນັ້ນມາເປັນເວລາດົນນານ ແຕ່ບໍ່ໄດ້ຮັບຄວາມນິຍົມຈາກປະຊາຊົນ ຍ້ອນບໍ່ສາມາດຢຸດການສໍ້ຣາດບັງຫລວງທ່ີເຮື້ອຮັງແລະການກໍ່ຄວາມຮຸນແຮງຢ່າງແຜ່ຫລາຍໃນຂົງເຂດນັ້ນ.
ເກົາຫລີເໜືອແລະສະຫະຣັດ: ເກົາຫລີເໜືອເໄດ້ບັນລະຍາຍຕົນເອງໃນວັນຈັນມື້ນີ້ວ່າ ເປັນອຳນາດນີວເຄລັຍທ່ີພາກພູມໃຈປະເທດນື່ງ ແລະຂົ່ມຂູ່ວ່າຈະທຳການຕອບໂຕ້ຕໍ່ສະຫະຣັດ ຖ້າຕົນຖືກໂຈມຕີ. ໜັງສືພິມ Rodong Sinmun ຊຶ່ງເປັນໜັງສືພິມຂອງພັກກຳມະກອນເກົາຫລີ ທ່ີປົກຄອງປະເທດຢູ່ໃນປັດຈຸບັນ ກ່າວວ່າ ມັນເປັນຄຳເວົ້າທ່ີໄຮ້ສາຣະ ທ່ີຈະເວົ້າວ່າ ເກົາຫລີເໜືອຂົ່ມຂູ່ສະຫະຣັດ ແລະກ່າວອ້າງວ່າ ແມ່ນວໍຊິງຕັນເອງ ທ່ີຂົ່ມຂູ່ເກົາຫລີເໜືອ. ໃນການໃຫ້ສຳພາດກັບຕາໜ່າງໂທລະພາບ CBS News ທ່ີມີກຳນົດ ຈະອອກອາກາດໃນວັນຈັນມື້ນີ້ ປະທານາທິບໍດີບາຣັກໂອບາມາກ່າວ ວ່າ ທາງຣັຖບານຂອງທ່ານແລະກອງທັບສະຫະຣັດຕຽມພ້ອມຢ່າງເຕັມ ສ່ວນເພື່ອຮັບມືກັບເຫດການໃດໆກໍຕາມທ່ີຈະເກີດຂຶ້ນທ່ີພົວພັນກັບເກົາຫລີເໜືອ ແລະທ່ານກ່າວຕໍ່ໄປວ່າ ປະຊາຄົມນາໆຊາດແມ່ນປຸ້ມລຸມສາ ມັກຄີກັນ ຕໍ່ຕ້ານການເຄື່ອນໄຫວແບບເກາະຜິດຂອງເກົາຫລີເໜືອນັ້ນ. ເມື່ອຖືກຖາມກ່ຽວກັບລາຍງານຂ່າວທ່ີວ່າກຸງພຽງຢ້າງກຳລັງກະກຽມເພື່ອຍິງລູກສອນໄຟຂີປະນາວຸດໄປຍັງທິດທາງຂອງເກາະຮາວາຍໃນຕົ້ນ ເດືອນກໍລະກົດໜ້ານັ້ນ ທ່ານໂອບາມາກ່າວວ່າ ທ່ານບໍ່ຢາກວິພາກວິຈານ ກ່ຽວກັບຂໍ້ສົມມຸດໃດໆ.
ເກົາຫລີໃຕ້ແລະຍີ່ປຸ່ນ: ປະທານາທິບໍດີເກົາຫລີໃຕ້ ທ່ານຫລີມິອອງບັກ ຈະທຳການຢ້ຽມຢາມ ຍີ່ປຸ່ນໃນວັນອາທິດໜ້ານີ້ ເພື່ອທຳການໂອ້ລົມສົນທະນາກັບນາຍົກຣັຖ ມຸນຕີ Taro Aso. ທຳນຽບປະທານາທິບໍດີເກົາຫລີໃຕ້ ກ່າວໃນວັນຈັນມື້ນີ້ວ່າ ໃນລະຫວ່າງການຢ້ຽມຢາມເປັນເວລາ 1 ມື້ນັ້ນ ຜູ້ນຳທັງສອງຈະແລກປ່ຽນຄວາມຄິດຄວາມເຫັນກັນ ກ່ຽວກັບເຣື່ອງຕ່າງໆທ່ີຮວມທັງເຣື່ອງໂຄງການນີວເຄລັຍຂອງເກົາຫລີເໜືອນຳ. ນອກນັ້ນແລ້ວ ທ່ານຫລີກັບທ່ານອາໂຊະ ຍັງຈະປຶກສາຫາລືກັນເຣື່ອງ ສະພາບການຂອງສາຍພົວພັນລະຫວ່າງເກົາຫລີໃຕ້ກັບຍີ່ປຸ່ນ ແລະການຮ່ວມມືໃນລະດັບຂົງເຂດ ແລະລະດັບສາກົນ.
ມີການຄາດເຊັ່ນກັນວ່າ ຜູ້ນຳເກົາຫລີໃຕ້ຈະລົມສູ່ນາຍົກ ຣມຕ ຍີ່ປຸ່ນ ຟັງໂດຍສັງເຂບ ກ່ຽວກັບການປະຊຸມສຸດຍອດຂອງທ່ານກັບປະທານາທິບໍດີບາຣັກໂອບາມາແຫ່ງສະຫະຣັດ ຢູ່ທ່ີກຸງວໍຊິງຕັນໃນສັບປະດາຜ່ານມາເຊັ່ນກັນ.
