ທີ່ອິຣ່ານ: ສະພາບການໃນນະຄອນຫລວງຂອງອິຣ່ານປາກົດວ່າເຄັ່ງຕຶງ ແຕ່ສງົບງຽບໃນວັນອາທິດມື້ນີ້ ແລະບໍ່ມີລາຍງານຂ່າວກ່ຽວກັບການປະທ້ວງ ຂນາດໃຫຍ່ໃດໆ ຫລັງຈາກໄດ້ມີການປະທ້ວງມາເປັນເວລາ 1 ສັບປະ ດາ ທີ່ບາງຄັ້ງໄດ້ກາຍເປັນຄວາມຮຸນແຮງ ເພື່ອຕໍ່ຕ້ານໄຊຊະນະໃນ ການເລືອກຕັ້ງອີກເທື່ອໃໝ່ ຂອງປະທານາທິບໍດີມັກມຸດອາມາດີເນຈາດ ຊຶ່ງເປັນບັນຫາຂັດແຍ່ງກັນນັ້ນ. ແຕ່ໂທລະພາບແຫ່ງຣັດຂອງອິຣ່ານລາຍງານໃຫ້ຮູ້ໃນວັນອາທິດມື້ນີ້ວ່າ ປະຊາຊົນ 13 ຄົນເສັຍຊີວິດ ໃນການປະທະກັນກັບຕຳຫລວດໃນລະ ຫວ່າງການປະທ້ວງໃນວັນເສົາວານນີ້ ແລະໂບດແຫ່ງນຶ່ງກໍໄດ້ຖືກໄຟໄໝ້ໃນລະຫວ່າງການປະທ້ວງນັ້ນ. ຕາມທ້ອງຖນົນສາຍຕ່າງໆໃນກຸງເຕ່ຣ່ານໃນວັນເສົາວານນີ້ ປະຊາຊົນອິຣ່ານຫລາຍພັນຄົນໄດ້ປະທະກັບຕຳຫລວດ ໃນການທ້າທາຍຕໍ່ຄຳເຕືອນຂອງຜູ້ນຳສູງສຸດຂອງອິຣ່ານ ໃຫ້ຢຸດການເດີນຂະບວນປະທ້ວງກ່ຽວກັບການເລືອກຕັ້ງທ່ີວັນທີ 12 ເດືອນນີ້ ທ່ີເປັນບັນຫາຂັດແຍ່ງກັນນັ້ນ. ພວກທ່ີເຫັນເຫດການໃນນະຄອນຫລວງອິຣ່ານ ກ່າວວ່າ ຕຳຫລວດປາບຈະລາຈົນໄດ້ໃຊ້ໄມ້ຕະບອງແລະປືນສີດນ້ຳຂັບໄລ່ພວກສນັບສນຸນ ທ່ານMir Hossein Mousavi ຜູ້ສມັກຮັບເລືອກຕັ້ງທ່ີໄດ້ປາໄຊໄປນັ້ນ ໃຫ້ສລາຍໂຕ. ພວກເດີນຂະບວນປະທ້ວງພາກັນຮ້ອງໂຮຄຳຂວັນວ່າ “ຂໍໃຫ້ຜູ້ຜະເດັດການຈົ່ງພິນາດໄປ”. ຂນະດຽວກັນ ກະຊວງການຕ່າງປະເທດຂອງອິຣ່ານໄດ້ຖີ້ມໂທດໃສ່ ສຖານີວິທະຍຸວີໂອເອຂອງສຫະຣັຖ ແລະສຖານີບີບີຊີຂອງອັງກິດວ່າ ເປັນຕົ້ນເຫດສຳລັບຄວາມວຸ້ນວາຍ ຫລັງການເລືອກຕັ້ງໃນອິຣ່ານ. ໂທລະພາບ PRESS TV ຂອງອິຣ່ານ ອ້າງຄຳເວົ້າຂອງໂຄສົກກະຊວງຕ່າງປະເທດ ທີ່ກ່າວວ່າ ການຕິດຕໍ່ສື່ສານໃດໆກໍຕາມທີ່ຊາວອິຣ່ານ ມີກັບພວກອົງການຂ່າວເຫລົ່ານີ້ ແມ່ນເປັນການຕ້ານອະທິປະໃຕຂອງອິຣ່ານ ແລະຖືກວ່າເປັນການປະທຳທີ່ເປັນປໍລະປັກຕໍ່ຊາດອິຣ່ານ.
