<!-- IMAGE -->
ໃນການໃຫ້ສຳພາດກັບສະຖານີວິທະຍຸແລະໂທລະພາບບີບີຊີ ຂອງອັງກິດ ປະທານາທິບໍດີ ບາຣັກໂອບາມາ ກ່າວວ່າ ມັນນອນຢູ່ໃນຜົນປະໂຫຍດຂອງໂລກແລະຂອງອີຣ່ານເອງ ທີ່ວ່າສາທາລະນະລັດອິສະລາມແຫ່ງນີ້ “ຈະຕ້ອງປະລະຄວາມທະເຍີທະຍານຂອງຕົນ ກ່ຽວກັບໂຄງການອາວຸດນີວເຄລຍນັ້ນ”
ທ່ານໂອບາມາກ່າວວ່າ ອີຣ່ານ “ມີຄວາມສາມາດບົ່ມຊ້ອນ ທີ່ຈະເປັນປະເທດມະຫາອຳນາດ ແລະຈະເຣີນຮຸ່ງເຮືອງໄດ້ດີທີ່ສຸດປະເທດນຶ່ງ” ແຕ່ວ່າ ອີຣ່ານມີທາງຈະບັນລຸຄວາມສາມາດບົ່ມຊ້ອນທີ່ວ່ານີ້ໄດ້ຫລາຍກ່ວາ ຖ້າຫາກອິຣ່ານ ປະລະໂຄງການອາວຸດນິວເຄລຍຂອງຕົນ ທີ່ອາດ ສາມາດຊຸກຍູ້ໃຫ້ເກີດມີການແຂ່ງຂັນກັນດ້ານອາວຸດນີວເຄລຍ ຢູ່ໃນພູມີພາກນັ້ນໄດ້
ປະທານາທິບໍດີໂອບາມາກ່າວວ່າ ອີຣ່ານນັ້ນ ແມ່ນມີຄວາມເປັນຫ່ວງ ແລະຄວາມປາຖນາດ້ານພະລັງງານ ທີ່ຖືກ ຕ້ອງຊອບທຳ ແຕ່ທ່ານກ່າວ ຕໍ່ໄປວ່າ “ສິ່ງທີ່ຖືກຕ້ອງໃນເວລານີ້ ກໍແມ່ນລິເລີ່ມດຳເນີນຂັ້ນຕອນທີ່ມີຄວາມໝາຍ ແລະຢ່າງແຂງຂັນເອົາຈິງເອົາຈັງ ບໍ່ສະເພາະແຕ່ລະວ່າງ ສະຫະຣັດແລະອີຣ່ານ ສອງປະເທດເທົ່ານັ້ນ ແຕ່ພ້ອມດຽວກັນກໍສືບຕໍ່ການເຈລະຈາໃນແນວທາງສ້າງສັນ ກັບກຸ່ມພີຫ້າບວກນຶ່ງ ນັ້ນນຳ”
ປະທານາທິບໍດີໂອບາມາ ໄດ້ຫັນປ່ຽນນະໂຍບາຍຂອງສະຫະຣັດກ່ຽວກັບອິຣ່ານ ແລະກຳລັງດຳເນີນຍຸທະສາດດ້ານການທູດ ທີ່ໂຮມທັງການປະກອບສ່ວນໂດຍເຕັມໃນການປຶກສາຫາລືກັນທາງການທູດກັບອິຣ່ານ ກ່ຽວກັບໂຄງການອາວຸດນີວເຄລຍຂອງອິຣ່ານ ກັບບັນດາຜູ້ຕາງໜ້າ ຈາກປະເທດອັງກິດ ຈີນ ຝລັ່ງຣັດເຊຍ ແລະເຢຍລະມັນ.ທ່ານໂອບາມາ ໄດ້ບອກກັບບີບີຊີວ່າ “ຖ້າຫາກວ່າ ຄວາມຄຽດແຄ້ນກັນລະວ່າງສະຫະຣັດແລະອີຣ່ານ ທີ່ມີມາເປັນເວລາໄດ້ສາມສິບປີນັ້ນ ເປັນສາເຫດຂັດຂວາງບໍ່ໃຫ້ປະຊາຊົນອີຣ່ານຫລິງເຫັນໄພອັນຕະລາຍ ທີ່ຈະຕິດຕາມ ມາ ຈາກໂຄງການນີວເຄລຍຂອງຕົນນັ້ນແລ້ວ ສະຫະຣັດກໍຢາກຈະເປີດປະຕູໄປສູ່ການປຶກສາຫາລືກັນ ແລະຈະລໍຖ້າເບິ່ງວ່າ ອີຣ່ານຈະພ້ອມທີ່ຈະຍ່າງຜ່ານປະຕູນັ້ນ ຫລືບໍ່.
ທ່ານໂອບາມາຍັງໄດ້ກ່າວອີກວ່າ ພາກສ່ວນນື່ງຂອງການແກ້ໄຂບັນຫາ ທີ່ທ່ານຫລິງເຫັນ ກໍແມ່ນ ຈັດຕັ້ງປະຕິບັດຄືນໃໝ່ ແຜນການບໍ່ແຜ່ຜາຍ ຫລືຂະຫຍາຍອາວຸດນີວເຄລຍອອກໄປນັ້ນ ຢ່າງແຂງຂັນຂື້ນແລະໃນຂອບເຂດທີ່ກວ້າງຂວາງຂື້ນ ຊຶ່ງໂຮມທັງ ໃຫ້ສະຫະຣັດແລະຣັດເຊຍ ຫລຸດຜ່ອນຈຳນວນອາວຸດນິວເຄລຍຂອງຕົນ ທີ່ມີສະສົມໄວ້ນັ້ນ ລົງຢ່າງຫລວງຫລາຍ.” ທ່ານໂອບາມາກ່າວຕໍ່ໄປວ່າ “ການກະທຳດັ່ງ ກ່າວນີ້ ອາດສາມາດພາໃຫ້ຄວາມຮູ້ສຶກຂອງປະຊາຊົນອິຣ່ານ ທີ່ວ່າພວກເຂົາເຈົ້າຖືກປະຕິບັດຕໍ່ ໃນແບບທີ່ແຕກຕ່າງໄປຈາກຄົນອື່ນໆນັ້ນ ຫລຸດນ້ອຍລົງ ຊື່ງທ່ານກ່າວວ່າ “ມັນເປັນຄວາມຮູ້ສຶກ ທີ່ເຮັດໃຫ້ອີຣ່ານຕ້ອງສ້າງອາວຸດເພື່ອປ້ອງກັນໂຕນັ້ນ.”
ປະທານາທິບໍດີໂອບາມາກ່າວໃນທີ່ສຸດວ່າ ພາກສ່ວນນື່ງຂອງແຜນການປະຕິບັດງານ ອັນກວມກວ້າງກວ່າເກົ່າຂອງພວກເຮົາ ກໍຄືການສົນທະນາຫາລືກັນໃນຂອບເຂດທີ່ກວ້າງຂວາງຂື້ນ ກ່ຽວກັບວ່າປະເທດຕ່າງໆທັງໝົດ ມີຄວາມສົນໃຈທີ່ຈະກຳຈັດ ແລະຫລຸດຜ່ອນການແຜ່ຜາຍອາວຸດນີວເຄລຍນັ້ນແບບໃດ.