ປະຕິກິລິຍາຂອງທ່ານໂອບາມາກ່ຽວກັບອິຣ່ານ: ປະທານາທິບໍດີບາຣັກ ໂອບາມາ ໄດ້ຮຽກຮ້ອງໃຫ້ລັຖບານອີຣ່ານ “ຢຸດຕິການດຳເນີນການທັງໝົດ ທີ່ຮຸນແຮງແລະບໍ່ຍຸຕິທຳ ຕໍ່ພວກປະຊາຊົນຂອງຕົນນັ້ນ.”
ໃນການໂຕ້ຕອບອັນແຂງແຮງທີ່ສຸດຂອງທ່ານ ກ່ຽວກັບຄວາມວຸ້ນວາຍຫລັງການເລືອກຕັ້ງຂອງອິຣ່ານນັ້ນ ປະທານາທິບໍດີໂອບາມາ ກ່າວວ່າ ລັຖບານອີຣ່ານຈະຕ້ອງເຂົ້າໃຈວ່າ ເວລານີ້ໝົດທັງໂລກກຳລັງສິ້ງຊອມເບິ່ງຢູ່ ແລະທ່ານຮຽກຮ້ອງໃຫ້ ອີຣ່ານຈົ່ງປົກຄອງປະເທດດ້ວຍຄວາມເຫັນພ້ອມກັນ ບໍ່ແມ່ນດ້ວຍການບັງຄັບຂູ່ເຂັນ
ປະທານາທິບໍດີໂອບາມາໄດ້ໃຫ້ຄວາມຄິດເຫັນຂອງທ່ານເມື່ອວັນເສົາ ວານນີ້ ລຸນຫລັງທີ່ມີລາຍງານວ່າ ມີການປະທະກັນລະວ່າງເຈົ້າໜ້າທີ່ ລັຖບານອີຣ່ານແລະພວກປະທ້ວງໃນນະຄອນຫລວງ ເຕຫະຣ່ານ ປະຊາຊົນຫລາຍຮ້ອຍຄົນໄດ້ເຕົ້າໂຮມກັນທີ່ນະຄອນນີວຢ໊ອກ ນະຄອນຫລວງວໍຊິງຕັນດີຊີ ແລະນະຄອນລອສແອນເຈລີສ ເພື່ອທຳການປະທ້ວງການສນັບສນຸນກຸ່ມຝ່າຍຄ້ານຂອງອີຣ່ານ ແລະໃນວັນເສົາວານນີ້ເຊ່ນກັນ ທີ່ນະຄອນເຈຣູຊາແລມ ນາຍົກຣັຖມຸນຕີອິສຣາແອລ ທ່ານ SHIMON PERES ໄດ້ກ່າວຊົມເຊີຍພວກ ປະທ້ວງເພື່ອການປະຕິຮູບໃນອິຣ່ານ ແລະເວົ້າວ່າ ທ່ານຫວັງວ່າ ຈະໄດ້ເຫັນການສີ້ນສຸດລົງຂອງຣັຖບານອິຣ່ານຊຸດປັດຈຸບັນ.ສ່ວນໃນປະເທດເຢຍລະມັນ ປະຊາຊົນຫລາຍກ່ວາ ນຶ່ງພັນກວ່າຄົນໄດ້ພາກັນເດີນປະທ້ວງຕາມຖະນົນຕ່າງໆໃນເມືອງ Hamburg.
ທີ່ອິຣັກ: ຕຳຫລວດແລະພວກກູ້ໄພ ກຳລັງທຳການຊອກຄົ້ນຕາມຊາກຫັກພັງຂອງໂບດແຫ່ງນື່ງແລະບ້ານເຮືອນຢູ່ໄກ້ໆຫລາຍຫລັງ ເພື່ອຊອກຫາ ສົບແລະຜູ້ທີ່ອາດລອດຊີວິດມາໄດ້ ຈາກການໂຈມຕີສະລະຊີບທີ່ໄດ້ເອົາ ຊີວິດຜູ້ຄົນໄປ ຢ່າງນ້ອຍ 72 ຄົນ ແລະບາດເຈັບຕື່ມອີກປະມານ200 ຄົນ.
ການໂຈມຕີໃນວັນເສົາວານນີ້ ຢູ່ໃກ້ເມືອງ Kirkuk ໃນພາກເໜືອຂອງອິຣັກ ມີຂຶ້ນໃນເວລາພຽງ 10 ມື້ ກ່ອນກຳລັງຂອງສະຫະຣັດມີໝາຍກຳນົດທ່ີຈະຖອນອອກຈາກເຂດຕົວເມືອງແຫ່ງຕ່າງໆຂອງອິຣັກ.
ໃນການໂຈມຕີຄັ້ງນີ້ ລົດບັນທຸກຄັນນຶ່ງໄດ້ລະເບີດຂຶ້ນໃນຂະນະທ່ີພວກ ໄປໂບດ ພາກັນອອກຈາກໂບດໄປ ຫລັງຈາກເສັດສິ້ນການສວດມົນໃນ ຕອນທ່ຽງ ໃນເມືອງ Taza ຊຶ່ງເປັນເມືອງຂອງຊາວ Turk ທາງທິດ ໃຕ້ຂອງແຂວງ Kirkuk. ມີບ້ານເຮືອນປະມານ 25 ຫລັງໄດ້ຖືກທຳ ລາຍ. ບັນດາເຈົ້າໜ້າທີ່ີການແພດກ່າວວ່າ ມີຜູ້ຍິງແລະເດັກນ້ອຍຮວມ ຢູ່ໃນພວກຜູ້ຄົນທ່ີເສັຍຊີວິດໄປນັ້ນ. ຍັງບໍ່ມີໃຜອ້າງເອົາຄວາມຮັບຜິດ ຊອບໃນການວາງລະເບີດສະລະຊີບຄັ້ງນີ້ເທື່ອ.
ທ່ີອັຟການີສຖານ:ອົງການເນໂຕ້ກ່າວວ່າ ທະຫານສອງຄົນເສຍຊີວິດ ແລະພນັກງານອີກຈຳນວນຫົກຄົນໄດ້ຮັບບາດເຈັບ ໃນການຍິງໂຈມຕີຂອງພວກກະບົດຕໍ່ ຖານທັບອາກາດ Bagram ຊື່ງເປັນຄ້າຍໃຫຍ່ຂອງສະ ຫະຣັຖໃນອາຟ ການີສຖານເມື່ອຕອນເຊົ້າວັນອາທິດມື້ນີ້ ຖານທັບແຫ່ງນີ້ຕັ້ງຢູ່ໃນແຂວງຄາປີຊາ ທາງທິດເໜືອຂອງເມືອງຫລວງກາບູລ. ຖະແລງການສະບັບນຶ່ງຂອງອົງການເນໂຕ້ເວົ້າວ່າ ພວກທີ່ໄດ້ຮັບບາດເຈັບ ໃນການໂຈມຕີຕໍ່ຖານທັບ Bagram ນັ້ນ ໄດ້ຮັບການຮັກສາພະຍາບານໂຕແລ້ວໃນເວລານີ້. ອົງການເນໂຕ້ບໍ່ໄດ້ແຈ້ງໃຫ້ຊາບວ່າພວກເຄາະຮ້າຍເປັນທະຫານຊາດໃດ ຕາມກົດລະບຽບຂອງອົງການ.
ຖະແຫລງການຂອງເນໂຕ້ ຍັງເວົ້າອີກວ່າ ຍັງບໍ່ຮູ້ໃນທັນທີນີ້ເທື່ອວ່າ ມີພົລເຮືອນອາຟການີສຖານທີ່ອາໃສຢູ່ໃກ້ຖານທັບທີ່ຖືກໂຈມຕີນັ້ນ ໄດ້ຮັບອັນຕະລາຍຫລືບໍ່. ໃນຖະແຫລງການອີກສະບັບນັ້ນ ອົງການເນໂຕ້ເວົ້າວ່າ ຊາວອາຟການີສຖານຈຳນວນ3 ຄົນເສຍຊີວິດ ແລະອີກ 17 ຄົນໄດ້ຮັບບາດເຈັບໃນ ວັນເສົາວານນີ້ ທີ່ເມືອງ Pech ໃນແຂວງຄູນາ ທາງພາກຕາເວັນອອກ ຂອງອາຟການິສຖານ ແລະວ່າປະຊາຊົນເຫລົ່ານັ້ນ ໄດ້ຮັບເຄາະຍ້ອນ ຖືກລູກຫລົງ ໃນການໂຈມຕີພວກກະບົດ ຕໍ່ຄ້າຍແຫ່ງນື່ງຂອງກອງທັບແຫ່ງຊາດຂອງອາຟການີສຖານ.
ນັກຂ່າວໜັງສືພິມNew York Times ຫລົບໜີຈາກກຸ່ມຕາລີບັນ: ນັກຂ່າວໜັງສືພິມ New York Time ຄົນນຶ່ງທ່ີຖືກລັກພາໂຕແລະຖືກກັກໂຕໄວ້ໃນເທິງພູເຂົາແຫ່ງຕ່າງໆໃນອັຟການີສຖານແລະປາກີສຖານ
ເວລາປອດໄພແລະມີສຸກຂະພາບດີ ຫລັງຈາກຫລົບໜີຈາກກຸ່ມຕາລີບັນທ່ີຈັບໂຕຜູ້ກ່ຽວໄປນັ້ນ.
ໜັງສືພິມສະບັບນີ້ກ່າວໃນວັນເສົາວານນີ້ວ່າ ນາຍ David Rohde ວັຍ 41 ປີແລະນາຍ Tahir Ludin ນັກຂ່າວອັຟການີສຖານພາກັນປີນຂຶ້ນຝາອ້ອມບໍລິເວນບ່ອນທ່ີພວກເຂົາເຈົ້າຖືກກັກຂັງໃນແລງວັນສຸກແລະພາກັນ
ເອົາໂຕຫລົບໜີໃນຂົງເຂດ Waziristan ເໜືອຂອງປາກີສຖານນັ້ນ.
ນັກຂ່າວສອງຄົນນີ້ພ້ອມດ້ວຍນາຍ Asadullah Mangal ຄົນຂັບລົດໃຫ້ເຂົາເຈົ້າໂດ້ຖືກລັກພາໂຕຢູ່ນອກນະຄອນຫລວງກຸງຄາບູລໃນເດືອນພະຈິກປີແລ້ວນີ້ ແລະໄດ້ຖືກຈັບເປັນໂຕປະກັນໄດ້7 ເດືອນຜ່ານມາ.
ແຕ່ນາຍ Mangal ບໍ່ໄດ້ຫລົບໜີກັບພວກນັກຂ່າວສອງຄົນນີ້ ແຕ່ຍັງບໍ່ມີລາຍລະອຽດກ່ຽວກັບເຣື່ອງນີ້ເທື່ອໃນເວລານີ້. ຫລັງຈາກພວກເຂົາເຈົ້າຫລົບໜີຈາກບໍລິເວນກັກຂັງແລ້ວ ໜັງສືພິມTimes ກ່າວວ່າ ນາຍ Rohde ແລະນາຍ Ludin ໄດ້ພົບເຫັນທະຫານປາກີສຖານຄົນນຶ່ງທ່ີພາເຂົາເຈົ້າເອົາໂຕຫລົບໜີມາ. ນາຍRohdeແມ່ນຄົນນຶ່ງໃນຈຳນວນພວກທ່ີໄດ້ຮັບລາງວັນ Pulitzerຂອງໜັງສືພິມ Times ທ່ີຕິດຕາມເອົາຂ່າວກ່ຽວກັບ ອັຟການີສຖານແລະປາກີສຖານ ແລະຜູ້ກ່ຽວໄດ້ກັບໄປຍັງອັຟການີສຖານເພື່ອຄົ້ນຄວ້າ
ເພື່ອຂຽນປຶ້ມອອກມາ.
ວັນສຸກ, ໐໖ ທັນວາ ໒໐໒໔